عايزين ايه بالظبط؟

[غــفــران]

مشكلة قائمة بين الشباب و البنات اللي في سن الزواج، و تعالو نتكلم عن الشباب و البنات الملتزمين و الملتزمات اللي المشكلة دي قائمة بينهم برضه للأسف.

بالنسبة للشباب هو عايزها تكون متدينة و في نفس الوقت جميلة و يا سلام لو بيضا (و البعض منهم بيشترط البياض) و مهم جدا انها ما تكونش تخينة و ملفوفة القوام، بعضهم بيشترط انها تكون بتشتغل، اما الشرط اللي ظهر اخيرا و يضحك فعلا هو انها تكون صغيرة في السن، يعني يكون الراجل من دول عدى التلاتين مرتاح و عايز واحدة مش اكبر من 25 سنة :confused:

اما بالنسبة للبنت فهي عايزاه متدين، وسيم، طويل، مستقر ماديا، و لو هي عايزة تشتغل بعد الزواج تبقى عايزاه يؤمن بعمل المرأة و لو مش عايزة تشتغل تبقى عايزاه يؤمن بضرورة جلوس المرأة في البيت، و طبعا عايزاه كريم و حنون و طيب.

يعني باختصار الطرفين عايزين كل حاجة :confused:

يا شباااااااااب.... يا بناااااااااات.... انتوا عايزين ايه بالظبط؟ :confused:

[وائل]

تكثر الاشتراطات

ولكن فى النهاية تكثر التنازلات

وأماي فى أكثر من قصة تنتهى بكل التنازلات وبطريقة غير مفهوة
ونتسائل أين هذا ممن كان يشترط

ومتى وأين تنازل ونزل من البرج العاجي

الوضع الاقتصادى واشتراطات أهل العريس وأهل العروسة
يجعلون من الزواج أسطورة لا تتجقق للكثيرين

وأصبحنا نزيد مشاكلنا بأنفسنا
والله المستعان

جزاكم الله خيرا على طرح الموضوع يا أختى الفاضلة غفران

[الغزال الشارد]

أنا مش عاوزه غير رضا ربنا عني.....




ورضا بابا وماما عني.......


:pray::pray::pray:

[غــفــران]

و غير كمان اشترطات الأهل يا وائل، اصحاب الشأن نفسهم بيكون ليهم شروط وهمية، و زي ما قلت حضرتك بتنتهي بتنازل، طيب ليه الشروط القاسية دي من الأول؟ :sniff:

[غــفــران]

طيب ايه رأيكوا في الل بيحطوا شرط الشكل الخارجي كشرط اساسي للاختيار؟

[عائدة الى الله]

نتكلم بصراحة؟؟؟؟؟؟؟؟؟

ماشى نتكلم بصراحة

بصراحة أنا ساعات كتير باقول مواصفات أمى و أبويا يقولولى دى مواصفات وهمية صعب كل دة فى رجل واحد تلاقيه

أظن و الله اعلم و احسب انى من الفتيات الملتزمات
و اللى بتقوليه يا غفران حقيقة
باقول عايزاه متدين و فاهم الدين صح و يسبنى أشتغل و أعمل دراسات عليا
و باقول عايزاه مثقف و متفتح و يرغب فى السفر للخارج:closeeye:
و باقول عايزاه طويل :bb:و وسيم و شيك:cowboy2:
و باقول عايزاه ثورى:box: و شخصيته قياديه
و ماما تقولى

قولى على رااااااااااااااحتك خالص:brb:

مش هايجيلك غير نصيبك

و مع ذلك أنا باقول كدة و من جوايا عارفة انه من النادر جداا يكون فيه واحد بالمواصفات دى

و عارفة انه وقت الجد لازم اكون واقعية
لأنى أنا نفسى مش أمله يعنى ما حصلتش عشان اقعد اتشرط كدة

فزى ما قال دكتور وائل كله بيتنازل فى الاخر

فدة وضع طبيعى لازم كل واحد يحلم بالحاجة المثالية
عشان لو بطلنا نحلم نموت:brb:

[أسالك الفردوس]

كاتب الرسالة الأصلية : غـفـــران
طيب ايه رأيكوا في الل بيحطوا شرط الشكل الخارجي كشرط اساسي للاختيار؟

السلام عليكم يا غفران
انا متهيائلى ان احنا لازم نحت كل الشروط اللى احنا نفسنا فيها و ندور على الشخص اللى فيه اغلبية المواصفات دى علشان يوم ما نتنازل يكون التنازل مش كبير
لاكن لو احنا فكرنا بمدأ التنازل من الاول..يبقى هنتنازل كتير اوى و يضيع حلمنا بالشخص اللى احنا كان نفسنا فيه
مثلا زى الواحد اللى بيذاكر للثانوية العامة و مركز انه يجيب 80% فى اخر السنة هيجيب حاجة و سبعين لاكن لو ركز من الاول على تسعين ممكن كان جاب اكتر من تمانيين
مش عارفة فكرتى وصلت ولا لأ
اما بالنسبة للشكل مشعيب ان الواحدة يكون نفسها تتجوز واحد شكلة حلو كلنا ميالين للجمال بطبععيتنا
انا من الناس اللى بشرط شرط الاخلاق و الشكل مع بعض
دى طبيعة مش اكتر يمكن يكون فيه ازمة اقتصاديه لاكن معتقدش ان فيه ازمه فى الشكل :)
على العموم ربنا ينولنا كلنا اللى فى نفسنا
سلام

[غــفــران]

كلامك صح يا عائدة الى الله، انما في حاجات ممكن تتنازلي عنها في اختيارك و حاجات مستحيل تتنازلي عنها صح؟ و هو ده اللي انا باتكلم عنه.

[غــفــران]

اسألك الفردوس... يمكن يكون كلامك فيه شيئ من الصح انما انا ضد اللي بيختار على اساس الشكل كصفة اساسية، عشان دي حاجة بتاعة ربنا مش في ايدنا احنا و لا في ايد اللي شكله مش حلو انه يغيره.

[مامتكم]

عايزين ايه

عايزين عريس وبس هو لسه فيه حد بيتشرط

اللى تعرف عريس ومش عاوزاه تبعتهولى عندى لستة انتظار

يا بنتى ده انا من 20 سنة (ماكانش لسه العرسان شاحة زى دلوقتى)

ارسلت لى بنت عمى بتقول لى تقدم لى عريس بس طويل وانا قصيرة

رددت عليها

تشبثى بركبتيه لغاية ما اجيلك حد لاقى

المهم الدين والباقى يتحل

[غنوة]

كاتب الرسالة الأصلية : غـفـــران
اسألك الفردوس... يمكن يكون كلامك فيه شيئ من الصح انما انا ضد اللي بيختار على اساس الشكل كصفة اساسية، عشان دي حاجة بتاعة ربنا مش في ايدنا احنا و لا في ايد اللي شكله مش حلو انه يغيره.

كلامك صح ياغفران وموضوع مهم جدااااااا
في ناس فعلا بتقول اني عاوزة شكله اول حاجة يكون جميل وبيداوا يختاروا ايه هي الصفات اللي عاوزين يختاروها وانا بنظري اني دي حاجة غلط
لاني فعلا زي ماقولتي الشكل ده من عند ربنا سبحانه وتعالي ومش لازم اننا نختار الشكل اول حاجة
لان الاخلاق والتدين انا باعتقادي دي اول حاجة بس لما يجد الجد ياغفران اعتقد انهم بيتنازلوا عن الشكل :chains:

[eldoctor]

بصى .. ربنا بيوفق ..
يعنى مش حتلاقى واحد او واحدة عايز العفاف .. وتلاقى ربنا يضيقها عليه الا لحكمة ..
اللى بيدور على شكل ..الشكل مش دايم .. واللى بيدور على مال او غنى ... المال مال الله .. واللى بيدور على .. وعلى .. دوروا على واحد يتقى الله فيكم ....
ان جائكم من ترضون دينه و خلقه فزوجوه الا تفعلوا تكن فتنة فى الارض و فساد كبير ..

واظفر بذات الدين تربت يداك ..
حديث موجه للرجال .. واخر لاهل النساء ..
انما مصيبة العصر اللى احنا فيه .. انه تحت ستار الحرية الشخصية .. والشخصية المستقلة.. احيانا نرى بأعيننا قشور ..ولا نرى المدى الطويل الذى قد يراه الاهل احيانا ...
لا اجد تعليق اكثر من ذلك ...

انا عايز ..... 3 كيلو سمك .. من ماركة ايوه جاى بتاعة غفران......

[سنفور مفكر]

عايزين كل حاجة



إيه المشكلة؟؟؟:hat:

:confused:

:confused:

ممكن تفهميني...........أنا مش شايف مشكلة
سنفور مفكر

[كــهــرمـــانه]

كاتب الرسالة الأصلية : emas40
المهم الدين والباقى يتحل

تمام

كل حاجه تهون و ممكن الواحد يتنازل عنها

إلا دي :flowers:

[te3mah]

كاتب الرسالة الأصلية : غـفـــران
بتنتهي بتنازل، طيب ليه الشروط القاسية دي من الأول؟ :sniff:
طب وإيه رأيك يا غفران لما يبدأ أحد الطرفين في التنازل من الأول علشان الموضوع يمشي
ويلاقي الطرف التاني استحلى التنازلات وأخدها حق مكتسب ليه
ولما تيجي تطالبي بأبسط حقوقك يقولك :
هو ده اللي عندي وإذا كان عاجبك
انتوا من الأول موافقين عليه

حسبي الله ونعم الوكيل :closeeye:

[te3mah]

كاتب الرسالة الأصلية : emas40


المهم الدين والباقى يتحل
كلامك صح يا أم جهاد
بس للأسف
في نسبة كبيرة من الشباب دلوقتي بتتشدق بقال الله وقال الرسول علشان تتجوز بلوشي مع إنهم مقتدرين ماديا
وده عن تجربة شخصية
والحمد لله
لجوئي الدائم لربنا هو اللي أنقذني في النهاية :closeeye:

[فارس الأقصى]

السلام عليكم و رحمة الله و بركاته...

بصراحة غفران كالعادة أثارت موضوع منتشر بين كثير من الشباب (الله أعلم حال الشابات ايه)...

انا عن نفسي أعرف فعلا كذا ولد من الملتزمين (نحسبهم كذلك و لا نزكي علي الله أحد) حاطط شروط صعبة في الشكل....

انا طبعا متفق معاهم، إن الشكل لازم يبقي مقبول و إلا مكنش ينظر إليها من أصله....

بس مش لازم يعني تبقي الشروط إنها لازم تبقي بيضاء البشرة و بياض لا تشوبه أي ألوان أخري مثلا... ده زيادة أوي....

إنما إحقاقا للحق برضه، انا مش شايف إن اللي حاطط شروط زي كده غلط (بالمناسبة انا مش حاطط أى شرط في الشكل غير القبول) إنما هوا هيتعب...
يعني لو واحد عايز يتجوز واحدة ليها مواصفات معينة (نادرة) في الشكل، براحته، و لما يلاقيها هأزغرطله كمان ... (ده لو لاقاها :-") )

يعني من الآخر، زهقت من محاولة إقناعهم بالموضوع ده...

اللي هيحصل إن تدريجيا مع عدم وجود الزوجة ذات المواصفات المطلوبة و اللي ترضي بحالته كمان (ما هوا لو لسه قدامه 10 سنين علي ما يجيب الشقة يبقي لازم يتنازل حبة عن أقل الأشياء أهمية برضه) هيبتدي هوا يتنازل حبة فحبة و في الآخر هيتجوز (زولة) من السودان (و هذا لا يعني إنهن أقل جمالا، أبدا و الله، أقصد يعني عكس الشرط اللي كان بيفكر فيه الأول)

و ربنا يهدي الجميع و يرزقهم زيجات صالحة إن شاء الله.....


آميييييييييييييييييييييييييييييييييييييين :pray:

[غــفــران]

كاتب الرسالة الأصلية : emas40
عايزين ايه

عايزين عريس وبس هو لسه فيه حد بيتشرط


ايوه يا ستي بيتشرطوا اوي كمان :dry:


المهم الدين والباقى يتحل

صح المهم الدين، و اللي بيطبق الدين صح مش كلام و خلاص، و مهم كمان حاجات تانية، بس ما أظنش ان من ضمنها الشكل بصورة وهمية زي ما هو حاصل حاليا :police:

[غــفــران]

لان الاخلاق والتدين انا باعتقادي دي اول حاجة بس لما يجد الجد ياغفران اعتقد انهم بيتنازلوا عن الشكل
ده في اعتقادك انتي يا غنوتي، انما هم ممكن يتنازلوا عن نقطة الجمال و الرشاقة دي انما لما يوصلوا لسن ال40 و ما يلاقوش حد يتزوجهم :surrender

انما مصيبة العصر اللى احنا فيه .. انه تحت ستار الحرية الشخصية .. والشخصية المستقلة.. احيانا نرى بأعيننا قشور ..ولا نرى المدى الطويل الذى قد يراه الاهل احيانا ...

لا يا دكتور ده بيقول انه عايزها بيضا عشان تعفه، آل يعني القمحية مش هاتعفه، اي منطق ده؟ :confused:

[bigera]

اله اله اله ايه الموضوع اللى يفتح عين الواحد :D

انا واضع شروط فى مقدمتها طبعا الدين والاخلاق وهناك شروط فرعية زى الشكل والسن

بس اول ما الاقيها طبعا حركز فى الشروط الاساسية ومش مهم اوووى الفرعية بس نكون متفاهمين طبعا

تلاقى كتير يقولك عاوزنها جميلة عشان مبصش على حد تاانى :thinky:

طاب ياترى ايه السن المناسب للزواج :crazyy: اول ما خلص كلية ولا ايش :knight:

[غــفــران]

عايزين كل حاجة
إيه المشكلة؟؟؟
ممكن تفهميني...........أنا مش شايف مشكلة
سنفور مفكر
يااااااااا بختك :D

على فكرة ياسي غـفـــران دي أول مشاركة معاكم
ما هو واضح طبعا عشان بتقول لي يا سي غفران :D