طلبة شرطه والسواق وقانون الطوارئ !

[dr.shadow]

انا معظم صحابى فى كلية الشرطه أو الكليات العسكريه ... انتيمى بيحكيلى موقف حصل معاه ..الموقف ده آثر فيا جامد ... كان راكب عربيته هو واتنين صحابه وزمايله فى الكليه وماشى " مخالف " فى شارع .. وسواق عربيه نقل طالع من شارع جانبى داخل الشارع " داخل سليم فى اتجاه الشارع " السواق متخيلش ان فيه حد جاى مخالف وبالتالى كان هايخبطهم بس ربنا ستر .. السواق بيزعق لصاحبى وبيقوله مش تفتح ... طبعاً صاحبنا دمه فار .. ازاى يقول للباشا كده . نزل هو وصحابه من العربيه ونزلوا السواق وهاتك يا ضرب!وشتايم ايه بقى .. مش طلبة كلية شرطه !! السواق طبعاً قعد يعيط ويقول هاروح القسم .. هاكتب بلاغ .. فواحد فيهم قاله : روح يابن ***** قوله فلان بيه ضربنى !صاحبى بيحكى وبيقول بالنص " كان فاكر بروح امه ان المركز هيحميه !! " المهم السواق طلع على القسم وهما وراه .. قابلوا ملازم واقف فى الجنينه بتاعت القسم فالسواق قعد يعيط ويقول ضربونى يابيه . دول لما شافوه بيعيط ماكتفوش ونزلوا فوقه ضرب تانى لحد ما المخبرين جم خدوه .. وهما طلعوا على نائب المأمور " راجل محترم برتبة عقيد " .. بيحكوا للضابط اللى حصل الا والمخبرين داخلين بالسواق .. السواق قعد يعيط ويقول ضربونى يابيه وقالولى يابن **** .. انا امى**** يابيه ؟؟ انا امى **** ؟؟ العقيد قاله دول مش ضباط ؟؟ قاله آه يابيه . قاله يبقى امك **** !! ونزل فوقه ضرب يمكن أشد من الضرب اللى ضربوهوله !!

طبعاً صاحبى جاى يحكيلى وهو فرحان بالانتصار على السواق الشرير الوحش .. بس انا لما سمعت الحكايه دى حسيت ان فيه حاجه انكسرت جوايا .. حسيت بنفس الشعور بالذل والقهر اللى حس بيه السواق علشان ملوش ضهر .. حسيت بخنقه فظيعه لما سمعت صاحبى وهو بيقول " كان فاكر بروح امه ان المركز هيحميه !! " .. لو القسم ميحميش الغلابه .. مين يحميهم ؟؟؟؟ وباقوله من حقكوا قانوناً انكم تعملوا كده ؟؟ قالى : " ربنا يخليلنا قانون الطوارئ " ..... ساعتها مقدرتش اقول غير : حسبى الله ونعم الوكيل !!!


الموضوع موجود على مدونتى مع العديد من الآراء ... بس الآراء كلها أجمعت على شئ واحد ..... حسبنا الله ونعم الوكيل !!

[صناع الحياة2000]

خلاص البلد باظت وده مش موضوع جديد ان ظباط الشرطه يعملوا كده

حسبنا الله ونعم الوكيل

[zoom129]

حسبى الله ونعم الوكيل

[عيسى الدفراوى]

عشان كده يا صديقي العزيز ربنا عمره ما حيرزقنا برئيس ديمقراطي واجنا عايشين بالقهر

[فرحه]

كووووووووووووووووووووسة
وحسبنا الله ونعم الوكيل

[طاير يا هوا]

المشكله ان الداخليه اكتر وزاره بتخاف من الفضايح يعنى هم لو عارفين ان السواق الغلبان حيعرف ياخد حقه عن طريق القضاء او الصحافه او نشر الموضوع على الانترنت وده طبعا بيلوث سمعه مصر اكتلر ما هى ملوثه كان حيبقى فيه تصرف تانى
مش حيكون احسن اكتير بس كان حيبقى اقل اهانه للمواطن اللى المفروض ضابط الشرطه بسلامته فى خدمته

[مي المنوفيه]

في أمريكا يكتبون في الشوارع لافته عليها........

" لو كنت أنت بوش و رميت السيجاره في الشارع لتعرضت للمسائله و المحاسبه.."


في أمريكا بقي مش هنا....

[ام سلمى]

لما حبت عيال لسه طلبة
فى كلية الشرطة يعملوا كده
ده قمة الاستهتار
بس مين اللى علمهم كل الكم ده من الغرور
والسفالة

بس اسمحلى أسالك سؤال
انت دورك فين هنا
بتقول انه صاحبك
ليه ما قلتلوش انه غلطان
وانه بكده بيفترى على خلق الله
وان نتيجة ده وحشة
وان ربنا ما يرضاش بالظلم
ليه ما فهمتوش كده

انا طول عمرى ما بقبلش ضباط الشرطة بحس ان الغرور مزروع جواهم وكأنهم ملكوا الدنيا وما عليها ...............ربنا هو المنتقم الجبار

[ماســــه]

حسيت ان فيه حاجه انكسرت جوايا .. حسيت بنفس الشعور بالذل والقهر اللى حس بيه السواق علشان ملوش ضهر .. حسيت بخنقه فظيعه لما سمعت صاحبى وهو بيقول " كان فاكر بروح امه ان المركز هيحميه !! " .. لو القسم ميحميش الغلابه .. مين يحميهم ؟؟؟؟ وباقوله من حقكوا قانوناً انكم تعملوا كده ؟؟ قالى : " ربنا يخليلنا قانون الطوارئ " ..... ساعتها مقدرتش اقول غير : حسبى الله ونعم الوكيل !!!

يادكتور شدووووو

والله مش انت لوحدك الى حسيت بكدة

انا بجد اتضايقك

ياااااااااااااااااه ماهى الحكومة بتسرق وكله بيسرق يعنى جااااات على الضباط

ياسلااااام

منه لله الراجل الى ضرب السوااااااااق وسورى يعنى ومن صحبك كماااااان

سورى ماتزعلشى منى

لمن ده حتى لو ماكنشى صحبك انا كنت هااقول مكدة

[mona mahmoud]

حاجة تقرف

حسبي الله و نعم الوكيل

[محمود ع ح]

فى الصغر كنت حينما يسألنى أحد الكبار : (نفسك تطلع إيه لما تكبر) ، كانت الإجابة : (ظابط بوليس) ...
كنت وقتها أعتقد أن ضباط الشرطة يحمون المجتمع من (الحرامية) و (الناس الوحشين) .
ولكن ما هو الواقع الحقيقى لضابط الشرطة الآن ؟
ماذا لو سألنا أحد الشباب الذى يسعى لدخول كلية الشرطة : لماذا تريد أن تكون رجل شرطة ؟
لا أعتقد أنهم يسعون للمرتب ، أو لخدمة المجتمع .. ( الله أعلم )
ولكن الاعتقاد الذى ترسخ فى ذهنى هو أن أى شخص يسعى للانضمام للشرطة فى مصر إنما هو يبحث عن السلطة والنفوذ .. فقط ..
فى أمريكا (مثلا ) شعار الشرطة : الخدمة والحماية .. وهذا هو المفروض فى أى جهاز للشرطة فى أى مكان فى العالم .. ولكن فى مصر الشرطة تتعامل مع الناس بهذا المبدأ ولكن بالعكس .. أنتم ( أيها الشعب ) خدام للشرطة .
الشرطة فى مصر ظلت فترة من الزمن ترفع شعار ( الشرطة فى خدمة الشعب) ولكن بعد فترة غيرت هذا الشعار لـ ( الشرطة والشعب فى خدمة الوطن ) .. ماذا يقصدون حقيقة بهذا الشعار ؟ وماذا يعنون حقا بكلمة (الوطن ) هل يقصدون الحكومة والشرطة ؟
سؤال : لماذا لا يشعر المواطن المصرى بشعور إيجابى ناحية ضابط الشرطة أو أمين الشرطة أو مخبر .. أو شاويش .. الخ ، كل مشاعر المواطن المصرى ناحية الشرطى هى مشاعر سلبية .. كره .. حقد .. عدم ثقة.. احتقار .. خوف .. ، ارتبط ضابط الشرطة فى مصر بصفات مثل : التجبر والغرور و عدم الخوف من الله .
وسؤال آخر : متى يحدث التحول لضابط الشرطة ، بمعنى أنه يكون فى البداية مواطن عادى مثل أى مواطن ، وبعد انضمامه للشرطة يتحول إلى شخص آخر ينسى أنه من هذا الشعب المطحون الغلبان ، ينسى أنه مواطن مصرى يحتاج للشعور بالأمان والكرامة فى وطنه ، ينسى أنه فى يوم من الأيام كان ينظر إلى رجل الشرطة ويرجو منه أن يكون على قدر المسئولية التى من المفروض أن يكون مكلفا بها .
ولا حول ولا قوة إلا بالله

[طاير يا هوا]

يا اخ محمود انت فكرتنى هو ليه غيروا شعار الشرطه فى مصر من (( الشرطه فى خدمه الشعب )) اصبحت (( الشرطه والشعب فى خدمه الوطن )) يقصدوا ايه بالوطن يعن الارض والشجر والمبانى والحاجات دى والا ايه ؟؟

[محمود ع ح]

يا اخ محمود انت فكرتنى هو ليه غيروا شعار الشرطه فى مصر من (( الشرطه فى خدمه الشعب )) اصبحت (( الشرطه والشعب فى خدمه الوطن )) يقصدوا ايه بالوطن يعن الارض والشجر والمبانى والحاجات دى والا ايه ؟؟

ياليتهم يقصدون حتى المبانى والشجر ، أعتقد أنهم يقصدون أى شىء ماعدا المواطن وما له علاقة مباشرة وغير مباشرة براحة المواطن .. ، بمعنى آخر : طالما أنهم يحصلون من وراءك فائدة فأنت عندها تكون جزءا من الوطن .

[egy_princess]

انا مش عارفه اقول ايه
لاني فعلا حزينه على بلدنا لانها بقت كده
كل واحد مبيسدق يستغل منصبه علشان يعمل اللي هو عاوزه
ومش بيفكر حتى في اخواته

[dr.shadow]

طيب والعمل ؟؟؟؟؟

انا يمكن ماقدرتش الوم صاحبى جامد لأنى عارف ان ده مش هايغير حاجه ... ده واحد فى ايده سلطه كبيييييره ... ماتقدرش تقوله ماتستخدمهاش لأنه عمره ما هيعمل كده ..
العيب فى مين دلوقتى ؟؟؟ فى طلبة الشرطه والضباط اللى بيتنططوا على خلق الله ولا فى اساتذتهم فى الكليه اللى فهموهم انهم فوق القانون .. ولا فى الحكومه اللى سمحت للاساتذه دول انه يقولوا كده ... ولا فى مستر اكس ربنا يخرب بيته اللى شايف الفساد ده كله قدامه وساكت ...
التغيير يبدأ منين يا جماعه .. من تحت من عند الطلبه الصغيرين دول ولا التغيير لازم يكون من فوق . على رأى د. بلوروز مسح السلم بيبتدى من فوق .. ؟؟؟
ياريت ندور على حلول لأن مش كفايه إننا نتحسبن عليهم .. ماحنا من زمان بنتحسبن ايه اللى حصل ؟؟؟
يقول الله تعالى فى محكم التنزيل " اللّهِ إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ " .. ياريت الآيه دى تبقى قدام عنينا على طول يا جماعه ..