كارثة الطب فى مصر !!

[كتكوت عجوز]

الاخوة الاعزاء

فـكرت كثيرا قبل ان اطرح هذا الموضوع الحساس للنقاش، ولكن هدفى المصلحة العامة، فهذا الموضوع يهم الجميع. فمستوى الخدمة الطبية فى مصر متدنى الى درجة رهيبة وللاسف فمعظم الناس لا يدرك حجم هذه المشكلة. ولقد اتيح لى كطبيب مارس الطب لسنوات عديدة وفى عدة اماكن يشار لها بالبنان فى مصر، ان المس و عن قرب جوانب متعددة من هذه الــــكـــــارثـــة و تحت يدى معلومات بل ومستندات اغرب من الخيال تخفى عن عامة الناس .. نهايته

هدفى من الطرح :

1- شباب كليات الطب واطباء المستقبل يجب ان يدركوا حجم المشكلة كى يكون الغد افضل (قدر الامكان).

2- الاطباء و هم اساس الخدمة الطبية يجب ان يعترفوا بوجود القصور ويلتفتوا لعلاجه وللعلم فالذنب ليس ذنب الاطباء وحدهم لان الطب جزء من المجتمع، يعانى نفس امراض المجتمع. ولكن اذا مرض الطب ... فعلاجه يصبح من اول الاولويات

3- باقى الناس .... بلغة الاطباء .. العيانين، وهم الاهم عندى هنا لانهم دائما الضحية، ودائما يضحون بانفس مايمتلكون... صحتهم ... بل و احيانا حيـــاتــهــم ... فهؤلاء يجب ان يدركوا حجم المشكلة لكى يميزوا بين الغث والسمين كى لا يقعوا ضحية تلك الـــكـــارثـــة. (الــطب فى مصــــر)

الموضوع طويـــــــــل و له جوانب كثيــــرة

و قبل ان استطرد اود ان استمع الى تعليقاتكم
هل ادخل فى الموضوع ولا الحكاية مش ناقصة غم... وخلــينا على عمانا عشان نعرف نعيش
هل فيه حد حاسس بالمشكلة؟ ... او مر بتجربة تذكرها عندما فرا هذه السطور؟ و لا حاسين ان الموضوع مبالغة وواحد جاى يزود الهموم هم ؟..

مش عارف ايه رايكم؟؟

و على فكرة انا زبون جديد عالقهوة .. ومش عارف هل فيه رقابة عالمواضيع هنا؟ .. وهل فيه حد من حقه يقفل اى موضوع بالضبة والمفتاح؟ لان علاج هذا الموضوع محتاج صراحة متناهية ...


اخوكم
كتكوت عجوز

[eldoctor]

عايز تناقش ايه و ازاى ... انا واحد من الناس اللى ماتحبش تتغرب .. غصب عنى اضطريت اسيب مصر .. و الا حابقى باشتغل نصاب .. انا تخصصcritical medicine عارف احنا كام واحد فى مصر ما نعديش 50 باى شكل .. اشتغلت فى اكبر مستشفيات القاهرة و اسكندرية ... و لقيت ان محدش فاهم حاجة .. و النصب اكتر من الطب ... يا اما اشتغل نصاب .. ياما اسيب البلد و ده اللى عملته .. على فكرة وزارة الصحة المبجلة .. مش عارفين يحطونى تحت اى كادر .. يعنى تبع باكنة ولا قلب ولا تخدير .. غلبوا فيا ... و ما صدقوا انا سافرت .. عارف كام دكتور من تخصصى فى الدول العربية .. السعودية و الكويت .. الخ .... 34 و اللى فضلوا فى مصر .. طالع عينيهم .. بلاش تقلب المواجع ... لحسن الواحد حيطق

[Lighthouse]

موضوع هام جدا ويمس الجميع
هل من الممكن ونحن بصدد مناقشة كارثة من كوارثنا ان نتحدث عن مصيبة التعليم الخاص وتخريج اطباء ملاكي بفلوسهم يعني وتشريح مستواهم العلمي حتى نعرف جزء من مصيبتنا وخيبتنا التقيلة

لنا عودة

[كتكوت عجوز]

الاخوة الاعزاء

السلام عليكم
مشكلة الطب فى مصر هى ليست مشكلة واحدة ولكنها مجموعة من المشاكل ادت فى النهاية الى كارثة حقيقية .. واعرض عليكم بعض وليس كل عناوين المواضيع .. و لاادرى حقيقة من اين نبدأ..

التعليم الطبى :
اعداد الاطباء والدراسة والامتحانات والدروس الخصوصية ..
الطب يورث و لا يدرس – امتحانات مع ابناء الاساتذه واصدقاؤهم – سلم لى عالبابا – و كمان فى الكنترول؟
ترتيب الاطباء على مستوى الجمهورية حسب التقدير والمجموع
مهزلة الدراسة العليا و البحث العلمى - رسائل و ابحاث ملفقة
نظام اختيار اعضاء هيئة التدريس
نظام ترقيات اعضاء هيئة التدريس
مهازل كليات الطب الاقليمية وسقط المتاع
قصص من الواقع


قوانين المهنة :
لجنة اداب المهنة - نقابة الاطباء
مئات القتلى و الاف الا خطاء المهنية - ولم يشطب غير 2 من سجلات التقابة فى تاريخها !!!
تراخيص المزاولة سارى مدى الحياة. ياريتها رخصة سواقة ميكروباس!!

القطاع الحكومى :
المرضى فئران للتجارب
التجهيزات والمناقصات و المشتريات التدريب والرشاوى
العلاج على نفقة الدولة
مستشفيات وزارة الصحة
التامين الصحى
المستشفيات الجامعية
قصص من الواقع

القطاع الخاص:
نجوم فى سماء الطب
الرقابة على الاداء : كله ماشى من دماغه
العلم والضمير
شيلنى وشيلك : العمولات والبيزنس والسمسرة والمجاملة بين الاطباء
الاعلانات
شباب الاطباء
قصص من الواقع


ويمكن بعض المواضيع مفهومة من عناوينها ..
من اين نبدأ؟ ايه رأيكم؟
الاخوة الحكيمباشية .. هل ترون نقاط أخرى يمكن أن تضاف؟

و للحديث بقية ...

كتكوت عجوز

[Lighthouse]

والله ياكتكوتنا العجوز انا شايفة ان الترتيب اللى حضرتك عملته منطقي وممكن نمشي بيه

لكن هل المناقشة مقصورة على الاطباء فقط
لان مشاكل التعليم الجامعي في مصر تقريبا واحدة ... صحيح بالنسبة للاطباء الوضع مختلف لانهم يتعاملون مع ارواح البشر ولكن يمكن الحديث عن التعليم الجامعي في مصر ومشاكله ضمن الحديث عن تعليم الاطباء

قلت ايه ؟؟؟؟

[كتكوت عجوز]

الاخت العزيزة لايت هاوس

النقاش مفتوح للجميع بالطيع .. اطباء وعيانين (قصدى غير اطباء) ... وسؤالى كان للأطباء لأنهم أدرى بالموقف بسبب وجودهم داخل مطبخ الخدمة الطبية ... و طباخ السم بيدوقه.. و لكن هذا لا يمنع انها مشكلة تمسنا جميعا .. و يفضل بل و يجب أن نناقشها جميعا .. نستكمل رؤوس المواضيع .. ونناقشها

حيث ان الهدف الأهم ... هو كشف جوانب المشكلة ... و التشخيص أول مراحل العلاج ... لان معظم جوانب المشكلة خافية على معظم الناس .. أو على الأقل لا يتصور ان حجمها بهذا الثقل والضخامة ....

موضوع التعليم يا عزيزتى كارثة اخرى .... خاص وحكومى .. و التعليم الطبى تأثر بوضع التعليم الجامعى طبعا .. ومشكلة التعليم بشكل عام .. وبالإمكان فتح موضوع عن مهزلة التعليم فى مصر ... و مرحبا بأى كلام فى مصلحة البلاد والعباد ... وتذكرت الآن كلام احد اساتذتنا فى ندوة عن التعليم الطبى .. انه قال ان الهدف من تــطــويـر التعليم هو تحويل الطالب الى .. "طور" ..

نــكتـــة طــبـيـة (من الواقع):

شلة من اساتذة الطب اجتمعوا .. و بدأ الكلام عن المرضى والجراحات .. وكان احد الحاضرين نجم من اسطع نجوم الطب فى مصر(رحمه الله) .. الذى نصح احد زملائه بخبث:
.. خلى بالك الحالة اللى بتكلم عنها دى صعبة .. والعيان لو مات .. أهله هيقولوا ياريتنا كنا رحنا للدكتور فـلان احسن ( فلان هو المتحدث) ... فيرد عليه الاستاذ الدكتور اللى لسه مش نجم قائلا : طيب و الحالة دى لو جت لسعادتك تعملها ايه يابيه ؟؟؟؟ فيرد الدكتور النجم : لا انا مش هتفرق قوى .. لأن لو العيان مات .. أهله هيقولوا: الحمد لله اننا عملنا اللى علينا ووديناه لفلان .. دى اعمار ..
ويتتعالى قهقهات الجميع ...

الحوار ده حصل فعلا .. مش خيال

و للحديث بقية ..



<!--EDIT|كتكوت عجوز|Oct 24 2002, 09:32 PM-->

[eldoctor]

تحب تبدأ من الاول .. تعالى و للعلم .. انا كنت قريب جدا من مجلس نقابة الاطباء فى التمانينات .. لان والدى الله يرحمه كان عضو مجلس نقابة عامة ... و كنت عارف كل اللى بيحصل ايامها .. و الكلام اللى بيتقال من ايامها .. لسه بيتكرر لحد دلوقت..
اعداد الاطباء .. دى سياسة دولة .. ان الناس تبقى ملهية فى مذاكرة العيال .. علشان يجيبوا مجمزع فى الثانوية و يدخلوا كلية الطب .. زى ماكانت كلية الحقوق فى الاربعينات هى احسن كلية .. بعد الثورة بقت الطب من كليات .. القمة ..(زى قمة الشارع ...الناصية يعنى) ... و تلاقى الراجل طالع عينه علشان الدروس الخصوصية .. و التحسين .. و ايام زمان كان يعيد علشان يحسن .. .. فالدولة تفتح العدد شوية .. مش مهم يروحوا فين المهم .. ان الناس تتبسط .. و لو ان دلوقت بقت نيلة بعد كليات الطب الملاكى قصدى الخاصة .. مش مهم بتفهم ولا لأ المهم معاك كام
ده مرحلة ما قبل الكلية .. اما فى الكلية .. فده موضوع عايز كتاب مش موضوع .. اسمع منكم انتم الاول

[كتكوت عجوز]

الاخ العزيز الدكتور ..

لقد لمست نقطة هامة جدا .. مرحلة ما قبل الكلية ... و هنا بعض ملاحظات وتساؤلات ... لماذا يكون الطب هو الغاية لكل طالب فى الثانوى ؟ و لماذا تكون كلية الطب هى المصير المحتوم لمن يحصل على المجموع العالى؟ ماهى المعلومات المتاحة لخريج الثانوية العامة التى تؤهله لاتخاذ هذا القرار المصيرى؟ وهل يعلم الاهل حقيقة مستقبل الاطباء .. ووضعهم المادى فى ظل هرم اجتماعى مقلوب؟ وهل فعلا يجنى الطبيب الشاب مقابل ما يتكبده من مجهود بعد التخرج مقارنة بالتخصصات الأخرى؟ ... ولنا عودة لموضوع نقابة الاطباء.. والصراع مع الحكومة فى تحديد اعداد الخريجين و موقفها من كليات الطب الخاصة فى مصر ...

و قبل ان ندخل فى الكلام عن التعليم الطبى .. أود ان اقفز الى نقطة هامة اراك قد ذكرتها فى مشاركة سابقة .. النقطة هى – العلم والضمير ... فقد ذكرت انك تركت مصر مضطرا .. بسبب الجهل والنصب .. وهو سلوك يدل على ضمير يقظ .. فانا مثلك احب مصر جدا .. (بكل اللى فيها) .. و اكره الاغتراب .. ولهذا افهم تضحيتك تماما .. ولهذا اواد ان اسألك، والسؤالين مطروحين للجميع ايضا :

1- العلم .. ماهى النسبة المئوية (تقريبا، وفى تقديرك الشخصى) من اطباء مصر العاملين فى مصر .. و الذين يحملون علم وخبرة تؤهلهم للتصدى لتخصصاتهم؟
2- الضمير .. ماهى النسبة المئوية (تقريبا، وفى تقديرك الشخصى) من اطباء مصر العاملين فى مصر .. و الذين يحملون ضميرا يقظا.. ويحكمون ضميرهم و دينهم .. اثناء التعامل مع المرضى؟

فى انتظار ردك

و للحديث بقية ان شاء الله ..

[ام نرمين]

السلام عليكم ورحمة الله وبركاتة
فعلا للأسف الشديد نحن عندنا في مصر كلية طب وهندسة هما كما يقولون كليات القمة
وكأن ما عداها من كليات ولا حاجة ويا عيني الواد مستقبلة ضاع
ودة ناتج من ثقافة المجتمع بأكملة وللأسف ممكن يكون شخص ينتقض هذا الوضع لكن هو شخصيا
اذا وضع في اختيار بين كلية عادية وكلية طب أو هندسة مثلا يختار طب أو هندسة وكأنة استخسار
بغض النظر عن الميول والأتجاهات والمعلومات وأشياء أخرى كثيرة هى التي تحدد.
لكن لتأصل هذا المفهوم لدى الشعب المصري فنادرا ما نجد أحدا يشذ عن القاعدة وهو بفعلتة هذة
يصير أعجوبة وكأنة عمل اللي محدش عملة :woot: :woot: :woot:
وقد رأيت اننا ممكن ايضا في هذا الموضوع الحيوي نتناقش في نقطة التأمين الصحي والبلاوي اللي فية
اما عن السؤالين المطروحين فأنا في تقديري الشخصي ان :
1- بالنسبة للعلم
نسبة الأطباء اللذين لديهم علم و خبرة تؤهلهم للتصدي لتخصصاتهم هى 60% :unsure:
2-بالنسبة للضمير
نسبة الأطباء اللذين يحكمون ضميرهم ودينهم اثناء التعامل مع المرضي هى 40% :unsure:
والله أعلم
وان كنت اتمنى ان يكون تقديري هذا خـطــــــــــأ

[3amooo]

Originally posted by newrealmine@Oct 26 2002, 02:54 AM
1- بالنسبة للعلم
نسبة الأطباء اللذين لديهم علم و خبرة تؤهلهم للتصدي لتخصصاتهم هى 60% :unsure:
2-بالنسبة للضمير
نسبة الأطباء اللذين يحكمون ضميرهم ودينهم اثناء التعامل مع المرضي هى 40% :unsure:
والله أعلم
وان كنت اتمنى ان يكون تقديري هذا خـطــــــــــأ

إذا افترضنا صحة هذه النسبه وهى ال 60% وال 40%

فغالبا بيكون نسبه 90% من ال 60 % إللى عندهم علم مابيكونش عندهم ضمير

ونسبه ال 90% من ال 40 % إللى عندهم ضمير بيبقى عندهم جهل

مع اعتراضى اساسا على موضوع ان فى 60% من أطباء مصر عندهم علم

[ام نرمين]

والله عندك حق ياعمو ربنا يستر علينا :blush: :blush: :blush: :blush:

[الشيماء]

بناء على دعوتك يادكتور .. الكتكوت العجوز انا باجاوب اهو
السلام عليكم ورحمة الله..
انا لااضيف على ماقلتم الابيت من الشعر.. يقولك
يارجال العلم ياملح البلد
ماذا عن الماء لو الملح فسد :?small:
انا برضو اشتريت السلامه.. زي الاخ الدكتور..
درست في الخارج حصلت تخصص مهم .. مالقتليش مكان .. فضلت الغربه..بس في بلد عربي..
الحال مش احسن بكتير.. بس ليهم اعذارهم ...
اصل طعنات البيت الداخلي بتوجع بمقتل..فضلت طعنات الغربه..
وابقى دكتورة حبايبي فهريدي على النت وبس...
وسلام على بلدي :h2:
:h2:

[Lighthouse]

ولما الكل يمشي
ايثارا للسلامة
مين ح يعالج عيوب البلد المزمنة

:( :( :(

[eldoctor]

كام واحد عنده علم .. نسبة قليلة جدا .. و الاسباب كتيرة ... نظام النيابات اصلا فاشل .. يعنى تلاقى ايه الموض اللى ماشية .. البنات مثلا بيشتغلوا نساء و اطفال تلاقى النيابات متروسة نساء و اطفال و كلهم بنات .. و بعدين تيجى للتسجيل فى الدراسات .. الماجستير ضحك على الدقون .. محدش بيدور انك تتعلم .. الا من رحم ربى .. يعنى كام واحد بيسجل جراحة كل سنة .. و كام واحد الاستاذ بيدور اذا كان جه ولا راح .. بس الواحد لازم يقول الحق فيه ناس بتدور .. انا طلع عينى ايام الماجستير علشان الاستاذ دايما يقولى .. انت حتبقى مسئول عن ارواح ناس .. لازم تعرف الصح .. والا مفيش وقت تغلط قدام العيان
و نقطة تانية رسايل الماجستير .. انا حاقولك عن نفسى انا عملت رسالة اشراف مشترك .. بين جامعة اسكندرية .. و قصر العينى .. و عملت كلام جميل جدا و جديد بس للاسف اتركن فى الدرج .. و برضه لم اياس و سجلت دكتوراه بس لقيت ان الدكتوراه ملهاش علاقة بالعلم .. دى مسألة علاقات و مجاملات وحاجات من دى كتير .. و بعدين ليه يا حقير تاخد دكتوراه و انت مش من كادر الجامعة ؟؟؟؟

الضمير ده حاجة مختلفة حتى لو موجود .. حتعمل ايه ؟؟؟؟ حتموت من الجوع .. ولا تجارى الجو ؟؟؟ انا بحس ان الناس مظلومة فى النقطة دى ....مش كل واحد بتجيله فرصة يشتغل بره مصر ..
و اسمع راى الناس

[كتكوت عجوز]

الاخت الشيماء الاخ الدكتور شكرا لمشاركتكما ... و ارجو ان تستمرمشاركاتكما المفيدة ..


موضوع العلم والضمير ممكن يكون أخطر اعراض المرض .. ولكن طبعا مش هو اصل المشكلة .. النظام و حال البلد ككل هو السبب .. ما الدافع للعلم اذا كان ترخيص مزاولة المهنة سارى للأبد .. فى البلاد المتقدمة هناك امتحان فى التخصص كل 10 سنوات .. وجو ممارسة الطب جو علمى بطبعه .. ابحاث فعلية وليست ملفقة .. و عندنا ممنوع تفكر وتطلع بحاجة جديدة .. يعنى هتفهم اكتر من الخواجات؟ حتى اساتذة الكليات المرموقة المحتكرين لكل شئ .. نادرا مايقوموا بنشاط علمى جاد .. سوى الاشراف على الرسائل القص واللصق .. وتبادل اسماؤهم على الابحاث المنقولة ... و المكان الوحيد فى العالم الذى تسمع فيه من نجوم الطب جملة .." من خبرتى فى التعامل مع الحالات دى .. لقيت ان كذا وكذا بيجيب نتيجة احسن .. " بالذمة ده كلام برده .. يعنى ايه خبرة سعادتك؟ .. كام حالة؟ .. فين الابحاث اللى تؤهلك تخالف المراجع الاجنبية والابحاث العالمية بالبجاحة دى؟ .. واصبحت استاذ فى كلية الطب رخصة جديدة للتهجيص والتاليف .. والضحايا الناس اللى بتجرى ورا النجوم ..

وطبعا مفهوم ان بعض ذوى العلم و غائبى الضمير يستغلون علمهم لمصلحتهم .. وليس لمصلحة المرضى والامثلة كثيرة .. وبالمثل فان اهل الضمير الجاهلين .. يضرون بمرضاهم بحسن نية .. زى الدبة اللى بتقتل صا حبها ..

الخلاصة بحسبة بسيطة لو كان العلم موجود فى 20 % (لو تفاءلت) و الضمير فى 20 % (برده لو هتفاءل) يكون نسبة اللاطباء ذوى العلم والضمير فى مصر ....
20% فى 20 % = 4 % ..... والنسبة دى اهم عرض للمشكلة .. أن 4% من اطباء مصر فقط هم من يحملون العلم والضمير المطلوب للتعامل مع صحة المصريين .. تخيلوا 4% ؟ مع كل التفاؤل ..

و هذه الارقام للأسف ليست نتيجة دراسة علمية واحصائية .. و استبعد ان يسمح بدراسة من هذا النوع فى البلد ... ولكنها استقراءات متفائلة للواقع الطبى الأليم ..

كارثة.. أليس كذلك .. مارأيكم ..



<!--EDIT|كتكوت عجوز|Oct 29 2002, 07:52 PM-->