المخلوع رقم 2

[واحد بيحب مصر]

كتب صديقنا الشاعر المبدع د. أحمد فنديس القصيدة التالية
فكتبت ردي عليه بعدها . و من هنا أناشد الدكتور أحمد فنديس
أن يشرف قهوتنا عشان يشرب معانا واحد شاي و يمتعنا بكام قصيدة حلوة .

مخلوع (1)
شعر د. أحمد فنديس
مهداة لكل رجل قبل أن تعكنن
عليه زوجته و0000000تخلعه
وقفت والورقة بيديها
تتشمت في الزوج المخلوع

قالت يا زوجى جا يومك
وحياتك لتموت م الجوع

أهى جاتنى الفرصة عشان اسيبك
واتجوز حنفى النعنوع

دا حنفنف راجل بيهلب
وبيكسب ألف ف أسبوع

تمنعنى انى أسافر برّه
مين قال لك سفرى ممنوع

اتفضل ورينى شطارتك
دلوقتى سفرى مشروع

موش خدت اللى دفعتو لمهرى
بالبلغة يا شلبى يا جربوع
----
فكان ردي عليه بهذه الكلمات :
مخلوع (2)

شلبي اللهلوب راجلْ مجدع
و لا خاف من صوتها السرسوع

ولا همّو كلامها المتموّع
و لا شبشب ايدها المرفوع

ولا هزت شعرو بتهديدها
و لا نزلت من عينو دموع

قاللها و اللهِ ان ما سكتي
لاتجوز عشره ف. اسبوع

و لا أرضى ف. يوم يكتبوا عني
إن انا شلوبه المخلوع

الراجل راح يفضل راجلْ
و احسن لك سكي الموضوع
تحياتي و دمتم
و ربنا يجعل كلامنا خفيف على أخواتنا المتواجدات في القهوة دلوقتي
كل عام و الجميع بخير
د. جمال مرسي

[أرض الميعاد]

هيكون خفيف جدا ان شاء الله
:maaaad:

[رشا عبد الرازق]

يا أرض الميعاد متضمنيش يكون خفيف

يعني نعمل حزب عليكم دلوقتي ؟:clap:





تحياتي دكتور جمال

لقصيدة الدكتور احمد أظن والله اعلم اني قد حظيت بشرف القراءة له من قبل قصيدة عن مصر

وتحية لردك شديد الاتقان كالعادة


تحية

وفي العامي

تحلو العودة دوما

بعد فاصل مخمخه


دي مقوله شهيرة للدكتوره الشيماء


تقبل تحياتي الدائمة

لقلمك المميز


:tu:

[أرض الميعاد]

بعد اذنك دكتور جمال ... ارد على رشا

بصي كويس على :maaaad: بعد كلمة خفيف

نعمل حزب وليه لأ :chair:

[ماهيله]

و لا شبشب ايدها المرفوع
هى وصلت للشباشب:confused:
أحنا نروح القسم و كل واحد يآخد حقه هناك :blink3:

[واحد بيحب مصر]

الأخت أرض الميعاد
الأخت رشا
أنا مش عارف انتم عاوزين تعملوا حزب ازاي؟:55:
ايه نوعه ؟:thinky:
يعني حزب ستات ضد رجاله ؟:chair:
ولا حزب فصحى ضد عامي؟:55:

وضحولنا يا جماعة الخير
ما تسيبوناش كده ! ! !:cry:

تحياتي لكما و لعل هذه الطرفة الشعرية تضفي البهجة على نفوس الجميع
كل سنة و انتم بخير
د. جمال:shak:

[واحد بيحب مصر]

الأخت الغاليه ماهيله
السلام عليكم و كل سنة و انت طيبه
( طبعا لازم اسحب ناعم ) :nanana:

لا و الله يا ستي العملية ما وصلتش لكده:surrender

لكن خوفي انها توصل للأكياس السودا:doctor:

تحياتي

[موعوود]

كاتب الرسالة الأصلية : واحد بيحب مصر

[QUOTE]الراجل راح يفضل راجلْ
و احسن لك سكي الموضوع
الراجل راح يفضل راجل
من حيث تحديد النوع
اما في البيت ويا مراته
فمقنن كله ومشروع
لا صوته يعلا علي صوتها
ولا يحشر انفه في موضوع
واذا مره خالف واتمرد
يرقد له في البيت اسبوع
صديقنا المبدع
د جمال
تحياتي الي صديقك د أحمد
واقبل مني تلك المداخله البسيطه السريعه التي لاتليق بابداعاتكم وفي انتظار مزيدكم
تحياتي

[النيـل]

كتب صديقنا الشاعر المبدع د. أحمد فنديس القصيدة التالية
فكتبت ردي عليه بعدها . و من هنا أناشد الدكتور أحمد فنديس
أن يشرف قهوتنا عشان يشرب معانا واحد شاي و يمتعنا بكام قصيدة حلوة .


اولا اهلا بيك وبصديقك الي هو صديقنا الدكتور المحامي: احمد ولغاية ما يجي يشرفنا ويشرب معانا الشاي قبل ما يبرد ولو برد نعمله تاني ومال ايه .. هو هايجلنا اعز منه اسمحلي ارد عليك بالمخلوع تلاتة واللي هي ماتلقيش بمخلوع واحد ومخلوع اتنين


الراجل راح يفضل راجلْ
و احسن لك سكي الموضوع


انت مين انت وجاي
بتقولي سكي ع الموضوع

انت خلاص يا ابني
بقيت في البطاقة مخلوع

والحكاية مش حكاية
شنب لاسود وسبوع

الحكاية ازاي تعرف انك
تعيش بالشبشب المرفوع

وبتهددني انك تتجوز
عشرة ف اسبوع

طب روح اتجوز كدة
وهو ليه قلبي موجوع

انا ياما سهرت ليالي
ونزلت من عيني دموع


وتلف الدنيا بطولها وعرضها
حتى القرى والنجوع

ولا هاتعرف تعيش من غيري
وتتنمى من الروح طلوع

وتحلم انك ترجعلي تاني
وكلامي كله مسموع

بس انا هارفض طبعا
وهاقولك امشي يا مخلوع


وتقبل تحياتي
النيـل:flowers:

[محمد فارس]

عزيزى د0جمال مرسى
رائع كما عودتنا00
اراك جادا حينا و ساخرا حينا اخر00
اقرأ لك الفصحى 00فيخال الىّ ان العامية فى خصام معك واقرأ لك العامى فأظنك لا تجيد غيرها 00
وهكذا انت
نجم مضئ فى سماء العامية والفصحى00
وقد كان من حظى ان قرأت قصيدة الدكتور احمد فنديس وردك عليها من قبل 00
وانا من هنا اضم صوتى لصوتك واناشد الدكتور احمد بأن يشرفنا بالتواجد فى قهوة هريدى0

واما عن المخلوع 00فقد يكون لى عودة اليها مع عودتى من الاجازة0

[هريدي يابووووي]

خلعوووووووووووووني و بااااين في عينيهم:brb:
شديدة والله يا دوك
تسلملنا كيبوردك :flowers:

[رنـranimـيم]

ياساتر استر يارب....فيه ايه انا ماشيه من هنا بالصدفه لقيت لما وحد بيقول مخلوع قلت ده يااما باب او ضرس او مسمار ....ونسيت خااااااااااااالص ان :clap::clap:بقى فيه ناس تانيه بتتخلع:brb::brb::brb:
يعنى جه اليوم اللى حنسمع فيه الست بتقول لجوزها روح وانت مخلوع
ياايها الرجال..الضغط يولد الانفجار وانتم ضغطوا فتحملوا الانفجاااااااااااااااااااااااااار

دكتور جمال ..الجزء التالت بسرعه والله علشان نشوف شلوبه المخلوع على شبابه حيعمل ايه بعد المدام ماخلعته بالتلاته :D

يارجال العالم ....انتهى عصر تعليب المرأه.. وبدأ عصر.. خلع الرجل :viking:


رنيــــــم

[واحد بيحب مصر]

موعود
السلام عليكم
مش عارف انت معانا ولا علينا
كلامك بيقول انك علينا
و اسمك ( موعود ) بيقول معانا
معلش أنا حصل عندي لبس:clap:
عموما :
الموضوع كله طرفهxطرفه
تحياتي

[موعوود]

كاتب الرسالة الأصلية : واحد بيحب مصر
موعود
السلام عليكم
مش عارف انت معانا ولا علينا
كلامك بيقول انك علينا
قصدك ايه يا دكتور
هما حزبين
مخلوع واحد ومخلوع اتنين
بمعني حزب د احمد
وحزب د جمال
و اسمك ( موعود ) بيقول معانا
طبعا معاكوا مش حضرتك د احمد بتاع رقم واحد:nanana:
معلش أنا حصل عندي لبس:clap:
لبس واكل وشرب دي متطلبات الحياه:brb:
عموما :
الموضوع كله طرفهxطرفه
ومااجملها طرفه وللعلم هنا توجد مواضيع بها مداخلات بها كثير من الطرافه خاصة من عمنا الناضورجي هراس واستاذنا العائد ابو سهيله
تحياتي

[واحد بيحب مصر]

أخي الحبيب هراس
و هكذا هي الحياة يا صديقي
مزيج من الجد و الهزل
نعم أخي لقد بت أخشي على شعر الفصحى عندي من شعر العامية
و لكني على أية حال أحاول التوفيق بينهما
كنت أكتب العاميه من قبل و لكن ليست بجودة الفصحى و لكني توقفت
إلى أن شجعتني عليها أخي هراس من جديد
تحياتي
و أتمنى لك قضاء إجازة سعيدة و ترجع بالسلامة
تحياتي
واحد بيحب مصر

[واحد بيحب مصر]

:55:الأخ النيل
الظاهر اننا (معشر الرجاله ) هنسلم بالأمر الواقع
و بد كده يسمونا ( معشر المخاليع )
عموما أنا مستني أشوف مين مخلوع (4)
و مستني مشاركة الأخوات
إيه رأيهم ؟
شكرا على مشاركتك و أضم صوتي لصوتك لدعوة الدكتور أحمد فنديس للقهوه
تحياتي
واحد بيحبكم و يحب مصر:55:

[واحد بيحب مصر]

الأخ الزعيم هريدي يا بووووووووووووي
حمد الله ع. السلامه
شاش من صفع عوتك
جميلة خالص مشاركتك
عاوزين المزيد
إيه رأيك في الموضوع بتاعنا ده ؟
تحياتي:viking:

[واحد بيحب مصر]

إيه يا جماعة
انتو خلصتو ولا إيه ؟ ؟:box:

مفيش حد عاوز يعلق على الموضوع
و يقول رأيه إيه في الخلع ليه :confused:

مستني كل واحد يكتب لو كلمتين بالشعر:chair:

و لا إزاي يكون التفاعل

[واحد بيحب مصر]

دلوقتي واحد هيقوللي :

خلع إيه اللي انت جاى تقول عليه

انت عارف قبله معنى الخلع ايه

لما تتريق عليه

خلع ايه ايه ايه ؟

الله يرحمك يا أم كلثوم

[ماهيله]

على فكره يا جماعه
خدوا بالكوا .....
اللى عايز يكتب شعر يكتب و لو تحبوا تنكتوا كمان
بس لاحظوا أن الخلع ده مش قانون أرضى
ده قانون الآهى ...دلنا عليه الرسول صلى الله عليه و سلم

[واحد بيحب مصر]

الأخت الحبيبة ماهيلة
السلام عليكم و رحمة الله
حاشى لله يا أختاه أن يكون في كلامنا لا سمح الله تهكم
أو انقاص أو إنكار لشرع الله أو سنة نبيه صلى الله عليه و سلم
و ليغفر لنا الله اي زلة لسان حدثت في هذا الموضوع .
و أشكرك على التنويه و لفت الإنتباه .
الإعتراف بالحق فضيلة
و الساكت عن الحق كشيطان أخرس
تحياتي

[محمد فارس]

كتبت الاخت ماهيله
اللى عايز يكتب شعر يكتب و لو تحبوا تنكتوا كمان
بس لاحظوا أن الخلع ده مش قانون أرضى
ده قانون الآهى ...دلنا عليه الرسول صلى الله عليه و سلم

0000
وهل ماكتبه الدتور احمد فنديس والدكتور جمال مرسى وباقى المداخلات فيها مايمس الخلع من حيث انه امر اجازه ديننا الحنيف0
انا ارى ان ماكتبه الدكوران يستحقا عليه الشكر حيث انهما سلطا الضوء بأسلوب ساخر على قضية هامة شغلت مجتمعنا حينا من الوقت 00
ومثلما يسئ كثير من الرجال الى مسألة الطلاق فقد اساءت كثير من النسوة الى مسألة الخلع بمجرد اقرارها تشريعيا 0
من هنا يتحتم على صاحب القلم ان يُسَخر قلمه فى نقد الاستغلال السئ لما اجازه لنا الله 0
وماذا يتبقى لصاحب القلم ان طلبنا منه الابتعاد عن مثل هذه الامور0

د0احمد فنديس
د0جمال مرسى
واصحاب كل المداخلات000
نحن فى انتظار باقى مداخلاتكم00

[واحد بيحب مصر]

أشكرك أخي الحبيب هراس على هذه المشاركة الجميلة
و نحن لن تتوقف أقلامنا لمجرد نقد وجه لنا
و إلا كنا كففنا عن الكتابة منذ زمن بعيد
أشكرك أنك أوضحت للأخت ماهيله ما لم أستطع أنا أن أوضحه لها
تحياتي و دمت أخا رائعا
أخوك د. جمال

[ماهيله]

قلبك أبيض يا ..هراس

ولو أننى مش فاهمه يعنى أيه ..ومثلما يسئ كثير من الرجال الى مسألة الطلاق فقد اساءت كثير من النسوة الى مسألة الخلع بمجرد اقرارها تشريعيا 0 ما علينا :rolleyes:

عادى يا جماعه دى وجهات نظر و كل واحد له وجهة نظره فى الذهب ما قلتش حاجهB)

[واحد بيحب مصر]

و نحن نحترم وجهة نظرك ماهيلة و نقدرها
تحياتي:blow:

[محمد فارس]

كاتب الرسالة الأصلية : ماهيله

ولو أننى مش فاهمه يعنى أيه ..ومثلما يسئ كثير من الرجال الى مسألة الطلاق فقد اساءت كثير من النسوة الى مسألة الخلع بمجرد اقرارها تشريعيا 0 :rolleyes:
B)
الاخت ماهيله

اقصد انه وبرغم ان الطلاق ابغض الحلال عند الله 00فإن بعض الرجال يطلقون النساء على اتفه الاسباب 0
ونفس الشئ 00هناك من النساء من تطلب خلع زوجها ربما لأن ملامح وجهه باتت غير مريحة ، او ربما لأن صوت شخيره زاد معدله عن السابق0
وقد وصل الامر اننا نسمع عن حفلات تقام فى حالة اتمام الطلاق او صدور حكم بالخلع0
هنا00اليس من صاحب القلم ان يكتب وينقد ويسخر00
ليس من الطلاق او الخلع 00وانما من اساءة الرجال والنساء فى تطبيق مااحله الله0
هذا ماقصدته0
ونحن لا نملك الا التقدير لرأيك حتى وان اختلفنا معه0
واهلا بكل ماتكتبيه اختلافا او اتفاقا0

[ماهيله]

وبرغم ان الطلاق ابغض الحلال عند الله
على فكره يا جماعه

مافيش حديث بيقول أن أبغض الحلال عند الله الطلاق
ولو كان فى حديث يبقىاسناده ضعيف جدآ
و أنا أتحدى اى حد يجيبلى حديث عن الرسول عليه الصلاة و السلام بيقول كده


ونحن لا نملك الا التقدير لرأيك حتى وان اختلفنا معه0
جزاكم الله خيرآ

واهلا بكل ماتكتبيه اختلافا او اتفاقا0
طبعآ أكيد

[واحد بيحب مصر]

شوفتي بقى يا مهيلة إن قصيدة المخلوع فتحت لنا آفاق جديدة للحوار و النقاش إزاي ؟
تحياتي لمشاركاتك المثمرة
و تقبلي خالص الود

[ماهيله]

يوه بقى

[محمد فارس]

كاتب الرسالة الأصلية : ماهيله
مافيش حديث بيقول أن أبغض الحلال عند الله الطلاق
ولو كان فى حديث يبقىاسناده ضعيف جدآ
و أنا أتحدى اى حد يجيبلى حديث عن الرسول عليه الصلاة و السلام بيقول كده [

[/B]


الاخت الفاضلة ماهيله
انت على حق 00فالحديث النبوى "ابغض الحلال عند الله الطلاق" ضعيف وادناه فتوى توضح الامر 0

و يظل ماكتبه الدكتور جمال بعيدا عن هذه المنطقة ، 00و

بـــاب الطلاق والخلع والظهار
سئل فضيلة الشيخ محمد بن صالح العثيمين

ما صحة حديث أبغض الحلال عند الله الطلاق ؟

الجواب : الحديث هذا ضعيف , لأنه لا يصح أن نقول حتى بالمعنى أبغض الحلال إلى الله .. لأن ماكان مبغوضا عند الله . فلا يمكن أن يكون حلال . لكن لا شك أن الله سبحانه وتعالى لا يحب من الرجل أن يطلق زوجته , ولهذا كان الأصل في الطلاق الكراهة , ويدل على أن الله لا يحب الطلاق لقوله تعالى في الذين يؤلون من نسائهم قال : ( للذين يؤلون من نسائهم تربص أربعة أشهر فإن فاءوا فإن الله غفور رحيم * وإن عزموا الطلاق فإن الله سميع عليم ) سورة البقرة : 226 - 227 .. ففي رجعوهم قال : ( فإن الله غفور رحيم ) يعني الله يغفر لهم ويرحمهم وفي عزمهم الطلاق قال : ( فإن الله سميع عليم ) وهذا يدل على أن الله لا يحب منهم أن يعزموا الطلاق . وكما نعلم جميعا ما في الطلاق من كسر قلب المرأة , وإذا كان هناك أولاد تشتت الأسرة . وتفويت المصالح بالنكاح , ولهذا كان الطلاق مكروها في الأصل

[ماهيله]

جزاكم الله خيرآ يا أخى هراس
أنت و الأخ سعيدى
خليكم كده ورايا دائمآ
الله يكرمكم
دائمآ تدعمونى