ماما هو أنا أجنبى؟؟يعنى إيه أجنبى

[مامتكم]

بهذا السؤال فاجئنى ضياء 6 سنوات بعد عودته من المدرسة وفى عينيه إنكسار لم أعهده فيه وهو البلطجى جدا
-مين قالك أجنبى
-الأستاذ دخل الفصل وقال مين هنا أجنبى ماحدش رد وبعدين قاللى قوم انت مش انت أجنبى قلت له لأ انا مصرى قال تعالى انت على جنب. يعنى ايه اجنبى ياماما؟
-اجنبى يعنى مش من نفس البلد دى
-بث انا اتولدت هنا وعايش علطول هنا
-ايوة ياحبيبى بس احنا مصريين لكن كلنا فى الآخر مسلمين
-لما أروح مصر هابقى برضو أجنبى
-لا هتبقى مصرى
-انا عاوز اروح مصر وادخل مدرسة كل اللى فيها مصريين ويكون فيها واحد بس سعودى
-ليه
-عشان اقوله انت أجنبى
ذكرنى هذا بشىء حدث منذ ثلاثون عاما
هيثم 3سنوات ونصف طفل فى حضانة بالشارقة عاد إلى منزله وجدت والدته صرصار جريت وراه بالشبشب كالعادة صرخ هيثم سيبيه ياماما أحسن يكون مواطن
حكت الام هذه الرواية وهى تضحك وتبكى فى آن واحد لأن إبنها يعانى من تفرقة عنصرية لأنه مش مواطن عليه أن ياخد على دماغه ويسكت وهو فى هذا السن
إليكم بعض كلمات من أفواه أبناء الغربة من الجيل التانى:
-غدير 27 سنة ولدت وتربت فى الخليج :بالرغم من المستوى المادى والإجتماعى المرتفع الذى وفرته لى أسرتى إلا أننى أشعر انهم ظلمونى بأن أعيش فى مجتمع أنا فيه درجة ثانية ولن أكرر خطؤهم هذا عندما أتزوج

-شريف 15 سنة:يعنى إيه وطن وطن يعنى أصدقاء ومكان اتربيت فيه وحاجات بتحبها كل ده انا أجده هنا فى الغربة بأحس بالغربة فى مصر حتى بيضحكو على طريقة كلامى (لهجته لاتكاد تجعلك تميز أنه مصرى)

-شيماء 17 سنة:باحب مصر طبعا بس مصر بالنسبة ليا إجازة فسح وبحر وساحل شمالى وعزومات عند عماتى وخلانى وجدو وتيتة مش عارفة لما أدخل الجامعة هأتأقلم إزاى لكن برضو باحب مصر

-أفنان 17 سنة :بحب مصر آه لكن هنا كل ذكرياتى هم 4 سنوات اخلص الجامعة وأرجع اعيش هنا

-ابراهيم 19 سنة (يدرس بمصر منذ سنتين) بأحس بالغربة فى مصر جدا بابا وماما بيكلمونى كل اسبوع مرة بافتقد جو الأسرة انا حاسس انهم أنانيين كان مفروض ينزلو معايا

-شادى 7 سنوات انا باتكلم زى المواطنين وبالبس زيهم بس مش عارف هم ليه مش بيصاحبونى وبينادولى يامصرى كانها شتيمة هى مصرى دى شتيمة

-محمد 11 سنة :ولد بيقوللى انت جدك فرعون قلت له وانت جدك أبو جهل الأستاذ ضربنى أنا بس إشمعنى

-تسنيم 8 سنوات:ينفع تعملولنا هنا مدرسة كل اللى فيها مصريين؟

-أحمد 20 سنة والده يعمل بالخارج من 17 سنة:بأحس ان بابا انسان غريب عنى وانا صغير كان بيوحشنى لكن دلوقتى باستحمل إجازته بالعافية هو بالنسبة ليا مصدر للفلوس وبس.B)

كلام كتير جدا يشيب ويخللى الواحد يقف مع نفسه 100 مرة عشان يراجع حساباته ويشوف هو بيعمل ايه ومتغرب ليه وايه الإيجابيات والسلبيات الجزء ده خاص بالأبناء بس فيه جزء تانى خاص بينا إحنا وتأثير الغربة علينا وجزء تالت خاص بأرحامنا وأقاربنا اللى بنتغرب بعيد عنهم وتأثير ده عليهم وعلى علاقتنا بيهم
الخلاصة بالنسبة للأبناء بيحصل لهم ده:
• فقدان الشعور بالوطن وبالتالى فقدان الإنتماء
• الشعور بالدونية والمعاناة من التفرقة العنصرية
• التعود على المستوى المادى المرتفع والرفاهية مما يفقده القدرة على التأقلم مع متطلبات الحياة فى وطنه
• فقدان الترابط الأسرى مع أقارب الدرجة الثانية مثل الأعمام والخلان يصبح الطفل بعد والده مالهوش كبير
• فى بعض الدول لا يكون المستوى الدراسى يعمل العقل بنفس مستوى المناهج بمصر بحيث ان الطفل يعانى عند إكمال الدراسة بوطنه
• الحياة المنغلقة التى تفرضها علينا الغربة تفقد الطفل جزء كبير من شخصيته المتواصلة مع المجتمع وحينما يضطر للإحتكاك المباشر تشوف العجب
ده اللى توصلت له من خلال البحث فى هذا الموضوع ياريت نفتح باب النقاش فيه ونجد حلول لكل نقطة ونخرج بتوصيات تساعدنا على إجتياز هذه المصاعب

[سيف الديـن]

بالنسبة للأبناء بيحصل لهم ده:
• فقدان الشعور بالوطن وبالتالى فقدان الإنتماء
• الشعور بالدونية والمعاناة من التفرقة العنصرية
• التعود على المستوى المادى المرتفع والرفاهية مما يفقده القدرة على التأقلم مع متطلبات الحياة فى وطنه
• فقدان الترابط الأسرى مع أقارب الدرجة الثانية مثل الأعمام والخلان يصبح الطفل بعد والده مالهوش كبير
• فى بعض الدول لا يكون المستوى الدراسى يعمل العقل بنفس مستوى المناهج بمصر بحيث ان الطفل يعانى عند إكمال الدراسة بوطنه
• الحياة المنغلقة التى تفرضها علينا الغربة تفقد الطفل جزء كبير من شخصيته المتواصلة مع المجتمع وحينما يضطر للإحتكاك المباشر تشوف العجب

والله انا مش مع الناس اللي بيسفروا
بس حضرتك تقدري تقولي ان 70 % من الحاجات ديه بتحصل مع اللي قاعدين هنا بردوه

[BlueRose]

ياااه يا ماما
فكرتيني بذكريات لطيفة جدا

انا اتولدت و عشت اول 9 سنوات في حياتي في السعودية , و واجهت ما يواجهه ضياء الآن , بس انا كنت عايشة في عمارة كلها مصريين و اصدقاء العائلة كلهم مصريين , يعني المواجهات في المدرسة بس

و طبعا طريقة المواجهة كانت تتبلور من خلال مداولات و نقاشات مع زملاء الكفاح من الأطفال المصريين و كانت طبعا وسائل المواجهة الناتجة عن هذه المداولات كلها تعوزها النضج (كلام كبير)

انا بقى واجهت الموقف بصورة مختلفة عن ضياء , ربما كانت خاطئة
واجهتها بنفس الطريقة العنصرية , يعني بنظرة فوقية "اراها الآن غير مبررة" و بالتالي اصبحت نظرتهم العنصرية هي مجرد كلام فاضي عشان انا الأحسن (من وجهة نظري ساعتها)
و بما ان المواجهات في المدرسة , و كنت وقتها الأولى على المدرسة دائما بلا منافس تقريبا , و و تليني مباشرة اختي التوأم ثم بعدها السعوديات و كان تفوقي الدراسي ملحوظ من الجميع مدرسات و طالبات
فطبعا اللي كان يتكلم ارد انا ان المصريين اذكياء جدا عشان كدا باحمد ربنا اني مصرية

و طبعا مع الإعجاب الطاغي هناك بالمسلسلات المصرية و افلام الفيديو المصرية (من 20 سنة ماكانش فيه دش) كنت اسمع من الزميلات الكلام و اتمنظر عليهم "مش عارفة بإيه"
امثلة كثيرة كنت اتعامل فيها مع من يشعرني بالعنصرية بأني افضل



على طريقة برامج : لا تجربوا هذا في المنازل :
طبعا لو عندي ابن دلوقتي هاعلمه ان دا رد فعل خاطئ لأني الآن اراه كذلك فعلا , العنصرية لا تعني او ازرع بداخلي عنصرية مقابلة

المهم انه شيء مش سهل فعلا على طفل انه يحس بالتفرقة , خصوصا انه لم يختر هذا الوضع


لكن اغلب مشاكل الطلبة الدارسين في مصر ليست التأقلم مع المجتمع الجديد (و ان كانت تلك مشكلة احيانا) بقدر ما هي البعد عن الأهل

في حالتي عدنا جميعا عند دخول شقيقتي الكبرى الجامعة بعد ان سبقها شقيقي بعام قضاه وحده , لم يرض ابي ان نتحول الى عائلتين

عدنا و انا بالكاد اعرف اخوالي و اعمامي (باستثناء من كانوا يعيشون في السعودية منهم ) , و لم اعرفهم جيدا الا بعد عودتنا بصورة نهائية

الآن ابن شقيقتي في كندا لا يوجد طفل واحد يوجه له كلمة عنصرية , الفكرة نفسها غير موجودة عند الأطفال
اما الكبار و منهم شديدي العنصرية فكذلك لا يجرؤ احدهم على النطق بكلمة عنصرية خوفا من القانون

هم العرب كدا

[تقية]

-لما أروح مصر هابقى برضو أجنبى

اكيد معاه حق فى الاحساس ده لانه بقى حيران البلد اللى اتولد واتربى فيها بيقولوا عليه اجنبى...امال البلد اللى بينزل ليها شهر فى السنة هيقولوا عليه ايه
بصراحة احساس صعب فى السن دى

بث انا اتولدت هنا وعايش علطول هنا

حيرة صعبة بين بلد تربى فيه وبلد ينتمى اليه
-

تسنيم 8 سنوات:ينفع تعملولنا هنا مدرسة كل اللى فيها مصريين؟

ده هيزود المشكلة وهيحسس الولاد بالغربة اكتر وهينعزلوا عن المجتمع اللى حواليهم

-أحمد 20 سنة والده يعمل بالخارج من 17 سنة:بأحس ان بابا انسان غريب عنى وانا صغير كان بيوحشنى لكن دلوقتى باستحمل إجازته بالعافية هو بالنسبة ليا مصدر للفلوس وبس.B)

دى بقة المصيبة الكبرى...التعود على غياب الأب ونهاية دوره عند كونه مصدر للفلوس

عشان يراجع حساباته ويشوف هو بيعمل ايه ومتغرب ليه

والله كتير من الاحيان بتبقى الغربة شئ غصب وضرر لابد منه وذلك لصعوبة الحياة

• فقدان الشعور بالوطن وبالتالى فقدان الإنتماء
• الشعور بالدونية والمعاناة من التفرقة العنصرية
• التعود على المستوى المادى المرتفع والرفاهية مما يفقده القدرة على التأقلم مع متطلبات الحياة فى وطنه
• فقدان الترابط الأسرى مع أقارب الدرجة الثانية مثل الأعمام والخلان يصبح الطفل بعد والده مالهوش كبير
• فى بعض الدول لا يكون المستوى الدراسى يعمل العقل بنفس مستوى المناهج بمصر بحيث ان الطفل يعانى عند إكمال الدراسة بوطنه
• الحياة المنغلقة التى تفرضها علينا الغربة تفقد الطفل جزء كبير من شخصيته المتواصلة مع المجتمع وحينما يضطر للإحتكاك المباشر تشوف العجب
ده اللى توصلت له من خلال البحث فى هذا الموضوع ياريت نفتح باب النقاش فيه ونجد حلول لكل نقطة ونخرج بتوصيات تساعدنا على إجتياز هذه المصاعب

معكى حق كل دى سلبيات للغربة..بس ايه الحل والظروف عندنا بالنسبة للمعيشة اصبحت صعبة جداا ومعظم الشباب لازم يتغرب علشان يقدر يفتح بيت
والله يا عزيزتى حاجة تحير والاطفال هما الضحية لانهم بيفقدوا احساسهم بالوطن
حبيبتىالغالية موضوعك مهم ومؤلم ولكن دى ضروريات الزمن اللى احنا فيه
تحياتى لكى

[وهبه]

ضريبة الغربة

هذا ما يحدث بالفعل

وبعدما كان المصريين فاكهة بالنسبة لهذه المجتمعات وطلب الحصول عليهم غالٍ
كالاعارة او حتى التعاقد ..
اصبحت هذه البلاد عن طريق السعودة او اللعودة تبحث عن بديل لهؤلاء العاملين بعدما تمكنوا من خلق جيل يحمل مسيرة تكميل العملية التعليمية .... كما نعانى نحن من البطالة فى بلداننا يعانون هم ايضاً منها بعدما اصبحت ظاهرة عالمية تبحث عن حل

المهم فى الموضوع ان الاهل ( اب وام ) شاركا فى هذا الوضع بصورة او باخرى ودفعا الضريبة التى هى قيد البحث فلا هم يستغنون عن الوضع الاجتماعة والمادى الذى اكتسبوه من عملهم بالخارج ولا هم عادوا الى اوطانهم بما فيه من بدائل لاعمالهم ولا هم احتوا هذه المواقف ..

ولا نقول عنصرية فقط لان العدد قليل من المغتربين وانهم ظاهرين بلغوتهم وسط هذه المجتمعات وخوف الاهل من الاندماج مع اقرانهم فى الدراسة لجهلهم بعرف هذه المجتمعات وعادتهم .
فاذا كانت ثمة تجمعات لهؤلاء المغتربين ومدارس تجمعهم او ما شابه وتأصيل العلاقات اكثر عن طريق مجالس الاباء او اجتماعات تتعرف على هوية المنتسبين لهذه المدارس.. ولا اقول القنصليات او السفارة
ولكن على مستوى الحى او التجمع
وهناك من البدائل ما يمنع هذه الظاهرة القديمة الحديثة واعتقد ان ام سلمى لها موضوع مشابه وقد تحدثنا فيه عن ذلك

ونستكمل النظر فى البحث

شكراً

[العنتيل الدامد جوووى]

السيدة الفاضلة ..الحكيمة وصفا وفعلا
الموضوع كبير اااااااوى
كنت اتمنى ان يتجزء الى مجموعة مواضيع
مثلا...
الفرق بين طفل الغربة ..وطفل الوطن
عودة الابن لاستكمال التعليم الجامعى..واستمرار الاسرة فى الخارج
العنصرية... لم اجد كلمة اقل وطأّ (وطاّ ..صح )
التوطين او السعودة او البحرنة او العومنة...او اى كلمة يقصد بها توظيف اهل البلد وفلسعة المغتربين

كل العناصر السابقة يجب ان تكون موضوع لحاله..

تحبى نتكلم فى المجمل ..ولا نحدد موضوع محدد

عموما كل يوم بكتشف ان عالمنا العربى يستحق ماهو فيه واكثر

ولى عودة بعد تعقيب حضرتك

تحياتى واحترماتى

[ام سلمى]

اولا مبروووووووووك على الموضوع الرائع
ثانيا الكلام لما قريته جاب لى اكتئاب
شوية لما افك وارد تانى
الصراحة عيالى صعبوا على جدا

سلمى مش بترضى تتكلم فى المدرسة ولا كلمة مصرى
ولا بترضى اها تقول انها مصرية اساسا
مع انها اولى ابتدائى

لى عودة مرة اخرى

[العنتيل الدامد جوووى]

معلش ياست الحبايب
نسيت اقول الكلمتين دول فى الرد اللى فات

ومردتش اعدل فى مشاركتى

قلت لا احطهم فى صفحة لوحدهم.............


اللهى يا نتقم منك ياللى كنت السبب فى اللى احنا فيه..

واللى احنا حناقشه دلوقتى...

قولى امين يا ام سلمى

انا شايف اسمك تحت

[ام سلمى]

آآآآآآآآآآمين يا عنتيل
والله انا مش قادرة انطق من كمية المرارة اللى جواى
حسبنا الله ونعم الوكيل

[MASHI]

سلام عليكم واحد واحد

بصفتى واخد السكة قياسة رايح جاى ومعايا الشاي
فانا ردى بيكون صعب بصراحة على الشخص اللى بيتكلم في الموضوع ده وغالبا ما يكون ردى عليه يدل على انى متربي تربية سوووووهاج
وبينسحب خائبا من الحوار وكله بالعقل والادب حسب كلامه ...
لان كل فعل له ردفعل ...
وعموما الحمد لله على كل شيء
وبعدين الاطفال مش غلطانين الكبار هما اللى غلطانين ..
المسميات مننا احنا مش من الاطفال
الهى يجعل الخضرة في ايدك ناشفة ياللى في بالى ويغلب ولاياك ويفترى عليك حماك ((هو حماه عايش ولا لسه ؟؟))

[ماسة]

دوري دوري
انا شخصيا عمري كلة قضيتة في الغربة والى الان بزور مصر شهر في السنة واحيانا شهر في سنتين بس بصراحة مش حاسة بالغربة ابدا. يمكن عشان هنا اتربيت ورحت المدرسة وكونت صداقات وكل ذكرياتي هنا. اخساسي ناحية مصر هو اني طبعا بحبها جدا لكن مش متخيلة نفسي عايشة فيها. يعني ازورها كام يوم وارجع لحياتي العادية.
وبخصوص التفرقة العنصرية، فعمري بردة ما حد قال لي يا مصرية يمكن لاني في المدرسة مكنش فيها اي مواطنين
قرايبي باءة معرفهمش اوي فعلا. يمكن اعرف عائلة احدى خالاتي واحد اعمامي كويس جدا لكن الباقي معرفهمش معرفة وثيقة
بس حكاية فقدان الانتماء معتقدش انة صحيح لاني مع اني عمري ما عشت في مصر لكن لسا بحبها وبتحمق عشانها


دوري باءة ادعي على مستر اكس
يااااااااااا رب
اشوف فيك يوم
ربنا يكرمك فية
زي ما كرم شارون

شكرا

[->warDaya<-]

انا ما قرأتش كل الردود..
الموضوع ده اثر فيا جدا وفكرني بالآلم اللي كنت بحس بيها زمان
انا كنت عايشه في السعوديه لغاية ما كان سني 13 سنه..ماما كانت تولدنا ف مصر ونرجع تاني
وللاسف بابا استسهل ودخلنا مدرسه جنب البيت هناك..عشان يبقى متطمن علينا..
المدرسه دي كانت حكوميه..تقريبا ما كانش في غيري انا واختي مصريين في المدرسه كلها..
اتعودت من صغري اني ماتكلمش مع حد ولا اخلي حد يكلمني..لأنه اكيد اكيد هايقصدوا انهم يتريقوا عليا
واللي تسألني اسمك ايه..تبقى عاوزه تتمهزأ وتتريا عليا قدام الفصل..
واللي تبصلي تبقى اكيد نويالي على نيه سودا..
من الاخر كنت عايشه حياة وحشه جدا جدا..
ولما جيت مصر..كنت مستغربه اوي..حاسه اني اكيد عايشه في حلم..لما اقعد في الفصل والللي حواليا كلهم مصريين
بيتكلموا زيي زيهم
مش بيعتبروني زباله زي هناك..اه والله كانوا بيعتبرونا كده..وجرمنا الوحيد اننا مصريين..
وكمان..رحبوا بيا جدا..وكانوا بيحاولوا يخلوني اتكلم...كانوا بيحاولوا يخلوني اقول اسمي..اللي كنت بخاف اقوله..احسن يتريقوا عليا زي ما كان بيحصل هناك..

وباعدين الحمدلله..كل ده نسيته وتخطيته..
وعرفت ان الاهل عمرهم ما بيعرفوا يعني ايه عذاب في بلد عربي لانهم مش بيختلطوا باهل البلد زي ما بيحصل للاطفال في المدارس..
هم يعيشوا ويرجعوا بالقرشين..والاولاد يرجعوا نفسيتهم بايظه ويقعدوا سنين وسينين بيحاولوا يبنوا نفسهم من الصفر..عشان يقدروا يعيشوا طبيعي..

فعلا عمري ما هافكر ولا حتى يجي على بالي اني اسافر اي بلد عربي تاني..
:(

[stubborn emmy]

ماما ايماس
وحشتيني
موضوعك دا بيوجع اوي على فكرة
هحاول اقسم الفقرات الي بتكلم فيها لان الموضوع واسع

اولا : احنا ليه بنسافر بره ؟ ياترى دا صح ولا غلط ؟

اكيد ابويا كان زي غيره من الشباب الي عاشوا في مصرنا الحبيبة حيث سهولة الحصول على لقمة العيش وتوافر فرص العمل مع المواصلات المريحة و وفرة المساكن و انهمار الاموال عليه من السماء
وكان متأكد جدا ان والدتي العزيزة ستوافق عليه كده بالساهل
والأكثر من ذلك ان كرامته محفوظة هنا في بلاده حيث لا رشاوي لا فساد لا احباط لا دناوة لا شقاء
و طبع الو شيلنا (لا) واستبدلنا ماتحته خط بأضداده هنعرف سبب سفر ابويا هو و كتير غيره من الشباب في ايامه
في كلمة بابا قالهالي زمان
قاللي اللي معاه فلوس في بلدنا يعيش ملك
واللي معهوش الموت بالنسبة له راحة
بس ياترى الي عايزين يسافروا دول يسافروا وهما عازبين ويرجعوا بعد ما يعملوا القرشين يكملوا ف بلدهم ؟
ولا يسافروا بمراتاتهم ويخلفوا هناك ويرجعوا اول ما العيال يوصلوا لسن المدارس ؟
ولا يستقروا هناك ويقعدوا لأجل غير مسمى و ( يتبتوا) في الشغل هناك بإييدهم وسنانهم
بصراحة معرفش

[stubborn emmy]

ثانيا : ضياء يعمل ايه مع زملائه - المواطنين -؟

وانا في سن ضياء كنت بتكلم سعودي مع السعوديات ومصري مع المصريات
كنت وديعة اوي وهادية واللي تتريق على كلامي او تقول كلمة وحشة على بلدي اناقشها بهدوء واقولها انتي ليه بتقولي كده ؟ هو انا بقول كده على بلدك ؟ احنا كلنا مسلمين
بالفطرة وجدت اني متساوية مع المخلوقة دي في كل شيء لا هيا احسن مني ولا انا احسن منها
في الوقت دا كنت بسمع نوعية تانية من اصحابي المصريات كانوا بيردوا بعنصرية زي بلو روز ما وصفت
مرة واحدة سعودية قالت لواحدة مصرية انتوا جايين هنا ليييييه جايين تاخدوا فلوسنا ؟
البنت قالتلها اه جايين ناخد فلوسكم استريحتي ؟
موقف تاني
السعودية: انتوا جايين هنا تشتغلوا عندنا
المصرية: ردت عليها وقالت وانتي الصادقة احنا جايين نعلمكم بدل ما كنتم حافيين و بترعوا غنم
انا كنت بسمع الكلام ده وانا صغيرة بصراحة كنت بتبسط ان المصريين بيستردوا كرامتهم ( على اد تفكيري وانا صغيرة ) بس ف نفس الوقت كنت بزعل ان دي بقت اخلاقنا وكنت مصممة اني لما اتكلم اقول ان كلنا مسلمين

ضياء صعبان عليا ، حاولي تقهميه ان في فروقات فردية وان مش كل السعوديين وحشين ومش كل المصريين حلوين وان كل واحد بيتعامل من خلال تربيته وتمسكه بدينه واخلاقه
يعني لو حد عاملك وحش بلاش انت تعامله وحش خليك انت احسن منه
سكوتك مش معناه انك ضعيف بالعكس ده معناه انك مؤدب و مسلم بحق

انا لما كبرت شوية اتعاملت مع شخصيات لبنات سعوديات في منتهى الأدب والأخلاق اللي شفتهم في حياتي وفي نفس الوقت شفت نماذج لمصريات في منتهى السفالة والوقاحه هناك
يعني الموضوع مش عام

و عموما الاحاسيس الي بيحس بيها ضياء بتختلف من طفل لآخر هناك على حسب :
1/ نوع المدرسة حكومية ولا خاصة
2 / مدى تقدير المعلمين للموضوع دا وتوجيه الاطفال للسلوك الصح وتنبيههم ان احنا كلنا مسلمين وسواسية وان مدى التزام المسلم بدينه هو الي بيفرق بينه وبين اخوه
3 / المدينة الي عايشين فيها
يعني مثلا لما كنت في نجران كان المصريين قليليين و اختي كانت بتحس بالتفرقه
انما في الرياض كان عدد المصريين تقريبا اد السعوديين
4 / الولاد اشقياء ومتحررين في حركتهم يعني ممكن الموضوع يتطور الى ضرب وخناقات انما البنات ملمومين وهاديين نوعا ما
5 / أؤكد لك ان بالتعاون بينك وبين المدرسين الكويسين في مدرسته ومع مرور الأيام ضياء هينشيء نش~ة طبيعية جدا ويتأقلم مع الوضع
انا لما كبرت الموضوع معادش فارق معايا خالص

[stubborn emmy]

ثالثا : احساس الانفصام الي بنحسه لما ننزل بلدنا سواء في الاجازات او لما نستقر فيها نهائيا اسبابه وعلاجه ؟

انا ايمي ايمي العربية ايمي المسلمة ايمي المصرية عشان بتتكلم مصري وسعودية عشان اتولدت واتربيت هناك
انا مبسوطة اني اتربيت هناك ومش زعلانة اني اتعلمت في مدارس السعودية لأني لما نزلت وشفت القرف الي بيحصل للاطفال في المدارس من ضرب وعدم اهتمام بالمواد الدينية واللغة العربية ودروس ومجاميع بحمد ربنا اني اتعلمت بسهولة ويسر ومش زي ابدا ما في كتير فاكرين ان المستوى التعليم هناك ادنى من هنا بل انا شايفه العكس تماما
الامكانات هناك احسن وآدمية التعامل متوافرة والمناهج متقاربة ، الاختلاف هو في نظام الامتحانات ونوعها وفي اللغات الخرى ( انجليزي وفرنساوي )

لما كنت بنزل في الاجازات لمصر كان بيبقى كلي شوق و حنين عشان هتفسح واشم هوا واشوف مناظر جديدة وناس كتيرة وازور جدتي و اهلي وانزل لعمو البقال اجيب ب 35 قرش شيبسي ( كان ايامي ب35 قرش ):واه يابوي
بس كنت بقرف من الهوا المتنيل بهباب العربيات والناس الي بتشخط ف بعضها والحمير ف الشارع وبتعمل اسمه ايه دا وراها والناس بتدحك عليا لما يلاقوا لهجتي مكسرة
نسيت اقول الاستقبال الحافل الي بنلاقيه ف المطار ، ازيك يا باشا حمدا لله عالسلامة يا مدام الشاي يا باشا الحلاوة يا مدام خلتني اقول عليهم شحاتين

كنت عارفه اهلي كويس بس مش عايشة معاهم ومتهيقلي دا العادي الي بيحصل هنا برضه يعني صلة الرحم معادتش قوية زي ايام زمان عشان الزحمة والانشغال
حرصنا على النزول كل أجازة و زيارة الأهل دا كان شيء كويس

وإليك بعض من نماذج اصطدامي بالحياة في بلدي :
اول ما نزلت مصر بقى كنت تعبانة نفسيا جدا من بعد اهلي ومكنتش قادرة أتحمل المسؤولية وكنت بعيط كتير و بطلب منهم كل شوية ينزلوا
كان قرايبي بيقولوا عليا معقدة و نرفوزة ومبفرقش بين الهزار والجد يعني اي حد يقوللي اي كلمة بزعل
كنت ناشفة، اخويا منير الله يكرمه قاللي كلمة ، قاللي لو عود الشجرة كان ناشف اكيد هيتكسر بسرعه ومش هيستحمل الصدمات والظروف القاسية حواليه لكن لو كان لين ومرن عمره ما يتقطم .
اول ما نزلت واجهت مشاكل كتيرة في الدراسة بسبب اللغة الانجليزية لأن منهجها كان ساذج في السعودية .
اول ما نزلت كنت بتأفف من كل حاجه وافتكر اني كنت دايما ماشية حاطة منديل على مناخيري .
ولو مشيت ف الشمس ساعة بدوخ .
كنت خايفة اتعامل مع الناس خايفة اثق فيهم بسرعه .
اول ما نزلت مكنتش طايقة اشرب المية وكنت بقولهم هموت لو شربتها ( بصراحة لغاية دلوقتي نفسي اعرف مين الي قال ان الي يشرب من مية النيل لازم يرجعلها ؟ متهيقلي هو كان قصده لازم يرجعها مش يرجعلها )
اول ما نزلت مقدرتش اتأقلم مع المواصلات مع الشوارع الزحمة والسواقين الي على طول مخنوقين
مقدرتش اتأقلم مع الاسعار الغالية لسلع انا متعودة اني اشتريها كل يوم

بعد فترة تأقلمت ، أينعم بصعوبة .... وأينعم كنت محتاجة على الأقل لأمي ومازلت رافضة وضعنا المشتت
لكن تأقلمت
بالعكس حسيت اني بقيت اعتمد على نفسي واتحمل المسؤولية
حسيت يعني ايه حياة يعني ايه ناس وشوارع واهل
حسيت يعني ايه واحد غلبان وفقير ومطحون وبيشتغل كذا شغلانة
شفت ناس بتاكل فتافيت بعد ما كنت هناك برمي موائد ف الزبالة :انجغة:
حرمت نفسي من حاجات كنت اتعودت عليها ودلوقتي تحولت الى كماليات
الرفاهية خطر
بس الحمير والمواصلات والمية وطمع الناس دا بره الموضوع
لان دا حق الانسان الطبيعي انه ياكل اكل نضيف ويشرب مية نضيفة ويعيش ف مكان نضيف ( نعمان جمعة ) يبقى فيه صرف صحي ( انا مش عارفه ازاي في ناس عايشة من غيرو كهربا وصرف صحي لغاية دلوقتي لا والحكومة بتمن عليهم وبتقول هننشيء شبكة )

باختصار ( قال يعني بعد الرغي دا كله هختصر )
انا مش مع ان الاهل ينزلوا عيالهم ويكملوا هما بره
اضعف الايمان ينزلوا لهم كل شهرين تلاتة


و دي كانت حكايتي مع الزمااااااااااااااااان الزماااااااااااااان الزمااااااااااااان
بس خلاص