أيام الثمانينات

[غــفــران]

و انا باتجول في المدونات اتكعبلت في مدونة صاحبها تقريبا من مواليد سنة 65.. و بيتذكر معانا ما تعيه ذاكرته من أحداث و ذكريات.. طبعا انا اللي خبط معايا منهم ذكريات الثمانينات اللي قضيت فيها كل سنوات طفولتي.. و بالأخص تليفزيون الثمانينات و برامجه و مسلسلاته و أيامه الجميلة. التدوينة اسمها انا من هذا الجيل

انا عارفة ان الموضوع ده ما يهمش كل مواليد الثمانينات و ما فوق.. بس اللي مدرك الفترة دي هايستمتع بالذكريات و نفتكر مع بعض برامج زي جولة الكاميرا بتاع هند ابو السعود.. العالم يغني حمدية حمدي.. على فين لفريال صالح.. فكر ثواني و اكسب دقايق نجوى ابراهيم.. اخترنا لك فريال صالح و نجوى ابراهيم.. من أغاني الأفلام لأحلام شلبي.. حياتي فايزة واصف.. عالم الحيوان تعليق محمود سلطان.. و برامج الأطفال زي عصافير الجنة.. صباح الخير لنجوى ابراهيم و برنامج بابا ماجد.. و كارتون جميل.. ساندي بل و هاني و ماجد اللعبة الخشبية و طبعا توم و جيري.

طبعا ده غير المسلسلات العتيقة.. برج الحظ بتاع شرارة النحس.. في حاجة غلط بتاع حسن عابدين و اسمع بأه أحلى أسعار و كيلو اللحمة كان غلي و لع نار و بأه بكام.. و مسلسل كده فظيع بتاع عبد الغفور كان بيقول فيه كل شوية: أنا اخووووووووه.. و مسلسل انا البرادعي يا رشدي.. و مسلسل تاني كان شنيع برضه بتاع هدى رمزي كانت طول المسلسل بتصرخ لأأأأأأأأأه... بابااااااااااا.. حاجة يعني بوظان أعصاب

طبعا ده غير بابا عبده.. أحلام الفتى الطائر.. دموع في عيون وقحة و الشهد و الدموع و ليالي الحلمية و رأفت الهجان اللي كانوا في أواسط و اواخر الثمانينات.
و طبعا فوازير نيللي و فطوطة.. نيللي افتكرلها التمبوكة.. و امشي يا صفة امشي يا صفة.. و الشخصيات.. جرجر جرجر جراجير.. جرجير.. لكن خدوا بالكوا من الآتي الفزورة هاتبقى ليلات عن شاخصييييييييية زي حالاتي يعني بالعربي ستاتي.

معلش بأه دوشتكوا.. بس البوست ده فعلا خلى الذكريات كلها تطفح عندي

[MASHI]

تطفح....
ناولنى السلاكة يا ابراهيم
كلنا الذكريات لازم نرجع ليها كل يوم يا استاذة وخصوصا الحلوة
كلنا بنحتاج نهرب لزمان الجميل يا استاذة وندور على حكاياته ..
اييييييييييييييه ....دنيا
تحياتى

[zoom129]

ايوه ياسلام باحب اوووى ايام التمانينات

اروح المدونة وارجعلك

[zoom129]

ياااااااااااااااااااااه

وقعتى ازاى فى المدونة دى ياغفران ؟

بصراحة انا كمان كنت حاسس بنفس مشاعر الراجل ده ومع كل كلمة كان بيقولها كنت باقوله وانا كمان عاصرت الجيل ده وشفت بالظبط اللى انت شفته انا كمان من جيل التمانينات

تحياتى غفران اعادتلى ذكريات جميلة بموضوعك ده

[إسلامي]

يانهار ابيض يا غفران على كم الذكريات اللي افتكرتيها واللي انا كمان افتكرتها..

بس انا قعدت أقرا كلامك وعمالة أدور بين السطور على روبي
ازاي نسيتي روبي الدبدوب اللي عربيته بتطير اللي كان بييجي الساعة 8.05 بعد النشرة الجوية ؟

خلى الذكريات كلها تطفح عندي

ايه التعبير الرومانسي ده يا غفران؟

[إسلامي]

بتاع هدى رمزي كانت طول المسلسل بتصرخ لأأأأأأأأأه... بابااااااااااا.. حاجة يعني بوظان أعصاب

ده كان اسمه النساء يعترفن سراً
كنت باخاف من المسلسل ده قوي .. ودايما كنت باحس انه مسلسل أبيض واسود علشان كل الستات اللي فيه كانوا لابسينن اسود علشان باباهم ميت ..

وكنت باخاف منه بالأكتر لما كان بيتعاد الساعة 12 الظهر على القناة الأولي في أجازة الصيف وكنت بابقى انا واختى لوحدنا في البيت.. ورغم اننا كنا بنخاف منه إلا اننا كنا لازم نتفرج عليه كل يوم متعرفيش ليه.. عارفة سعيد صالح في هالو شلبي وهو بيتكلم عن الشراب أبو أستك منه فيه ... أشد ويلسعني.. أشد ويلسعني.. طب بتشد ليه؟.. علشان يلسعنى..

ذكرياتون

تسلمي يا غفران

[zizoghoname]

تعرفي نسيتي اهم حاجه في التمنينيات ان أن مولود في آخرها

[وهبه]

جميل قوى ان نتذكر هذا الماضى وأن يدونه مَن عايشه وعاصره ليطلع عليه الاجيال اللاحقة ...

طبعاً كان فيه فترة قبل هذه وهى بداية التلفزيون بإعتباره اختراع جديد ومحدود انتشاره ومقصور على فئة معينة تعتبر هى المترفة فى ذلك الوقت ..
ايام الابيض والاسود وايام بدايات مسلسلات كالبقية تأتى وهو مسلسل بوليسى وايام عقيلة راتب وعبد العظيم عبد الحق وايام ثلاثى اضواء المسرح حتى اطفال التلفزيون والذين منهم اسماء لامعة الأن ...

يآه ... تقليب دفاتر الذكريات

فين ايام ما كان التلفزيون موضوع فى كشك خشبى موجود فى الميادين العامة !

[العنتيل الدامد جوووى]

وبعدين معاك ياغفران

قلبتى علينا ذكريات رائعة

انا قرات المدونة كلها

مع كل سطر ..كنت اعيش ذكرى معينة

ما بين افراح او احزان

ايام جميلة فعلا..رغم صعوبتها

كنت تستمع بابسط الاشياء واقل الامكانيات..

الان كل وسائل الرفاهية متوفرة..وكل التكنولوجيا..وكل التعاسة

اتخيل هذا الزمان ...وروتانا تعرض الان حاحا وتفاحة

الله يكون فى عونكم ياشباب هذه الايام

شباب جنينة مول

[ام سلمى]

صحيح يا غفران
أزاى تنسى روبى
بقه روبى برضه يتنسى

أياااااااااااااااام

[boosi cat]

كانت أحلى أيام ..

التليفزيون كان تلت قنوات بس و كلها برامج مفيدة ..و كان بيجى ع الساعه 1 الضهر و يعمل تشششششششش الشاشة كانت بتبقى أبيض و إسود .و بعدين ترجع بعديها بساعه تقريبا مش فاكرة أوى ..


كان فى كارتون بحبه أوى بتاع طمطم كان بيجى ع الساعه اتنين و نص العصر و قت الغدا و كان ليه طريقة لطيفة فى أكل ورك الفرخة (طمطم أنا شبل الفلاه).

و السنافر و كعبوووول ..


و كان فى برنامج حلو لنجوى إبراهيم زى مسابقة و كل يوم بيعرضوا حلقة مرة عن الصدق و مرة عن المعروف ....و كان معاها عبدالرحمن أبو زهرة ؟يارترى فى حد فاكر اسمه أحسن نسيت ...

كان فى أغنية حلوة لنجوى إبراهيم فتحى يا زهور فتحى و اصحى معانا و صحصحى


كانت أحلى أيام عشتها فى حياتى لأنها أيام طفولتى و طفولتى هى أحلى أيام حياتى

[مصري ماشي]

بقلظ ..


كانت أيام













طفوله مشرده

[إسلامي]

و كان فى برنامج حلو لنجوى إبراهيم زى مسابقة و كل يوم بيعرضوا حلقة مرة عن الصدق و مرة عن المعروف ....و كان معاها عبدالرحمن أبو زهرة ؟يارترى فى حد فاكر اسمه أحسن نسيت ...

كان فى أغنية حلوة لنجوى إبراهيم فتحى يا زهور فتحى و اصحى معانا و صحصحى

كان اسمه أجمل الزهور وكان بييجي في رمضان الساعة واحدة الضهر

وكان في كمان برنامج بتقدمة نجوي ابراهيم زمااااااااان قوي كان ابيض واسود بس ده افتكره طشاش يعني .. كان اسمه عصافير الجنة .. اللي هو كان فيه دبدوب وأرنوب (طلعت عطية) و بقلظ (سيد عزمي).. وده كان أول ظهور لبقلظ اللي استمر معاها في صباح الخير ومساء الخير

طب حد فاكر كانوا في طفولتهم عن قصص حياة المشاهير اللي كان بييجي يوم ألأربعاء الساعة 4 أو 5 تقريبا؟؟
وحكايات أندرسون اللي كانت بتقدمه مرفت سلامة على القناة التانية؟
طب حد فاكر النحلة زينة ونحول؟
الله .. الموضوع حلو قوي قوي قوي يا غفران

[ABUSHAHD]

انا برده اول ما قولتى الثمانينات اول حاجه نطت فى راسى ،؛ روبى راكب عربيته اللى بتطير

وبابا ماجد ، وبقلظ ( ومساء الخير يا ماما نجوى ..... مساء الفل يا حبيبتى )

وبرنامج سينما الاطفال يوم الجمعه وماما عفاف الهلاوى

وحلقات الرجل الاخضر على ما اتذكر كانت بتيجى يوم الاحد

واكتر حاجه كانت تغيظنى لما افضل استنى برنامج جولة الكاميرا بتاع هند ابو السعود اللى كان بيجى يوم الاحد، ويجى مجلس الشعب يطول ويعتذروا عنه نظراً لطول الفتره الاخباريه ، مع ان الاخبار بتيجى بعد البرنامج

وبرنامج اخترنا لك يوم الاربع على القناه التانيه

واول حلقه من برنامج امانى واغانى وجميله اسماعيل وجمال الشاعر

وبرنامج حياتى
وموسيقى اخبار خفيفه

ولما كنا نسمع اذاعة اسرائيل الساعه 6 الصبح علشان كانت بتجيب اغانى سريعه زى اغانى حكيم

ومسلسل عيلة مرزوق

ومسرح المنوعات

وبابا ضياء وقوللى بالله عليك ماذا تفعل لو كنت مكانى

وحياتى لفايزه واصف

يعنى فيه حاجات كده معلقه فى دماغى وحاجات ما افتكرهاش

لكن اللى افتكره اغنيه كنت بموت فيها ما اعرفش مين بيغنيها
كنت بشوفها فى التليفزيون

حبيت بلدى وعشان بلدى

انا عايزك تكبر يا ولدى
واشوفك بتعمر فيها
وبتزرع ورد فى صحاريها

ومش فاكر الباقى.....

ويا ريت اللى يقدر يجيب الاغنيه دى يحط اللينك بتاعها

اشكره بشده

وشكراً على مواضيعك الرائعه يا غفران

تحياتى

[شريفه]

السلام عليكم


يا غفرفر يا حبيبتى انا حاسه بيكى قوى
لانى فعلا باحس ان كل حاجه حلوة كانت زمان و كل حاجه كان فيها بركه و رضا . حتى الملابس و طريقه الشعر كانت جميله و الافلام احسن جيل كان هو جيل التمانينات( عادل امام و محمود يس و محمود عبد العزيز و ميرفت امين و غيرهم) ده غير برامج الاطفال الحلللللللللللوة ماما نجوىو بقلظ مثلا او برنامجها بتاع رمضان بتاع الحروف اللى كان بيجى فى عز الحر فى اغسطس و لسه النهارده شايفه حلقه من بتوع يوميات ميزو قلت يااااه الايام الحلوة دى و المسلسلات اللى مش عارفين يعملوا ربعها

ايييييه يالا كانت ايام و مستحيييييييييييييييل ترجعععععععععععع


اللهم بارك لنا فى ايامنا و الايام اللى جايه و استرها علينا يااااااا رب