أنا منتقبة بيضاء جميلة أريد زوج ميسور الحال!!!

[حرنكش]

أنا منتقبة بيضاء جميلة أريد زوج ميسور الحال..رقمى فى الكنترول!!!
أنا رجل أعمال أريد زوجة ثانية لديها شقة!B)
أنا آنسة جامعية أريد زوج يتقى الله يكون أول حرف من اسمه تامر!
أنا شاب مصرى وسيم أريد زوجة سعودية مقيمة بالكويت!
طيب.. أما بعد,
بخصوص شريط الخاطبة sms ويا موفق راسين فى الفضائيات اللى موجود _وياللعجب_ فى القنوات الدينية !
فهذا أمر لا يليق بقداسة وجدية الزواج وبناء أسرة مسلمة مستقرة.
ولا أعفى مسؤلية القناة الدينية عن التحكم بهذا السيل الغير منطقى من النخاسة الحديثة فى ستار دينى.
ولا يمكن أن تكون حجة القناة هى أن خدمة الرسائل القصيرة تدعم القناة ماديا!
خصوصا بعد أزمة قناة الفجر الفضائيه والتى كشف مديرها أثناء الأزمة أن العائد المادى من خدمة الرسائل القصيرة ضئيل وأن مهما كان إقبال المشاهدين على المساهمة فى دعم القناة فإن ما يعادل 60% من عائد الخدمة يذهب إلى شركة المحمول والوسيط ويبقى 40% فقط هو ما يخلُص للقناة.
هذا غير الأمانه الدينية والأخلاقية تحتم على قناة تخصصت فى الوعى الدينى على تنبية المشاهدين من مخاطر هذا الأسلوب العجيب و الغير آمن فى التواصل والتعارف ناهيكم عن الزواج!
ويكفينا فى هذا المقام حكم الخمر والميسر..
فيهما منافع للناس .. وإثمهما أكبر من نفعهما..فتم التحريم.
ودفع الضرر مقدم على جلب المنفعه .
وإذا قال قائل.. كلٌ وصىّ على تصرفاته !
ماشى نناقش بقه التصرف ده ونحكم عليه بناءا على التحليل المنطقى.
بالنسبة للفتاة وهى من تعنينى فى المقام الأول لحساسية الموقف بالنسبة لها.
هل تأمن فتاة بطرح رقم تليفونها المحمول لكل (من هب ودب) فى الفضااااء على مستوى دولى .. (رقمى بالكنترول)!!
أى ضامن هذا الذى يضمن طالب يدها أن يكون كاذباً أو لاهياً أو قوَّاداً أو حتى صادق ضال..
(هو خسران إيه؟ كل الحكاية كارت شحن)
بالنسبة بقه للشاب اللى قرر _والحمد لله_ أنه يستقر ويتأهل ويختار عروسة من عشرة مليون إحتمال_بسم الله ما شاء الله_ من مشاهدى القناة.
يعنى سؤال برئ .. بس شوية منطق..
هو اللى فشل فى التعرف على زوجة المستقبل أم أولاده من محيط الأسرة ثم محيط الأقارب ثم محيط المعارف و الجيران و جيران الجيران وأهل المسجد والنادى والكليه و الجامعة والشغل والمصيف والأتوبيس والسوبر ماركت
نافوخى يا عالم!
واحد فشل أو بلاش فشل ممكن تزعل ناس .. نقول لم يوفق أن يجد نصفه الآخر فى كل ما سبق هايلاقيه عن طريق شات القنوات الفضائيه أو شات النت!!!
ده إما أن يكون إنسان متوحد منعزل مقطوع عن العالم الواقعى,
أو إنسان إجتماعى أه ..لكن مثالى حالم بيحلم بـ(باربى) المتدينة التى لم يقابلها على الأرض وإنما فى أحلامه فقط,
أو إنسان غير جاد عارف إنه مش خسران حاجه.. فيها إيه ما يجرب!
أو إنسان سئ النية ومااااا أكثرهم.. أعتقد أن القنوات الدينيه ليس لها باسوورد للأتقياء فقط..
عادى يعنى أى حد ممكن يفتح قناة دينية ويتفرج أهى تسالى وحاجة جديدة زى جلبية بارتى كده!

وأنا لا أسفه من إختيار أحد للأسلوب الذى أختاره لإدارة حياته.
لكن أعلم علم اليقين أن هناك من الطيبين المخدوعين الذين يعتمدون على ثقتهم فى القناة الدينية وكأنها ضامن لمرتاديها ومشاهديها.
وفاكرين أن طالما هذا الشريط يجرى تحت رعاية القناة الدينية ..فكل من يكتب علي هذا الشريط من الملائكة أو الصحابة والصدّيقين على الأقل!
طيب
حبيت أبادر بالطرح وأرجو المناقشه عشان أعرف بس هو أنا اللى لوحدى مستنكرة الأسلوب ده والا ايه؟
عشان لو ماليش حق الحق ابعتلى sms قبل ما يفوتنى الركب الملائكى المهيب واعنس!
واعتذر إن تأخرت فى متابعة الموضوع لظروف كمبيوترية.

[مـؤيـد]

مش معقوووول.. هاكونا مطاطا هنا.. ..
انتي فين يابنتي وازيك.. وايه حرنكش دا؟! ..


لا تستغربي يا هاكونا.. في الشريط دلوقتي مش غريبة تقرئي إلى الأخ الحبيب محمد أرجو الدعاء لي بالتوفيق.. أحبك ..
محمد يرد : الأخت الحبيبة والله اني أدعيلك والله ييسرلنا وييسرلك ويبارك فيكي ويرزقك الذرية الصالحة ولك كل الحب والمودة وجزاك الله خيرا ..

انا من رأيي انها بقت مهزلة. ولكن كف قناة مستقلة عن قبول هذه الرسائل لأنها تتنافى مع طرحها الديني مثلا، عائد إلى رغبة القناة.. واذا كانت هناك عوائد ممتازة من وراء هذه الرسائل، فالقناة لن تلتفت لمعارضي الرسائل.. هتقولك اللي مش عاجبه يغير المحطة.. لأن في النهاية القناة مستقلة وليست مؤدلجة، وقد تكون برامجها متناقضة تماما.. لكن دا يمثلها فقط..
فخلاص يا هكونا .. سلمي بالأمر الواقع يعني..

برايفت: شوفي توقيعي

[شروق الشمس]

انا معاك يا حرنكش
بس الاول انا معرفش حرنكش بنت ولا ولد لانى جديده فى المنتدى
على العموم انت موضوعك مهم وفى كتير بيتأزوا بسسب الموضوع ده
وانا واحده من الناس كان عاجبنى الموضوع
بس مجربتوش انا قلت فى ناس ممكن تستفيد من الموضوع ده
بس بعد كلامك اقتنعت انه فعلا مش صح
شكرا على المعلومه
تحياتى وسلامى

[ندا]

حرنكش
وااااااااااااااحشني ...

قصدي وحشتيني يا هاكونا ..يا جماعة دي هاكونا ولازم اصيح عليها علشان غيرت اسمها وطبعا هاتضربني في الموبايل


موضوع خراااااااااافة يا هاكونا

وانا من رأيي ...

قدسية الزواج وتعزيز البنت ...البنت في كل الاحوال لازم تبقى معززة مكرمة ...
حتى لو من غير زواج خااااااالص

اعتقد كرامة الانسان سواء رجل او بنت ..اسمى واعلى من كل شئ ..

ده رأيي والله اعلم

ربنا يكرمك يارب وربنا يبارك فيكي

وحقيقي شوقتيني جدا للقاء

وان شاء الله قريب بإذن الله والله المستعان

اخلص بس الكورسات ان شاء الله

[أم فيروز]

اسلوب جميل جدا في الطرح حرنكش
أعتقد معظم الناس احساسهم بيكون فعلا كدا لما بيتفرجوا عالقنوات ذات البار
او شريط ال sms
احساس بالغيظ والاندهاش
هو في إيه؟
دا في رسائل غريبة عجيبة جدا جدا
والمهم انك تتغاظي تقولي مش ح أقرا تاني
ما بتقدريش ما هو كلام ماشي ع الشاشة غصب عنك عينيك بتروح له تاني
أما بخصوص القنوات الدينية ، فأد إيه الرسايل دي بتشوش تركيزك ع الموضوع الأصلي أو البرنامج المعروض
فعلاً ادعو لأبي ، لأخي لزوجي ، لوالدتي، لوالدة زوجي ، لوالدة زوج بنت عمي
وانتي طول ما انتي قاعدة : طيب ربنا يشفيه
ماشي ربنا يوفقكم
ما تقدريش تطنشي
والله ما يصحش أبدا الرسايل دي
عائد مادي؟؟
ويا ترى العائد دا حرام ولا حلال ولا مش مهم نعرف؟؟
لكي خالص تحياتي ع الموضوع

[المنسى1]

القنوات المسماه بالقناوات الدينية ...
...زيها زى اى قنوات تانية .....وموضوع الاعلانات ...ليس لها تدخل فيها.
...لان تقريبا هو دا العائد المادى المهم بالنسبة ليهم.
...يعنى تلاقيهم بيعلنو عن عسل نحل...
...وجايبين واحد الدغ يحكى حكايات ما انزل الله بها من سلطان.
..تلاقى العسل بيعالج العقم ومرض السكر والضغط والروماتيزم.
....مش كده وبس وبيخلى العجوزه صبيه.
.....المهم السفه من اللى بيشترو الحجات دى او من اللى بيبعتو رسايل زى عاوزه عريس يتقى ربنا فيا.
...انا اتخنقت من الغلط والمغالطات.
...بس انا بغير القناه وخلاص...

[وهبه]

بخصوص شريط الخاطبة sms ويا
موفق راسين فى الفضائيات اللى
موجود _وياللعجب_ فى القنوات
الدينية !
فهذا أمر لا يليق بقداسة وجدية
الزواج وبناء أسرة مسلمة مستقرة.
ولا أعفى مسؤلية القناة الدينية عن
التحكم بهذا السيل الغير منطقى من
النخاسة الحديثة فى ستار دينى.
closeeye:

اللعب على معاناة الشعوب ومتطلبات الجمهور ... عامل رئيسى فى استمرارية نجاح العمل الاعلامى والتشويق له

وبهذا تصبح للقنوات خدمات اضافية بجانب المعرفة والارشاد

مسألة ضعف التمويل .. حجة واهية كما تفضلتى ...

قنوات تجذب المشاهدين بمثل هذه الامور ... ولقد اتمتد الامر الى ابعد من ذلك فيوجد اعلان عن بيع قطعة ارض او منزل او حتى طلب عمل او فرصة عمل ...

[غــفــران]

أولا سؤال: عرفتوا ازاي انها هاكونا مطاطا؟
ثانيا: ازيك يا هاكونا بأه طالما اكيد انتي هاكونا يعني

بالنسبة بأه للموضوع، هو انا بالفعل باشفق على اللي بيبعتوا طلبات زواج عبر الأثير كده.. احتمالات نجاح العلاقة دي بتكون ضعيفة اوي في رأيي.. انما برضه ده ما يمنعش ان كل واحد حر في انه يشوف الطريقة المناسبة للعثور على الطرف الآخر، طالما لا تتعارض مع الأمور الشرعية و بعلم ولي الأمر. انا آه ممكن اكون رافضة اني اتجوز بالطريقة دي.. انما ماحدش أجبرني اني اعمل زيهم و لا من حقي اني أرفض طريقتهم في التعبير عن احتياجهم لزوج او زوجة.. و فعلا مين عارف؟ مش يمكن كل الأبواب استدت في وجوههم عشان يلاقوا شريك الحياة و مافيش أدامهم غير الباب ده؟

[د. عماد الدين]

أولا سؤال: عرفتوا ازاي انها هاكونا مطاطا؟
ثانيا: ازيك يا هاكونا بأه طالما اكيد انتي هاكونا يعني

من التوقيع دا أولا

جوا عينى دايره سمرا... ليه ما شوفش الدنيا ضلمه

و من الأفاتار دا ثانيا
و من البوح دا ثالثا
ريهام لي عودة إن شاء الله دا رابعاً .... عود أم أحمد

[غــفــران]

ريهام لي عودة إن شاء الله دا رابعاً .... عود أم أحمد

و كمان ريهام؟ ده انا آخر من يعلم هنا بأه

[BlueRose]

تصدقي اتخضيت لما شفت العنوان بعد المتغيرات الأخيرة

النهاردة كان دكتور كبير بيحكي ان ما يسمى علاج الشيخ العطار منتشر بشدة في أوساط تعتبر متعلمة راحوا يشتكوا من نتائجه و ردهم الوحيد على استخدامه هو أنهم ماكانوش متخيلين أن القناة التي ستأخذك للجنة ممكن تعلن عن حاجة نصب

بصي يا رومي جميع القنوات مفتوحة للتجارة , يعني أغلب القنوات الدينية أصلا مملوكة لأصحاب قنوات أغاني و لذا تدار بنفس العقلية
كل ما هنالك أنها قنوات خصصت للنوع التاني من الجماهير الذي لن يشاهد الكليبات
يعني للسيطرة على الجمهور كله

لي عودة

[timorlank]

أنا آنسة جامعية أريد زوج يتقى الله
يكون أول حرف من اسمه تامر

موجود وجاهز بس لو الشقة من العروسة موافق.

اللى بيحصل ده اقل ما يقال عنه انه مهزلة؟؟؟؟؟؟؟؟؟
شيخ بيدى درس عن الضوابط الشرعية بين الرجل والمراة وتحته فى الشريط(الى الولهانة ممكن رقم تليفونك؟) ولا بحبك وعايز اتجوزك وغيره.
على فكرة انا شوفت رسايل فضيحة على قناة الناس وغيرها.
لى رايى اخير.
بصراحة انا شايف ان البنات اللى بيبعتوا رسايل فى الحقيقة شغالين تبع شركة المحمول ويمكن يكونوا رجالة كمان؟؟؟؟؟؟؟؟
وده شغل علشان تسخين الجو والزبون يطب ويبعت رسايل.
المغرمة الولهانة والعاشقة والسهرانة يبعتوا رسالة والشباب اللى ما ورهوش شغلة يبعت وشركة المحمول تكسب

[ELLORD]

عندك حق فعلا
وليتهم يعرفون
احييك اختى على اسلوبك المنطقى جدا والمقنع فى طرح الفكرة
جزاك الله كل خير

[مصري ماشي]

علي الرغم من غيظي منهم " الراسل و المرسل إليه ".. أشفق عليهم

وأفتكر سيأتي يوما يختفي شريط الرسائل .. لأن دائما الهيافه ما بتدومشي وكذلك النصب
ستتقلص إعلانات النصب من علي القنوات الدينية أو ستفني هذه القنوات و ستصبح بلا مشاهد..بلا قيمه

نعود للناس اللي هما إحنا ...

هل وصل بنا التخلف ليعلنوا عن منتج لنا مثل ما في إعلان "ما خلااص ياعديله " ؟

هل إعاقتنا الذهنيه وصلت إلي هذا الحد..
حقا مصيبه و كارثه ..وصلنا إليها ..
شكرا للأخ صاحب الموضوع حرنكش أو الأخت حرنكش
(و عفوا في إحدي الحالتين )

[مصري ماشي]

[لى رايى اخير.
بصراحة انا شايف ان البنات اللى بيبعتوا رسايل فى الحقيقة شغالين تبع شركة المحمول ويمكن يكونوا رجالة كمان؟؟؟؟؟؟؟؟
وده شغل علشان تسخين الجو والزبون يطب ويبعت رسايل.
المغرمة الولهانة والعاشقة والسهرانة يبعتوا رسالة والشباب اللى ما ورهوش شغلة يبعت وشركة المحمول تكسب

ممكن جدا و مش مستبعد