علاج الكرش من غير ولا قرش

[dr_sho]

[ALIGN=CENTER]كرش وصلعة لزوم الصنعة
الصلعة كنا إتكلمنا عليها فى موضوع

[ALIGN=CENTER]قرعة بنت أختى [/ALIGN]

وقلنا إنها بتقتل حلم الوسامة
الكرش بقى أخوها التوأم
بس المرة دى الستات والرجالة فى الهوا سوا ومافيش حد احسن من حد

وطبعا الكرش عبأ كبير
والتخلص منه مريح جدا ضمن التخلص من اعباء الحياة
وكفاية علينا عبأ توفير لقمة العيش واللهث المستمر وراء الحياة
يعنى مش عايزين أعباء إضافية
علشان كدة عايزين نعلنها سويا
دعوة للتحرر
من ذلك الذى نحمله أمامنا أينما ذهبنا
فهيا نعود فراشا
بكام ياترى ؟
ماهى ما فيش حاجة اليومين دول من غير فلوس
أبدا من غير ولا مليم
تخيلوا
بس التمن حاجة تانية خالص
التمن إرادة
التمن إلتزام
والإرادة طريق السعادة
المهم
العلاج المجانى ده عبارة عن ايه ؟
هنقوله كدة عنواين وبعدين نرجع نشرح
1.وقاية
2.مشى
3.تمارين رياضية
4.عوامل أخرى طيب ممكن تفسرى
حاااااضر

أولا الوقاية خير من العلاجمبدأ متفقين عليه
إن أفضللى 100 مرة إنى أتجنب الأسباب قبل حدوث النتائج
يبقى الوقاية هنا معناها تجنب الأسباب
أسباب ؟
هو الكرش ليه أسباب ؟
أيوة ..........
نقولها كدة كنقاط علشان ما نطولش *
1.دهون مترسبة فى الجدار الأمامى للبطن
أو مترسبة فى الأحشاء الداخلية مسببة لكبر حجم المعدة والأمعاء
وطبعا ترسب الدهون ده سببه نفس أسباب السمنة (عادات غذائية خاطئة )

2.عادات غذائية خاطئة
الإكثار من الوجبات السكرية والنشوية والدهنية
الإستعجال فى الأكل يؤدى إلى إبتلاع الهواء وبالتالى تضخم المعدة والأمعاء.
كثرة شرب الماء والمشروبات الغذائية أثناء الوجبات
التركيز على تناول وجبة واحدة دسمة فى اليوم وإهمال باقى الوجبات بهدف التخسيس مثلا.
النوم بعد العشاء مباشرة
عدم تنظيم أوقات الوجبات
التغذية العشوائية للحامل وعدم ممارسة الرياضة أثناء الحمل وبعد الولادة.

3.عوامل اخرى :
قلة الحركة والخمول وكثرة النوم والإسترخاء والكسل.
التدخين والشيشة تؤدى إلى دخول الهواء فى الأمعاء.
أمراض القولون وتجمع السوائل فى التجويف البطنى .
رفع الأشياء الثقيلة بطريقة عشوائية تؤدى إلى هبوط المعدة والأمعاء.
كبر السن يؤدى غلى ضعف العضلات.
ضغوط نفسية أو قلق يؤدى إلى إلتهام كميات كبيرة من الطعام.
إن كانت هذه الأسباب
إن تجنبناها
فمن اين ينمو الكرش ذلك العزيز؟؟؟؟
ثانيا المشى

إن كان على أنا نفسى أكتب المشى أولا
او نفسى أكتب المشى ثم المشى ثم المشى
ولكن ما باليد حيلة
اللى أنا عايزة أقوله إن المشى
مهم
ويمكن من غيره الموضوع كله ما يبقاش جايب همه
ونخللى الكرش مكانه أفضل
طيب ليه مهتمة سعادتك بالمشى قوى كدة
لإنه مهم
مهم إزاى ؟

:luck:مهم لإنه بيحرق لحضرتك 300 سعر حرارى فى الساعة لو ماشى بسرعة متوسطة ولو مديت الخطاوى حبة هيبقوا 350 سعر حرارى فى الساعة الواحدة .
:luck:مهم لإن فائدته بتفضل ممتدة لمدة يومين او اقل حبة لإن العضلات بتفضل منقبضة فى الفترة دى والإنقباض ده بيحرق فى الدهون.
:luck:مهم لإنه بيقوى عضلات البطن والفخذين .
:luck: مهم لإنه بيساعدك فى التخلص من ترهلات الجلد فى منطقة البطن
:luck: مهم لإنه بيفيد فى علاج المضاعفات الناتجة عن الكرش زى إرتفاع ضغط الدم ونسبة الكولستيرول.
يااااااااه قد كدة مهم
لأ
ده مش مهم بس
ده أفضل دواء مستخدم
ايه ياأفندم ...بتقولى دواء؟
أيوة
دواء
وطالما دواء يبقى لازم له جرعة ومواعيد وطريقة إستخدام
ولو ما إتمشاش عليهم هيفقد صلاحيته كدواء

الجرعة :
ساعة فى اليوم
كتيييير
معاكم حق
لازم الوقت يقل حبة
خلاص على الأقل 3 مرات فى الأسبوع
وأكرر على الأقل
المواعيد: والمعدة فاضية
أفضل وقت بقى فى الفجر أو بعد العشاء ب3 ساعات
وبصراحة بانتهزها فرصة
وأهمس فى أذن إخوتى
أن يذهبوا لصلاة الفجر مشيا فى مسجد بعيد عن البيت بمسافة كافية
فيبقى كدة اتنين فى واحد
كل خطوة عليها ثواب ويبقى مشينا
رياضة الروح والبدن
وبشر المشاءين فى الظلمات بمنابر من نور يوم القيامة .

طريقة الإستخدام بس ياريت قبل ما تقروها ماحدش يقول والله البنت دى عقلها فيه حاجة
والله انا بريئة
الكلام ده مش بتاعى
وما ينوب المخلص إلا تقطيع هدومه
أنا باقول كدة لإنى أول ما قريت المفروض نمشى إزاى إندهشت وفغرت فاهى (فتحت بقى يعنى بالعربى ) وقلت مين اللى هيعمل كدة
بس حسيت إن كل حاجة ممكن تيجى بالتعود ولو أنا حطيت الطريقة فى دماغى يومين تلاتة هاتعود عليها
بلاش لك بقى وأدخلى فى المفيد
حااااضر
آسفة
هو فى الحقيقة فى شروط لإستخدام المشى كدواء

إمشى إمشى إمشى وما تقفش إلا وإنت فعلا حاسس إنك مش قادر تكمل (يعنى مش تمشى خطويتين وتقف تتفرج على الناس اللى رايحة واللى جاية وبعدين تمشى تانى علشان تقف بعد خطوتين تشترى ترمس وفول سودانى ).
وسع الخطاوى كإنك بتجرى جرى بطئ
حركة إيدك تبقى عكس حركة رجليك يعنى رجليك اليمين قدام تبقى الإيد اليمين بتطوح لوراء والرجل الشمال وراء يبقى الإيد الشمال بتطوح لقدام.
أن ظهرك يكون مفرودًاً أثناء المشى حتى لا يسبب بروزًاً في منطقة البطن.
أن يلامس مشط القدم الأرض قبل الأصابع والكعب.
أن يكون المشى بصفة منتظمة.. ويتم زيادة مدته تدريجيًا.

كدة يبقى أولا وثانيا إتكلمنا عليهم بالتفصيل الممل جدا
وعلشان التفصيل ممل جدا والناس نامت
فنخلى ثالثا ورابعا بإذن الله نتكلم عليهم بكرة

المصادر المستخدمة فى إعداد هذا المقال
:luck:موقع الدكتورة ليدا للسمنة
:luck: موقع لكِ ركن السمنة

[/ALIGN]

[army m@n]

عندى كرش ؟؟
مفتكرش

[محمد شحاتة]

والله يا دكاترة مش عرف نقول اية منورين كدة زى الكتاب اللى فوق دة دايما

وصحيح الأكل الكتير زى اللى بيحفر لنفسه
تسلم الموسات والكيبوردات

جزاكم الله خيرا

[dr_sho]

[ALIGN=CENTER][/ALIGN]

[ALIGN=CENTER]واضح[/ALIGN]



شكرا على مرورك يا دكتور ارمى مان

[dr_sho]

[ALIGN=CENTER]جزانا وإياك يا أخ محمد
شكرا لعذوبة الطلة [/ALIGN]

[حماده الجن]

على فكره

موضوع الشرب أثناء الاكل مش من الاسسباب بتاعت الكرش

لأنه بيقلل حجم المعده االى المفروض الواحد يملاه أكل

يعنى لو معدتى بتأخد 25 كيلو وانا شربت 20 كيلو ميه

يبقى مش باقى إلا 5 كيلو بس للأكل

كمان ألميه أثناء الاكل بتخلى الاكل سائل فى المعده

فتقل مده بقائه فيها
فمش تتمدد أكتر

لذا ينصح بالميه الكتير

المصدر : برنامج ريجيم * ريجيم

قناه المحور

وكان في كمان دكتور كلى كان قاعد

وقعد يقول اشرب ميه عمال على بطال

[dr_sho]

الأخ حمادة
كان زمان فى رجيم معترف بيه اسمه رجيم الماء
بيقول نفس الكلام اللى حضرتك بتقوله نقلا عن الموقع المذكور
بس فيه ناس عارضته بشدة وغلطته كمان
وقالت إن المية دى بتعمل على تمدد المعدة مع الوقت
يعنى بتكبر حجم المعدة
فبتستوعب كميات أكبر من الطعام
ده غير إن الشرب أثناء الأكل مش بيدخل مية بس
ده بيدخل مية وهوا
يعنى بإختصار كلام الموقع ده قديم حبة

بالنسبة لدكتور الكلى
طبعا كلامه مضبوط 100 % لإنه قصده شرب المية عموما (مش أثناء الأكل )
فالماء له فوائد صحية جمة ومتوافق عليها
ولكن ليس أثناء الأكل

تحياتى
وشكرا للمرور

[آيات الجارحى1]

انا همشى بقى واسيب المنتدى الكئيب ده

ايه يا دكتورة بس فى ايه بقى ايه المواضيع الروعة دى...
اوعدك(بقرااااااااااااااااااااءة كل مواضيعك)..
ولما تقوليلى حلول نعقولة ابقى انفذها يا باشمهندس

[عبقرينو]

جزاك الله خيرا
بالنسبة لي أهم شيء الرياضة ويأتي بعدها تنظيم الأكل، وكلاهما مهم
وإن كانا بصفة عامة يتساويان، ولكن هذا رأيي الشخصي
وأعني الرياضة بكل أشكلها
والمشي يندرج تحت الرياضة، ولعله الأنسب للبعض
وبالنسبة لبعض الاختلافات في الآراء فهذا طبيعي كما هو الاختلاف في كل شيء
حتى نتائج الأبحاث الطبية قد تختلف، ولهذا تختلف نظرة الأطباء وأخصائيي التغذية
طحياطي

[placebo]

مش عارف ليه اول قرأت موضوعك يا دكتورة افتكرت المشهد الخالد ايه بتاع ميمى شكيب لما كانت بتعاتب جوزها وتقوله " اقدمك للناس ازاى ؟؟؟ اقولهم البيه .. جوزى .. وحضرته يبقى كرشه ؟ "
اعتقد برضه ان الستات الحوامل بيشتركوا مع الرجالة اصحاب الكروش فى شيء تانى .. الاتنين رجليهم وحشاهم عشان مبيشوفوهمش كتير..

[engalshaimaa]

الاتنين رجليهم وحشاهم عشان مبيشوفوهمش كتير

[هوبى العسولة]

اريد حلة :confused:

[dr_sho]

ولما تقوليلى حلول نعقولة ابقى انفذها يا باشمهندس

وايه بس اللى مش معقول فيها ياتوتو ياسكر
هى بس عايزة مجهود منا
وإحنا غتعودنا على الحاجات السهلة
نفسنا فى زرار ندوس عليه نخس وبعدين ندوس عليه نتخن

حتى نتائج الأبحاث الطبية قد تختلف، ولهذا تختلف نظرة الأطباء وأخصائيي التغذية

إختلافكم رحمة يا دكتور
تحياتى لمرورك
ودمتم

اعتقد برضه ان الستات الحوامل بيشتركوا مع الرجالة اصحاب الكروش فى شيء تانى .. الاتنين رجليهم وحشاهم عشان مبيشوفوهمش كتير..

اريد حلة

حلة إيه يا هبة
حلة محشى ؟

[dr_sho]

[ALIGN=CENTER][/ALIGN]

نيجى بقى لثالثا
الرياضة والتمرينات

ياناس يانشيطة
التمرينات بقى ليها فايدة عظيمة
وجميلة
و
أقول الفايدة اسهل
شوفوا ياجماعة
التمارين الرياضية مهمة
مهمة لإنها بتزود فاعلية عمل القلب وبتحسن الدورة الدموية
مهمة لإنها بتزود اللياقة البدنية
مهمة لإنها بتساعد على تناسق العضلات
مهمة لإنها بتحسن عملية الهضم والنوم
مهمة لإنها بتحسن قدرة الرئتين من الإستفادة من الأوكسجين
مهمة لإنها بتقلل من الوزن الزائد وبتقلل الكولستيرول
مهمة لإنها بتساعد على مستوى معين للسكر فى الدم
خلاص
آمنا بالله
عارفين والله إنها مهمة
ومصدقين
إدخلى فى المفيد
ناس حتة قبل المفيد
بس مهمة علشان المفيد يبقى مفيد
دلوقتى حضرتك ناوى تلعب رياضة
جميل طبعا
بس ياريت حاول

حاول تختار مكان واسع ومناسب وياسلام لو كان مكان مفتوح فى الهواء الطلق يعنى لإن التمارين الهوائية مهمة لحرق السعرات الحرارية ولتحسين كفاءة القلب والرئتين والجهاز الدورى وتخفف البطن
بس بقى مش معنى كدة إننا عايزين الستات يطلعوا يجروا فى الشوارع
والنوادى تملى آنسات ومدامات لابسيت ترنجات وبيتنططوا قدام الناس
تيجى تقول يا أهل الخير حرام
ما يصحش
تبقى هتاكلك وتقول بعلو صوتها أصح وضع للتمارين فى الهواء الطلق
معاكى حق طبعا
ده فى حالة إن ربنا عاطيكى ومتجوزة واحد باشا فاتح لك نادى مخصوص أو لو عندك جنينة تبقى فيها مطمئنة على نفسك ولو عندك بالكونة متقفلة بستارة تأدى الغرض
ولو ما فيش
الله يخليكن فى بيوتكن أولى بيكن ولو ما ينفعش خلاص الكرش ارحم
اللهم هل بلغت اللهم فاشهد

حاول تبقى الهدوم اللى لابسها مريحة وخفيفة وقطنية

حاول تبقى مستريح قبل ما تمارس الرياضة يعنى ما تبقاش مجهد وروحك طالعة وتعبان وزهقان
حاول يبقى بعد الأكل بفترة كافية (3 ساعات مثلا)
حاول يبقى فيه تدريب يومى ولو مشغول قلل فترة التدريب بس حافظ على كلمة يومى دى

حاول تؤدى التمارين بهمة ومرح وتركيز وجدية
جدية مش يعنى وإنت مكشر
لأ يعنى لازم تعرق وتنهج وتتعب

حاول تاخد نفس عميق بين كل تمرين والتانى

حاول تحافظ على إستقامة ظهرك اثناء تاديتك للتمارين لإن ده مهم جدا لعودة البطن لوضعه الطبيعى

حاول تعمل التمارين دى قدام مراية

حاول تعمل االرياضة على سطح مستوى (يعنى ما تنزلش فى شارعمش متسفلت ومليان حفر وهاتك يارياضة )

حاول تعمل تمديد "إطالة" عضلات الجسم بعد كل تدريب برفع الذراع إلى أعلى ومحاولة لمس أعلى نقطة على الجدار بأطراف الأصابع بالشمال مع الثبات عند أعلى نقطة لمدة خمس ثوان.

حاول تسجل وزنك كل ثلاثة أيام قبل الإفطار لتعرف مدى الاستفادة.

ولو

لو شعرت بدوخة او صعوبة فى التنفس أو ألم مفاجئ عند أداء التمارين توقف وأبدا فى تمارين الإسترخاء والتنفس العميق

لو شعرت ببعض الآلام فى العضلات والمفاصل بعد التمارين فى اليوم التالى فهذا شئ طبيعى ويمكن معالجة ذلك بالماء الدافئ مع فنجان ملح لمدة عشر دقائق مع التدليك للعضلة المتألمة.

لو كان الجو حارا فيجب الإكثار من السوائل بشرب الماء المعتدل بعد التدريب وقبله ورشفات أثناء فترات الراحة

لو كنت تشكو من أى مشكلات صحية فى القلب أو المفاصل أو أى مرض آخر استشر طبيبك قبل المزاولة
و
أظن كفاية كدة
ندخل بقى فى التمارين الموصوفة لإزالة الكرش
فى الحقيقة فيه تمارين لإزالة الكرش
:luck:. رقود على الأرض ظهرا مع وضع الذراعين جانبا.
ترفع الرجلان فى عشر عدات ليكوّن الجذع مع الرجلين زاوية قائمة.
ويتم تثبيت الرجلين في هذا الوضع لمدة عشر ثوان.
ثم تخفض في عشر عدات
يكرر هذا التمرين عشرين مرة تدريجيا.

:luck: رقود على الأرض ظهرا مع وضع الذراعين جانبا.
يرفع الجذع عن الأرض مع الإمساك بالساقين ورفعهما إلى أعلى ارتفاع ممكن، ثم العودة لوضع البداية
ويكرر هذا التمرين 15 مرة.

:luck: الرقود على الظهر مع تشبيك اليدين خلف الرأس مع ثني الركبتين باتجاه الصدر .
ترفع الساقان لأعلى 90 درجة مع الجذع
تثنى الركبتان باتجاه الصدر مرة أخرى .
ثم تمد الساقان إلى الأمام 45 درجة
ثم العودة إلى وضع البداية .
يكرر هذا التمرين لأعلى وللأمام 10 مرات .

:luck:الرقود على الأرض مع الإبعاد بين قدميك وساقيك مع تشبيك اليدين خلف الرأس.
تسحب الرأس والكتف إلى أعلى مع محاولة تحقيق ملامسة بين الكوعين مع الحفاظ على هذا الوضع لمدة 10 ثوان .
ثم العودة الى وضع البداية
ويكرر 10 مرات .

:luck:الرقود على الأرض ظهرا مع ثني الركبة حتى يقترب الكعبان من الحوض .. وتشبك اليدان خلف الرأس .
يتم محاولة الوصول إلى وضع الجلوس ثم العودة إلى وضع البداية مع الاحتفاظ بالقدمين كما هما فوق الأرض .
ويكرر هذا التمرين تدريجيا 10 مرات .

:luck:يمكن تكرار التمرين الخامس مع عدم ثني الركبتين، تستمر الساقان ممدودتين على الأرض .
مع محاولة الوصول إلى وضع الجلوس وملامسة الكوعين للركبتين
(10 مرات)

:luck: الرقود ظهرا على الأرض مع مد الساق اليمنى على الأرض وثني الركبة اليسرى باتجاه الصدر بحيث تمسك اليدان بالركبة المنثنية .
محاولة الوصول إلى وضع الجلوس مع الإبقاء على الإمساك بالركبة ثم العودة لوضع البداية.
ثم يكرر التمرين مع القدم اليمنى.
ويتم تكرار التمرين 10 مرات.

:luck:جلوس على الأرض مع الإبعاد بين القدمين والساقين مع مد الذراعين جانبا.
يلف الجذع لتحقيق ملامسة بين اليد اليمنى والقدم اليسرى ثم العودة إلى وضع البداية .
يلف الجذع لتحقيق ملامسة بين اليد اليسرى والقدم اليمنى ثم العودة إلى وضع البداية .
هكذا يمينا ويسارا 20 مرة .

:luck:وقوف مع الإبعاد بين الساقين قليلا مع وضع اليدين في الوسط.
يثنى الجذع جهة اليمين في أربع عدات ثم العودة إلى وضع البداية ، ثم يثنى الجذع جهة اليسار في أربع عدات ثم العودة
.. وهكذا 15 - 30 مرة .

:luck:وقوف مع الإبعاد قليلا بين الرجلين ورفع الذراعين لأعلى .
يثنى الجذع لأسفل للمس الأرض مع عدم ثني الركبة ثم العودة لوضع البداية .
يكرر هذا التمرين من 15 - 30 مرة .

خلاص كدة ثالثا خلصت وربنا سهلها والحمد لله
ناقص كدة رابعا ويبقى مافيش كرش


رابعا دى بقى سهلة وبسيطة
علشان تزهق كل واحد نفسه ينزل كرشه

يعنى لو هتنام
حاول ما تستخدمش المراتب والفرش الناعمة لأنها تضعف عضلات البطن وتقوس الظهر.
وحاول ما تنامش على بطنك (والنوم على البطن عادة غير إسلامية نهى عنها الرسول المختار)

والله ما انا نايم
طيب هتقوم تقعد
خلاص
حاول وإنت قاعد ركبتينك يكونوا فى مستوى أعلى من وسط الجسم (الحوض)

زهقتونى
خلاص هأقوم اقف
طيب
بس
حاول أن تقف معتدلا (يعنى لو وقفت وظهرك ملامس للجدار يجب ان تلامس الجدار بالأطراف التالية : الكعب ، المقعدة وخلف الرأس.

بصراحة إنتم القعدة معاكم تحرق الدم
أنا ماشى علشان إتخنقت وعايز اتنفس بعيد عن الخنقة دى
مع السلامة
بس
حاول على قدر الإمكان تسحب عضلات بطنك مع الزفير وإنت بتتنفس فى كل وقت وفى اى مكان لإن ده هيحسن قوام حضرتك وتحسين القوام مهم جدا للتخلص من كبر البطن.

خلاص ياجماعة
الكرش نزل
أنا عارفة إنها نصائح كتيرة وتزهق
بس علشان يكون عندنا مرجع متكامل لإن الكلام ده متجمع من كذا مكان
يعنى ما بأقولش إنه يتنفذ كله مرة واحدة
بس نحاول واحدة بواحدة
وآسفة إن طولت
وجايز اكون زهقتكم لكن العشم كبير بقى فى الصدور المتسعة والقلوب الطيبة
والسلام ختام

[ALIGN=CENTER]

المراجع المستخدمة فى إعداد هذا المقال:
:luck:بلاغ كوم
:luck:موقع الدكتورة ليدا للتنحيف والتغذية

[/ALIGN]


[ALIGN=CENTER][/ALIGN]

[dorbaga]

السلام عليكم ورحمة الله وبركاتة,,,


رقيتك واسترقيتك ياحكواتي يا بني من كل عين ومصلتش على النبي , علية اضل الصلاة والسلام

منورة يا دكتورة وموضوع ع ع الكرش دا ا ا مش عوزين نتكلم عنه تاني عشان مينفعش نتكلم عن الناس وهما مش موجودين ن ن


ان شاء الله يكون في ميزان حسناتك ان شاء الله


اخوكم الحكواتي