أنا مســــــــــافر

[Broken_ Heart]

أحبائي أهل كتكوت وأهل أكتب عامي
مش عارف بس أقول إيه
لكن تقرر سفري فجأة إلى دولة الكويت للعمل
والسفر النهاردة الأربعاء الساعة السادسة مساءً

وأكيد حابعد عنكم شوية لحد ما تستقر الأمور هناك وأرجع أتواصل معاكم
ولما عرفت موضوع سفري لقيت نفسي باكتب الكلمات دي من وحي اللحظة
ياريت تعيشوها معايا
حاتوحشوني كلكم وبجد بحبكم
آه على فكرة ياتري في حد من الكتاكيت في الكويت نبقى نقابله هناك يعني لو في حد ياريت يقوللي


أنـا مســــافــر

أنا مســــافر
وريح الغربة واخداني
أنا مســــافر
لكن واخدك ف أحضاني
ولا عمري حاييجي اليوم
وأقول فينك يا واحشاني
أنا مســــافر
ومش حانساكي بالمرّة
ومهما الغربة كات مرّة
يحليها ...
صوتي لما أندهلك
وألاقي ملامحي تشبهلك
وأجيب سيرتك على لساني
أنا مســــافر
وجوايا الألم مطوي
وفوق الكتف أحزاني
أنا مســــافر
ولو تاه في الطريق خطوي
ألاقي عنيكي عنواني
أنا مســــافر
وإنتي لسة بتسأليني
ياترى رح توحشيني
لا ياغالية ...
عارفة ليه...
لأن دمي هو نيلك
والشوارع شراييني
والنجمة السهرانة ليلك
هيّ عيني
والسما شوقي وحنيني
ورغم الغربة رغم البعد
أنا عالوعد
راح أشيلك جوة قلبي
وتشيليني
سامعة يا غالية
فاهماني
لكن حارجع وأقول تاني
أنا مســــافر
يا واحشاني

[هايو]

اولا أنا مش حعلق على الكلام الجميل دة وعلى روعته كفاية انه من القلب بس حبيت اقولك تسافر وترجع بالسلامة ان شاء الله وياريت ماتحرمناش من اعمالك وانت هناك منتظرينك
تحياتى اختك مروه

[صبي القهوه]

اخي العزيز/جميل احساسك بالوطن..وادعوالله ان تعود له وانتما في احسن حال
دعواتي بالتوفيق
ودائما في انتظار الاستمتاع باعمالك

[يحيي النادي]

الله عليك
احساس القصيده اكتر من رائع وان كانت فيه مشاكل طفيفه ف الوزن
بس بجد تسلم

[د. ابودنيا]

ي

أنـا مســــافــر

أنا مســــافر
وريح الغربة واخداني
أنا مســــافر
لكن واخدك ف أحضاني
ولا عمري حاييجي اليوم
وأقول فينك يا واحشاني
أنا مســــافر
ومش حانساكي بالمرّة
ومهما الغربة كات مرّة
يحليها ...
صوتي لما أندهلك
وألاقي ملامحي تشبهلك
وأجيب سيرتك على لساني
أنا مســــافر
وجوايا الألم مطوي
وفوق الكتف أحزاني
أنا مســــافر
ولو تاه في الطريق خطوي
ألاقي عنيكي عنواني
أنا مســــافر
وإنتي لسة بتسأليني
ياترى رح توحشيني
لا ياغالية ...
عارفة ليه...
لأن دمي هو نيلك
والشوارع شراييني
والنجمة السهرانة ليلك
هيّ عيني
والسما شوقي وحنيني
ورغم الغربة رغم البعد
أنا عالوعد
راح أشيلك جوة قلبي
وتشيليني
سامعة يا غالية
فاهماني
لكن حارجع وأقول تاني
أنا مســــافر
يا واحشاني


شديد الهمة والهامة

ياشايل مصرنا علامة

ولا يهمك

بدال الحالة محتاجة

وفيه حاجة

ومش لاقينها راحة البال

بدال الحالة والاحوال

هنا مش عال

هنتغرب نجيب الزاد

ونرجع لو فيه بينا ميعاد

مادامت ف الايدين حنة

وفيه مواعيد تانى بينا

هنرجع يوم بمشاعرنا

ونروى الحب ف احضانا

ومهما كان ف يوم حالنا

مسيرنا نغلب الغربة

مسيرنا نفكها كربة

[نور محمد]

تروح وترجع بألف مليون سلامة يا أستاذ بروكن :)
وانت كمان هاتوحشها قوى...وبتقولك
بالأمس كانوا هنا واليوم قد رحلوا ......... وخلّفوا فى سويدا القلب نيرانا
نذراً علىّ لإن عادوا وإن رجـعوا .......... لأفرشن طـريق الطفّ ريحانا
ربنا يصبرك على غربتك
وترجع تانى لكل اللى بتحبهم بألف سلامة يارب
:rosy: :rosy: :rosy:

[بنت الماضي]

مسافر :(
سبحان الله مسافر يوم عيد ميلادك
استاذنا ربنا يجعلها ايام سعيده عليك ويار بالكويت تعجبك
انا كنت هناك لحد السنه اللي فاتت :)
ومتخفش في هناك ناس كتييييير من القهوة
اولهم مورسيس وأ.خالد المصري كمان
كلماتك مش هقولك قد ايه شديده
بس ..ربنا يكرمك وما تنسانااااش

[مصطفى عزب]

انا كتبت من فترةنفس العنوان لقصيدة ولكن شتان بين العمالاق والقزم ... قصيدتك رائعة أحييك .. انا هسافر الكويت قريب ..
واهى ماشيه
حاولت كتير ومنجحتش
لا مرة أولى ولا تانيه
ودارت روحى مع قلبى
ودارت روحى مع عقلى
منين متروحى ياروحى
على نفسك أكيد جانية

[موعوود]

شاعرنا الرائع بروكين
قصيده علي الهواء مباشرة
علشان كده وصل صدقها لينا طوالي
وآه ياصاحبي
حطيت رجلك علي أول الطريق
أتمني لك دائما التوفيق
في رحلتك الجديده في بلاد الغربه
مع تحيات
غريب ومتغرب قديم

[someerrors]

دى اول مرة ليا هنا بس حبيت اقول ان القصيدة بجد رائعة ........
ربنا يوفقك و اتمنى لك كل التوفيق

[marwakoko]

ان شاء الله تسافر وترجع بالسلامة وتحقق اللى اتغربت علشانه وربنا يوفقك يارب في حياتك بس عيزينك تكون القلب الشجاع بلاش بروكن هارت ودايما افتكر ربنا علشان تكون شجاع بايمانك ... وعن القصيدة فهيا وصلت للقلب زي ما هي خارجة من قلبك
مع خالص دعائي بالنجاح والتوفيق