آخر عروسة نيل

[أحمد عبد الحكم]

آخر عروسة نيل فى قلبى
بتسحب حلمها بشويش
ماعاتبتهاش
لأنى عارف قد إيه النيل صبر
سابنى أعافر كام سنة
أطلع سبع سموات من الفرح اللذيذ
واطرح مع النخل العزيز
سبايط غنا
وقبل ما تطيب فرحتى
سحب عروسة نيلى وقطفنى
آخر عروسة نيل ف قلبى
بتفرد شال العمر فى النظرة الأخيرة
ترميه على صدرى وداع
يشهق نشيد الشمس
ويطيش الشعاع
تنطمس ملامح روحى
ويشيط المدى
ساعة ما يخنقنى البكا
يتبل ريق المراكب.. وانطفى

[بنت الماضي]

اخ احمد اهلا وسهلا بيك في منتدانا
كلماتك حلوة اوي
وتشبيهاتك جديده ما شاء الله
منتظرين الاحلى ومنتظرين تفاعلاتك مع الزملا
تحياتي

[هايو]

اولا اهلا بيك منور القهوة
ثانيا اهنيك على الموضوع الجديد وعلى المرادفات الغريبة اللى استخدمتها واللى مابنسمعهاش كل يوم واعتقد ان دة حيديلك فرصة تبقى جديد وموضوعاتك كمان حتطبع بشخصيتك اكتر
تحياتى

[أحمد عبد الحكم]

فى محاولة علشان تفتكرونى وافتكر نفسى بجدد النشر
محبتى للجميع