آآآآآه يا دمــــاغي

[أسامه علي ( محب )]

آآآآه يا دماغي
شعر محب

عقلي خـلاص قـرب هيجـن
م اللي بشوفه من أهـل الفـن
عـيـب يـــا جـمـاعـه
بـطــلــوا حــبـــه
ســهــر ومـيــاعــه
بطلوا هجص وشغـل دلاعـه
الأيـام دي خدوهـا أجــازه
قبل ما نمشيلكوا فـي جنـازه
تفتـح شاشـة التليفـزيـون
تلقى مزيعـه قاعـده بتدلـع
وف كـل كلامهـا بتتـأصـع
وضيوفها من الوسـط الفنـي
في التمثيـل أو كـات بتغنـي
تلقاها لبسـه لبـس خلاعـه
صــدرهــا بــايـــن
وضـهـرهــا بــايــن
وكأنهـا قـاعـده عريـانـه
تـيـجــي تـسـألـهــا
لـيــه يـــا فــلانــه
بسرعة ترد عليـك وتقولـك
أنـــــا فــنــانــه
ولو شفتها في البيت ما تصدق
تفضـل تنظرهـا وتبحـلـق
متغيره ..صفـره ..وعدمانـه
المكيـاج بــوظ بشرتـهـا
ضيـع حلاوتهـا ونضارتهـا
فـوقــوا يـــا عـالــم
إصـحـوا يـــا نـــاس
راح منكـم فيـن الأحسـاس
فــيــن شـاهـمـتـكـم
فــيــن مـروءتــكــم
قالوا العربـي كلـه حمـاس
الأعـداء بيمـوتـوا فيـنـا
وبيلعنـوا تلاتيـن أهاليـنـا
ولا بـــــنــــــرد
ولا بـــنــــصــــد
والقنـوات كلهـا حواليـنـا
شاغلـه حياتنـا وبتلهيـنـا
ولو في مسلسل ديني جميـل
يزعوه الساعة تلاتـه باليـل
آدي أحـــوالـــنــــا
فيها تفسيـر اللـي بيجرالنـا
حتـى شيوخنـا الله يهديهـم
لو يطلع بالتليفزيون
لازم يحلـق شنبـه ودقـنـه
وإذا كــــان مـمـكــن
يلبس بدلـه عليهـا بابيـون
دول عايزين اسلام ع الموضه
آه يــا ليـلـه ســـوده
حتى الموضه دخلت في الدين
تبقى مصيبه ومـش حاسيـن
بس الأمة دي مـش هتمـوت
حتـى لـو حاربـوا بنبـوت
الكـفـار بيحـبـوا الدنـيـا
وإحنا مبنخافشي من المـوت
أسألـوا ناسنـا بفلسطـيـن
بيواجهوا الدبابـه بصدورهـم
ولا فيه رهبه ومش خايفيـن
وف بغداد.. آهو جه دورهـم
وبكره الدور هيكون على مين
فـوقــي يـــا أمـــة
شـيــلــي الـغــمــة
لإمتى هنفضـل كـده نايميـن
الإعـلام ده شـغـل يـهـود
عايزينـا للشـهـوة عبـيـد
هو صحيح دا زمـن شعبولـه
وزمن نانسي وجيجـي وفلـه
الـــمـــزيـــكـــا
بــقـــت فـبـريـكــا
وأســألــوا مـطـربـنـا
عــلـــي ويـــكـــا
الله يلـعـن أبــو أمريـكـا
قــالـــك بـــــوش
لأ مــــش بــايـــش
ولا أقـــــولــــــك
خـلـيـنـي عــايـــش
أبـقـى فـــي حـالــي
وربــــي عـيــالــي
وأمشي بروحي جنب الحيـط
وديـة لينـا أكـبـر فتـنـه
مصيبة وحلـت علـى أمتنـا
خــلــوا إيـمـانـكــوا
هــــو سـلاحــكــوا
بكرة الموت يحصد أرواحكـوا
وبـــحــــذركــــوا
أوام خـــدوا بـالـكــوا
مـــــن الـطــوفــان
لــمـــا هـيـيـجــي
مش هيسيـب منكـم إنسـان
وصاحب الدين هـو الكسبـان

[جارة القمر]

فكرة جميلة يا محب ايه رايك نخليها سيجال
ونشوف مين دماغه وجعاه اكتر
والزباين يحكموا؟ :box2:
الف سلامة لدماغك يا محب
مخك طار عقلك دار
مش دى الفكرة ولا الحدوتة
اصل الحال من يومة منيل
من يوم التهريج والهلس
ما صبح اسمه ال ايه فن؟
فن ده مين يا عالم تعبانة
راجل نطع وقد الحيطة
شايل بنته وعامل زيطة
بنتى حبيتى معجزة فذة
تقدر تلعب على الحبلين
نونو يا عينى لسه فاطمها
ويرضعها بخيبته الفن
فن ده مين يا عالم مجانين؟
هو العرى ده اسمه الفن؟
ولا الكارثة يا عم محب
راجل بغل وله شنبات
عامل حفلة وفرحان خالص
اصل مراته بقت ستار
ست جميلة وعريانة ملط
ال ايه برده ده اسمه الفن
عامل حفلة لاجل عيونها
عازم منتج يمكن تعجب
والله ده انت راجل تيس
وخسارة فيك كلمة راجل
نايم تحلم بالزلمكة
والطيارة ولا عمارة
اصل تمنها تجيبه الهانم
ويا دوب كده بكاس وسيجارة
هو ده حالنا وحال اولادنا
الى يشوفوا بعينهم فن
فين الدين او فين العيب؟
مش ممكن تلاقيهم تانى
عند الناس دى خلص الدم
حرب تقوم فرصة عظيمة
نجمع كام الف من اياهم
اصل الهانم دى فنانة
تلبس اسود كده وتعيط
والناس وياها دى فنانة
ال يعنى الشهدا الابرار
دفعوا حياتهم لاجل دموعها
اصل الهانم بقت ستار
لازم تعمل ليها كام حفلة
ممكن نعمل للاطفال
الى يا عينى فيهم عاهة
تبقى تجارة وبرضة شطارة
والناس هتشوفها على غفلة
قبل ما ينسوها فى الزحمة
عيل يا ابنى جاله سرطان
فرصة عظيمة وضربة جنان
اعمل له يا اخويا كام اعلان
يلا نلم نعالجه كمان
والله موته اكرم له
ولا يتعالج من تمن اللحم العريان
يلا يا عم كده ولا يهمك
وجع دماغ ولا القلب وحاجة غلب
بس ولا يهمك

[أسامه علي ( محب )]

الأخت الصديقه جارة القمر أرحب بك في صفحتي وبفكرتك الجميله ولنواصل الحوار

شوفتي يا جارة اللي جرالـي
حــظــي وبـخـتــي
تسلـمـي يــا خـتــي
ســؤالــك عــنـــي
لسه دماغي برضه بتوجعني
ما هي أحوالنا بجـد غريبـه
واللي بشوفه حاجـه عجيبـه
تمشي ف شارع ولا ف حاره
علـى رجليكـي او سيـاره
تلقي مشاهد مـش عجبانـي
هنا وف بلدي مالها معانـي
ده غـــــشـــــاش
وده هـــــبـــــاش
عايشين الأثنين في قصـور
والمظبوط يسكـن تخشيبـه
شئ بيشـوه صـورة بلـدي
ما اتمناهـا لأبنـي وولـدي
تمشي تضربي كـف بكـف
حاجه تخللي العقـل يخـف
مــثـــلا يـعــنــي
تلقى أفندي راكـب سيـارة
متشيـك وعليـه نـضـاره
ماشي بجلالته عكس السيـر
لا بيهتـم بــأي قـانـون
ولا يهتـم بــرأي الغـيـر
كان فيه راجل ماشي ف حاله
ومــاشــي صــــح
بيـدور علـى رزق عيالـه
لا بيتـكـلـم ولا بـيـكـح
لقـى سيـاره بتخبـط فيـه
فجأه بسرعه أُغمـى عليـه
جم أهـل المنطقـه واتلمـوا
وحــوطــوا الـبـيــه
إيه يا افندي منتـش شايـف
ماشي بسرعه كمان ومخالف
آم البيـه طـلـع جـوالـه
ورســــم حــالـــه
إبعد يـا بنـي إنتـه وهـوه
إنته متعرفنيـش انـا ميـن
أنا راح أخللي نهاركم طيـن
وصــــدق فــعــلا
ماهو من أصحاب الملاييـن
والغلطـان هـو المسكـيـن
شوفتي يا جـاره الأوضـاع
اللي جابت لدماغـي صـداع
أنا عـارف إنـك عزرانـي
ويمكن إنتي كمـان بتعانـي
ويــلا يـــا أخـتــي
مـهـمــا هـنـشـكـي
ومـهـمــا هـنـبـكـي
اللي فوقينـا مـش سامعيـن
أصــــل ودانــهــم
واحده طين والتانيـه عجيـن

[محمد فارس]

يعنى اسمك محب وجاى تقطع فيهم00
مش خايف ياخدوا الاسم منك000
الا بجد0تطلع 00مين جيجى
متكنش هى اللى بتروح وتيجى00
وترقص فى حفلات التخريجى


محب
كلماتك جميلة ونقدك الساخر زادها جمالا00
وكمان الفين تحية لجارة القمر التى تألقت فى مداخلتها00

واحنا منتظرين الموضوع يشعلل بينكم00
شعللها 00شعلل00شعللها

[جارة القمر]

اه يا محب يا اخويا انا شفت
شفت حاجات خلتنى هطق
وجع الراس كان اسهل يابنى
العن منه وجع القلب
قلبك لما يطير من صدرك
علشان عيل شكله يغم
واقف ياكل جنب زباله
ياكل لقمة او عضماية
يمكن يقرف منها الكلب
واقف جنب رصيف كده فاخر
ادام فيلا يا عينى عليها
اصغر طوبة فى سور جنينتها
ياكل بيها الواد اسبوع
وقف الواد يا حبيبى يبحلق
كده ومتنح ليه ما عرفش
قلت اشوفه ليه بيبص
يمكن حد عليه بيحن
يديله لقمة ولا جنيه
ولا ينادى لابن البيه
يدى الواد كده كام هدمه
اصل البرد خلاص عالباب
يادى الغلب ولا حاجة مندى
واحد جه وشخط فى الواد
اصل المحروس كلب البيه
زور يا حبيبى ما اعرف ليه
اه البيه الكلب خاف من الواد
عينه ختخرج كده على طبقه
كلب البيه اسم الله عليه
واكل ربع خروف فى الطقة
اما البيه اسم الله عليه
واكل بلده فى كرشه بحالها
طار الواد من جنب السور
ولسان حاله كان بيقول
انا ليه كده ما طلعتش كلب
كنت اللقمة دى حتى الاقيها
بس يا قلبى حتى الكلب
يقرف من عيشتك يا ضنايا
ادى يا سيدى حاجة تجنن
بس وجعها كان فى القلب
من كان اولى ياكل لقمة
واد غلبان ولا الكلب
مخى خلاص اهو طار يا محب
والظاهر الدور عالقلب
نعمل ايه ادى حال الدنيا
طول ما الدين فى البسبور
اصل البطاقة دى للغلبان
مش للبيه صاحب الكلب

[أسامه علي ( محب )]

أيــوه يــا جــاره عـنـدك حــق
بــدي أفَـلْـصْ قـبـل مــا طـــق
عايز أفضفض م اللي ف قلبي
عــايــز أطَــلًــعْ م الـمـتـخـبـي
أصـل أنــا خايـف
وكـمان عـارف
الـكـتـمـان بـيـضـر الـقـلـب
إيـه دا يـا شيـخـــه
دي حـياه غـلـــب
لـو كـانـت عـلــى أد صـداع
تـبـقــى بـسـيـطـه ونتحـمـلـهـا
وعلاجـهـا سـهـل فــي أولـهــا
حـبــة مـيــه وفـــص لــمــون
تلـقـى الأمــر علـيـك بـيـهـون
أمـا الـقــلـب
لأه يـا شــيـخــه
ألـف سـلامـه علـيـك م القـلـب
إن شالله اللـي بياكلـوا الشـعـب
الحراميه
واللـي عامللـي فيهـا شخصـيـه
جاتـهـم نـيـلـه وألـــف رزيـــه
دول لاعبيـن فـي بلـدنـا لـعـب
أغـــرب حاجــه
نـاس أغنـيـا .ومــش محتاجة
راحوا استلفـوا فلـوس م البنـك
آلا إيـه يختي معاهم صــك
والـصـك مـيـسـواش تعـريـفـه
دول في النصب يا ناس حريفه
شايفه الـضـحــك
والعـمـلـيـه فـيـهــا تعريص
واحـد نـدل ضعيـف وخسـيـس
خـد قــرشــيـن
ضـيـع عـلــى بـلــده مـلايـيـن
وإنتي عارفـه دي فلـوس ميـن
دي فـلـوس الـنـاس الماسكـيـن
هـمـا عايـزيـن ياكـلـوا بغـاشـه
أمـــا الـشـعـب فـيـاكـل طـيــن
واللـي بيحصـل ده مـش مــرة
ياخـدوا فلوسنـا ويهربـوا بــره
قـولـي تقريـبـا يـيـجـي ألـفـيـن
طيـب راحــوا فـيـن الـحـراس
الـلـي بيحـمـوا فـلـوس الـنـاس
هـيــه بـلـدنـا نـــاس نـايـمـيـن
ولا خــلاص دفـنـوا القوانـيـن
واحــد زيــي سـافـر واتـغـرب
يـامـا أتبـهـدل ويـامـا إتـعــذب
لاجـــل مـــا يعـمـلـه قـرشـيـن
قلـت مفـيـش غـيـر الأستثـمـار
يكـتـر قـرشـي وأبـنـي الـــدار
نصحوني أهل الخيـر وقالولـي
شـركـات تـوظـيـف الأمـــوال
قـرشــك فـيـهـا يـبـقـى حـــلال
نــاس تـعـرف ربـنـا وتـخــاف
ماشييـن ع الشـرع وع الـديـن
وإنتـم مـش غُــربْ وعارفـيـن
راحــت فـيـن هـيـه المـلايـيـن
ومفـيـش قـدامـنـا الا الـصـبـر
أو نـدفـن نفـسـنـا فـــي الـقـبـر
أفـضــل مـــن لـطــم الـخـديـن
أغرب حاجه أسمعها يـا جـاره
إن يـقـولـو عـلـيـهـا شــطــاره
وأنـا مـحــتـار
ولا عــــاد فـيـهــا اسـتـثـمــار
ولا حتـى قـدرت ابـنـي الــدار
ومفيـش عنـدي غيـر الأوجـاع
وجابولـي فـي دماغـي صـداع

أرجو من السيد المشرف حزف المشاركه السابقه لأنها غير مرتبه وشكرا

[أسامه علي ( محب )]

والله يا أخي أنا بقالي ثلاثين سنه بأستناك
كل يوم اسمعهم بيقولوا هراس جاي هراس جاي
لحد ما قولتلهم الظاهر هراس دي كذبه بيضحكوا بيها علينا
وأخيرا ظهرت يا هراس ......وشك ولا وش القمر
بص يا سيدي
بصفتك ناضورجي كبير شوف لينا الحته أمان الأول علشان عندي
كلمتين عايز أأقولهم في ودانك
بتسألني عن جيجي قرب شويه :box:
شوف يا عمونا انا هنا لا أدون تاريخ أو أسرد وقائع علشان تسألني عن جيجي
وأصلها وفصلها طبعا انته سيد العارفين الشعر الساخر زي ما سعادتك اتفضلت بيبقى
فيه شويه بهارات وكمزن وفلفل اسود ومنيل بستين نيله انا عارف ان عندك الضغط والدكتور الله يسترها معاه منعك من الحاجات الحريفه علشان هيه بترفع الضغط أكثر وخاصة انك مصري وبتعاني من مرض محسن صالح شفانا وشفاك الله منه
وبعدين يا شاعر انته جيت بتقول
هيه اللي بتروح وتيجي
في حفلات التخريجي
جبتها منين التخريجي ديه يا استاذ
ده تلفيق وتزوير في أشعار رسميه....ظبطها يا شاعر
طبعا دي شوية فرفشه اوعى تزعل أو يجرالك حاجه ...مش مستاهله
ويا قهلا بيك في آي يا دماغي

[محمد فارس]

كاتب الرسالة الأصلية : محب


هيه اللي بتروح وتيجي
في حفلات التخريجي
جبتها منين التخريجي ديه يا استاذ
ده تلفيق وتزوير في أشعار رسميه....


هى بتروح وانتو بتيجوا
فى حفلات التخريجو

صححتها ياعم محب ولا يهمك

راجعلك تانى وتالت00
بس دماغى الايام دى شوية بعيد عنك عمرانه00
ولما تكون عمرانه 00معرفش اكتب00
لازم تعيش مود اللسعة علشان تكتب00

تحياتى

[stubborn emmy]

والله مش عارفه اقول ايه :55:


تسلم ايديكم بجد يا محب ويا جارة :55:


سجال رائع ومعاني اروع :clap:

اتفضلوا :flowers::flowers:


بس خلاص

[جارة القمر]

دماغى طار والله خلاص
ياناس خلاص قربت اتجن
مش لاقية حد يقولى ده ايه؟
ده عيش بجد ولاده جبس؟
لو بس حد يقولى عليه
نويت فى يوم اخرج بدرى
وقلت اجرب اشترى عيش
مش كل يوم اعمل فيها بيه
واقول بقى يجيب لى البواب
ورحت ماشى لحد الفرن
لقيت هناك موكب زحمة
وناس كتير واقفين طوابير
تقولش بيفرقوا لحمة؟
ركنت حبة وحبة كمان
يمكن تروق والقى لى مكان
اتارى كل الوقت ما فات
تزيد ياعم الناس الوفات
عملت فيها مش قادرة
وقلت يا ابنى هاتلى معاك
بص المنيل على سهوة
وقاللى غور يلا انا ناقصك؟
معايا اهوه ادى جوز جنيهات
كمان هجيب لك ماهى ناقصة؟
سكتت خالص ما نطقثش
وقلت طيب اخد دور
فطل الطابور حبة بحبة
يمشى لحد ما صابنى الدور
وجبت ال ايه كده بجنيه
ورجعت وانا فرحان خالص
وقات بس اكيد العيش
هيبقى طعمه جديد خاص
طبعا دى زحمة بالميات
يبقى اكيد العيش فاخر
وجبت طبق الفول العال
وجنبه بقى حته جبنة
ولسه هقطم لقمة يا عم
والقى الحكاية مش سهلة
اللقمة كان لونها مسود
وقلت يمكن محروقة
لكن الرغيف الى بعديه
كان لونه برضه حاجة هبابى
غمضت عينى وقلت هدوق
وادى قطمة على سهوة
لقيت فى بقى حاجات ناشفة
اتاريها مسامير وحصاوى
جريت بسرعة على البواب
وقلت الحق يا تهامى
انا جبت عيش ما اعرفش ازاى
لقيته حيطة قدامى
ضحك يا اخويا كده وقاللى
عملت فيها ناصح لازم
وجبت مالفرن الى ورانا
انا قلت طبعا يا تهامى
وهو عيشنا بيحى منين؟
ضحك يا اخويا البيه البواب
وقاللى لا يا سعادة البيه
العيش بتاع جناب البهوات
بنجيبه من السوبر ماركو
وتمنه بفى يا سعادة البيه
خمس مرات تمن العيش ده
خرج وسابنى وانا محتار
حتى الدقيق بقى فيه درجات
والناس بتاكل واهى ساكتة
طبعا مادام جناب البهوات
بياكلوا من العيش التانى
بلدنا فيها الغلب زكايب
حتى الدقيق طاله النايب
ومخى باظ من يومها يا ناس
وكرهت حتى شكل العيش
هو الفقير بقى يلبس خيش
وياكل الطين كده بدل العيش؟

[أسامه علي ( محب )]

راجعلك تانى وتالت00
بس دماغى الايام دى شوية بعيد عنك عمرانه00
ولما تكون عمرانه 00معرفش اكتب00
لازم تعيش مود اللسعة علشان تكتب00
إيـــــه يا هراس
ألف سلامه عليك يا حبيبي
وجع الراس
خف شويه من الأنفاس
طول اليوم سهرا ع القهوة
تشرب شيشه وشاي على قهوه
وتقوللي دا الراس عمران
وباين لسه كمان خرمان
ومهما يا صحبي تِظَبَطْ فيها
العكننه مش هتخليها
فايقه ورايقه زي زمان
أما إذا كان على مود اللسعه
أنا في الخدمه
وجاهز ليك من سته لتسعه
وكله يا صاحبي إلا الراس

[أسامه علي ( محب )]

الصديقه العزيزه جارة القمر
أدعوك هنا للمشاركه في الردود فأنتي أيضا صاحبة الصفحة
وشريكة الموضوع فهو سجال بيني وبينك وتكامل وليس تنافس
فمن فضلك تشاركي في التعليق فأنا وانتي نمثل هذه الصفحة

[أسامه علي ( محب )]

إنتي يا جارة فتحتي الجرح
زاد الهم وبعد الفرح
أنا هلاقيها بجد منين
مش عارفين رايحين على فين
زي ما قلتي كنت بقول
هو عمل معمولنا يا ختي
إننا نفضل كده على طول
ليه مش عايزه تفك شويه
ويغوروا ولاد الحرميه
اللي مفيش في قلوبهم رحمة
هما بياكلوا غدا وفطار
حاجه كده ياختي أسمها كافيار
سعر الكيلو يأكل بلدي
فول وفلافل وبعيش بلدي
غاليه بجد وسعرها نار
وإحنا بقت أحلامنا اللحمة
والمشكله وصلت للفول
مين هيصدق مهما نقول
مهما هنصرخ وبصوت عالي
الصوت مبيطلعشي العالي
يوصل لسيادة المسؤول
هما يعيشوا في قصور فدادين
وبيوتنا وقعت م الزحمه
بصوا يا خلق شويه علينا
بطلوا حبه تنهبوا فينا
نفسي بلدنا تبقى نضيفه
ونعيش فيها عيشه شريفه
هو طلبنا دا طلب صعب
بيجيبلكوا في قلوبكوا الرعب
مابنطلبشي غير العدل
مش عايزين من عندكوا فضل
واللي ينرفز واللي يغيظ
تقبض م الدوله الملاليم
وتطلب منك تمشي سليم
ولو يوم مره أخدت جنيه
يا أخييييييه
تبقى مصيبه وحاجه غريبه
أجروا بسرعه إتلموا عليه
أمن وشرطه
حاصروا الحته
أوام وهاتووه
وتحطوه هنا في التخشيبه
والتحقيق أيام وشهور
والمسكين اصبح مشهور
والكاميرات حواليه وصحافه
وكلام فاضي وشغل سخافه
علشان هوه مد ايدييييه
المسكين وأخدله جنيييه
والله بجد ياناس دا حرام
بسرعه يرد عليك ويقولك
أصله سرق م المال العام
شايفه التقوى والإيمان
بانوا وظهروا على الغلبان
أما اللي بيسرقوا ملايين
دول شرفا وفوق القوانين
فاكره يا جاره حكاية التعلب
لما طلب من الناس حواليه
حد يروح للديك يناديه
يدن علشان صوته جميل
والتعلب بقى شيخ ونبيل
حاجه تجيب للعقل جنان
حاجه تغُمْ وأنا تعبان
م اللي بيحصل والأوضاع
وجبولي في دماغي صداع

[جارة القمر]

بص يا عم هقوللك حاجة
كل الدنيا دى هم وكرب
بس الحق عشان الحق
فيها ميزة برضه كبيرة
بتعمنا يا اخويا الصبر
اصل الصبر ده نعمة كبيرة
تصبرطول اليوم تتعود
تبقى حياتك دنيا الصبر
تصحى الصبح
تصبر علشان تغسل وشك
لما سنية تسك المية
بعد شوية تصبر علشان تاكل لقمة
لما سنانك تكسر فيها
تنزل شغلك اهو ده الصبر
لما تلاقى مواصلة يا خويا
انتزل منها على التخشيبة
توصل شغلك ضارب مخك
تلقى رايسك سايق فيها
يشخط ينطر يشتم فيك
برضه مديرك لازم تسكت
ولا يشيللك ست ايام
تدخل مكتب تلقى زمايلك
تسلخ فيك رايح جاى
تسكت برضه مش هتزعق
خلى اليوم يمشى بسلام
ترجع تانى بقى على بيتكم
برضه الزحمة ووجع القلب
تدخل تلقىحماتك
جاية تشرف يادى الغلب
ولا خناقة ما بين اولادك
تنزل دغرى فيهم ضرب
وادى جيرانك يلا بجملة
خبط ورقع ووجع قلب
حاول تخرج بعد الضهر
تلقى الليلة قلبت غم
دوغرى تنام وتشد لحافك
خلى اليوم يتعاد من تانى
يبقى يا سيدى هو الصبر
ممكن يجى فى بلد تاني
ادى مزايا بلدنا الغالية
اوعى تقول راسى وجعانى
بس تقول لله الحمد

[أسامه علي ( محب )]

والله يا جاره دايما حامد
صابر شاكر وقوي وصامد
واللي يعيش في بلدنا يا أختي
لازم يشرب صبر وجامد
إلاَ قوليلي يا جارة صحيح
عمايرنا مبنيه بإيه
بحديد ياختي ولا صفيح
كل ما فكر
أو أتذكر
أعلى عماير هنا في بلدنا
عاليه بجد وعلو المدنا
كل شويه واحده تطيح
عمرها لسه مجاش سنوات
واللي ساكنها ناس بهوات
دفعوا تمنها كتير أولوفات
أصل مكانها في حتت راقيه
وغاليه بجد
ولا يسكنها إلا أكابر
مش ناس حالها يدوب ع القد
دول مش بس خسروا فلوسهم
راحت تحت المبنى نفوسهم
والله الواحد عاد بيخاف
على كل العمارات في بلدنا
لو يشتد شويه الريح
نعمل ايه ماهي حاجه تغُمْ
ناس في بلدنا ما بتشبعشي
طماعة جدا ما بتقنعشي
جابوا للشعب ضغط الدم
ناس إحساسها مات من بدري
مش مكتفيه بسرقة جيبي
بدها برضو تسرق عمري
ده كلام جد ومش تجريح
أنا هتجنن والله يا جاره
لما بيحصل عندنا كارثه
أو تنهد علينا عماره
تلقى فضايح كات مستوره
خرجت م الأدراج في الصوره
وكتير ناس عماله تقول
وكلام عمره ما يدخل عقل
فين يومها البيه المسؤول
حد يصدق
واحد يبني سبع تدوار
من غير تصريح
لأه وإيه
طلعت لجنة وعاينوا الحاله
وفورا جالها أمر إزاله
ناس جدعان
بصحيح رجاله
وكانوا فعلا رايحين يزيلوها
بس السكه طويله شويه
أخدت منهم ياما سنين
لجل عيون عبد الروتين
ولما وصلوا بِمُعِدَاتْهُمْ
بصوا لقوها وقعت وحديها
يعني الذنب مكانشي عليهم
كان الذنب حقيقي عليها
بيني وبينك
كلمه ف ودنك
سر وقوعها مش إهمال
يمكن دي توابع زلزال
م اللي حصل في سنة تسعين
والظاهر تأثيره شغال
والله يا شيخه
فيه في بلدنا بيوت بالطين
جامده قويه وعايشه سنين
بس يا أختي تقولي لمين
وتعيدي لمين
شايفه يا جاره الناس الصاحيه
جُمْ عندنا وحدانا في الناحيه
فيه واحد فلاح غلبان
عايز يبني لعياله بيت
قُريبْ منه جنب الغيط
آه لو شوفتي اللي أنا شوفته
ييجي ستين سيارة أمن
مليانه عسكر بالنبابيت
حاصروا الحته
وهدوا البيت
والمسكين يلطم على خدو
يتوسل والنبي ما تهدوا
دا أنا لميت قرشين بالعافيه
شوفت الذل وجاتلي الكافيه
صحتي راحت وأتهديت
ونفسي ألم عيالي ف دار
لو هتهدوا بجد صحيح
أُطلقْ يا بني عليه النار
رد وقال له
إنته مخالف للقوانين
وآدي يا جاره الأوضاع
اللي جابت في دماغي صداع

[contramal]

إيه يا عم محب الجمال ده

:flowers:

لأ دا أنا مش طالع من العامى بقى

ده أنا هقدم كمان طلب تحويل مسار

وأسيب الأدباتيه وكلامهم المجعلص

وآجى معاكم هنا

إستنى بقى أما أروح أقدم طلب وآجى

:scooter:

[جارة القمر]

والله
صدقت تمام يا محب
اصل البنا عندنا ده مزاج
تبنى براحتك كده على راحتك
معاك فلوس كلكع وخلاص
تبنى بيوت او تبنى عقول
او حتى تبنى مطعم فول
مدام فلوسك جوه الجيب
عمرك ما تسمع كلمة عيب
ولو فلوس ومعاها نفوذ
تبقى الحكاية اكيد هتبوظ
مبانى واقعة تموت ناس
وعقولنا ضايعة من غير اساس
الغش كمان بقى فى التعليم
وزيرنا يا اختى اسم الله عليه
عزبة ابوه يلعب فيها
يشيل سنة ويحط اتنين
ولا كانه البيه شاريها
مناهجنا تحفة وزى الزفت
والبيه يقول اهو ده التطوير
تقدر تقوله كده مش صح
وشك ساعتها اوام هيطير
ماشى ومعاه اتنين بودى جارد
عشان يهد ويبنى الارض
وكل يوم يطلع بقرار
ويوم ابوه مالهوش نهار
الى يفكر يوم يحتج
مدارسنا بقت ملعب لعيال
مش فاهمة حاجة فى مناهجها
اصل المدرس بقى بقال
ويوصل الدرس لباب بيتها
بسلامته قال سنتين ثانوى
عشان يخفف مالاعباء
كتر دروسهم ورصيدهم
ويظهر ان ايده فى جيبهم
زودها خلاها تلاتة
عشان يلوش بزيادة
والاب باع عفشه وفرشه
ورهن مراته للجزار
عشان يكفى فلوس الواد
الى انهطل ودخل ثانوى
والست عندها ست عيال
تشحت عشانهم من بدرى
واخرها ايه الله اعلم
اصل الوزير لساه قاعد
لما يموت ربنا يفرج
يجيبوا غيره من الخارج
دماغى ورمت من بدرى
اصل الصداع ساكن فيها
وناوية اقدم له بكره
فى مدرسة يفطس فيها