على ضفاف الحروف فارد قلوعي [الأرشيف]

واحد بيحب مصر

02-05-2005, 07:45 PM

على ضفاف الحروف فارد قلوعي

شعر د. جمال مرسي

يا شاعر قول و لا يهمك

أنا سامعك
و غيري كتير بيأسرهم كلامك لما بتقوله
و تتحرك مشاعرهم
عشان حسك
عشان صوتك
عشان نبضك
عشان اسمك
عشان الحرف زي السيف
في وقت يعز فيه السيف
كلامك كلنا نحبه
عشان بيقوله قلب نضيف
مهوش ممزوج بكبر و زيف
كلام يخرج
من الوجدان إلى الوجدان
و يفضل حي جوانا لكل زمان
كلام في الحق
و من غيرنا يقول ال " لأ "
في وش الظلم و الظالم
يا شاعر قول أنا فاهم
و كل اللي قراك فاهم
و بستناك
على ضفاف الحروف فارد قلوعي ليك
اقول لبيك
عيوني لما تطلبها
أقول تفديك
عشان غيرت فيا كتير
و خلتني أكون بالشعر أحلى أمير
تعالى معاك أشيل همك
تعالى لصدري هيضمك
و أقولك قول
أقول لك قول و لا يهمك

و دمتم بخير

صفحات العمر

02-05-2005, 07:55 PM

هقول طبعا وليه اسكت

دا قلمى مداده م المعنى

هقول واحكى

عشان الكل يسمعنا

دا نا شاعر

ولو لسه الطريق واعر

همهد بالقلم دربى

ولا هقبل الين وارضى باى هوان

لانى حقيقه بتدور على اللى كان

وبتصصح قلوب عايشه

ومتعايشه مع الوجدان

بتحلم بالضمير لما

يكون صاحى وما ينامشى

بيرفض اى شىء ممكن

يدمر صورة الانسان

ويعشق كل قلب حنون

يصون عرضه

ويزرع بالوفا ارضه

عشان تطرع مبادىء خير

يقدم قلبه لجل الغير

ولا يندم ولا يحلم

بغيرضله ولقمايه

بغير هدمه وقلب معاه

يعيش فرحُه

يلملم ف الصعاب جرحه

يهون كل الاسى وياه

يا كل المعنى وحرفه

يا كل النبض ف وريدى

خلاص قلمى نسى خوفه

وزى السيف اهوه ف ايدى

***

اميرى الغالى د. جمال مرسى
يسعدنى ان اكون اول المعانقين لرائعتك الجديده

اراك اليوم تثتثير حفيظة كل الشعراء بكلماتك الرائعه التى اخذت قلمى معها الى بحور الشعر دون ان يعبأ بشدة الرياح ولا ارتفاع الامواج

هكذا انت دائما استاذى راقيا فى كل شىء

دمت بكل خير وسعاده

محمد

محمد فارس

02-05-2005, 08:14 PM

ههههههههههههههه
والله جاى بحق 00

مي البكري

02-05-2005, 09:07 PM

أنا شمعة
و بتنور طريق مفتوح
على الأيام

أنا نجمة
يشوف نورها ألوف و ألوف
تشوف أحلام

أنا كلمة
نطقها حلم عدل كبير
في وسط ظلام

أنا موجة في بحر كبير
في حبر كبير من التفكير
و فيه بنغرق الأوهام

و لو يوم مش أنا اللي اكتب ....
فحيكون مين ؟؟

و لو يوم م الظنون حاسكت
حينطق مين ؟؟

و مين يحلم
و مين يوصف
و مين يحكي كلام ملايين

حنكتب
كلمة و لا اتنين
حتبقى شمع حب و خير
و حتصحي
كلام جوة ضمير و ضمير
كلام عايش
و لكن من همومه نام .....

جزاك الله خيراً ...... كلام جميل يدل على فكر مبدع ......

محمد فارس

02-06-2005, 01:32 AM

أنا شمعة
و بتنور طريق مفتوح
على الأيام

أنا نجمة
يشوف نورها ألوف و ألوف
تشوف أحلام

أنا كلمة
نطقها حلم عدل كبير
في وسط ظلام

أنا موجة في بحر كبير
في حبر كبير من التفكير
و فيه بنغرق الأوهام

و لو يوم مش أنا اللي اكتب ....
فحيكون مين ؟؟

و لو يوم م الظنون حاسكت
حينطق مين ؟؟

و مين يحلم
و مين يوصف
و مين يحكي كلام ملايين

حنكتب
كلمة و لا اتنين
حتبقى شمع حب و خير
و حتصحي
كلام جوة ضمير و ضمير
كلام عايش
و لكن من همومه نام .....

جزاك الله خيراً ...... كلام جميل يدل على فكر مبدع ......

د0جمال مرسى
اسمحلى بس احيى اختنا مسلمة على هذه المداخلة الراقية جدا
فهى شاعرة جديدة بالمنتدى لكن مستواها ماشاء الله 000شئ رائع بجد ويستحق التقدير

------

الغزال الشارد

02-06-2005, 01:47 AM

فارد قلوعك ع الحروف
بتنادي مين؟؟
بتنادي طفله
نبضها مليان بخوف
بتنادي عمر وفات
متحسبهوش سنين

يا شاعر قول..
ولا يهمك طريق مقفول
ولا جلاد ولا سياف
ولا يهمك دي ناس ماشيه
مافيها عقول

ولا كلمه تصحيها
ولا امرك حينهيها
دي ناس اتعوّدت ع القهر
ومين من موتها يحييها

يا شاعر قول وقول تاني
ومين يسمع؟؟
ومين يفهم؟؟
ومين حيبرد النيران؟؟
قلوبنا قايده نار ومرار
ولكن وشنا بيضحك
نشوف ف عذاب
نشوف ف خراب
جنون ودمار
ونبقي كلنا باردين
بنتفرج
نقول لأه
يقولوا سكوت
نقول الآه بحرقتنا
ويفتكروها أهة اه
يقولوا اننا موافقين
مدام قالوا بصوتهم اه

فارد قلوعك ع الحروف
لكن ودان الناس
ماعدتش تسمع غير سكوت
واللي بإيديهم انهم دايما يقولوا
لأ بخوف

دكتور جمال......

حين بدأت ان احاول مجاراة كلماتك.....

اردتها ان تأتي متفائله ككلماتك....

ولكن.........

يبدو انني شردت كالعاده...

:sniff: :sniff: :sniff: :sniff: :sniff:

مي البكري

02-06-2005, 01:48 AM

جزاكم الله خيراً
:flowers:

محمد فارس

02-06-2005, 02:07 AM

000

قولها ياشاعر
قول من حقك إنك تكتب
انك تحسب00
انك تنجح00
انك ترسب00
000
قولها وعلّىِ قوالتك فوق
خَلّىِ النايم يِصحَىَ يفوق
خَلّىِ الظالم يعرف ظلمه
مش راح ينجح 00مهمن يكذب00
000
قولها وحَذّر اى منافق
مَرّة يخاصم00مرة يرافق
دا مهما ينافق00
اللى ينافقه 00بكره يسب
000
قولها ياشاعر00قولها وإمشىِ
قولها ورقّص حاجبى ورمشىِ
قولها وصحصح كل الامة
دا لو كان ظلم 00أبدا ميدومشىِ
-----

اخى الفاضل د0جمال مرسى
تقبل منى هذه المداخلة المتواضعة والتى حرصت بها انا اتواجد فى صفحتكم مع قصيدتكم الرائعة وايضا لاتجاور مع ابداع اخى الحبيب- محمد سعيد ومداخلة الاخت انا مسلمة , ومداخلة مبدعتنا وغزالنا الشارد
دام ابداعكم جميعا

abo hamza

02-06-2005, 02:34 AM

خايف أقول لساني يطول
أصل الشكوي حراقة
ودايما يقتلوا فينا
كل فكرة خلاقة
بس أقول ورب الكون
قلامنا ف إيدينا
لقولة حق مشتاقة

أخي الكريم د . جمال كلماتك دعوة للبوح والقول ... إبداع يعجز القلم علي مجاراته فأرجو ألا تفسد رائعتك كلماتي العرجاء

بنت الماضي

02-07-2005, 10:22 PM

الله عليك يا شاعر لما تقول
لما تنسى الناس وتفتح قلوب
لما ميهمكش الحدود والظلم
لما يكون الكلام طالع من القلب
ياشاعر قول
واحنا وراك نردد ونسمع

استاذ جمال
الله عليك لما تشجينا بكلامك
وفعلا الشاعر يقول وميهموش
حبيت اقولك ربنا يكرمك
تحياتي :flowers:

موعوود

02-07-2005, 11:05 PM

انا شاعر ومايهمش في شعري يكون
لا هو بقافيه ولا موسيقي ولا موزون
ولا عاوز في يوم اسمي يكون مشهور
ولا آخد نوبل جايزه...... ولا المليون
.............................

انا باحلم اكون كلمة لسان مظلوم
اقول الحق ولا اخافشي ولا اجبن يوم
اطير بالكلمه ترفعني معاها لفوق
نحلق في سما صافيه ملانه نجوم
...........................
وكالنسمه كلامي يكون في عز الحر
وأمل يوصل مابين الآه وبين الصبر
وطوق يحمل معاه بكره بنور الشمس
وحتة سُكره تحلي لنا كاسات المُر

أستاذي الرائع \ دكتور جمال
ومن غيرها يستطيع أن يحرك ماركد من المشاعر والشعور
وأقصد طبعا الكلمه الصادقه والشجاعه
أي كلمة حق تقال في وقتها
وتحية تقدير الي قلمك المبدع والمؤثر فينا جميعا

فلسفندي

02-08-2005, 06:29 AM

على ضفاف الحروف فارد قلوعي

شعر د. جمال مرسي
يا شاعر قول و لا يهمك

أنا سامعك
و غيري كتير بيأسرهم كلامك لما بتقوله
و تتحرك مشاعرهم
عشان حسك
عشان صوتك
عشان نبضك
عشان اسمك
عشان الحرف زي السيف
في وقت يعز فيه السيف
كلامك كلنا نحبه
عشان بيقوله قلب نضيف
مهوش ممزوج بكبر و زيف
كلام يخرج
من الوجدان إلى الوجدان
و يفضل حي جوانا لكل زمان
كلام في الحق
و من غيرنا يقول ال " لأ "
في وش الظلم و الظالم
يا شاعر قول أنا فاهم
و كل اللي قراك فاهم
و بستناك
على ضفاف الحروف فارد قلوعي ليك
اقول لبيك
عيوني لما تطلبها
أقول تفديك
عشان غيرت فيا كتير
و خلتني أكون بالشعر أحلى أمير
تعالى معاك أشيل همك
تعالى لصدري هيضمك
و أقولك قول
أقول لك قول و لا يهمك

و دمتم بخير

مهما قالوا عن كلامي
إنه وقت شديد وحامي
وإنه وقت رقيق وسامي
ردي كان .... هو ده شعري ....
هو إحساسي ومشاعري

*****

أصل لو جاني الكلام

وسط أضغاث المنام

يبقى سهل إنك تقول

طب على الدنيا السلام

*****

الكلام إللي بحسه

هو بس إللي بقوله

والملام مابكونشي حاسه

لو واحد غفلان يقوله

*****

شعري دايماً كان خليلي

هو نوري .... هو ناري

هو زيت قنديل في ليلي

هو ناس ماشية في نهاري

*****

لو بشوف أحلام بجد

لو حقولها في يوم لحد

يبقى لازم تبقى جايه

من حقايق متداريه

*****

كتبت كلام بيجرحني

عن الشيخ إللي كان محني

في سكة سعيه على رزقه

و ابنه البغل في القهوة

قاعد مبسوط وبيغني

*****
وبكتب عن صدور والعة
وعن إنسان بقى سلعة
سحابة من حشيش طالعة
غيامة ع العقول بتعيش
وعن قامة يهود فارعة

*****
وبكتب عن إيدين تتمد
على عرق إللي مالهوش حد
ولو يوم يفتكر حقه
سنين سجنه تكون بلا عد

*****
وبكتب عن سكك تتسد
في وش شباب وزي الورد
يقلب كل شاب جوه كراسته
يلاقي نجمة كان خدها في مدرسته
بكل مرار بتسمع كلمته بتقول

" وإيه يعني وعملِت إيه "

ويلقى الكلب أبو نجمه ينادي عليه

..... وضاع الشاب

و ِعد يا صاحبي لو كان لك في علم العد

وكلمه تقيد في قلبي النار بتتقال بكل الود

عيال اليوم .. شباب الغد

سيدي الفاضل : د : جمال مرسي
كيف لي أن أشكرك على فتح باب النقاش التفاعلي في هذا الموضوع الشائك
" كلمة الشاعر "
كم يجب عليها أن تكون ( قوية .. مرنة .. سهلة .. مريرة .. عميقة غائرة )
شكراً لك آلاف المرات
رغم أني أعلم أن للحديث بقية ...
وأنه لن تنهي أبداً الكلمات موضوع كان صلبه " أصحاب الكلمة "
أدامك الله مخلصاً لمن أحبوك
......... فلسفندي ..........

واحد بيحب مصر

02-08-2005, 09:51 AM

و هفضل مهما شاب شَعري أقول و أقول

و مش ممكن تحيدني قيود و أفول

و لا لسع السياط فوق ضهر كلمتنا

يخلي الحرف في بقي يكون مشلول .

**

يا حرف اطلع و لا يهمك

و قول الحق لو صلبوك على الجدران

و اوعك يوم تعيش خانع

ذليل و جبان

و اوعك عن قضايانا تكون مشغول

و لا ترخّص في يوم قيمتك

و لا تحني في يوم قامتك ..

لمستعمر و لا مسؤول

**

يا حرف اطلع من الوجدان

و طير بيا لكل مكان

و خبط ع. البيبان يا ناس

أنا الإحساس

أنا الإنسان

انا مقدرش أكون محبوس ما بين جدران

و لازم للوجود أطلع

عشان كل الوجود يسمع

و يعرف يعني ايه شاعر

بيعصر قلبه بيمينه

عشان غيره يكون فرحان

و هوَّ من الأسى مقتول

اخواني و أحبائي الشعراء و الشاعرات
الذين لم تختنق الكلمة في حلقهم بل خرجت صرخة عالية مدوية
محمد سعيد
محمد فارس
موعود
فلسفندي
أبو حمزة
أنا مسلمة
الغزال الشارد
بنت الماضي

أنتم جميعا شعراء رائعون عبرتم بإحساسكم
عما يدور في خلجاتنا جميعا
أحبكم جميعا
أخوكم د. جمال

ابتهال

02-08-2005, 08:52 PM

ماشاء الله عليكم

صفحة غاية فى الروعة

كل من دخلها هو مبدع ولاشك

:flowers: :flowers: :flowers:

Broken_ Heart

02-15-2005, 02:39 PM

أستاذنا الكبير قوي والجميل قوي
د / جمال
أنا مش جاي أعلق على ما خطه قلمك لأني لا أملك هذه الصلاحية
لكن حرصاً مني أن يكتب إسمي في صفحات موضوعك جئت
وكمان علشان إسمي يكون مكتوب في صفحة واحدة مع كل هؤلاء العمالقة
ودي إرتجالة على السريع مني أرجو ألا تشوه هذا الموضوع الرائع
أرجو أن تقبلها مني

حاقول طبعاً وحاسكت ليه
وحايفيد يوم سكاتي بإيه
د. أنا شاعر وقلبي ماليه
بدل كرات الدم حروف

في ساعة الحق أقول الحق
لوعاشق أقول الآه
لو رافض أقول ال(لأ)
وطول ما القلب شغال دق
عمره ما يعرف طعم الخوف

أنا شاعر بعيش إحساس
وإحساسي لكل الناس
باقول الكلمة وبإخلاص
وبعيونهم عيوني تشوف

تحياتي ورردة