صدق أو لا تصدق زواج هند الحناوى و أحمد الفيشاوى

[el7awadeet]

صدق أو لا تصدق زواج هند الحناوى و أحمد الفيشاوى

كانت السيارة تشق طريقها الذى تتمنى هند أن تنتهى منه، ربما مع ذهاب تحدى الموتور للأرض أن تتوقف آلام الذكريات و مآسى الأيام و الشهور الماضية ربما مع توقف الموتور يتوقف إستدعاء شريط مرير يضم من الصور المؤلمة أكثر مما يضم من أى شىء آخر.. لكن عبثا حاولت.. إذ كيف تهرب من مطاردات الذكريات و آثار جلسة الصباح بتفاصيلها المملة ترن فى آذانها فلم يحن وقت الراحة و لم يأت إلى هذه اللحظة وقت القصاص العادل ممن ظلموها.. و أولهم الفيشاوى الصغير أو حتى الكبير فكلاهما واحد.. أولهما فعل فعلته و الثانى تولى الدفاع عنه و قاد المعركة نيابة عنه و حصل على أجازة من أعماله الفنية ليتفرغ للظهور كل حين فى الفضائيات و المؤتمرات الصحفية فى أكبر مهزلة أسرية و عائلية تجرى بين أسرتين علنا و بهذه الطريقة و تتناول تفاصيل خاصة جدا يوصف بعضها بأنه للكبار فقط.

لكن.. عند البيت و فى مساء الخميس الماضى بعد يوم مرهق من العمل و الجلسات القضائية يتوقف أخيرا الموتور الذى جاء فى لحظة مناسبة تماما فها هى ذى صديقتها نشوى - أحد شهودها فى القضية - تتصل بها من محمولها.. لم تكتف هذه المرة برنة واحدة على أن تفهم هند بأنها تريدها فتقوم هى بالإتصال بها.. إن تليفونها لا يريد أن يتوقف عن الرنين.. تفتح عليها الخط أم تقفله؟ تدخل لتحدثها من الداخل أم ترد؟ هل هو إتصال عن طريق الخطأ أم هو إتصال مقصود؟
كل ذلك فكرت فيه هند فى أجزاء من الثانية لتقرر على الفور الرد لتتأكد أن نشوى تريدها فى أمر مهم نشوى: يا هند إنتى فين؟ و لم تتوقف نشوى عن الكلام بل إستمرت دون إنتظار رد هند حيث أردفت: هند مبروك.. أحمد قرر الإعتراف بالزواج.. و أبوته "لينا" أحمد عاد إلى صوابه يا هند.. هند أنا مش عارفة إيه اللى حصل صدقينى.. ثم تضيف بصوت ممزوج بالبكاء: هند إنت سمعانى.. أكيد سمعانى أوعى تبكى يا حبيبتى.. ولا أقولك إبكى.. لازم تبكى إبكى بعد كل اللى شوفتيه.. إبكى من الفرحة إبكى علشان خاطر لينا..روحى خديها فى حضنك.. إنت فين دلوقت.. عايزه أشوفك.. عايزة أطير لغاية عندك إنت روحتى..لسه فى الشغل؟!
كانت نشوى تدرك أن هند لن تصدق و ربما إعتبرته مزاحا ثقيلا لكن.. على التليفون الأرضى بالداخل إستكملت نشوى خبرها المفاجأة نبأها المذهل فقالت: لا أعرف ما الذى جرى هل تدخل الشيخ عمرو خالد و أقنع أحمد بأن العودة إلى الحق فضيلة الفضائل أم لا.. هل أقنعه بأن الله مدح فى كتابه العزيز من بين من مدح الأوابين.. و الأوابون هم الذين يعودون إلى الحق متى عرفوه أم هل تدخل أحد من الشيوخ الذين يعرفهم الفيشاوى الصغير و أفهمه أن كثيرين من أهل العلم و الدين أعطوا أسماءهم لأخريات من أجل الستر عليهن و أنهم بذلك نالوا الدنيا و الآخرة.
و أنه من الأولى أن يقوم هو بهذا التصرف النبيل حتى و لو كان لوجه الله عز و جل وحده خصوصا أن الدلائل الأولية تقول أن "لينا"إبنته.. فهناك علامات للشبه و أن تحليل الـDNA
الذى تهرب من إجرائه سيثبت ذلك لا محالة.. و تستكمل نشوى: هند أنا لا أعرف ما الذى جرى بدقة.. لكن أحمد كان معى منذ قليل لم يكن معى على الهاتف إنما قابلنى و لم أقابله ما صدقت ذلك أبدا لقد جاء و الخبر فى وجهه و قال لى: إنه يخجل من أن يقابل رسول الله ـ عليه الصلاة و السلام ـ يوم القيامة و هو كاذب.. لقد قال لى: إنه عمل حساب ذلك اليوم و قد أوصاه الرسول ـ صلى الله عليه و سلم ـ و أوصانا بالصدق و هى صفته عليه السلام(الصادق الأمين).. أحمد قال لى ـ تقول نشوى ـ إننى أخشى من أن يحاسبنى الله عز و جل على وأد لينا بعد أن أمرنا عز و جل أن نمتنع عن وأد البنات و أخشى أن توأد لينا معنويا فلن يتركها الناس حين تكبر.. و قبل أن تكمل نشوى كلامها دق هاتف هند المحمول لتدرك أن الطالب هو ممدوح الوسيمى المحامى الذى يتولى القضية نيابة عن هند.
هند دون أن تنطق تفتح الهاتف المحمول.. هى تدرك أن نشوى ستفهم أنها سترد على من يطلبها و تنطق للمرة الأولى: أيوه أيوه يا أستاذ ممدوح يرد ممدوح الوسيمى المحامى: يا أستاذه ليكى عندى مفاجأة.. لكن التليفون مش هينفع إنت فى البيت.. الدكتور و الدكتورة عندك أنا عايز أجيلكم دلوقتى.
بدأت هند تصدق كلام نشوى وأن الأمر جد و ليس هزلا لكنها كمن يريد أن يصدق سألته: أستاذ محمود إيه المفاجأة؟ حاجة تخص القضية؟ يرد الوسيمى: القضية.. يا أستاذة القضية خلاص.. التليفون مش هاينفع إنتو فين؟ ترد هند: أحمد كلمك؟ قال بحسم: لا.. أقل من أجزاء من الثانية مرت على هند كأنها الجحيم، لم ينته إلا عندما أضاف الوسيمى: أحمد ما كلمنيش.. المحامى بتاعه هو اللى كلمنى شوفى أنا هاقولك اللى حصل المحامى بتاعه طلب منى نقعد مع بعض.. و هو لسه ماشى من عندى.. جيت فتحت المكتب مخصوص علشان أقابله أكد لى إن أحمد الفيشاوى قرر الرجوع للحق.. و إنه موافق على كل طلباتنا مش بس كده و كل أمنياته إنك تسامحيه و ما تكونيش دعيتى عليه الشهور اللى قاتت و إنه مش بس عايز ينهى الموضوع و يعترف بالبنت و بكل طلباتنا و بس، ده كمان عايز يعمل فرح كبير يشهد عليه العالم كله..و تسافروا إنتو الثلاثة تريحوا أعصابكم بره مصر.. و أبلغنى إن الفيشاوى الكبير مش معترف و إنه سافر إلى الأسكندرية الإسبوع اللى فات ريح أعصابه و رجع متغير وواضح إن ضميره صحى و إتغير وو عرف إنه مايصحش و هو مؤمن بالأفكار الناصرية و اللى أهم حاجة فيها العدل و المساواة بين الناس إنه رغم كده يظلم حد و يكون سبب فى تعاسة حد.
كانت هند تسمع لا تريد أن تقطع كلام المحامى و لا تريد أن تعود لترد على نشوى كانت تريد أن تستمع و تكمل الإستماع إلى حين يأتى أحد ليشهد على وجود المكالمتين ربما وقتها ووقتها فقط تتأكد أن ما يجرى علم و ليس حلم و أن حلمها الكبير بات أقرب إلى التحقيق و أنه آن الأوان أن تعود الحياة إليها أو تعود هى إلى الحياة.. وداعا للمحاكم والجلسات وداعا للصحفيين و رزالتهم وداعا للمصورين و غلاستهم وداعا للغمز و اللمز و مصمصات الشفايف من البعض كل حين وداعا للنظرات الجارحة التى تخترق إحترامها لنفسها قبل أن تخترق جسدها وداعا لنظرات الشفقة و التأييد أو حتى تلك النظرات اللئيمة الخبيثة غير اللائقة من الكثيرين من الآن سيلتئم الشمل.. كانت تفكر فى كل شىء و فى يدها سماعتان إحداهما للتليفون الأرضى مع نشوى و الأخرى للمحمول مع ممدوح الوسيمى لكن ها هى ذى المفاتيح تعبث فى باب المنزل.. فيما يبدو أن أحد الوالدين قد حضر، لحظات قليلة يدخل الوالد مبتهجا، ضاحكا مستبشرا تتبعه زوجته و كأنها بنظراتها و حركة يديها و خطواتها تلقى هموم الدهر كله.. إنها لكل النظرات التى تحلم بها أى فتاة من أمها يوم الليلة الكبيرة.
ليلة الزفاف ليلة العمر هى تراها الآن.. الأم تشعر بها لأول مرة تقترب منها.. تتسمر هند فى مكانها و كانها تريد أن تصرخ طمنونى إجعلونى أصدق أقرصونى فى ركبتى لم تنطق هند بكلمة واحدة من هذه الجمل لكنها قالت بنظراتها التى أصبحت فيها ملقية جيدة لكلمات اللحظات القادمة: لكن الأم بهدوء تصل إلى هند و تسألها: عارفة مين معانا يا حبيبتى؟ قبل أن تنطق تنظر هند إلى الباب الذى وقف عنده والدها الدكتور حمدى الحناوى و كانه ينتظر و يرحب بضيف وقف عند الباب لكن قبل أن تكمل الأم يدخل الفنان محمود الجندى يمزح مع هند و يشيع جوا من المرح و المودة دائما ما يشيعه الجندى فى أى مكان يذهب إليه..إنه صديق الفيشاوى الكبير و عشرة عمر بدأت من المعهد و إستمرت فى مسرح الطليعة مع الفيشاوى الكبير و زوجته الفنانة سمية الألفى و آخرين كان منهم الراحل إبراهيم عبد الرازق و فيما يبدو أنه لعب دور فى المسألة هكذا فهمت هند و هكذا تساءلت فى سرها لكنها و رغم الهاتفين اللذين تحملهما و كل طرف من السماعة الأخرى يتحدث فلايزال الوسيمى يكمل الموضوع و لاتزال نشوى تلاحظ صمت هند و تنادى عليها لكنها رغم ترحيبها بالفنان محمود الجندى و شكرها لسعيه و مسعاه لكنه مع كامل الإحترام له ليس هو الشخص الذى تنتظر دخوله إنها تريد شخص آخر واحدا غير الجندى إنها تنتظره هو و كم من الأيام و الساعات و الدقائق و اللحظات إنتظرته.. يقطع صمتها الجندى و الحناوى وهما يسألانها عارفة مين معانا يا هند؟ الذهول هو الموقف كله.. الصمت هو الرد.. تكاد يغمى عليها فقدانها للوعى أقرب من الوعى و غيابها عن الدنيا أقرب لها من كل الدنيا و من خارج الباب أقرب إلى خيالها من كل من حولها.. يقطع صمتها من جديد صوت والدها الذى ينادى إدخل يا حبيبى.
و فى لحظات مرت كأنها سنوات طويلة على هند و كأفلام السينما العربية يقترب الحبيب.. و تنتظر الحبيبة و الشهود فى المكان و دقات كعب حذاء الفيشاوى تشى بموقعه من الباب تتأكد أنه هو.. هو ذا ظله يبدو جليا من خلف الزجاج ها هو ذا طيفه ها هى ذى رائحته إنه حبيبها زوجها أبو إبنتها عاد إليها رجع.. هل تجرى عليه تحتضنه و تقول حمد الله على السلامة من الغياب.. الغياب عن الوعى و العدل.. أم لا داعى لتفتح صفحة الماضى؟ إنها صفحة الألم.. المستقبل أهم.. أولى من التفكير و الكلام أشياء مهمة يجب ترتيبها هناك زواج هل تفهمون: هكذا تقول ـ زواج.. زفاف.. فستان.. بدلة.. فرقة.. قاعة.. مأذون.. زغاريد.. معازيم..صحافة و تليفزيون لكن قبل أن يدخل أحمد الفيشاوى تستيقظ هند الحناوى من الحلم إنها تحلم و نحن حلمنا معها.. الأغلبية الكاسحة كانت متعاطفة معها.. و الحلم الفائت حلم الأغلبية التى حلمت بأن تعود السعادة إلى أسرتين و إلى شابين فى عز الشباب لكن طافت بهما الدنيا فى أحزانها، و حامت حولهما دعوات الشياطين.. و يبقى القول الفصل للمحكمة فى 28 يونيو القادم!

[DR.BLUEROSE]

نفسي اعرف سبب واحد لاهتمام الناس بموضوع احمد الفيشاوي و هند الحناوي هما ليسا اكثر من شابين فاسدين كل الفكرة ان احدهما مشهورا

و انا لم ار الاغلبية الكاسحة التي تعاطفت معها و عن نفسي لم اتعاطف مع اي منهما

هم ليسا قاصرين بل بالغان عاقلان و كل منهما مسئول عم يفعل و تصوير اي منهما كضحية اساءة بالغة لكل الاخلاق

[محمد حبيب]

ياراااجل؟؟ مبروك!!

[el7awadeet]

ايه يا محمد يا حبيب ؟
ما تقرأ اللى مكتوب
يا بنى ما اتجوزوش ولا حاجه
يا رب يا بنى يتجوزوا لحسن بقى شكلنا وحش اوى
وصدقنى يا دكتور بلو روز مش موضوع فساد والا ماكنتش شوشرت على نفسها
الموضوع اكبر من كده
الموضوع كبير كبير كبير
ربنا يهدى العاصى

[el7awadeet]

بس ايه المواقع الجامدة دى
لا صحيح موقوع جميل تسلم ايدك

[DR.BLUEROSE]

يا رب يا بنى يتجوزوا لحسن بقى شكلنا وحش اوى

شكلنا وحش ليه؟؟
الموضوع لا يسيء الا الى طرفيه

وصدقنى يا دكتور بلو روز مش موضوع فساد والا ماكنتش شوشرت على نفسها

امال حكاية ايه يا حواديت؟؟

[samarbreeze]

السلام عليكم,
الأخت (حواديت) ,اصبح الموضوع يصيبنى بالغثيان ,يمكن لأن حياتنا بقت متمحوره حول حاجات تافهه و ملهاش لازمه,المشكله دى دوشنا بيها الاعلام و الصحافه اكتر من اخبار العراق,مشكله هند و احمد ممكن تترجم لقضيه (نشوى و محمود)و (بدوى و فكيهه) المشكله دى موجوده من زمان و هتفضل موجوده لأن هى دى الدنيا مش ممكن الناس هتتوقف عن فعل الأخطاء,
يجوزوا مايجوزوش يخلفوا مايخلفوش اعتقد دى مشكلتهم هم مش مشكلتنا احنا , واعتقد انى هرفع دعوه عليهم هما الاثنين بسبب الازعاج اللى عملوه الفتره اللى فاتت,تمنياتى لك بالتوفيق,السلام.....

سمر

[ام سلمى]

يا سلاممممم

هو فيلم عربى علشان يرجعلها فى الاخر
ما هى افلام زمان بتاعت شادية(ربنا يغفرلها ويرحمها) وعماد حمدى دى
هى اللى ضيعت اجيال عارفه لو رجع فى الاخر واتجوزها وعاشوا فى سعادة وخلفوا اولاد وبنات تبقى دى دعوة لكل بنت ياله مش مشكلة اتجوزى عرفى واتهبدلى شوية فى المحاكم وبعد كده حبيب القلب يرجعلك غلطان وندمان

انا فى راى ان الموضوع كله ..............
ياله ربنا يسهل لعبيده

[.'D/_'D:/]

الصراحة أحنا قرفنا من أحمد وهند ماينحرقوا الأتنين ونخلص

[الديب]

ايه الموضوع المقرف ده...


كفاية بقى كلام على الناس...و كمان أوسخ فئة في المجتمع..الممثلين و المغنيين
أكيد الفئة دي أخبارها كلها كده...

تفتكري يا أخت "حواديت" ان من الصحيح اننا ننشر وساختهم !!

[el7awadeet]

السلام عليكم ورحمة الله وبركاته


والله العظيم لحد دلوقتى كتبت تلات ردود والكمبيوتر يهنج ما يتسيفوش
هاحاول اختصر اللى عاوزه اقوله
اولا شكرا ليكم على الرد وعلى التعبير عن ارائكم
الموضوع فعلا كبير زى ما قلت
مش زى ما وصفتوه ده من وجهه نظرى وكلنا مشتركين فيه بافكارنا الرجعية


اولا : الراجل ما يعيبوش حاجه
ليه بقى ان شاء الله ربنا ما هيفرق بين رجل ومرأة وهوه بيحاسبنا ( انا ما بطالبش بالمساواة لان مافيش مساواة اساسا) والراجل حر يعمل اللى هوه عاوزه يمشى يتجوز عرفى براحته هوه مش خسران حاجه والبنت لا طبعا والحقيقة انهم الاتنين خسرنين ادام ربنا طبعا مش ادام ثقافتنا المعقدة وده بيخلق استهتارعند اى شاب

ثانيا: الولد منتج والبنت مستهلك مهما ان كان
اسال اى واحد بتحب اهل باباك اكتر ولا اهل مامتك هيقولك اهل بابايا بيعاملونا وحش انا بحب اهل ماما وده فى الغالب لانهم مستكترين الباشا ابنهم على الست المسكينة طبعا ماهو شقيان وتعبان لكن هيه مفيش بقى مراعاة لدورها العظيم فى تربية الاولاد او فى دورها كعاملة برة البيت وده برضو يدى الحق للولد يامر اخته ترتب سريره وتغسل هدومه وتحضر له الاكل
وله ردت ايه يا بنت بتردى على اخوكى طب خدىىىىىىىىى ااااااااااااه
والله بيحصل وده بقى بيخلق كبت نهايته انفجار وانحراف

ثالثا : ودى الكارثة ... وسائل اعلامنا الجميلة
البنت بتحب وتخرج وتتفسح وتتجوز عرفى وتخلف عرفى واهلها يعرفوا فيتجوزا عادى خالص
احنا امريكين استايل ( زى ما قلتى يا زهقانة) واهم حاجه الحب مش مهم الاخلاق او الفروق الاجتماعيه والادبية لا لا لا الحب اقوى من كل شىء
تيجى بقى للواقع فالموضوع مختلف تمام الاختلاف
ارتفاع نسبة العنوسة
ارتفاع نسبة البطالة
وطبعا لاننا شعب الاستسهال فيلا نتجوز عرفى وربنا يبقى يحلها من عنده

رابعا : ودى اهم حاجه بعدنا عن الدين
عارفين عملنا عندنا فى الكلية استفتاء عن الزواج العرفى فكان اول سؤال هل تعتقد انه مباح -حرام- لا اعرف- ماليش فيه
والمفاجاه ان النسب الكبيرة كانت من نصيب لا اعرف ومباح
جهل دينى تقولوا ايه!!!
والله حصل

طبعا انا بتكلم بصفة عامه جدا
يعنى ماحدش يرد يقولى انا ابن حلال واهلى متحضرين
انا بتكلم بصفة عامة يا جماعة
وانتو طبعا عارفين لو الواحد ما اتقاش ربنا فخلاص
اذا لم تستحى فافعل ما تشاء
والا بقى تبقوا خوجات ولا حاجه
يا ريت يكون الرد وصل يا بلو روز وتكون فهمت قصدى كويس
ياريت يا سمورة تكونى اقتنعتى ان الموضوع مش بسيط
ويا مصرية انه مش تافه
ويا دى انهم حتى لو اتحرقوا هيروحوا وييجوا غيرهم
ويا طارق انه مش مقرف وتشكر يا عم على الرد ده
ولو كان كده فعلا ما كنتوش دخلتوا ولا ايه
بس بجد اشكركم من كل قلبى

والسلام عليكم

[ارشميدس]

صراحة انا في الموضوع ده مش فاهم حاجة اطلاقا..

[el7awadeet]

ليه بس يا ارشميدس ؟؟؟
ده حتى الموضوع معقد ومكلكع
وانت ادها وادود طبعا

سمى كده بس وهتلاقى نفسك بتحل

[DR.BLUEROSE]

بصراحة الرد موصلش خالص يا حواديت
و انا بالتاكيد لما قلت رايي كان رايي في الموضوع نفسه مع خالص احترامي ليكي

و في ردك اثرت مجموعة موضوعات يستحق كل منها ان نفرد له موضوع مستقل و نناقشه و ياريت تعملي كدة لانها فعلا موضوعات مهمة و اكثر اهمية من جواز هند و الفيشاوي

تحياتي

[el7awadeet]

المواضيع كلها بتصب فى بعضها

ده احلى رد فعلا
بس بجد اتقهرت لما قلتلى ان الرد ما وصلش
وان المواضيع اهم من جوازهم العرفى
المواضيع= الاسباب
الجواز العرفى =نتيجة
ايه يا دكتور ده احنا زمايل يعنى تفكير واحد
وعن المواضيع فان شاء الله ولو انى مش كبيرة كده عشان اكتب فى المشاكل العظيمة دى
تحياتى ليك يا دكتور
وعلى فكرة انا كمان بحب الازرق
احيك على اختيارك
صافى