بحث في اهم قضايا الزواج

[sshy]

السلام عليكم و رحمه الله
انا حاليا اريد ان ابدأ في بحث يختص بالزواج و قضاياه و كل محاوره
و لكنني احتاج الي اكبر كم ممكن من الاراء و المشاركات و التجارب و القصص و الخبرات الحقيقيه
لا اعرف هل يجب علي انشاء موقع لذلك ام مجموعه بريديه ام ماذا؟؟؟
و هي يمكن لاعضاء هريدي مساعدتي بارسال خبرات و قصص عن اي شئ يخص الزواج
لا يهم ذكر الاسم و لكن المهم ان تكون القصص و الاشياء واقعيه و حقيقيه
لمن يرغب في مشاركتي في هذه الامر ارجو ان يراسلني مشكورا علي الايميل التالي
handoftruth@gawab.com
و شكرا للجميييييع

[sshy]

ايه يا جماعه :think3: :think3:
هو الموضوع مخيف قوي كده؟؟ :chains: :chains:
انا بجد نفسي الموضوع ده ينجح لاني عاوزة اناقش قضايا كثيره في الزواج و لكن بمفهوم جديد نوعا ما
اي حد ممكن يدلني علي طريقه
او اي حد حابب يشارك في البحث بدون اي اسماء
يرسل علي الايميل
ارجو ان الجميع يشارك بجد
الموضوع هام فعلا
و مفيد ان شاء الله

[سبأ]

احنا حاضرين يا sshy بس انتي ماحددتيش انتي هتناقشي الزواج من اي زاويه :huh:

لازم تحددي ناحيه معينه وتركزي فيها والا الموضوع هيتوسع ويكبر ويبقى موسوعه الزواج مش بحث عن الزواج ورردة

[sshy]

انا فعلا عاوزاها موسوعه
عاوزة اكلم عن كل القضايا الهامه بلا استثناء
بس هاحاول ابتدي بنقط معينه مثل
راي الشباب و البنات في الزواج قبل و بعد
السنين الاولي من الزواج و ما يحصل فيها
ديما بين كل زوجين يكون في سبب او اكثر بالذات ديما يدور حولهم الخلافات
الاسباب دي ما هي كلها و تجميعها؟
الصمت الزوجي
رغبه بعض الازواج في الطلاق و استمرارهم من اجل الاولاد
دي بس مجرد كام حاجه
و في انتظاركم

[no0r]

السلام عليكم

الاخت الفاضلة /sshy

مش فاهمة يعنى هيتم مناقشة الموضوع هنا والا من خلال مجموعة بريدية؟

وان كنت شخصيا افضل ان يتم تناوله هنا :closeeye:

وثانيا يا ريت لو هيبقى موسوعة نحدد المواضيع والجوانب اللى هيتم مناقشتها بالتدريج والاعلان مسبقا عن بداية نقطة جديدة فى النقاش
يمعنى مش كل واحد عاوز يناقش نقطة معينة يروح فاتح بيها زاوية جديدة للحوار يقوم يتسحب البساط من تحت رجلين الموضوع اللى كان مفتوح اصلا من غير ما نوفيه حقه


واخيرا اشكرك ورردة

[sshy]

السلام عليكم
اختي العزيزه نور
الحقيقه انا هاناقش الموضوع في عدم اماكن بس بالنسبه للقهوه و اعضائها فسيتم النقاش هنا
و يمكن ينتقل بعد ذلك لمجموعه بريديه بس حاليا هنا

علشان نبقي اكثر تنظيما
هانبدأ باحلام وتخيل كل شاب و فتاه عن الزواج و ما الذي يتمناه في الطرف الاخر بالتحديد
و هل يتنازل عن شروطه ام هي ضروريه
يعني مجرد نقط لبدأ الكلام
و ارجو الاهتمام بالموضوع من الجميع
و شكرا لكم

[sshy]

السلام عليكم
مش معقول كده يا جماعه
الله يكرمكم الموضوع هام
و ارجو المشاركه باهتمام و متابعه لان ان شاء الله الموضوع في نفع لي و للناس
تحياتي

[دمياطى كريم]

السلام عليكم sshy بعد التحية

الموضوع دة أكبر من انة يتناقش مرة واحدة

المفروض يتقسم لمجموعة أفرع وكل فرع يتناقش

بالنسبة للفرع اللي يخص وجهات النظر الشخصية انا هاقول عن وجهة نظري في الزوجة اللي اتمناها

طبعا أول حاجة يكون فية ألفة وود

وأكيد تكون ذات الدين (فأظفر بذات الدين)

وفية حاجة مهمة بعض الناس لا تأخذها فب الإعتبار علي الرغم من أهميتها القسوة

أنا في إختياراتي لشريكة حياتي يجب أضع في إعتباري هل ستكون أم صالحة للأولاد أم لا

ممكن تكون زوجة جيدة لكن أم غير جيدة

موضوع جيد

وشكرا

[دمياطى كريم]

أسف كنت أقصد أهمية قصوي وليست قسوة

:huh: :huh:

[no0r]

الاخت/ sshy


انا متابعة الموضوع بس مستنية اما يوصل لنقطة تهمنى فى النقاش حيث انى عديت مرحلة اختيار فارس الاحلام دى :chr58:


انا زوجة الفارس الان يا فندم :wub:


شوية كده بس الموضوع يخش فى الغميق وهتلاقينى هنا ليل نهار :chr58:


جزاكم الله خير وجعلكم من المرشدين لدينه و وجعلنا واياكم من عباده المخلصين ورردة

[sshy]

السلام عليكم و رحمه الله
اولا احب اشكر نور قووووووووووي
و مستنياكي بجد

دمياطي كريم كمان شكرا جدا


بصوا يا جماعه من الاخر عاوزة اقول اني اصلا عاوزة اؤلف كتاب في الزواج بمعظم جوانبه
و علشان تعرفوا مين العبده الفقيره لله
انا مصريه متزوجه و عمري 24 سنه
بحب الكتابه قوي و بكتب شعر و مقالات ممكن تلاقوا بعضها في ادباتيه و اكتب عامي
بحاول ابقي ملتزمه
متحمسه و طموحه و عاوزة اعمل شئ مختلف و اعمل شئ نافع لي و للمسلمين
شئ يتقدم بطريقه جديده و لاول مره
مشروع الكتاب زي ما هو في دماغي انه اصلا هيبقي كبير قوي
انا هاكتب حاجات من وجهات نظري و خبراتي المحدوده و خبرات من حولي
كمان ارائكم و اراء اكبر عدد من الناس هقدر اجمع كلامهم و ارائهم و خبراتهم
سواء من عدم مواقع و مجموعات علي النت او في الحقيقه او او او
يعني الموضوع كبير

مش عاوزة يبقي مجرد نصايح دينيه و اجتماعيه من الكبار للصغار
او اللي مجرب للي مش مجرب
كلام انشاء
عاوزة كلام واقعي
كلام حقيقي
كلام جامد
كلام بصراحه قوووووي
اكثر من اي صراحه شفتها قبل كده
علشان كده اللي هيشارك مش ديما هقدر يقول اسمه
و طبعا هيكون في مجموعه بريديه و ايميلات خاصه بالمشاركات الخاصه اللي ممكن صاحبها يحرج من ذكر اسمه
و طبعا كل ده هيتجمع
غير اني ان شاء الله في المرحله اللي بعدها هاخد رأي خبراء
يعني ممكن شيوخ و اطباء نفسيين و اجتماعيين و مستشاري زواج
يعني المهم الموضوع ان شاء الله اكثر من مميز
و مشاركه كل واحد او واحده فيكم مهما كان العمر او المؤهل او البلد لها قيمتها
بخبراتكم او خبرات من حولكم
بس المهم يبقي الكلام صادق و حقيقي و من الواقع
و يكون بجد بصراحه مباشره
سواء هنا او علي المجموعه او الايميل
الموضوع شدني جدا لاني انا و كل واحد مننا مهما كان عمره في حاجات كثير قوي لا يعرفها عن الزواج
و محدش علمنا ايه زواج و ازاي نكون ازواج كويسيين
فبجد حاسه ان الموضوع فيه نفع بشع لي و لكم و للكل ان شاء الله
و ان تم كما اتمني و اخطط له

ارجو مشاركتكم و اهتمامكم
و انا ان شاء الله متابعه معاكم
اما النقط اللي هنتكلم فيها فان شاء الله سأتي علي ذكرها باذن الله قريبا
تحياتي للجميييييييييع
و يارب الفكره تنال رضاكم و تحسوا باهميتها بجد
و السلام عليكم

[هريدي يابووووي]

هو يظهر ان الأعضاء المتجوزين خايفين من زوجاتهم.. :closeeye:
و العضوات المتجوزات خايفين من أزواجهم.. :hot:
والللي متكلمين عليهم زي حالاتي لسة ماشافوش مشاكل :lolly:

طب يا أخت شيماء.. حيث ماحدش عنده روح المبادرة..
ممكن تبداي بطرح أسئلة مثلا؟ بحيث تشجع الناس يبحثوا عن اجابات؟
ممكن نبدأ مثلا و نسأل.. انت اتجوزت ليه أصلا؟
و ماتقوليش عشان اعف نفسي و الجواز نص الدين والكلام اللي حفظناه ده :think3:
انا عاوزك تسأل نفسك.. و تطلعلي اجابة من جواك..
انت فعلا ليه اتجوزت اصلا؟.. و ياترى بعد 30 سنة من دلوقت مثلا.. لو كنت لسى مش متجوز.. ياترى هاتحس ايه اللي ناقصك بالظبط بسبب انك ما اتجوزتش؟
هه؟ :huh:
لأ ايه تاني ناقصك غير ضغط الدم والسكر ياخفيف؟ :viking:

[أم أحمد]

انا زوجة الفارس الان يا فندم
و انا كمان :wub:

زي حالاتي لسة ماشافوش مشاكل

ايه الناس اللي مستعجلة على رزقها دي :huh:

ربنا يبعد عنكم المشاكل يا عم :أخخخ:

و ماتقوليش عشان اعف نفسي و الجواز نص الدين والكلام اللي حفظناه ده
حاضر :closeeye:

تحب أقولك عشان الجواز سنة الحياة :twee:
















خلاص هارد اهو ..ابعد الشاكوش عن وشي الله يكرمك :أخخخ:

في الأول هاتكلم بشكل عام .. احنا ليه نتجوز أصلاً .. و بعد كدا هاتكلم عن نفسي ..

نتجوز لأن دي سنة إلهية في الكون .. محدش يقدر يكمل دوره اللي اتخلق عشانه لوحده ( ومن كل شيء خلقنا زوجين لعلكم تذكرون ).. دورنا العبادة و اعمار الأرض .. اعمار الأرض يحتاج للوجود الإنساني و من هنا اتى الزواج كعلاقة رفيعة تليق بمكانة الإنسان وبالزواج يحدث النسل وتتكون الأسر في المجتمع فيزيد عدد الأفراد الذين يعملون في الأمة ..

نتجوز عشان بارتباط عائلتين مع بعض تزيد وتنمو العلاقات و الروابط و الصلات الاجتماعية .. ده المطلوب مننا كمسلمين

نتجوز موش عشان بس نحفظ ديننا ( العفة و اكمال نص الدين زي ما قلت يا هريدي ) .. عشان برضه نحقق السعادة التي لا تتعارض مع الدين الاسلامي .. ده واضح في حديث الرسول فيما معناه ان خير متاع الدنيا المرأة الصالحة

نتجوز عشان ايه تاني؟! :think3:

نتجوزعشان بالجواز تكتمل شخصيتي المرأة و الرجل على حد سواء بادارة بيت و أسرة و تحمل مسؤولياتهما سواء بالعمل لهما أو الرعاية..


بالنسبة لي أنا لو هاتكلم بصراحة .. كنت مضربة عن الجواز إلى أجل غير مسمى سبحان الله .. باتكلم بجد .. كنت باقول لغاية ما اخلص دراستي العليا و استقر في شغلي موش عايزة حد يغلس عليا في حياتي.. قلة عقل يوه بقى ( الفكرة المسيطرة على دماغ كتير من اللي شوفتهم وعرفتهم)..لحد ما التقيت بالشخص اللي وجدت فيه الانسان اللي هيعيني في أمر ديني ودنياي وهيتحقق معاه بإذن الله أملي في الزواج في بناء أسرة تكون نواة صالحة في المجتمع .. أسال الله أن يجمعني بأسرتي في الجنة كما جمعني بها في الدنيا .. ادعولي يا جماعة ورردة

موش بس عشان كدا اتجوزت .. اتجوزت عشان أحقق السعادة سواء ليا أو لمن حولي .. اتجوزت عشان ما ابقاش وحيدة بعد 30 سنة .. احساس الوحدة صعب :sniff: .. صحيح أنا حالياً اؤدي دوري في الحياة من خلال العمل و الانتاج لكن من غير الجواز في حاجة هتكون ناقصاني ..هاكون ما عملتش دوري في مجال مهم في الحياة .. تكوين الأسرة اللي بحلم بيها في المجتمع و بنائها .. يا ترى فاهمني؟!

كفاية كدا يا هريدي و الا ارغي تاني :chr43:
الدور عليك تقول انت اتجوزت ليه يا فندم؟؟ :closeeye:

تحياتي لصاحبة الموضوع أم سارة :flowers:

و كل محبتي و تقديري للجميع ورردة ورردة

[sshy]

السلام عليكم و رحمه الله و بركاته
اخيرا حد عبرني تاني
و كمان هريدي و بارباروسا
يا سعدي يا هناي :clap: :clap: :clap:
اهلا بيكم
و شكرا علي ردودكم القيمه
الحقيقه الموضوع كبير فعلا و اكيد الزمام هيفلت من ايدينا احيانا :surrender :surrender
بس مش مشكله مع الوقت الموضوع هيكمل و هتبقي في نقط محدده نبني عليها كلام
بس اولا عاوزة اشكركم علي مشاركتي في الموضوع لانه مهم جدا عندي
و باذن الله نافع للمسلمين
بجد جزاكم الله خيرا قوووووووووووووووووووووووووووووي :wub: :wub: :wub:


نيجي للمهم
بما ان الناس ممكن تخاف زي ما هريدي قال
فانا هابدا بنفسي
و لازم كلنا نعرف اننا علشان نغير شئ او نحل مشكله لازم نحط ايدنا علي المشكله الاول
طبعا الصراحه صعبه قوي في الحاجت دي
بس عموما هي خطوه جريئه في سبيل احداث تغيير جذري ان شاء الله
طبعا المشاكل الزوجيه او حتي المشاكل في العلاقات عموما قائمه من يوم أدم و حواء للان
و لكن في هذا الزمان اصبحت معظم العلاقات ضعيفه و مجوفه و الناس بعدوا عن بعض قووووووووي
و انا شخصيا حصلت و بتحصل معي
و منهم ناس من المقربين جدا و ممن كنت احبهم جداااااااااا
و ده بصراحه باحس انه بيأثر في قوي و بيفطر قلبي :sniff: :sniff: :sniff:
ان الواحد يبقي قريب قوي من حد لمده 10 سنين و لا 20 ثم تضعف العلاقات بشده بدون سبب يذكر او يمكن لعدم وجود صراحه و مواجهه الامر يبدو كانه بلا سبب

الزواج سنه كونيه
و له نوايا كثيره جدا
و لو كان عندنا نوايا صح له ان شاء الله نوفق
كمان لو بدأنا صح
يعني الاقي شباب كثير يبدأوا في علاقات مكتوب لها الفشل
او ببدايه خاطئه شرعا او عرفا
اولها الصحوبيه و التعارف علي النت او التلفونات
و في الاخر نلاقي الناس بتصدم
الاعلام له دور 99% من كل مشاكلنا للاسف
لانه اكثر شئ مؤثر علينا كلنا اكثر حتي من الاهل و المدرسه و الجامعه و الاصدقاء
يمكن الاعلام رقم 1
الاهل 2
الاصدقاء 3
يعني اظن كده
و علشان كده انا ممن انادي بوجود اعلام اسلامي حقيقي بجد
ربما يخالفني كثيرون و منهم زوجي
و لكن الاعلام اصبح جزء في حياه اغلب الناس
سواء من تلفاز و راديو و نت و جرايد و مجلات و كتب
صعب قوي نستاصل الجزء ده من حياتنا
هنا تيجي اهميه وجود اعلام اسلامي فعلا
يعني قناه اقرأ مثلا
صحيح تجيب حاجت كثيره كويسه
لكن فيها اشياء برضه كثيره انا اختلف معاها جدا فيها
و كذلك اهل العلم
اما قناه المجد فالي حد كبير جدااااااااا نجحت تحقق المعادله الصعبه
مش عاوزين ده يكون موضوع كلامنا الله يكرمكم
دي مجرد مقدمه لها علاقه بالموضوع و الله
لان تعاملنا كازواج جزء كبير منه سببه الاهل و الجزء الثاني سببه الاعلام
لان الاعلام اصلا مؤثر في المجتمع جداااا


نيجي لتجربتي
انا زي ما قلت متزوجه من حوالي 4 سنين
و انا عمري 24 سنه
و عندي بنوته صغننه
تقدم لي زوجي في العام الثالث في الكليه
و كتبنا الكتاب بعد فتره
و تزوجت بعد تخرجي بوقت بسيط
و سافرت خارج مصر بعد زواجي ببعض شهور

طبعا زوجي انسان ملتزم لحد كبير و الحمد لله و طيب
و احبه و يحبني
بس اكيد في بيننا مشاكل
اساسها الخلافات في الاراء
رغم انه مختارني ملتزمه و انا اخترته ملتزم
و دي نقطه شباب كثير يقعون فيها
تخيل انه لاني انا و هوه متشابهين في الخطوط العريضه يبقي خلاص مش هانختلف
طبعا لا
في مليون الف تفصيله و قضيه و موقف سواء كبير او صغير
مهم او اهبل هتختلفوا عليه
و لا يمكن كل ده يبان فعلا الا بعد الزواج
حتي لو قعدتوا عشرين سنه مخطوبين و لا مكتوب كتابكم
مش لان الكل يتصنع
بس طبيعي ان في الفترات دي بيبقي غالب طابع الحب و الاعجاب
و طبعا كلنا نعرف ان مرايه الحب عاميه بتخلي الملوخيه كوارع!!!
خاصه ان معظم البنات يكونوا نفسهم يحبوا و يتحبوا و يعيشوا دور الزوجه و الام و يبقي لها بيتها مملكتها لوحدها
و الشباب بيبقي عاوز يستقر عاوز يحب و يتحب و عاوز حاجات تانيه اكيد
يعني دي نفسيه كل طرف بصوره واقعيه صريحه و الملتزمين يضيفوا سبب انهم عاوزين يعفوا نفسهم و يبنوا اسره ملتزمه
ممكن ناس تتزوج لاسباب اخري اكيد
فلوس
جاه
ضغط اسري
يعني حاجات من دي

انا و زوجي رغم اتفاقنا في الخطوط العريضه
الا اننا نختلف كثيرا
ارائنا برضه مختلفه في كثير من الامور سواء دينيه او حياتيه
بس الحمد لله بنتصالح علطول
يعني اقصاها يوم
و الحب و الموده مازلوا بيننا بفضل الله

انا كنت حابه اتزوج جدا قبل ما يتقدم لي زوجي
لاني رومانسيه و عاطفيه
و كمان لاني انا و صحباتي كنا ديما نشوف بنات اصغر مننا يتخطبوا و يتزوجوا في المدرسه و الكليه
و الصحوبيه و الحاجت دي
و طبعا الحمد لله اننا لم نكن نقبل بهذا حتي قبل الالتزام
فاكيد كنا عاوزين كمان نحب و نتحب بس بصوره شرعيه
و كنا ككل البنات نتصور ان الزواج شئ سعيد و مثالي
و ان طالما هو كويس و طيب و متدين
و انا كمان
و نيتنا صافيه
يبقي اكيد هتكون كل لحظه سعيده
عاوزة اقولكم ده مش صح و لا الواقع
الحياه بتفرض حاجات خارجه عنك و عنكي
و صحيح كلما كان الاختيار افضل كلما كانت الحياه اسعد
ده واقع
لكن حتي لو كان كل واحد فعلا كويس قوووي
برضه هتحصل مشاكل مش هاقول كثيره ولا قليله بس نص نص
مش شرط من الاهل
انا معنديش مشاكل من الاهل بفضل الله ماشاء الله
و لكن الخلافات بيني و بين زوجي في الاراء و اختلاف الطموحات شويه
و يمكن احيانا توقعات معينه منه في افكاري و شخصيتي
لان الرجل الشرقي ديمااااا يتوقع انه يقدر يشكل زوجته
هو اصلا داخل بنيه انه الرجل و انه هيغير
اما تصور ان حد ممكن يغيره في شئ فهو لا يتخيله ابدااااااااااااااااااااااااااااااااااا و يجده تصور غريب مش متعود عليه
و ده غالبا علي كل الرجال
لان ببساطه دي تركيبه و سيكولوجيه الرجل
عنده افكار مسبقه
و تربيته عموما تتمركز في انه الرجل و تعريف الرجل غالبا ما يكون غير صحيح
الحمد لله نجحت لحد كبير اقنع زوجي ان اختلاف ارائنا شئ طبيعي و لا يضرنا في شئ
و ان ده موجود بينه و بين ابيه و امه و اخته و اخيه
و بصراحه زوجي فعلا مرن اكثر مني
يعني انا كثير اري نفسي انا الصح
بس لما بفكر كثير بلاقي اني برضه غلطانه في حاجات
و لكن عزه النفس تاخدني
و علشان كده لازم اشتغل انا علي تحسين نفسي في نقاط معينه
و هو كمان نفس الشئ
و طالما الحب و الرغبه في الاستمرار موجودين يبقي ان شاء الله محاوله التاقلم دي تبقي شئ ممكن

يعني اللي عاوزة اقوله ان في حاجات كثير لو كنا اتعلمناها او عرفناها قبل زواجنا كان التعامل يبقي احسن
و كان ممكن كل طرف يتفادي غلطات كثير
و بما ان تعليم الشباب كيف يكونوا ازواج ناجحين و سعداء كمان
او اباء و امهات كويسين غير موجود في المدارس و الجامعات
فالامر يقع الان علي كاهل افراد
اتمني ان اكون منهم و اتمني ان يوفقني الله في ذلك

و يكون ده دليل لي كيف اكون زوجه افضل
و لزوجي كيف يكون زوج افضل
و لابنائي و من اعرف و للناس عموما
عاوززه اقول للشباب
الزواج ليس شئ سهل
و علشان تقدم عليه لازم بجد تكون مستعد له
و تكون قد المسئوليه
مش باقول كد تنفير للشباب
بالعكس انا نفسي فعلا كل الشباب يتزوج
بس يكون عارف بيعمل ابه و بيتعامل بصوره مدروسه

يعني مش دكتور داخل يعمل جراحه تلقائي كده
بدون ما يعرف يعني ايه جراحه و ايه بيحصل فيها و و و و
نفس الشئ
انا طولت عليكم قوووووووي انا عرفه
و ربنا يعينكم

هنتكلم اول شئ الان في ايه اللي بيخليك عاوز تتجوز سواء بنت او ولد
مليش دعوه بالناس
قولي انت ....انت
نفسك تتجوز ليه؟؟؟؟
و كيف تتخيل زوجك او زوجتك و حياتكم و اولادكم و يومياتكم؟؟
هل تتخيلها دوما بصوره السعاده الرائعه
و البنت هل تتخيلي اهم شئ بعد الدين انه يكون حنون و طيب معاكي و ميزعلكيش ابدا؟؟!!
و الولد تتخيل انها مطيعه الطاعه العمياء و انها جميله دوما اجمل من اجمل نجمات السينما العالميه؟؟!!!!

يلا قولوا بصراحه
عن نفسكم و عن اصحابكم و ممن في سنكم
تخيلاتكم ايه؟؟


اعتذر للاطاله مره اخري
و تحياتي لكم


ساره صحيت
و ماسكه عظمه دبوس الفرخه بتقرقض فيها :think3:
أل يعني البت اكيله قوي :brb: :brb:
هاروح الحق :knight:
حظكم حلو B)
يلا سلام عليكم

[sshy]

يالهوي انا كتبت كل ده :huh:
بجد الله يعينكم :chr58: :chr58:

غالبا الكتاب نفسه هيبقي اقصر من الرد اللي فات ده :brb: :brb: :brb:
يلا سلام :wub:

[محرر الأقصى]

السلام عليكم ورحمة الله وبركاته

الحقيقة يا اخت sshy موضوع رائع ومهم للغاية وكنت اتمنى ان حد يتكلم فيه من زمان

والسؤال اللي سألتيه في محله :tu:

لو كل واحد عرف هو هايتجوز ليه كان هايكون في اختيار شريكة الحياة شيء من العقلانية
يعني مش هانلاقي قصص حب :wub: وصحوبية B) زي ما احنا شايفين

كل واحد هايحط قدامه نقاط معينة لازم يجدها في شريك حياته :closeeye:

لما يجدها يبتدي يفكر انه يتجوز :drop:


أنا الان وأنا لازلت طالب :انجغة: باتمنى جدا اني اتجوز

ليه ؟ :think3:

لسبب جوهري هو اني كنت قبل الالتزام مصاحب وللأسف :huh:

وبذلت مجهوووووووود كبييييييييير ومجاهدة نفس علشان اقطع العلاقة دي :knight:

والحمد لله قطعت شوط كبير و لسه في رواسب وبقايا :hot:

علشان كده انا باتمنى اتجوز علشان اسد الفراغ اللي بقى عندي

لكن انا مش عارف احط خطوط عريضة لأسباب الزواج بسبب الرواسب دي

لأنها قطعا مش هاتكون عادلة :surrender

بمعنى اني لو حطيت الخطوط دي هاكون عايز اللي انا مصاحبها

انا شايف ان موضوع سد الفراغ العاطفي سبب مهم جدا لاسبا الزواج

وده وان كان سبب فهو ليه 500 نقطة تحت منه لازم تدرس :أخخخ:

انا من رأيي ان المناقشة تبدأ من علاقات ما قبل الاتزام

[W#MEROoo]

ازيك على فكرة موضوعك شيق جدا وخصوصا للمقبلين على الزواج بس هيحتاج مناقشات كتير اوي لان ليه جوانب كتير ويارب نقدرنفيد بعض على قد مانقدر وياجماعةاللي عندو معلومة او تجربة مايبخلش بيها لانةممكن يفيد غيرة
ودي اول مشاركة لية معاكم
وربنا يقدرنا على فعل الخير

[no0r]

الاخت العزيزة/ sshy

طيب برضو مضطرة اتكلم عن المرحلة اللى فاتت :chr58:

شوفى ستى انا


انا كنت طالبة مجتهدة فى الصف الثانوى الفندقى

خرجت من الاعدادية وسمعت ثانوى فنادق دى واتهبلت :واه يابوي هبقى نضيفه هبقى نضيفه :واه يابوي

قصدى مضيفة :closeeye: معلشى خطأ مطبعى :surrender

المهم التحقت بالثانوى الفندقى اول سنة ليا اتصدمت :أخخخ: ايه ده كل اللى مفلحش فى ثانوى عام محولين سياحة وفنادق

واحنا بالنسبة ليهم عصافير تقف الى جوار غيلان :sniff:

اه والله غيلان

الواد من دول كان طوله تلاته متر و يسد عين الشمس

وياريته نافع :surrender

المهم

لقيت المدرسة .. معظمها كبلز كبلز :chr58: ثنائيات يعنى :drop:

وكانت لى صديقة غالية هى اختى حتى الان

انا وهيا بقينا زى التايهيين

بيتقال علينا غشم :closeeye:

يا جدعان مش مسئلة غشم :maaaad:

اللى بتعملوه ده غلط وحرام :viking:

انتو بتقولو كده عشان مفيش حد بيحبكم :twee:

:أخخخ:


انتهى الصف الاول وكنا لازلنا متمسكين بوجهة نظرنا واللى خلانا متمسكين بيها اكثر

كان معانا فتاه جميلة جدا كانت مجتهدة وكان هناك شاب عامل فيها عمرو دياب

فضل يشاغل فى البنت لحد ما حبته :wub:

والبنت ليل نهار طبعا تفكير فيه :wub:

لحد ما سقطت :واه يابوي

وابوها نقلها من المدرسة :chains:

قلنا الحمد لله احنا فى السيف سايد :surrender

طيب مكناش بنكلم ولاد ؟!!

لاء طبعا كنا بنتكلم :chr58: فى المدرسة وقت الفسحة لو فى موضوع مشترك بين مجموعة ولينا راى فيه اكيد كنا بنقوله وبالتأكيد كان فيه ناس منهم كتير كنت اعتز بهم واحبهم فى الله

شويه وطلعت موضة فلان خطب فلانه :واه يابوي

معقول بجد؟ اه والله لابسيين دبل

هما فى الواقع كانو اتنين فعلا اتخطبو خطوبه بمعرفة الاهل

ومن ثم الفرة دارت فى المدرسة

وانتشرت الدبل الصفيح فى اصابع الفتيات والفتيان على حد سواء مثال الحب التاهر البرىء
و رمز لتأكيد العلاكه الجميلة :closeeye: :wub:

وانا وسمسم :twee:

وبعد فترة بدءت المشاكل تدب بين الثنائيات :drop: مشاكل هايفة جدا :sniff:
سناء كل ما تركب المواصلات مع حسن حسن يعمل فيها عبدو وسناء هيا اللى تدفع :lolly:

طارق وملك سابو بعض عشان ملك قفشته بيكلم سهيلة ولم سئلته بتكلمها ليه

قالها بكل بجاحة دى اختى :أخخخ:

وامثلة كثيرة من هذا وتلك

ان دلت على شيىء فأنما تدل على فراغ العقل ونقص الخبرة

من جانب اخر

كنت انا وماما فى البيت

هيا تقول شرق

انا اقول غرب :closeeye:

هيا يمين

انا شمال :closeeye:

هيا تقولى كولى

اروح انا صايمة :surrender

فترة مراهقة بئه وكل قراراتها كده لله فلله مكنتش بتعجبنى :closeeye:

انا ليا شخصية خاصة مستقلة ومسمحش ان حد يتحكم فيا :surrender

وبديت افكر ازاى البنات اللى فى المدرسة بيرضو الولد يفضل يزعق فيها ويبهدلها كده وهيا عماله تسح دموع من غير ولا كلمة وفى الاخر يسيبها :viking:

طيييييييييييييييييييييييب

انا عمرى ما هبص لاى ولد من الولاد دول :viking:

عمرى ما هذل نفسى ابدا :maaaad:

ومرت الايام

فهل صمدت برأيى ؟

اكملكم المرة الجايه

احسن ميزو صحى :chr58:

[sshy]

الاخ محرر الاقصي
جزاكم الله خيرا
و ربنا يوفقك و تتخرج و تتزوج ان شاء الله عروسه زي الفل

بس عاوزة اقول حاجه ليكو لي و للكل
انا شايفه كده و الله اعلم ده صح و لا لا

الفراغ العاطفي اللي جوا الشباب
جزء منه هما السبب فيه و جزء ممكن يكون قله حنان و عطف و تفهم و اهتمام من الاهل
يعني لو الاهل "ملئوا" حياه اولادهم قوي بحب و عطف و حنان و نشاطات و دين و و و مظنش هيبقي في فراغ لعلاقات غير مرغوب بها
خاصه لو كانوا الاهل صحاب لاولادهم و ينبهوهم دوما و ان حصل ان حد من اولادهم صاحب لا يتركوه
صاحب دي زي بيدخن تمام
الاتنيين حرام
لازم يفضلوا وراه بالحسني لحد ما يتوقف باقتناعه او حتي بدون
كثير مننا في مراهقته كان لا يقبل براي احد خاصه الاكبر
رغم اننا لما بنكبر بنلاقي حاجات كثيره مما قالوه كانت صح
و كانت ممكن توفر علينا كثير
فاحيانا فرض الاهل شئ علي الابناء هو فعلا المصلحه و هو فعلا الصح

كمان الصحوبيه زي ما قلنا تجي بسبب الاعلام و المجتمع
و تأثير الشباب علي بعضهم البعض


بس النقطه المهمه قوي اللي عاوزة كلنا نفكر فيها
ان مفيش واحد بس ممكن يكون فتي احلامك او حبك الحقيقي زي ما بيقولوا
و لا واحده بس هي فتاه احلامك و الوحيده المناسبه لك
الواقع يقول لنا ذلك

يعني حضرتك او اي حد تاني يتخيل انه لا يمكن يتزوج الا حبيبته
او انه لما يجي يتزوج ديما هيشوف حبيبته و يفتكرها او هيدور علي واحده فيها نفس الاشياء

ده مش صح ليه؟
اولا نحن ميعا نري اللي بيصاحبوا حتي و لو بهدف الزواج
ممكن يصاحبوا واحده كثير جدا و يتهيأ لهم فعلا كل الاحاسيس دي
و بعدين يسيبوا بعض و يصاحبوا ناس تانيه
هلما جرا
ده شئ

ثم ان في ناس تتزوج و بيحبوا زوجاتهم و كل شئ و لكن يتزوجوا عليهم و ممكن تبقي شخصيه و شكل مختلف تماما
و من يطلق او يترمل برضه يتزوج و ممكن ناس من اصول عرقيه و شخصيه و طباع مختلفه و شكل و كله

يعني المهم ان تخيل ان شخص واحد هو المناسب لنا علي ارض هذا الكوكب ليس صحيحا علي الاطلاق
و الشيطان ربما يوسوس لنا بذلك
او العاطفه الجياشه توحي بذلك او او
و كم من ناس تزوجوا بمن احبوا و لكنهم طلقوا و كرهوا بعض بعد كده
لان الحب و الاعجاب وحدهم ليسوا ابدا مقياس لنجاح الزواج
الحب الفياض ده يزول بعد شهور او سنين
و لكن يبقي المعدن و الشخصيه و الطباع و الاصل و الاهل و حسن التعامل و التضحيه و هذه المعاني
لا اقول الحب يختفي
و لكن يكون له طابع اخر مختلف تماما عن الافلام

فيا اخ محرر الاقصي
لا تخف و لا تقنع نفسك ان حبيبتك الاخيره هي فتاه احلامك و هي فقط من كانت ستسعدك
في اشياء كل منا عاوزها في من يمضي معه حياته
لو وجدت و وجد القبول صدقني ان شاء الله هيكون انجح زواج في العالم
مش فارقه بقي زواج صالونات زواج مطابخ زواج مودرن او بلدي او اي شئ
لكن ده الواقع
ممكن الحب ينجح بلا شروط و بدون تحكيم العقل
لكن الزواج لا

كمان احب اوضح بما ان المناسبه جت لمن لا يعرف من الشباب
و لو اني اظن ان الكل يعرف و الحمد لله
ان الصحوبيه حتي و لو كانت بنيه شريفه و غرضها الزواج فهي حراااام
غير مسموح لرجل و امرأه مهما كانت طبيعه العلاقه او الصله بينهما
ماداما ليسا محارم ان يتكلما او يجلسا سويا او ينفردا في المجلس او حتي المكالمات التلفونيه الا للحاجه
لخوف الوقوع في الفتنه
و كلنا عارفين قد ايه ضعف الشاب امام الفتاه و العكس
مش شرط انهم يعلموا شئ محرم و لكن سيكون بينهم علاقه صحوبيه او صداقه او اي شئ
و ده طبعا لا يرضي

و الرجل و المرأه مامورين بغض البصر و مأمورين بعدم الاختلاط الا بقواعد و عدم الخلوه طبعا بأي حال حتي لو مدرسها الخصوصي

و زي ما قال الاخ محرر الاقصي انك بذلت مجهود كبير و تعبت
بس انا عارفه و انت عارف و كلنا اللي جرب او اللي شاف و اتفرج
ان الامر صعب
هو مصيده لو وقعت فيها صعب قووووي تطلع
يبقي ابذل كا غالي و نفيس كل لا تقع فيها اصلا
و الوقايه خير من العلاج صح؟؟

و اقولك يا محرر الاقصي لا تقدر تحط خطوط عريضه صدقني
بس لما يجي الوقت
و الكلام في النقطتين دول هيجي قريبا
نقطه الوقت
و تحديد الشروط
فخليك معانا
الاخ w#merooo

شكرا علي مشاركتك جدا
و في انتظار كلامك ان شاء الله
و ربنا يقدرنا علي فعل الخير اللهم امين

الاخت الحبيبه نور
تجربتك زي تجربتي و تجربه الاخ محرر الاقصي بتقول ان فعلا تأثير وجود كبلز و تاثير الصحوبيات و المجتمع و الاعلام فعلا هي واحد من اهم اسباب الزواج
حتي انها تخلي طلبه لسه في مدارس و جامعات و الواقع و المنطق و كل شئ يقول انه مينفعش يتزوجوا الا بعد التخرج يفكروا في الموضوع بهذا الشكل فيبحثوا دوما او يكونوا منتظرين او يجيلهم احباط او يهملوا دراستهم او او او

المشاكل بين الكبلز غالبا فعلا تبقي تافهه
لان العلاقه اصلا غلط و هما الاثنين مش ناضجين
و هما الاثنين مش فاهمين ايه زواج و لا ايه علاقه و لا الدين بيقول ايه فيهم
يعني مش فاهمين اي شئ فطبيعي انهم يتخبطوا جدا
و لا اعرف كيف يتعامي الاهل عن ابنائهم
صحيح بعض الاهل يكون متابع و قائم بدوره و لكن الشباب يجدوا منفز دول ملهومش ذنب
بس اللي مطنشين او متساهلين دول ايه بقي معرفش؟؟!!
نور مستنيين باقي القصه

شباب بنات
اقولكم بما اننا بدأنا بهذا الخط فخلينا فعلا نبدأ بنقطتين
اولا اللي حابب يتكلم عن علاقات قبل الزواج اوكي
اللي حابب يتكلم عن تخيله عن شريك الحياه بالتفصيل و ليه اختار التخيل ده بالذات
هل بسبب الاعلام او شئ شافه او جربه او حد قاله دي المواصفات الكويسه و لا ايه؟؟؟

كمان النقطه الثانيه راي الاهل في موضوع الزواج عموما
يعني اهلك سواء ابيك و امك و اخوتك او الاهل الاخرين يعني خالتك و عمتك و ابن خاله بنت عمه اخوك؟؟!!!!
كنت ديما تسمعهم يقولوا الزواج حلو و لا وحش؟و كانوا يروا ان الزواج بدري احسن و لا متاخر؟
و في اهل يهتموا قوي بمرحله زواج اولادهم حتي من صغرهم
يعني يقلقوا هيتزوجوا و لا لا و يجيبوا لهم حاجات للزواج و يشيلوها
و ناس يعني الامر نص نص صحيح احيانا يفكروا بس يعني حتي لو لم يتزوجوا مش مشكله
و ناس تانيه مكبره خالص و يقولوا لولادهم للا جواز بلا نيله و براحتكم و اتجوزوا و انتوا عندكم 30 حتي و احنا مش قلقانين و لا همما الموضوع و لا يتحدثوا عنه بشوق يعني خالص او نادر

يعني اي نوع من الاهل كانوا اهلك و هل موقفهم ده اثر عليك و علي قراراتك في الحب او الزواج
ام انك في الموضوع ده لم تتاثر بهم؟؟


في انتظار كلامكم و تجاربكم
قريبا ان شلء الله هاكتب اسم المجموعه البريديه و الايميل للمراسله في الموضوع
لمن يحب المشاركه باي اسم مستعار او ايميل خاص به في ايهما

تحياتي للجمييييييييييييع
و ارجو ان الجميع يشترك و الموضوع ميقفش
كما ارجو تثبيته من ناضورجي الركن
و شكرا

[محرر الأقصى]

السلام عليكم ورحمة الله وبركاته

الفراغ العاطفي اللي جوا الشباب

جزء منه هما السبب فيه و جزء ممكن يكون قله حنان و عطف و تفهم و اهتمام من الاهل


انا معاكي في كل كلمة من الجملة دي :tu:

وكان هي دي تجربتي شخصيا B)


بسأل نفسي كتيييييير ليه ماكنتش أعرف الموضوع ده من زمان :انجغة: :انجغة:

أنا بمر بأزمات نفسية بسبب الموضوع ده

صحيح بندم كتيير لكن بتخيل لو الموضوع ده ما كانش ابتدى من البداية أصلا :sniff:

......


وده مش معناه ان الاهل بس هما المسؤولين لكن يقع جزء كبير من المسؤوولية عليهم

يجي بعد كده دور الاعلام والمجتمع والصحاب و.... و......


موضوع ان مفيش واحده بس هي فتاة الاحلام :wub:

اوكى سليم
:tu:
لكن لازم يكون على الاقل شروط وخطوط عريضة لازم تكون متواجده فيها
مثل : الحجاب , التدين . حفظ القران , الاخلاق ,....

ويمكن التغاضي عن بعض التفاصيل الدقيقة :surrender

وموضوع انان حبيبتك الاخيره هي فتاه احلامك و هي فقط من كانت ستسعدك

لأ أنا ماقولتش كده :chains:

لكن كنت اقصد اني في هذه المرحلة لن يكون امامي الاهي
:huh:
وده كلام كتير من أصحابي اللي مروا بالتجربة دي

انا عندي مذاكرة دلوقتي ولازم أمشي
:closeeye:
أشوفكم بعدين

وممكن جدا بعد الامتحانات B)

[sshy]

جزاكم الله خيرا اخ محرر الاقصي
ربنا يوفقك في امتحاناتك يارب
و عاوزين نعرف حضرتك طالب في ايه؟
كويس انك مكنتش شايف انها بس هي اللي ممكن تسعدك
و باصرارك علي شروط الالتزام فده شئ فعلا ممتاز
و ياريت كل الشباب يكون عندهم الخطوط العريضه اولا و اخيرا اساسها الالتزام قبل الشكل و المال و الاسره و و و
وفقك الله
و في انتظار المزيد و ارجو تثبيت الموضوع
تحياتي للجميع :wub:

[sshy]

السلام عليكم
مع ان الموضوع مهم و في كثير قوي ممكن يقال
بس مستغربه انه لم يثبت و كمان لم اجد كميه الردود المتوقعه
ياتري ليه؟؟ :sniff: :sniff: :sniff:

[محرر الأقصى]

كلها يومين وجاااااي :clap:


ادعولي :hot: :hot: :hot:


ورردة ورردة ورردة ورردة ورردة

[sshy]

السلام عليكم
يا جماعه انا بلاقي الناس اللي اطلعوا علي الموضوع يزيدوا و لكن لا يوجد مشاركات
و فهمت من البعض ان ده لان الناس تظن ان الموضوع للمتزوجين فقط
و ده خطأ
الموضوع اكثر لغير المتزوجين
هو اصلا بيناقش قضايا تخص الزواج من قبل الزواج
من ايام الطفوله و الشباب و تأثير الاهل علي الصبي او البنت في احساسه بموضوع الزواج و اختياره فيالموضوع و نظرته ثم الحب الخاطئ و الخطوبه و و و
يعني هو يناقش كل مرحله
و نناقش فيه كمان تجارب من حولنا من الاهل و الاصدقاء
من اهم اصغر او اكبر مننا
انا اقترحت نقطه نبدأ منها


اقولكم بما اننا بدأنا بهذا الخط فخلينا فعلا نبدأ بنقطتين
اولا اللي حابب يتكلم عن علاقات قبل الزواج اوكي
اللي حابب يتكلم عن تخيله عن شريك الحياه بالتفصيل و ليه اختار التخيل ده بالذات
هل بسبب الاعلام او شئ شافه او جربه او حد قاله دي المواصفات الكويسه و لا ايه؟؟؟

كمان النقطه الثانيه راي الاهل في موضوع الزواج عموما
يعني اهلك سواء ابيك و امك و اخوتك او الاهل الاخرين يعني خالتك و عمتك و ابن خاله بنت عمه اخوك؟؟!!!!
كنت ديما تسمعهم يقولوا الزواج حلو و لا وحش؟و كانوا يروا ان الزواج بدري احسن و لا متاخر؟
و في اهل يهتموا قوي بمرحله زواج اولادهم حتي من صغرهم
يعني يقلقوا هيتزوجوا و لا لا و يجيبوا لهم حاجات للزواج و يشيلوها
و ناس يعني الامر نص نص صحيح احيانا يفكروا بس يعني حتي لو لم يتزوجوا مش مشكله
و ناس تانيه مكبره خالص و يقولوا لولادهم للا جواز بلا نيله و براحتكم و اتجوزوا و انتوا عندكم 30 حتي و احنا مش قلقانين و لا همما الموضوع و لا يتحدثوا عنه بشوق يعني خالص او نادر

يعني اي نوع من الاهل كانوا اهلك و هل موقفهم ده اثر عليك و علي قراراتك في الحب او الزواج
ام انك في الموضوع ده لم تتاثر بهم؟؟



ياريت الكل يشارك
و لو حد حابب يشارك مش في المنتدي
ممكن يرسل علي هذا الايميل
handoftruth@gawab.com
و المجموعه البريديه سيتم الاعلان عنها قريبا
ارجو الاهتمام و ارجو تثبيت الموضوع
و شكرا للجميييييييييييييييييييع ورردة

[هريدي يابووووي]

طب انا عندي سؤال..
الطفل دلوقت و البنت من قبل مايطلعوا م لبيضة و الأهل و المجتمع بيرسمولهم حساتهم حوالين نقطة محورية
و هي الجواز..
هل فعلا الجواز نقطة محورية؟؟
يعني الواحد لو ما اتجوزش الدنيا اتهدت؟ :think3:
و الواحدة لو ما اتجوزتش خلاص مالهاش لازمة يعني؟ :think3:

[المعلم عكوة]

السلام عليكم ورحمة الله وبركاته

هات ياجدع طقم كراسي هنا أحسن القعدة هطول حبتين ونزل شاي لكل الل هيخش بعديا على حسابي
ايه ياجماعة مش احنا قولنا قبل كده مفيش كلام فى السياسة
وعلى العموم أنا هوقف الواد شغتة ع الناصية مع الأستاذة أمال علشان يقف ناضورجى :واه يابوي لو شم ريحة خطر يقولنا ......




نتكلم جد بقة

الأخت sshy ماشاء الله الموضوع فى غاية الروعة وعلى ما أعتقد إن اللى هيدخل ويقرأ شيء من الموضوع ممكن يكون عنده خجل من إنه يحدث ولو حتى نفسه فى شئ هو بيعمله أم بتعمله قد يكون يغضب الله ولكنه منتظر أن يجد الحل فى كلام أي شخص يدخل ويكتب حكايته أو ذكرياته وبعد كده هو ياخد الحل ويطبقه :huh: ... وعلى ما أعتقد هو ده سبب أكبر فى إن الزيارات كتيرة والردود أقل

غير كده أنا عايز أقول إن فيه مجلة كويتية إسمها الفرحة تقريبا بتهتم بنفس الموضوع وكلهاعن العلاقة بين الرجل والمرأة من أول الخطوبة حتى بعد الزواج وبتهتم بأدق تفاصيل العلاقة الزوجية ومشاكلها وبتعرض على القراء حلول .... http://www.al-farha.com/

أنا مش بقول كده علشان توقفوا الموضوع الخاص بينا الآن ....
لا بالعكس أنا بقول إن موقع مجلة الفرحة ممكن يفيدك فى الكتاب اللى أنت عايزه تعمليه على إنه تجربة سابقة لمشروع الزواج أقصد يعنى مشروع كتاب عن الزواج

أما بالنسبة للمنتدى فأنا شايف إن تناقل الخبرات والتجارب هيفيد جداً ولكن حتى الآن مفيش خبرات وتجارب ذكرت عن الزواج إلا من أثنين فقط أم الأخ محرر الأقصى فهو بيذكر حكاية الصراع الداخلي التى يعانى منها معظم الشباب اللى كان له صحوبية قبل إلتزامه وبعد كده إلتزم .....
على فكرة أنا عريس جديد :lolly:

ولله الحمد دامت فترة الخطوبة سنتين ، سنة قبل العقد وسنة بعد العقد

وكانت معظم المشاكل والخلافات ولله الحمد فى أمور بسيطة جداً طوال السنتين والكام شهر اللى فاتو من زواجنا

وبعدين ياجماعة إحنا بندور على حلول لمشاكل من حولنا واللى عايز يعرف أيسر الحلول يقرأ فى سيرة الرسول للتعرف على كيفية تعامله مع زوجاته
وعلى فكرة مجلة الفرحة كان لها أثر كبير على تعاملي مع زوجتي الغالية

طبعا أنا عايز أخلص كتابة بس معنديش ميزو بيعيط ولا عندى سارة نايمة علشان تصحى من النوم

لا أنا مراتي حضرت الفطار وأنا هقوم أعمل الشاي :tu:

يللا سلامو عليكو

[no0r]

انا رجعت تانى اهوه :knight:

كولو يوسع :chr24:


بس يا ستى

احنا وقفنا لحد فين فين فين :think3:

اه :واه يابوي افتكرت :tu:

بقيت فى مواجهات مستمرة مع ماما وكمان الكبلز اللى فى المدرسة والاستفزاز العاطفى بقى والكلام ده :twee:

وفى نفس الوقت تعارض كل اللى بنشوفه مع قيمنا ومبادئنا اللى اتربينا عليها

وبرضو الحكايات ساعات بيبقى شكلها حيلو :chr58:

دا قالى كذا وكذا :drop:

بس برضو انا مسمحشى حد يتحكم فيا :viking:

فشغلت نفسى خالص بعيد عن جو المدرسة حتى وانا جواها :twee:

بقيت طول الوقت فى المكتبة ودى طبعا مكنش بيبقى فيها الا النذر اليسير :tu:

وبعدين ظهر شخص فى حياتى :twee:

فى مكان عمل والدتى الله يرحمها

انا طبعا مبعبرشى طوب الارض :closeeye:

مش ألاطه يعنى :brb: بس مكنتش بستظرف حد :chr58:

المهم

لله فلله كده الانطباع الاول كان ضدنا احنا الاتنين :tu:

كرهتو من اول نظرة :brb:


وبعدين انا بروح لماما بأستمرار وساعات يكون فى حوار مثار فى مسئلة ما :انجغة:

وانا شخصية حرة مستقلة مش واقفة طيشة يعنى :viking:

لازم اقول رايى ويتسمع بالذوء :twee:

كل ما يحاول يقنعنا بوجهة نظرو انا اطلع نظرية تانيه :twee:

وباب الحوار ده خلانى اغير فكرتى عنو :viking:

و لقيت نفسى بفكر فيه :sniff:

انا اللى عمرى ما فكرت فى حد البنى ادم ده بفكر فيه ليه :maaaad:

وما بين انى مبسوطة بتفكيرى وما بين خوفى ان تفكيرى ده يكون غلط بقيت فى حيره :sniff: :think3:

فقمت بصلاة استخارة :tu:

يا رب اهدى لى بالى ان كان فيه شر اصرفه عنى وان كان فيه خير يسره لى

كل ده و انا اصلا ما لمحتش بكلمه :closeeye: انا أليطه جدا :chr58:
وهو أألط منى :أخخخ:

شوفتو أألط دى :chr58:

الى ان فوجئت بيوم ماما بتدخل عليا غرفتى الخاصة :viking: ودى كانت محظورة على الجميع :viking:

مكتوب عليها danger area :tu:
ايوه يا ماما خير :huh:

دا محمد طلب ايدك :lolly:

نعم :huh:

أزاى يطلب ايدى بس هو هياخدنى قطاعى :maaaad:

يا بنتى يطلب ايدك يعنى عاوز يتجوزك :أخخخ:

:chr58:

طيب اللى تشوفيه يا ماما :chr43:

وبدون ما ااقوله كلمه وبدون ما يلف ويدور و يستغل انى لسه فى تانيه ثانوى ويستغل فارق السن يوه بقى هو اكبر منى ب 15 سنه :wub: راح دوغرى اتقدم لوالدتى يوه بقى

واتخطبت للشخص اللى اول ما شوفته مطيقتهوش خالص :chr24:

المرة الجايه اكملكم فترة الختشوبه :chr58:

[محرر الأقصى]

السلام عليكم ورحمة الله وبركاته

B) B) B) B)

الحمد لله خلصت امتحانات ورجعتلكم تاني :clap:

الاخت sshy كنت سألت انا بدرس ايه

انا طالب في كلية الهندسة :brow:

مرة أخرى اعود للموضوع:harhar:

كان دخولي في موضوع علاقة ما قبل الاتزام بسبب سؤال الاخت sshy احنا عايزين نتجوز ليه :think3:

وكان اجابتي لسد الفراغ العاطفي لشاب كان مصاحب وقطع العلاقة دي :hot: :grl:

وانا شايف ان ده سبب جوهري ولو بالنسبة لي شخصيا

طبعا كان لازم يكون في الاول قبل موضوع (سد الفراغ العاطفي) ان ارضي ربنا

واطبق سنة من السنن

وانفذ حديث الرسول صلى الله عليه وسلم (من استطاع منكم الباءة فليتزوج)

لكن ارجع للسبب اللي قولته تاني

كنت أتمنى ان ارى تجارب اخرى واشوف ايه هو الحل

انا شايف الموضوع بيلف ويدور حوالين نقطة واحدة

نبقى نكمل بعدين

سلام

[sshy]

thank u all for replying
i will come soon to comment on what u said and add more
in shaa Alah

[عزة جبر]

انا شكلي دخلت الموضوع متأخر كتير :أخخخ:
بس مش مشكلة
اختي sshy موضوعك كتير حلو وكبير ومتفرع جدا
مش عارفة يمكن لانه الصداع ماسكني ما فهمت منيح بس بتوقع انه بدك تجارب شخصية :closeeye:
اذا كان هيك نحن في الخدمة وموجودون اربعة وعشرين على اربعة وعشرين
يا ستي انا مستعدة اكتبلك تجربتي كلها بس انت اامري واي سؤال نحن حاضرون :closeeye:

ولي عودة ان شاء الله

[سارونا]

موضوع في غاية الروعة يا شي :tu:
الصراحة قبل الجواز انا عمري ما فكرت بالطريقة دي ... انا ليه عاوزة اتجوز؟؟
الجواز بالنسبه لي حصل بسرعة ... ومكانش فيه وقت الإنسان يفكر
كلها طلب ايد وصلاة استخارة
بس من البدايه ... الزمت نفسي ان الإنسان ده ( اللي هو نصيبي )
واجب علي محبته واحترامه مهما تكون الخلافات اللي بينا
بنيت حياتي بالحب ... وكل اللي يجي بعد كده امور محلوله

معلش كل كلامي ملخبط بس راجعة ان شاء الله افصل اكتر
اصل البنت لس راجعة من الإمتحان وعاوزه تشرح لي هي عملت ايه :drop:

[بطاطس]

الموضوع دة مهم جدا
يعنى مثلا نبدا بالاختيار
مثلا لو بنت بتختار ودة اصعب بكتيييييييييير من اختيار الولد طبعا لاسباب كتير
اولا لان اختيارها قليل
وبعد كدة الاولاد دلوقتى(لازم الاوالد مش الرجالة) كلهم معندهمش تحمل مسئولية كلهم عايزين حاجة جاهزة وظيفة جاهزة عروسة جاهزة والا هايبداوا الشكوى من الظروف والحياة و يفكروا فى السفر ودة برضة من غير ما يعملوا حاجة بس يستنوا الفرصة فى مكانهم
ادى اول مشكلة الاختيار صعب جدا ياريت حد يرد فى الموضوع دة

[sshy]

السلام عليكم
الموضوع وقف ليه؟
انا حاليا في اجازه و لذلك مش قادره اني ادخل علي النت الا نادر قوي
بس ارجو ان الكل يشارك و يستمر في الموضوع
و انا كمان هاحاول كل ما ادخل اشارك بالرد
تحياتي للجميع
و لحد الان كلكم كلامكم مفيد و جميل و صح
بس عاوزه مشاركه و تفصيل اكثر
و شكرا