فهمونا المااافاااهيم

[مـؤيـد]

حتى نفهم الحياة أكثر..
حتى نعرف ما يدور من حولنا..
:think3:
حتى نتعمّق في داخل الأحداث :read:
ونفهمها أكثر!
حتى نرتقي بمستوى الإدراكْ :chr73:
وحتى نصبح أكثر وعيًا وحسّا وربطًا
إذن
علينا أن نستلهم الإجابة ونتستنطق المنطق العقلي
ونبحث عن الأسباب الكامنة وراء الحاصل والمحصول منه!
علينا أن نربط الحياة بشيء من التفكير والتأمّل..!
علينا أن نجعل من وجود عقولِنا فرصةً لاستخدامها في تقوية الذاكرة وتنشيط الدماغ

***

مفاهيمٌ مبسّطة:
لماذا يشتعلُ عود الثِّقاب عند "احتكاكِه" بتلك الكرتونة "الموضوع" فيها.؟!
أليس فهمنا لهذا سيجعلنا أكثر وعيًا ودِرايةً وربطًا.؟؟
لماذا يخرج ضوءٌ كالشرر عند خلعنا لملابسٍ صوفية كنّا نرتديها.؟.؟
أليس لمعرفتنا أوسع تخيلا للكون والأشياء؟
لماذا تُطفىء النّار عند إضافة الماء "H2O" عليها.؟
لماذا "يحمرّ" وجهك عندما يصفعك أبوك بكفه :slap:
لماذا يدمِعُ "البصل" أعيننا عند تقشيره.؟
لماذا تكون "قرصة" النّملة أقوى من "قرصة" البعوضة أحيانًا؟
لِماذا التّين الشوكيّ ألذّ من المشمش.؟ :chr21:

***
ألا تجدون في معرفة هذه الأشياء بشيءٍ من اللذة العلمية؟
كلُّ هذه التساؤلات مرتبطٌ بحقائقَ علميةٍ مؤكّده
فقط
نزيلُ الحاجز الترابي المغبرّ الذي يحول بيننا وبين معرفة تلك الحائق البسيطة والشيقة!

أحداثٌ تحصل يوميًّا
لكننا لا نفهم منها سوى أنها:
تحصُل والسّلام
لكننا ما إذا تأمّلنا رويدًا
فإن مخزوننا الثقافي سيرتفع كثيرًا
سنعرف بعضًا من الفيزياء
وشيئًا من الكيمياء
وقليلا من الأحياء
وحقائقَ رياضية
ومعلومات فلكية
لكنها-وإن قلّت- ستجعل لنا مساحةً للتفكير فيما يحصل من حولِنا..
وبعدها يكونُ استخدام العقل "للفهم" أمرٌ سهل
:idea: بشرط :idea:
أن نحاول ربط ما يدور في عجلةِ الحياة بكيفية حدوثها .!
***

لنبدأ معًا هذه الرحلة الخفيفة بمحاولة التفكير والاستنتاج والبحث
لنصل إلى جزيرةِ الحقيقة البسيطة
بأسئلةٍ بسيطة :flowers:

[GENEEN]

أنا معاك ياريس :tu: :clap: مع ان المشمش الذ من التين الشوكى :closeeye:


وفعلا فيه ظواهر علمية كتير مبناخدش بالنا منها ونفسنا نعرف أسبابها :think3:

مستنيين فريق أدهم صبرى وتفسيراته :flowers: :flowers: :flowers: :flowers: :flowers: :lolly: تشييز

[QALB_ELDEEN]

لماذا يخرج ضوءٌ كالشرر عند خلعنا لملابسٍ صوفية كنّا نرتديها.؟.؟


السلام عليكم

أنا حجاوب على الجزء ده يا عم جوارح ...

بص يا سيدى .. الشحنات الموجودة فى الدنيا نوعين .. شحنات استاتيكية ( يعنى ساكنة مبتتحركش ) و شحنات أخرى متحركة .. و المتحركة دى هيا اللى احنا بنستخدمها فى الكهربا ... و معروف طبعا ان الشحنات دى بتكون على شكل موجات بتجرى فى الاسلاك واللى بيوجد الشحنات دى و يخليها تجرى فى الاسلاك هو وجود فرق جهد بين طرفين ... و فرق الجهد ده هو اللى بيدى الشحنات طاقة و قدرة تخليها تتحرك فى الاسلاك من مولد الكهربا لأماكن الأحمال اللى هيا البيوت و المصانع ...


أما الشحنات الاستاتيكية فدى زى اللى بتتكون على اجسامنا لما بنبقى لابسين صوف .. لأن الصوف ( زى المطاط برضه ) بيولد شحنات استاتيكيه على أى جسم يحتك بيه و ميكونش واصل أو ملامس للأرض .. عشان كده ممكن لما تكون راكب عربية و الدواسة معمولة من المطاط تلاقى نفسك أول ماتنزل من العربية و تمسك الأكرة تحس بكهربة .. دى نتيجة الشحنات اللى اتكونت على جسمك من احتكاكك بالمطاط أو الصوف ... و تلاقى ناس كتير لما تيجى تقفل الباب و لا تفتح الحنفية تتكهرب :brb: .. و السبب ان بيحصل تفريغ للشحنات دى فى الأرض ... أما حكاية الصوف ... فلما بنخلع الملابس الصوف بيبقى عليها شوية من الشحنات دى ...عند تلامس الشحنات دى بيحصل تفريغ للشحنات كأنك عملت قفلة بالظبط فبتلاقى الشرارة دى ... بس انت أول متلاقى الشرارة دى ارمى البلوفر و اطلع اجرى :chr24:

سلام

[ســانــدى]

فكرة جميلةة جدا فعلا :tu:

طيب فى انتظار الاسئلة

وكل الشكر لتقى الدين على المعلومة المفيدة

[د.بلال]

لماذا يشتعلُ عود الثِّقاب عند "احتكاكِه" بتلك الكرتونة "الموضوع" فيها.؟!

بيتهيألي مجرد احتكاك بيولد حرارة كافية للاشتعال .. جرب تولع عود الكبريت بأي حاجة خشنة غير الكرتونة هيولع برضو :tu:

لماذا يخرج ضوءٌ كالشرر عند خلعنا لملابسٍ صوفية كنّا نرتديها.؟.؟

بالظبط نفس سبب حدوث البرق ... كهرباء ستاتيكية ولو عاوز حاجة لزيييزة ابقي البس شبشب صوف وطفي نور وامشي تزحيف على السجادة :tu:

لماذا تُطفىء النّار عند إضافة الماء "H2O" عليها.؟

لنها بتمنع عنها الاكسجين اللازم للحتراق ... حتى لو كبيت على الناس عصير أناناس هتنطفي ...

هي مش البطانية بتولع ؟
بس لو حطيتها فجأة على النار وغطيتها كويس النار هتنطفي .. لانك كده تبقا خنقت النار ومنعت عنها الاكسجين

لماذا "يحمرّ" وجهك عندما يصفعك أبوك بكفه

والله مش لازم يضربني بكفه علشان وشي يحمر :drop: ممكن يخليك قاعد وسط اخواتك الصغيرين ويقولك معملتش اللي قلتلك عليه ليه يا جزمة :brb:

السبب في رأي ان اي حاجة تثير الانسان بتنشط عمل حاجة اسمها الجهاز العصبي السمبثاوي و اللي بدوره بيزيد ضربات القلب يعني الضغط هيزيد يعني وصول الدم للاعضاء هيزيد فيحصل حاجة اسمها vasodilatation او حاجة زي كده يعني معناها ان الشعيرات الدموية السطحية بتتسع فبيبان الجلد باللون الاحمر اللي هو لون الدم

لماذا يدمِعُ "البصل" أعيننا عند تقشيره.؟

ليه بالضبط مش عارف بس اكيد فيه زيوت طيارة بتخش الهين تهيجها فتدمع
طيب مش عاوز تدمع ؟
في 3 حلول
الاول : انك تاكل لبانة وانت بتقطع البصل >> هيبقا شكلك روعة :brb: >>
المفروض ان ده يقلل الدمع

الثاني : انك تجيب طبقا غويط تحط فيه البصل بحيث يبقا غطسان تحت المية > الووتر يعني < وتقطع عادي مش هيحصل حاجة

الثالث : زي الشطور تروح لماما او اختك او كانتي و تقولها قشريلي البصلة دي :drop:

لماذا تكون "قرصة" النّملة أقوى من "قرصة" البعوضة أحيانًا؟

احتمال كبير لان النملة لما بتشعر بالخطر بتفرز حمض النمليك Formic acid
وهو حمض ضعيف بس طبعا مع تركزه في منطقه بذاتها يعمل التهاب
انما البعوضة قرصتها بتبقا علشان تدخل خرطوم حقييير جو جلدك علشان تمص دمك :sniff:

لِماذا التّين الشوكيّ ألذّ من المشمش.؟

:think3: معرفش

تصدق بالله ؟
عندي في التلاجة علبتين مربى واحدة بالتين وواحدة بالمشمش :tu:

[مـؤيـد]

لالالا لالا لالالا لالا لا

ايه الحلاوة دي يا دكتووووووووووووووور :واه يابوي
انت كده تستاهل وسام الاستحقاق من الدرجه الأولى :tu:

ربنا يكرمك يادكتور آآآآخر كرم :flowers:
ولو عندك كمان أي تساؤل ابقى اطرحه هنا عشان الدكتور بلال يجاوب، بس اوعه تقول له لحسن يعملنا دوشه بأه :closeeye: واحنا مش ناقصين :أخخخ:

ماشي عندي تساؤل كده برضو:
هوا احنا لما بنحضر حاجه ساقعه وتقعد شويه في الهواء الطلق بتسخن
ولما بنحضر حاجه سخنه وتقعد شويه في الهواء الطلق بتسقع :closeeye: صح
السؤال بأه
هوا الهواء الطلق ده مستقصدنا ولا ايه الحكايه :أخخخ: ؟

[مـؤيـد]

جنين :أخخخ:
ولا بلاش
جنين :D

منوراا ا ا ا انا في المفااااهيم يا ستي وفي الركن كووووووووووله :flowers:

وانا في الحقيقة بصدد التفكير في الرد على رسالتك :btbt:

تحيووتي

[مـؤيـد]

الدكتور قلب الدين حكمت يا ا ا ا ا ر :clap:
والله كنت عايز ارد على رسالتك بعد جنين على اساس الترتيب يعني بس مش عارف هيا جت كده ازاي يعني
ومتشكريييين يا دكتور على الشرح الكهربائي ده :flowers:

[ســانــدى]

السلااام عليكم

الدكتور بلال

السبب في رأي ان اي حاجة تثير الانسان بتنشط عمل حاجة اسمها الجهاز العصبي السمبثاوي و اللي بدوره بيزيد ضربات القلب يعني الضغط هيزيد يعني وصول الدم للاعضاء هيزيد فيحصل حاجة اسمها vasodilatation او حاجة زي كده يعني معناها ان الشعيرات الدموية السطحية بتتسع فبيبان الجلد باللون الاحمر اللي هو لون الدم
نسيت الـ 3F hormon يا دكتور ....


تصدق بالله ؟
عندي في التلاجة علبتين مربى واحدة بالتين وواحدة بالمشمش
تصدق وانا كمان :brb:

الاخ جوارح

ماشي عندي تساؤل كده برضو:
هوا احنا لما بنحضر حاجه ساقعه وتقعد شويه في الهواء الطلق بتسخن
ولما بنحضر حاجه سخنه وتقعد شويه في الهواء الطلق بتسقع صح
السؤال بأه
هوا الهواء الطلق ده مستقصدنا ولا ايه الحكايه ؟
:brb:

السبب فى هذه الظاهرة نظرية فيزيقية بسيطة جدا
بتقول ببساطة ان الحرارة تنتقل من الجسم الاعلى فى درجة
الحرارة الى الجسم الاقل ....

فأنت لما تجيب كوباية شاى سخنة تحطها فى الهواء
قوووووووووووم ايه ..تتنقل الحرارة من الشاى اللى هو
سخن الى الهواء حولها اللى هو اقل منها فى درجة الحرارة
فيبرد الشاى

فى حالة الحاجة الساقعة بأه نفس النظرية
بس اتجاه انتقال الحرارة العكس
بمعنى ان الحرارة تنتقل من الجو المحيط بزجاجة الحاجة الساقعة
الى الزجاجة نفسها فتكتسب الزجاجة حرارة فتزيد درجة حرارتها
او تقل درجة برودتها

ووووووبس ورردة

[د.بلال]

نسيت الـ 3F hormon يا دكتور ....

لا لا لا ارجوكي يا ساندي

انا منستش الهورمونات دي

لازم اوضح انا ليه مكتبتهاش

اصلي بصراحة ... معرفهمش يوه بقى

[ســانــدى]

لا هو هرمون واحد فقط
ألا وهو الأدرينالين

بس بيطلقوا عليه الــ 3F hormon
لإن افرازة بيزيد فى ثلاث حالات
الا وهى الخوف Fear والقتال Fight والطيران Fly

وطبعا كل الحالات السابقة بنلاحظ فيها
اعراض ظاهرية واضحة جدا
تبدأ بازدياد ضربات القلب
وهذا طبعا لأن الجسم محتاج كمية أكسجين اكبر للخلايا
وزيادة سرعة التفس
وارتفاع درجة الحراة نتيجة زيادة عملية حرق الغذاء
لاطلاق الطاقة ...
وطبعا زى ما انت ذكرت اتساع الشعيرات الدموية
السطحية وهذا اللى بيسبب احمرار الوجه
نتيجة امتلاءها بالدم الحامل للاكسجين

وووووووبس :flowers:

[د.بلال]

يعني ايه والطيران ؟؟ :huh:

[ســانــدى]

كان زمان معظم الناس بيخافوا جدا
من ركوب الطيارة
حتى اللى مش بيخافو
كان بيزيد تدفق الادرينالين عندهم
عند ركوب الطيارة :flowers:

[مـؤيـد]

تسلمي يا ساندي :tu: جزاكِ الله خير

عندي تساؤل كده برضو يوه بقى معلش استحملووونا اصلو الموضوع كده :انجغة:

وده سؤال حيورينا بأه مين البنت الشاطره :chr43:

هوا انا احيانًا كده لو جات فرصة منيله لا سمح الله ودخلت البيض اعمل مطبخ :واه يابوي
قصدي دخلت المطبخ اعمل بيض مقلي :maaaad: بيتلزق في الطاسه وبيتحرق :sniff:
وحتبقى الليله كلها سوده اصلا :sniff:
فاشمعنى والدتي اللي المفروض هيا اللي دعت عليا اعمل بيض بتعملوا من غير مايتلزق :closeeye: في حين انه بيتلزق معايا ويتحرق
محدش يقول لي هوا بيلزق عشان انت سيبته :viking:
مانا عارف طبعا
بس هوا ايه اللي بيخليه يلزق :انجغة:

[ســانــدى]

انت اكيد مش بتستخدم تيفال:tu:

والله يا جوارح اقولك اللى اعرفه
ولو انه مش تفسير :brb:

انت اكيد بتستخدم كمية سمنة او زبدة قليلة
لان لو تلاحظ المادة الدهنية لما بتكون
كتيرة بتمنع هذا الالتصاق ....
انما ليه بتمنعه بأه :think3:
أبحث فيها وارجع لك ان شاء الله

[ماسة]

موضوع جيميل :tu:

[د.بلال]

ليه بتمنعه بقا ؟

ممممم طوويب

بصو يا شبابوز تفسيراتي اللي هنا كلها تحتمل الخطأ ... بشكل كبير :drop:

فانا هقول اللي عندي يا تقتنعو يا تجيبو حاجة ألز ألز ألز

اي سائل في الدنيا بيتكون من طبقات

طبقة فوق طبقة فوق طبقة لحد ما يكونو الكمية الموجودة من السائل .. حلو ؟

حلو ... طيب لما انا احط كمية زيت او سمنة على الطاسة ايه اللي بيحصل ؟

بتتزحلق عليها ..... لا ذكي يا واد :brb:

الفكرة بقا كلها في الزحلقة دي بتحصل ازاي ؟

طبقي بتتزحلق فوق الطبفة اللي تحتها ... يعني مبتلزقش

فانا لما احط الزيت على الطاسة ثم احط الاكل البيض او الهمبرجر او السوسيس :sniff:

مش هيلزق بيها لان بين الاكل والطاسة طبقة زيت بتقعد تتزحلق فوق بعضيها من غير ما تخلي الاكل يوصل للطاسة


طيب ليه يا عم بنحط زيت مش بنحط ميا مثلا ؟

عشان احنا بنقلي على نار مش ضوء شموع :twee:

يعني ايه ؟

يعني لو حطينا ميا هتتبخر بعد دقيقة وكأنك يا ابو زيد ما غزيت

انما الزيت بيستحمل درجات حرارة عالية قبل ما يغلي وبالتالي مش هيخلص بسرعة

وبرضو بدل ما المية بتوصل لـ 100 درجة وتسكت الزيت بقا ممكن يوصل اعلى من

كده بكتيير 150 مثلا فالأكل يستوى بسرعة اكتر

حاجة تانية

الزيت بينساب اكتر من الميا يعني الطبقات بتتزفلط اكتر :tu: فالأكل مش هيلزق

ايه تاني ؟ ايه تاني ؟ معرفش بقا قولو انتو يوه بقى

[QALB_ELDEEN]

السلام عليكم

كلام جميل و مشاركات شيقة ..

أنا عندى سؤال ... و السؤال ده سألته لنفسى لما كنت بادرس السنه دى كورس اسمه optimization
و فى الكورس ده و من خلال قرايتى عرفت ان الانسان بمشاهدته للأسراب ( نمل - نحل - سمك طيور ) اتعلم كتير ...
و على سبيل المثال فى تصميم الشبكات و تفادى ال traffic Jam فى الشبكات لما يكون فى جزء من الشبكة كل المستخدمين أونلاين ...بدراسة سلوك النمل عرفوا ازاى يحلوا المشكلة دى ... :واه يابوي

ده غير مشاكل اخرى زى نقل البضايع و تنظيم سباقات السيارات و العجل :brb:

يالا اللى عنده معلومات go go gooooooooooooooooooooo

[QALB_ELDEEN]

http://mishami.image.pbase.com/u11/mplonsky/upload/2542574.IMG_5556bs2.jpg

http://mishappa.image.pbase.com/u16/mplonsky/upload/5016242.IMG_0602s.JPG

http://mk31.image.pbase.com/u11/mplonsky/upload/3789089.Img_6641s.jpg

[ســانــدى]

الاخ قلب الدين
الصورة مش ظاهرة :sniff:
وبعدين حضرتك عاوز معلومات عن النمل يعنى؟؟
بمعنى التنظيم فى مملكة النمل والنحل مثلا؟؟ :huh:

[مـؤيـد]

الاخ قلب الدين
الصورة مش ظاهرة :sniff:
وبعدين حضرتك عاوز معلومات عن النمل يعنى؟؟
بمعنى التنظيم فى مملكة النمل والنحل مثلا؟؟ :huh:نفس كده برضو

بصراحه مش فاهمك يادكتور قلب

[QALB_ELDEEN]

السلام عليكم

معلش يا ساندى مش حأقدر أعدل اللنك بتاع الصور ... لأنى معنديش تعديل المشاركة ... بس هى صور لنمل بيخزن أكل و بيتمشى و كده يعنى ... :brb:

أنا حضرب مثال باللى أقصدة ... العلماء لما راقبوا النمل و كيفية جمعة و ترتيبه للأكل بتاعه ... لقوا ان النمل بيعمل أكتر من مدخل للجحر بتاعه ... عشان لما يجى ينقل الأكل من مكان للجحر بتاعة ميبقاش كل النمل فى اتجاه واحد و يعملوا زحمة ... ووجدوا ان النمل بينقل الأكل بأسرع ما يمكنه ... بغض النظر عن تخزين كل أنواع الأكل مع بعضه !!! و بعد ما يخلصوا نقل كل الأكل المتاح ... يبدأوا يظبطوا و يستفوا المخزن على رواقه :brb: .. سبحان الله ...
استفادوا من الحكاية دى ازاى ... كان فى شركة نقل بضائع بالطائرات فى أمريكا ... و كان عندهم مشكلة ان كل يوم يجيلهم بضاع تملا يجى 10 طيارات .. بس المشكلة ان معظم الطيارات حيتملا ييجى 10% منها بس ..ماعدا الطيارات اللى رايحة نيويورك ... فكانت دى بتعمل مشكلة ان كتير من الكيارات بتطلع ب 10 % من حمولتها و طيارات بتطلع كاملة و بيتبقى بضايع لنيويورك لليوم التانى ... فلقوا ان البضايع بتتكدس و ان العمال بيحتاجوا وقت طويل عشان يستفوا طيارات نيويورك ... قاموا سألوا يعملوا ايه فى المشكلة دى ... فالعلماء اللى راقبوا النمل قاللولهم الحل ... و كان انهم يبعتو البضايع عشوائى أول مرة لأى مكان ... و بالتالى كل الطيارات حتتملى بنسبة 80% أو أكتر .. و المكان اللى حتوصلة البضايع دى يوديها للمكان المطلوب فى رحلته التالية مباشرة ...
و بكده مكانش بيتبقى اى بضايع متشحنتش و بيبقى جهد عمال الشحن موزع على كل الطيارات مش طيارة واحدة .. و كمان الطيارات مكانتش بتطلع تقريبا فاضية زى الأول..
ماشى ؟..... ورردة

[ســانــدى]

ماشى اخى الفاضل
مش ماشى بس ده طاير كمان :surrender
وألف شكر على المعلومة :tu:

[مـؤيـد]

انت اكيد بتستخدم كمية سمنة او زبدة قليلة
لان لو تلاحظ المادة الدهنية لما بتكون
كتيرة بتمنع هذا الالتصاق ....
هما بيحطو زبده ع البيض؟ :think3:

[ســانــدى]

هما بيحطو زبده ع البيض؟ :think3:

:brb: :brb: :brb:

طيب فهمونا ليه لما بتقرصنا ناموسة او برغوت
او بعوضة بنهرش وموضع القرصة بيحمر؟؟؟ :sniff:

[ماسة]

هما بيحطو زبده ع البيض؟
مش بيحطوة على البيض :brb: بس بيعملوا البيض في الزبدة
طيب فهمونا ليه لما بتقرصنا ناموسة او برغوت
او بعوضة بنهرش وموضع القرصة بيحمر؟؟؟
مش متاكدة بس تقريبا عشان مادة الهستامين بتفرز والمادة دي هي اللي بتسبب الورم والاحمرار. بيحصل حاجة اسمها INFLAMAMTORY RESPONSE فالدم بيتدفق اكتر في المكان المصاب عشان الاوعية الدموية توسعت و ال PLASMA بتتسرب فالمكان دي بيحمر.
شكلي عكيت :closeeye: بس الدكاترة يصححوا باءة :closeeye:

[د.بلال]

معكيتيش قوي يا ماسة ولا حاجة

استني اعك معاكي :drop:

اللي سمعت عنه يعني والله اعلم ان الجسم بيفرز مادة الهيستامين دي لما يحصل التهاب في حتة من الجسم او حساسية ومن اعراض افراز الهيستامين ده الهرش ...اللهم احفظنا :brb:

وكالعادة اي حتة يحصل فيها بربلم تلاقي الدم متدفق لها بشدة لتوفير كرات الدم البيضاء اللي بتاكل الجراثيم بشكل عجيب ‍‍‍‍ :tu:

اتبقا بقا اننا نقول ان في ادوة كتيرة بتندرج تحت تصنيق اسمها مضاد الاهيستامين او Antihistamen و بتستتخدم بشكل كبير في علام الحساسية والأمراض الجلدية

ويا ريت حد ضكتور قد الدنيا يدخل يشرح بشكل علمي اصح من كده يوه بقى


باباز

[ســانــدى]

طيب شوفوا يا حلوين
انا كنت قرأت من مدة مقالة
بس مش فاكرة فى كتاب ولا مجلة
كانت تتحدث عن الباعوض
وده فى سياق الحديث عن آية
(إن الله لا يستحى ان يضرب مثلا ما بعوضة فما فوقها)

شوفوا الكاتب قال ايه

البعوضة عندما تقوم بمص الدم تستعمل تقنية معقدة جدا:
عندما تحط على الهدف فتقوم بتحديد مكان معين بواسطة الشفاه
الموجودة فى الخرطوم، فالبعوضة لها أبرة مغلفة بغلاف خاص
تخرجها عندما تقوم بمص الدم.

الجلد لايثفب بواسطة هذه الابرة كما نعتقد.
ولكن الفك العلوى التى تشبه السكين والفك السفلى التى تحتوى
على اسنان مائلة نحو الداخلهما من يقوم بالعمل
فالفك السفلى تعمل كالمنشار اي تتحرك مثل المنشار
والجلد ينشق بمساعدة الفك العلوى التى تكون كالسكين
ومن المكان المنشق تدخل الابرة الى ان تصل الى العرق
وتقوم بعملية مص الدم.

كما هو معروف عن جسم الانسان فعندما تخرج دم من مكان
وفى مدة قصيرة وبمساعدة أنزيمات الموجودة فى الجسم تحدث
بعملية تخثر الدم فى تلك المنطقة.
اذن هذه الانزيمات تسبب مشكلة كبيرة للبعوضة
لان الثقب التى احدثتها البعوضة فى مدة قليلة ستنغلق
وهذا يعنى انها لاتستطيع ان تمتص الدم،
ولمواجهة المشكلة دى تقوم البعوضة بصنع مادة فى جسمها
وتفرزها الى عرق الانسان فى هذه المنطقة فتمنع تخثر الدم
وبهذا تكمل عملية امتصاصها للدم.

والبعوضة عندما تلدغ الانسان من مكان معين هذا المكان تنتفخ
ويكون فيها احتكاك وسبب ذلك هو الانزيم
التى قامت بافرازها داخل لجسم لتمنع تخثر الدم

[مـؤيـد]

تماااام عليكي والله ياأبله ساندي وأبله ماسه وأبله بلال :chr24:

طيب
عندي سوعاااال بسييييط جدا

ليه لما يكون الجو باااارد بيطلع دخان من بووءنا :chr58: ؟؟

[د.بلال]

د. ساندي

اول مرة اسمع عن الكلام ده .. بس يا ترى الدم هيلحق يتخثر قبل ما البعوضة تخلص عمليتها بنجاح ؟ :think3:

ليه لما يكون الجو باااارد بيطلع دخان من بووءنا ؟؟

هو مش بيخرج دخان من بقنا .. المفروض انه بيطلع شفاف ولما بيلامس الهواء الجوي بيتحول للأبيض

طويب ليه شفاف وليه أووبيض ؟

اساسا انت بتخرج في الزفير ثاني اكسيد الكربون CO2 و بخار ماء H2O كناتجين اساسيين لعملية التنفس و المفروض ان حضرتك من الثديات :brb: اي والله يا مان مش بهرج معاك :drop:

يعني ايه من الثديات ؟ يعني من ذوات الدم الحار برضو يعني ايه ؟ يعني اللي جسمهم له درجة حرارة ثابتة صيف وشتا في موسكو او في الكويت :surrender

نيجي بقا للمهم .. في الشتا لما تيجي تطلع بخار الماء في التنفس بيبقا شفاف لانه في درجة حرارة جسمك 37.5 ْم ف تبقا الجزيئات بعيدة عن بعضها و شفافة زيها زي اي بخار ماء في الجو مش بتاخد بالك منه

انما بقا لما يخرجد بخار الماء ده من بق حضرتكم هيلاقي الدنيا تلجججج يقوم يتجمع على بعضه ويتكاثف على بعضه كده فيبان لونه ابيض .. عارف بالضبط زي ايه ؟

لو عندكم مزرعة وشفتها الصبح بدري هتلاقي عليها طبقا بيضة كده زي ما تكون سحاب
بخار ميا ومتجمع على بعضه من البرد :tu:

و أي خودعة

[مـؤيـد]

تمام يادوك بل
بس اللي انا عايز اعرفه هوا ليه بيتجمع اساسا طيب؟
يعني هوا مبيتجمعش ليه في الصيف

يكونش بيجمع الأكل عشان البيات الصيفي :think3: !

[د.بلال]

بس اللي انا عايز اعرفه هوا ليه بيتجمع اساسا طيب؟

بيتجمع مالبرد يا عم جوارح . .ينكمش

انت مسمعتش المثل القائل : التنيكة تتمدد بالحرارة .. التنيكة تنكمش بالبرورة ؟

هي برضو بتنكمش بالبرودة وتتلم على بعضها كده فاللون بتاعها يبان :tu:

[مـؤيـد]

طيب يا شباب
مفيش حد ناوي يسأل ولا خلاص خلصت الأسئله :think3:

نجاوب طيب :chr58:

[GENEEN]

ممكن ممكن سؤال :chr58: :chr58: :chr58:






ليه لما بنحط فى كاس زجاجى ( يعنى هو فيه كاس فخار :أخخخ: ) شوية مية ونبل صوابعنا (بشوية مية مبلولة :drop: )ونمشى بيها عالحافة بيطلع صوت موسيقى حلوة :واه يابوي هى حاجة فى الاحتكاك صح؟ :drop:

نرجو الافادة :flowers:

[سارونا]

موضوع كميل ... ولذيذ جداً :chr58:

وحيث انكوا عاوزين حد يسأل أنا عندي سؤال

الأول ... هو ليه شعر راسنا ... وجسمنا بيوقف لما بنحس بخوف شديد ؟
التاني ....اللي طرحتوه في الموضوع ( ليه التين أحلى من المشمش ) ؟
مع أني ما بحبش لا التين ولا المشمش

والأسئله جاية كتير بس استنوا علي :twee:

[Cute_Girl]

الأول ... هو ليه شعر راسنا ... وجسمنا بيوقف لما بنحس بخوف شديد ؟


:واه يابوي

انا اعرف ان الموضوع ده فى القطط والحيوانات بس :surrender

الموضوع جميل
بس مش عارفه ليه بيفكرنى باغنيه كانت بتيجى على سبيس تون:

لماذا لماذا لماذا لماذا:twee:
لماذا يعيش السمك فى الماء:twee:
لماذا الاثنين قبل الثلاثاء :twee:
لماذا نحن هناااااااا:twee:
.................
.................

[سارونا]

طيب حد يرد على استفساراتنا

ولا احنا ولاد البطه السوده :أخخخ:

[د.بلال]

هو ليه شعر راسنا ... وجسمنا بيوقف لما بنحس بخوف شديد ؟

بصي يا ستي ..اي واحد لما بيخاف او يتوتر بيشتغل نظام في جسمه اسمه الجهاز العصبي السمبثاوي

بيعمل ايه السمبثاوي ده :think3:

باختصار بيحضر الجسم للخطر .. تزداد ضربات القلب يزداد معدل التنفس و تتحفز العضلات علشان تشتغل .. الخ الخ

الشعر بقا فيه عضله اسمها بالعربي تقريبا العضلة الناصبة Erector muscle و دي مهمتها انها توقف الشعرة

فلما تتوتري او مثلا اخوكي يقولك بخ :brb:

العضله دي بتنقبض فالشعرة تقف

http://www.pantene.com/haircare/hair_twh_12/image004.jpg

[مـؤيـد]

ممكن ممكن سؤال :chr58: :chr58: :chr58:






ليه لما بنحط فى كاس زجاجى ( يعنى هو فيه كاس فخار :أخخخ: ) شوية مية ونبل صوابعنا (بشوية مية مبلولة :drop: )ونمشى بيها عالحافة بيطلع صوت موسيقى حلوة :واه يابوي هى حاجة فى الاحتكاك صح؟ :drop:

نرجو الافادة :flowers:جنين :huh: !!
انتي بتمشي بالكاسة على الحافة :واه يابوي ؟!!
:huh:

[GENEEN]

أصلى بحب المرتفعات :drop: :drop: :drop:

فيه أعتراض :أخخخ: :viking:

طب ما حد يفهمنى ليه :sniff: