يا توتو يا كيتشن ماشين يا كااااايدهم..ومساعد الشباب ومبهدل مطابخهم....

[آيات الجارحى1]

السلام عليكم ورحمة الله وبركاته..
اذيكوا يا حلوييين يا عسوليييين:flowers:
اقتراح جالى من استاذى الجميل استاذ ياسر سويد :flowers:بعد قرائتنا لمحنة الشيخ زورو يوم الرز واللى ينسوا يقولوا له السمنة واللى ينسوا مش عارف ايه:sniff: المهم استاذ ياسر طلب منى انى اكتب اكلات مصرية..
الصراحة استاذ ياسر جه ع الجرح وضغط:cry:.. اصل انا ممتنعة عن اعطاء وصفات الاكل لحد عشان بتخن ع الوصف بس كدهيوه بقى
وبما ان توتو من هواياته عمل الاكل واكله اثناء عمايله..:eat:
وبما انى برضو بعمل وصفات مضمونة وديتها عربية اسعاف ونقالة:es3af: وصفارتين وىىى وااااااااايتسببوا ان اهل الحتة كلهم يتدلدلوا نصهم م البلاكونات عشان يشوفوا مين فين ليه:lolly:
وبما انى برضو هديكوا وصفات اى حد ممكن يعملها حتى اللى ملهومش علاقة بالمطبخ خالص ممكن يعملوها فى الصالون بس لو لوحدهم فى البيت ويبقوا يشيلوا السجادة العجمى فوق السطوح لحد ما العصافير تاكل بواقى الاكل اللى عليها..:-"
عموما اشكر استاذى ياسر وعاوزة بقى تشجيع ومتابعة كالعادة حكم انا اخدت بالى الناس تموت ف الهيافة(بهزر والله):brb::brb::brb::brb:
وكمان شرط اساسى ان اللى هكتبه يتنفذ مش اقعد انا اديكوا بهاريز افكارى ومرقة ذاكرتى وفلفلة وصفاتى وتاخدوها طازة وسخنة بلسعانى وكمان هكنس مطرحكوا بالنيشان وفى الاخر محدش يعمل اللى بقوله..وعلى فكرة الوجبات دى هتنزل كلها هنا يعنى اللى يتابعنى ييجى ورايا هنا مش فى حتة تانية عشان الناس التانية مش بيبقوا غاسلين ايديهم..:nanana:
تحية الى ام شهد واخوات شهد الخمسة فى عين العدو:lolly::55:.. ربنا يبارك فيهم يارب..
ويلا بينا..
تحبوا ابدا بإيه..:thinky:
طيب اهى دى سهلة:closeeye:




تحضير كوب من الماء البارد...:tu::tu:
المقادير..
كوب زجاجى شرط ان يكون فارغ..^_^
صنبور مياه شرط الا يكون بتاع سقاية زرع الجنينة..:luck:
بنى ادم هيعمل اللى هنقول عليه...:knight:
الطريقة...:-"
تسمية الله سبحانه وتعالى..
حمد الله على وجود الماء الذى حرم منه كثيرين..
لا مانع من صلاة ركعتين شكر على تلك النعمة والدعاء ان نشرب جميعا من يدى الرسول عليه الصلاة والسلام الكريميتين يوم القيامة:pray:.. بعد الانتهاء من الصلاة.. يمكنكم التسبيح.. بالطبع كل اللى فى البيت هيطلعوا يجروا عليكوا مش مصدقين انكوا بتصلوا وعليكم نور:blink:..تقوموا تقولولهم ممكن لو سمحت كوباية ميه.. يوه بقى


وبالهنا والشفا..:closeeye:



وراجعييييييييييييين:romio:

[آيات الجارحى1]

على فكرة الموضوع جد والله مش تهريج بس بعمل جس نبض وتليين كده وبجرب الصوت والبخار والحدوأية...
وكمان متنسوش موضوع حبرشنى الجديد اللى نزل فى العيادة النهاردة..

[أبو معاذ]

اهلا ايات

ازيك يا باشا


عملت الوصفة اللي قلت عليها

بس جيت عند "لو سمحت كوباية ميه"والبطارية فضيت

ليه؟؟؟

عشان مافيش حد اساسا اقوله لو سمحت

عموما الوصفة دي هاعديها المره دي


لكن يون في علمك المرة الجاية
لاممكن ابدا


وبعدين خدي بالك
انتي وقعتي في طباخ بريمو

محسوبك احسن واحد يعمل بطاطس محمرة في مصر

[ياسر سويد]

اهلا عم توتو :tu:

تحضير كوباية ميه ساقعه :crazyy:

عايزين الفول النابت :shak:

على فكره السمك عليا :flowers:

[dr_sho]

:clap::clap::clap::clap::clap:
أخيرا هنتعلم الطبيخ وفنونه :clap::clap::clap:
قاعدة أهو
عايزة أتعلم

1.المكرونة بالباشميل
2.محشى ورق العنب
3.الرز بالمكسرات
4.الحمام المحشى بالفريك
5.الفلافل (ما بحبش أشتريها من برة باحس إنها صباح العك يعنى )

توتو
علمينى بجد مش بهزار:blush):

[هريدي يابووووي]

:brb::brb::brb::brb::brb::brb:
يااااااااااه..
كات ايااااام..
انا بقى عندي وصفة سريعة و مضمونة للبيتزا السوبر سوبريم.. و مجربة ولا عمرها خيبت معايا أبدا..

البيتزا..
الكمية تكفي شخص واحد أحيانا.. و أحيانا 10:elec:
الوقت المطلوب 35 دقيقة

المقادير..
1- تليفون و يكون فيه حرارة.
2- بني آدم ينفذ الوصفة طبعا
3- رقم تليفون little ceasar

طريقة العمل:

هات التليفون..
و مش شرط يكون بقرص.. ممكن تليفون بزراير عادي.. و لو مافيش لا ده ولا ده.. ممكن موبايل..
اطلب رقم little ceasar
اطلب واحد بيتزا سوبر سوبريم كبير و اديهم عنوانك طبعا .. و لو ساكن في الدور العاشر والا حاجة أحسنلك تنزل تستناه على باب العمارة بدل ما محمد هنيدي يقابله على السلم و ياخد البيتزا منه:brb:
انتظر 35 حتى النضج
تررررررن تررررررررررررن <----------- جرس الباب:-"
هاتفتح هاتلاقي الصديق بتاع الديليفري..
هاتدفع الفاتورة:-"
و بالهنا و الشفا:-"

[ريحانه الحلوة]

:brb:

:brb:
:brb:

[مامتكم]

هاتفتح هاتلاقي الصديق بتاع الديليفري..
هاتدفع الفاتورة
و بالهنا و الشفا

دى الوصفة الوحيدة اللى بتنفع مع جوجو ابنى مع انى سايبة له كراسة فيها كل مالذ وطاب لكن وصفة هريدى دوت كوم بتنفع معاه جدا

عموما ياتو تو اما معاكم فى اى استشارة مطبخية انا الحمد لله اتعلمت الطبيخ اخيرا بعد 20 سنه تجارب فى عمك الحاج والحمد لله مازال صامدا آملا فى ان يفرج عنه بعد تلات ارباع المده لحسن السير وقبل ضربان السلوك

طحياطى على افكارك الملتهبه دائما

على فكرة انا تخصص شيااااااااااااااااااط

عن اذنك اما اطفى الفرن

[SAD GIRL]

ياسلااام :tu:
ماشاء الله عليكي ^_^
والله انا كان نفسي في موضوع زي ده من زمااااان :elec:

نورتي الركن الوردي يا توتو واحنا قاعدين مستنيين وصفاتك اللاسعة الله يكرمك :D

[آيات الجارحى1]

انا جييييييييييييت...
ايوووووه طالعى عينى من الصبح عشان اعرف اكتب ردود اصل الكمبيوتر بقى فيه حاجة مش مظبوطة ولازم اوديه الصيانة وبقالى فترة عمالة أأجل عشان مش قادرة على فراقه واهو النهاردة مش عايز يتحرك ولا يفتح اى صفحة...
المهم انى اهو وصلت الحمد لله.. لو ملقيتونيش بكره يبقى راح الصيانة..
اشكر كل الاحبة اللى نورونى بالرد والقراءة..
لؤلؤ هتبقى ان شاء الله بعد موضوعى ده مش قادر تحمر بطاطس كمان..
استاذى ياسر سويد صاحب الفضل عليا فى فكرة الموضوع..
من عيونى الفول النابت والفول ابو زلومة وكل اللى حضرتك تشاور عليه..
دكتورة شو استعدى واربطى المريلة وخدى الكمبيوتر فى المطبخ جنب المايكروويف ومتنسيش تدوقينى..
ريحانة الحلوة صوت ضحكك واصلنى امنعى الضحك..
البيج بوص هريدى بحاله بقى خبرة فى الاكل وخصوصا فى الاكلات المغربية الهريدية الصينية..واسالوا البطريق اللى فى الفريزر..
الدكتورة الرقيقة الجميلة ايماس..
20 سنة يا دكتورة بتتعلمى فيهم طبيخ!!!!
ياعينى عليك يا توتو يا غلبان.. انا ماما اتوفت وانا عمرى 19 سنة تانى يوم كنت داخلة المطبخ.. شهر تريقة على اكلى وبعدها كان احلى حاجة فى ايات اكلها.. (الميزة الوحيدة بمعنى اصح)..
تصدقوا بكتب كل الرد ده ولسة ولا ايقونة من السمايلز ظهرت عشان الجهاز بطىء..
ساد جيرل..
ربنا يكرمك يارب بتحرجينى يعنى وانتى كاتبة دليل اكلات فى توقيعك...
ربنا يخليكى يارب وميحرمنيش منك..
والى الجميع اول وصفة...






وصفة سهلة ان شاء الله والكل يقدر عليها شباب وبنات واطفال كمان...
الفراخ باللمون


الاكلة دى بتتعمل بصدور الفراخ بس..
بتطلبوا من بياع الفراخ انه يديكم صدور بس على حسب العدد اللى عندكم يعنى ممكن كل شخص يتعمل حسابه فى 2 صدور فراخ او اكتر زى منتوا عايزين..
المكونات...
1- صدور فراخ على حسب الرغبة...
2- طماطم تقطعوها كاروهات... يعنى مكعبات.. يعنى اى تخريط والسلام مش مهم لو مش عارفين تخرطوا مكعبات بس المهم تبقى متخررطة صغير مش ترنشات بقى وتلعبوا بيها طبق طاير فى المطبخ...الطماطم بتاع 8 او 9 طماطمات كبار (على اى كمية فراخ) اصل احلى حاجة ان الواحد يمشى من غير مقدار.. انا بتكلم جد والله بس خدوا بالكوا مش كل حاجة ينفع فيها من غير مقدار..
3- توم بتاع راس توم متوسطة مفرومة فى الكبة او تحت رجل عربية او ممضوغة حتى المهم تبقى مفرومة..(رجاء يا جماعة الله يكرمكوا التوم يتفصص الاول من قشره حكم انا عارفة بكلم ناس خام)...
4- زيت ويستحسن زيت زيتون.. على فكرة معظم الوصفات انا هكتبها بزبت الزتون بس انتوا براحتكم اعملوها بالسمنة او زيت العربيات شوفوا انتوا ترتاحوا لايه..



الطريقة...

1- اتفقنا ان فى صدور فراخ .. طبعا الصدور(مخلية من العضم).. ودى وظيفة بياع الفراخ لان فى حالتكم صعب اشرحلكم تخلوها ازاى ولو انها سهلة.. وكمان تبقى منزوعة الجلد.. يعنى معلهاش الجلد بتاعها وخدوا بالكوا اى طيور تتعمل لازم لازم لازم منطبخهاش بالجلد بتاعها عشان اى هرمونات ضارة فى اكل الطيور بتتركز فى جلدها..

2- الفراخ تتشطف وبعدين قطعوها كاروهات هى كمانز.. طبعا للتقطيع عشان تقدروا تظبطوا التقطيع تكونوا بتقطعوا على رخامة او خشبة تقطيع مش ماسكين الحاجة فى ايدكم وتقطعوا عشان هتبقى صوابعكم فى الاكلة هى كمان لان هتتعوروا.. المهم قطعوا الفراخ مكعبات او حتت صغيرة..يعنى الحتة اد عقلتين الصوبه واتمنى ميبقاش ناس عمالقى بيقروا عشان ساعتها هيبقى صدر الفرخة يادوب اد عقلتين الصوبع بالنسبة لهم .. سامع يا لؤلؤ ياللى مفيش كوتشيات فى مصر مقاسك...

3- صينية بقى على النار وفيها 4 او 5 معالق(معلقة اكل كبيرة) زيت زتون والنار والعة طبعا مش هنسوى الاكل باللمبة النيون اللى فى السقف..
سيبوا الزيت ثوانى كده على النار وبعدين حطوا مكعبات الفراخ كلها على الزيت.. هتتش محدش يتخض.. قلبوها بقى لحد ما تبقى لونا محمر كلها.. وبعدين حطوا التوم المفروم اللى قولنا عليه.. وقلبوهم بتاع 3 دقايق او اقل.. وبعدين ارموا عليهم مكعبات الطماطم ومعلقة صغيرة ملح(المعلقة مش مليانة وتقدروا تتحكموا فى الملح على حسب ما تدوقوه).. ونص معلقة صغيرة فلفل اسود...وقلبوهم مع بعض وضيفوا كوبايتين ميه.. لحد ما الطماطم تبقى صلصة وتدوب فى الاكل ساعتها تحطوا نص كوباية لمون معصور على اللى فى الصينية ده.. ويادوب 5 دقايق وتقفلوا النار
مع ملاحظة انكم تدوقوا الفراخ الاول استوت وللا لسة؟؟ بس عموما الفراخ بتستوى بسرعة ومع نفس الوقت اللى الطماطم بتتحول فيه لصلصة...


بس يا حلويين هى دى الوصفة.. مش هنزل وصفة تانية غير لما تقولوا لى انكم بجد عملتوها.. وللعلم هى من اسهل ما تكون والله ووقتها على بعضها بتاع نص ساعة من اول التخريط(للديناصورات) لحد ما تستوى....



وبألف هنا وشفا...
الحلقة الجاية الفول النابت والحمام المحشى.. ان شاء الله ووالله الاتنين اسهل من بعض...

ومحتاجة تشجيع بقى ومتابعة وربنا ميحرمنيش منكم ابدا يا عسوليين..

[أبو معاذ]

وبعدها كان احلى حاجة فى ايات اكلها..


:thinky::thinky:

ايه ده؟؟
هو انتي بتتاكلي يا ايات؟؟؟؟:-"


يعني على وزن احسن طريقه للفراخ شويها
واحلى حاجه في ايات اكلها

[آيات الجارحى1]

انا لحمى مر يا لؤلؤ خد بالك:box:




حد عمل حاجة من اللى انا قلته:sniff:


اما نشوف اخرتها معاكوا على الله يتمر:viking:

[كــهــرمـــانه]

أيه دا يا توتو

بقيت كيتشن ماشين....

على العموم دي وصفة هايله

بس أنا عندي مشكلة

أنا بعرف أعمل أكل كويس

بس المشكلة إللي عندي أن أنا تخصص دلق

الحاجة بتدلق مني بعد ما أعملها

مش عارفة ليه :confused:

هل عندك حل لمشكلتي ؟؟؟؟ :D

[أبو معاذ]

عمل ايه؟؟
انا لسه ماقرتش اساسا

[ياسر سويد]

حد عمل حاجة من اللى انا قلته


اما نشوف اخرتها معاكوا على الله يتمر


المفاجيع عملوها :crazyy:

وماسابوليش حاجه :viking:

بيقولوا خوفنا عليك م الأنفلوانزا :maaaad:

[أبو معاذ]

المفاجيع عملوها

وماسابوليش حاجه

انتوا هاتلخبطونا ليه؟؟؟

[SAD GIRL]

ايوووووه طالعى عينى من الصبح عشان اعرف اكتب ردود اصل الكمبيوتر بقى فيه حاجة مش مظبوطة ولازم اوديه الصيانة وبقالى فترة عمالة أأجل عشان مش قادرة على فراقه واهو النهاردة مش عايز يتحرك ولا يفتح اى صفحة...
الحال من بعضه والله :sniff:
الكمبيوتر الزفت بتاعي من أول ماحطينا عليه الويندوز xp وهو مدوخني السبع دوخات ربنا ينتقم منه :maaaad:
تلاقيني وانا قاعدة عالنت عمالة أعيــــــــــــــط :sniff:
وطالعلي بحركة جديدة اليومين دول لما اروح عند تنبيه بريدي واشيل علامة صح الي جمبه قبل ما أبعت الرد يقوم يلغيلي كل الكلام اللي كتبته فوق :chair:
أعمل فيه ايه بس :box2:

أمري لله ،،
انا بافكر اشتري كمبيوتر جديد خالص واحط عليه انترنت سريع عشان ده انا رميت طوبته خلااااص :dry:

المهم :D
تسلمي عالوصفة دي وهاجربها إن شاء الله ،، النهاردة او بكرة او اللي بعده او اللي بعده :blush):

[آيات الجارحى1]

يا سلام يا حلويين محدش عمل الوصفة..
دى وصفة سهلة دى وصفة هايلة:harp:
يا استاذ ياسر بجد عملوها وللا لا؟؟
وازاى لو عملوها ميسيبوش لك نصيبك:maaaad:
طيب امرى لله هنكمل اهو النهاردة...
الحمام المحشى...
المقادير..
1- بكرة شيكارتون عريض..
2- حمام
3-ورق عنب..
الطريقة..
يتم لصق ورق العنب مع بعضه بواسطة الشيكارتون العريض وبعدين يتلف بيه الحمام ويبقى حمام محشى وبالهنا والشفا..





*نصيحة بقى اللى مأكلش سمان قبل كده يبقى حرم نفسه من اروع اكلة فى الدنيا... وللعلم بقى السمان يقول للديوك الرومى قوموا وانا اقعد مطرحكوا.. طعمه فى منتهى اللذاذة اللى فى الدنيا..وبالتالى انا هكتب الوصفة على السمان لكن هى نفسها للى عايز يعملها بالحمام..
المقادير..
1- سمان على حسب الرغبة شرط ان ينزع جلده وطبعا لو هتشتروه من بياع الفراخ يبقى هيدبحه وينضفه وتقولوا له يشيل جلده لو ناس مفيش عندهم بياع فراخ واعتقد استاذ ياسر فى ايطاليا معندهوش بياعين فراخ يبقى هتشتروا السمان من السوبر ماركت مجمد..
2-كوبايتين رز يتم شطفهم فى مصفاة وبعد كده يتحطوا فى اى حاجة غويطة(حلة او اى بتاعة)
3-4 بصلات كبار يتخرطوا يدوى(شرط انهم ميبقوش مفرومين لازم متخرطين يدوى) وعليهم معلقة صغيرة ملح ونص معلقة فلفل اسود.. ويتم دعك الملح والفلف بالبصل...
4- ابرة وخيط...:blink:
الطريقة...
1- دلوقتى لو فى كبد وقوانص بتاعت السمان بتتخرط صغير بعد ما تتشطف وتتحط على الرز
2- بيتحط البصل ابو ملح وفلفل على الرز ابو كبد وقوانص او الرز السادة ويتحط عليهم 3 معالق زيت كبار (معلقة اكل كبيرة)...ويتقلبوا مع بعض..
3- بنحشى بطن السمان بالرز ابو خلطة ده ونحشيها للاخر مش شوية رز وتتساب مهوية.. لا عايزين شوية ذمة الله يكرمكوا لازم يبقى الحشو للاخر وميبقاش فى اى فراغات تسمح بدخول الهوا تبقى مكبوسة على عينها وعين اللى جابوها خالص..:viking:
4- بتجيبوا بقى الخيط والابرة وتلضموا الابرة طبعا وتخيطوا الفتحة اللى حشينا منها .. هتقولولى نخيط ازاى:crazyy:
سهلة الدكاترة زى ما بيخيطوا اى واحد مفتوح واللى مش دكاترة زى ما نفسهم يخيطوا بؤ عيالهم الرغايين.. اى خياطة والسلام بس المهم الن الفتحة تبقى ملمومة عشان ميقعش الرز منها وهى بتستوى..والخيط ابيض طبعا عشان مينزلش اصباغ فى الاكل
5- بتجيبوا بقى حلة وتحطوا فيها السمان وتملوها ميه لحد ما تغطى السمان.. الرز بتاع الحشو ممكن يبقى فيه زيادة حطوها على الميه اللى فى الحلة.. ولو كان ناقص وانتوا بتحشوا زودوا كميته شوية مش مشكلة..
بس وتسيبوها تستوى على النار بتاخود تقريبا ما بين 20 دقيقة الى نص ساعة.. وبعد كده بتنشلوها من الشوربة.. وتجيبوا بقى مقلاية.. او اى حاجة تحمروا فيها.. حطوا بقى معلقتين سمنة.. وادهنوا السمان بصلصة.. وحمروا السمان فيه لحد ما يبقى لونه دهبى (مش اسود الا يتحرق:cry: ) بس وتبقوا عاملين جنبها رز وطبعا الشوربة بتاعته بتبقى تحفة ملهاش حل..:tu:
وبالهنا والشفا...:flowers:


بعد الفاصل الفول النابت.....:scooter:

[آيات الجارحى1]

:clap:انا جيييييييييييييييييت:clap:
اخباركم ايه يا عسوليييييييييين:flowers:
كل سنة وانتوا كلكم طيبين وبخير..
دلوقتى طبعا الكل زهقان م الاكل وسنينه بس هعمل ايه هو الموضوع عن الاكل...
عايزين تاكلوا ايه من ايدين توتو النهاردة؟؟
طيب لمحبى المأكولات البحرية:inlove::inlove:
على فكرة الطريقة دى من اختراعى الشخصى البحت لكنها من اروع ما يمكن(اصل عمل الاكل هواية واى حد لازم يبدع فى هوايته)..
مكرونة بالبشاميل بالجمبرىو المشروم..

المقادير..
1- جمبرى متفصص ومغسول..(اى كمية بس تبقى كمية كبيرة..)
2- طماطم متقطعة كاروهات...مكعبات يعنى او قطع صغيرة.. عدد 10 طماطمات كبار..وتبقى طماطم جامدة..
3- راس توم متوسطة متقشرة ومفرومة..
4- مشروم(انا بجيبه معلبات ويبقى مشروم شرايح) حوالى علبتين صغيرين اوى علبة متوسطة الحجم..
5-لمون معصور تقريبا كوباية نص كوباية..
6- مكرونة مسلوقة(هقول تسلوقوها ازاى:crazyy: )
7- بشاميل(برضو هقول طريقته)..


الطريقة...

1- المكرونة تبقى عقل او مقصوصةكيس واحد (اللى هى اى نوع غير الاسباجتى الطويلة)..هاتوا حلة.. وحطوا فيها ميه كتير اوى واغلوها على النار واول ما تبدأ تغلى حطوا فيها المكرونة.. من غير الكيس الله يرضى عليكوا.. وقلبوها وسيبوها بتاع 10 دقيق لحد ما يبقى لونها ابيض ومتنسوش تقلبوها عشان متتعجنش فى بعضها.. بعد كده خدوها حطوها فى مصفاة وهنا تكمن المشكلة عشان يا هتتلسعوا يا هتتلسعوا لو مخدتوش بالكوا كويس وانتوا بترموها فى المصفاة.. المهم اغسلوها بالمياه الباردة كويس وسيبوها فى المصفى.. اوعوا حد يعمل فكيك ويسيبها فى الميه بتاعتها اللى اتسلقت فيها لحد ما تبرد ويغسلها بعد ما تبرد عشان هتبقى كلها حتة واحدة ساعتها وممكن تستخدم ليفة:D
2- هاوتوا صينية وحطوا فيها زيت زتون( او اى زيت او سمنة او حتى فازلين).. لا الا تصدقوا فازلين لا انا بهزر..:chair:
وولعوا الشقة.. قصدى ولعوا البوتاجاز واول ما الزيت يسخن حطوا التوم المفروم.. يادوبك ادوله كام تقليبة كده لحد ما يبقى لونه دهبى(خدوا بالكوا لما بيبقى لونه بنى بيمرر طعم الاكل عشان كده محدش يوصله للمرحلة البنى دى).. بعد كده حطوا المشروم.. وكام تقليبة كده وبعدين الجمبرى والطماطم ونص معلقة صغيرة فلفل اسود والملح زى ما انتوا عايزين.. وسيبوهم على النار لمده ربع ساعة او اقل لحد ما الطماطم تبقى صلصة.. لو حسيتوا ان الميه بتاعت الطماطم نشفت ممكن تزودوا كوباية ميه عشان متلزقش فى الصينية..وبعد ما تستوى حطوا فوقها نص كوباية اللمون وقلبوها ..
3- البشاميل بقى يا حلويين...
له وصفات كتيرة لكن انا بعمله بطريقتى الخاصة..:tu:
هاتوا حلة وحطوا فيها بتاع كوباية دقيق وحطوها فى الحلة على النار.. من غير اى زيزت او سمنة.. وافضلوا قلبوها لحد ما الدقيق يبقى لونه بنى... هاتوا بقى ساعتها زيت زتون او اى زيوت او سمنة عايزينها وحطوا بتاع 4 معالق اكل كبار زيت .. وهاتوا كوباية لبن سوخنة وادلوقوها عليهم.. ومعلقتين صغيرين مليانين ملح ومعلقة صغيرة فلفل اسود... حلو لحد هنا.. طيب هاتوا بقى مضرب البيض الكهربا واضربوا الخليط ده.. وهو على النار.. وزودوا بقى بتاع 4 كوبايات لبن سخن مع استمرار ضرب الخليط وهو على النار بالمضرب الكهربا عشان ميكلكعش.. لحد ما تلاقوا القوام بتاعه بقى متماسك وعامل زى المهلبية كده... اطفوا عليه وبعد شوية حطوا بيضتيتن واضربوهم معاه بالمضرب الكهربا...وممكن تستغنوا عن البيض انا عن نفسى مش بعمله ببيض عشان الكوليسترول..
4- كده خلاص فاضل اخر خطوة...
هاتوا المكرونة اللى كنا سالقينها ومحطوطة فى المصفاة.. ايوة اللى جنب الحوض دى.. حوطوها فى صينية وافردوها فى الصينية وحطوا عليها تلت كمية الباشميل وقلبوها معاها وافردوها فى الصينية.. وبعدين هاتوا الجمبرى اللى بالمشروم اللى عملناه اهو اودامكوا اللى فوق البوتجاز.. ايوة الله ينور.. حطوه فوق وش المكرونة كله.. وبعدين هاتوا باقى البشاميل اللى فاضل.. حطوه فوق وش الجمبرى والمشروم.. وتدخل الفرن.. لمده ربع ساعة وعلى نار شواية الفرن لمدة دقيقتين او تلاتة بس لحد ما وشها يحمريوه بقى
وبألف هنا وشفا .. والله يكرمكم اللى يعملها ميبخلش عليا انه يطمننى حلوة وللا لا؟؟ ... خصوصا ان دى ماركة مسجلة وحقوق الصنع والافتكاس خاصة بتوتو...
وراجعيييييييييييين:romio:

[جهـــJeHaDـــاد]

يااااااااااه ياايات

فكرتيني ايام ماكنت عايش لوحدي وبعمل البشامل :)

اول مره عملته اكتشفت غلطه مطبعيه في كتاب اشهي المأكولات بتاع مها غزلان :blink:

بس بعد كده بقيت اسطي اطمني ممكن اشتغل معاكي مساعد شيف مستريح:D

[ياسر سويد]

أيوه ياعم توتو

الفراخ عملوها وطنشونى :cry:

عموما أنا أخدت أجازة م الشغل

و ح أديلهم وصفة الحمام المحشى

وح أجيب كرسى وكام جرنان وأأعد جنب باب المطبخ

ياأنا ياهما المرة دى :viking:

بس أفتكر الشيكارتون مش ح يستوى :D



وعلى فكرة أحنا ما بنشتريش اللحمة م السوبر ماركت

عندنا مزرعة للطيورعاملها واحد تونسى

وعنده فراخ وحمام وبط ووز وأرانب وسمان

والسنة دى جاب خرفان كمان

وبيدبح لنا :chr24:

ولو نجحت الخطة أديلهم وصفة الجمبرى

بس الأول أوليلى أيه هو المشروم :flowers:

[آيات الجارحى1]

اهلاااااااا اهلاا ده ايه الانوار اللى هاله دى:flowers:
استاذى جهاد كويس انى لقيت حد بيعرف يطبخ فى القهوة دى...
استاذى الجميل استاذ ياسر سويد..:flowers:
المشروم هو الشامبينيون هو فطر عيش الغراب..
طيب خلى بقى الوصفة على السمان وسيبك من الحمام لان السمان اطعم كتير طالما فى حد عنده مزرعة.. وابقى قوللى الله يكرمك ايه الاخبار ...
وازاى يعملوا الفراخ وياكلوها من غيرك...:viking:..
ربنا معاك المهم تابعهم ومتندمجش فى الجرايد وتخلص الجرايد يقولوا لك هو كمان خلص المرة دى..
وللجميع التحية وكل سنة وانتوا طيبين..:flowers::flowers:

[آيات الجارحى1]

السلام عليكم ورحمة الله وبركاته..
شكلكوا كده مبتعملوش حاجة وسامعين نصيحة البيج بوص وشغاليين ع الديليفرى اللى هيجيبلوكوا الكافية ده(ربنا يحفظ الجميع يارب)...
ماشى انا هعمل بأصلى عشان مبحبش النباتى :D
عايزين طريقة ايه المرة دى؟؟:thinky:

ماشى خليها
الفول النابت
المقادير..
1- وعاء نظيف وجاف..
2- فول..
3- قليل من الماء..
4- مكان جيد التهوية..
الطريقة(نقلا عن sesame family street)
بتجيبوا الوعاء تفردوا فيه القطنة وبعدين تحطوا عليها حبات الفول وبعد كده ترشوا عليها شوية ميه.. وحطوها فى مكان جيد التهوية.. وكل يوم تحطولها شوية ميه لحد ما تبقى مطلعة زرع لونه اخضر.. يبقى الفول بقى نابت...


واى خدمة استاذى ياسر سويد..:-"
ربنا يخلى لنا elmo and grover يارب):انجغة:

وراجعيين ان شاء الله

[@esl@m@]

الله يكرمك يا توتو
اخيرا:clap:
دحنا لما بنروح اسكندريه ياعينى بنرجع عملين زى بتوع الصومال:sniff: من كتر اكل الجبنه مع الشاى بلبن
اخيرا هنطبخ انا واصحابى
سلام:flowers:

[شهرزاد]

:blink: شكل العشره كيلو اللي بقالي شهرين تلاته شغاله فيهم حيرجعوا يكتسحوني :sniff::sniff:

:closeeye: يا أيات .... بتعرفي تعمل اليالانجي ؟؟:thinky::thinky:



:huh: إوعي تقوليلي مين ده

ده اليالانجي يا أيات :knight::-":wink:

[سارونا]

مفيش زيك يا آيات :D

بس لاحظت على اطباقك ... انها لازم تحتوي على الليمون
ايه السر في ده :huh:

والصراحة عجبني طبق الجمبري ... ضمنا عشى اليوم
اتهنوا يا اولاد ... توتو هيبعت العشى :clap:

[البحيري]

اختنا الغالية :chef: توتو

:eat::eat::eat::eat::eat:

والله جوعتينا يا شيخة وهاتخليني أرجع لأيام زمان وأدخل المطبخ أفتكس تاني ، صحيح أن ام هدير مش رافضة دخولي المطبخ زي ما ستات كتير بتصدر فرمانات لأزواجها بعدم دخول المطبخ بسبب ان هو مملكتها الشخصية ، لكن وما ادراك ما لكن .........:chef:

فانا عند دخولي المطبخ يصبح كارثة بيئية من العيار الثقيل ، فأنا تقريبا استخدم أغلب الاواني أو بمعنى أصح الكثير من الاطباق والحلل و الاجهزة الكهربائية وخلافه حتى يتم تحضير مثل هذه الافتكاسات وهي تقريبا مثل ما كان يفعل عبد المنعم ابراهيم في تحضير برنيطة الاخغاء :bye: :brb: :brb: :brb:

ولذلك فقد أصدرت أم هدير فرمانا :shak: بأنه عند دخولي المطبخ لافتكاس اي شئ فعلي تحمل تبعات هذه الافتكاسات من ازالة آثار الغزو الفضائي للمطبخ والا :chair: ولذلك فلقد آثرت السلامة وقررت عدم التدخل من قريب أو بعيد في عملية الطبخ الا في حالة طلب المساعدة العاجلة من أم هدير أو ازالة آثار العدوان من غزو فضائي آخر يقوم به أولياء العهد :انجغة: :انجغة:

الا اني بعد ما قرات وصفاتك اللي انا شامم ريحتها دلوقتي وجوعتني حاتحمل كل المشاق واحاول تنفيذها :chef: وربنا يستر .

:eat::eat::eat::eat:

على العموم وصفاتك جميلة وفي انتظار وصفات ألذ :-" :-"

وتقبلي تحياتي :flowers:

أخوك

أبو هدير :انجغة:

[eldoctor]

حلو الموضوع ده .. ممكن افيدكم بخبراتى.. اصلى اسطى .. نمرة واحد .. بجد مش بهزار .. بس ممنوع من دخول المطبخ بأوامر عسكرية ..:viking::viking::viking::viking::viking:
تحبوا تأكلوا ايه ....

[سارونا]

تحبوا تأكلوا ايه ....

اللي يطلع من مطبخك يا دكتور

[eldoctor]

المكرونة .. العادية يا شباب
المقادير .. ك كيس مكرونة .. حوالى 1\2 كيلو .. بس من ماركة كويسة ..
من بتاعة بره (شايفين انا وطنى و باشجع الصناعة الوطنية ازاى)
حلة .. متوسطة ...
ملح
فلفل
سمنة او زبدة
علبة صلصة
مصفاة



المهم الطريقة
املا الحلة ميه .. وولع عليه .. لحد ما تغلى...
و بعدين سقط المكرونة .. وسيبها تتسلق
(ملحوظة اذا كنت بتستخدم نوع عجيب من المكرونة... فيستحسن وضع ملعقتين من الزيت على الميه .. لو نوع محترم .. الميه كفاية)
تسيب المكرونة تتسلق .. و تتاكد انها استوت .. تطلع حباية .. وتضغط عليها بطرف المعلقة ... تعرف انها استوت
بعد كده تدلقها فى المصفاة .. و تصفى الميه
ترجع للحلة .. مافيهاش ميه ....
تحط معلقة زبدة . او سمنة حسب مستوى الكولسترول بتاعك ....
و تحطها على النار بعد ذوبان السمن تحط معلقة او معلقتين .. من الصلصة حسب الكمية .. وحسب ذوقك .. وتحط ملح و فلفل.. و تقلب .. وتزود شوية ميه صغيرة ... و تستنى لحد ما الصلصة تستوى .. حتلاقى السمنة طلعت على الوش .. تسقط المكرونة .. فى الحلة .. وتقلب .. .. وتوطى النر .. وتسيب المكرونة شوية ...
طفى .. واغرف فى الاطباق ...
بالهنا و الشفا ..


ملحوظة .. بعض الاضافات الجانبية .. مثل الفلفل الاخضر .. يقطع قطع صغيرة .. ويضاف على الصلصة ... لحد ما تستوى .. وبعدين حط المكرونة

الى اللقاء فى طبق اخر
(انا باعملها كده بالضبظ)

[مسلمة للأبد]

انا جايا احيكوا علي الموضوع الجميل
دمه خفيف وكمان مفيد
وان شاء الله اجيب وصفة اكل

[eldoctor]

مين من اسكندرية ما يعرفش سندوتشان سيد صواريخ .. اللى قدام بوابة الجمرك .... فى بحرى ؟؟؟؟
سيبكم من بتاع جاد .. ده تقليد ...
وصفة تقريبية لمحاولة عمل صواريخ منزلية


المقادير .. كمية من الفول المدمس (منزلى .. او من بره .. او حتى وارد الصين)
كمية من السجق الجزارى ..(مش بتاع امريكانا .. سجق بجد)
زبدة (او سمنة .. بس الاحسن زبدة)
ملح و فلفل


الطريقة ... اسلق السجق ... لحد ما ستوى .... و تنشف الميه ...
افرط السجق ... (افتحه .. ) و حمر المحتويات فى الزبدة .. لفترة بسيطة .. او قطع السجق لحتت صغيرة .. وحمره فى السجق ...ضيف الفول عليه ... و زود الملح و الفلفل ...
يتاكل سخن ..
تحياتى

[engalshaimaa]

دي وصفه سهله
دي وصفه هايله
مشكرين يا جماعه علي الوصفات التومام :flowers:

[Dr ims]

السلام عليكم ورحمة الله وبركاااااااااااااااته
بما ان ماما سابتني في مصر ونا حماااااااااااااااااااااار مطبخ
وبما ان جدتي (انا قاعد معاها حاليا) بتعتبر دخولي المطبخ هو اعتداء على ممتلكات سخصية غاية في الاهمية

-============
فامكاناتي المطبخية منحصرة فيما يتم اعداده على فطار يوم الجمعة حيث يتطوع واحد مننا
انا وخواتي (احنا 3ولاد)...
حجات بسيطة
بس بما اني فنااان وبحب الرسم (احسن وقت واحلى رسومات لما اتخنق برسمها)
وبما اني بحب الميكسات التذوقية
و عشان كده انا بحب احط الحاجات على بعض واشوف طعمها ايه واغير النسب وبالتالي بيطلع معايا حاجات حلوة
دا غير شوية عك بيحصل من غير قصد معايا
زي امتحان الاناتومي (التشريح) السنة اللي فاتت
كنت مستعجل وعايز انزل الامتحان ولسه هسافر وعايز اكل
رحت جايب رغيف (فينو)
وحطيط فيه
معلقة زبادي
معلقة عسل اسود
معلقة طحينة
معلقة صغيرة نسكافيه
وقلبتهم في الساندوتش وكلتهم....
نجحت طبعا... ماتقلقوش
========================================
دي البداية وطبعا اصحابي ربقوا يهيسو عليا لما لقوني
بغمس السميت في الفيروز بالاناناس
=====================
وحاجات تانية مش فاكرها ....
ومع الوقت اكتشفت ان الموضوع له تاريخ في العيلة
لان جدي بيعملي عصير جوافة باللمون:clap:
حاجات لذيذه والله :واه يابوي
طب جربوها
طبعا وصلت دلوقتي لحاجات حلوة ومظبوطة وبعملها دايما
كلمة السر
القهوة
هاتو بن محوج
فتفوتة بسيطة (الايقونة دي :واه يابوي )
ماشي
تحطها على كبااااية الشاي
او على عصير الفراولة
روعة:واه يابوي


وطبعا ممكن تحطوها على الكوكتيل
بس الافضلية في الحالة دي تكون للقرفة وبنفس المقدار
تحطوها في الكوباية قبل ما تعملو الميكس
وبعد ما تعملوه (ميكس عصاير ) تقلبو كويس
هتلاقو اختلاف كثافة العصاير وامتزاج القرفة معاه جنان بس ما تكتروووش السكر عشان مايبقاش ماسخ
ولك تحياااااتي
واي حاجة جديدة هبعتهااالكم
على فكرة الكلام ده جد ونا بعمله شبه يوميا
مش هزار ولا تهريج
تحيااااااااااااااااااااااااااااااااااااااااااااااا ااااااااااااااااااااااااااااااااااااتي
وربنا معاكم

[Dr ims]

ايه الحكاااااااااااية .؟؟؟؟؟؟؟؟
هيا وصفاتي للميكس عجبتكم ولا سدت حنككم:brb::brb:
توتو ياشيفنا
كملي وصفااااااااااااااات
انتو فين يا عالم ؟؟؟
عايزين وصفات جديدة ... مش ليا طبعا ...انا ايه اللي دخلني بالمطبخ
بس عشان اتمنظر على بنانيت الكلية
انا بعرف اعمل :nanana::nanana:
ونتو البنانيت (:huh:) :brb::brb:
:hot:

[آيات الجارحى1]

السلام عليكم ورحمة الله وبركاته..
اذيكم يا حلويين يا عسوليين..:flowers:
معلش انشغلت فترة طويلة عن الموضوع ده مع انه موضوع لذيذ خالص...
طيب اشكر كل الاحبة الكرام اللى ساهموا معانا فى اثراء الموضوع ونتواصل معاكم تانى ان شاء الله فى باقى الوصفات التوتاوية اللى منها من ابتكاراتى الشخصية ومنها عادى بس مميز..
اخود بس جولة فى الموضوع واشوف انا كتبت ايه من وصفات وارجع تانى ان شاء الله...
طيب نصيحة تبع عصير اللمون ..
اتذكر مرة كانوا اخوات جوزى عندى وعاملة لهم عصير لمون.. واحد منهم كان مكتئب اوى اوى .. وفضل مأجل شربه للعصير فى الاخر بيقولوا له اشرب العصير ده زمانه بقى مر..
راح قال لهم ما العيشة كلها مرة مجتش على العصير..:D
لتفادى ان عصير اللمون يمرر اولا يبقى متقشر.. ثانيا زودوا عليه نص معلقة صغيرة لبن بودرة على الكمية اللى فى الخلاط.. كده استحالة انه يمرر ..
وراجعيييين ان شاء الله:romio:

[آيات الجارحى1]

السلام عليكم ورحمة الله وبركاته..
عودة مرة تانية للموضوع ده لانه ميعتبرش انا قلت فيه حاجة من وصفات توتو :closeeye:
طيب ندخل فى الموضوع على طول..


الفراخ المكسيكيان
المقادير:
صدور فراخ بعضمها ومنزوعة الجلدعلى حسب عدد افراد الاسرة
طماطم بتاع كده حوالى 10 طماطمات جامدة كبيرة متقطعة ترنشات(شرايح)
بصل بتاع 5 بصلات كبار وبرضو متقطعين شرايح
حوالى 4 فلفلات اخضر كبار(فلفل رومى) وبرضو متقطعين شرايح
حوالى 10 حبايات حبهان(هيل) مفروم فى الكبة..

الطريقة:
بتجيبوا مقلاية او صينية وتحطوا فيها شوية زيت او سمنة على حسب ما تحبوا يعنى مقدار خمس معالق كبار زيت..وتولعوا النار وتحطوا فيهم الشرايح بتاعت البصل .. وتحمروهم لحد ما يبقى لونهم دهبى(مش تحرقوهم احنا مش بنعمل بصل للكشرى هنا)..واول ما يبقى لونهم دهبى تحطوا معاهم شرايح الفلفل الرومى وبرضوا تتحمر معاهم..واول ما يبقوا الاتنين حمير خالص:D.. تحطوا شرايح الطماطم معاهم ومعاها الحبهان اللى فرمتوه فى الكبة وكام فص مستكة (خدوا بالكوا المستكة اجمالا لما بتزيد فى الاكل بتمرر طعم الاكل فبالتالى تحطوا فصين تلاتة مستكة بس ولو مش عايزين مفيش مشكلة بلاشها عشان غالية اصلا خالص)..
ومعاهم ملح وفلفل اسود على حسب الرغبة..
تسيبوا الخليط ده بتاع خمس دقايق كده وتقلبوه مع بعضه.. وبعدين حطوا صدور الفراخ على الخليط ده ومعاها بتاع كوبايتين ميه..
وتسيبوهوم يستوا على النار وخدوا بالكوا طبعا لو الميه نشفت ممكن تزودوا الميه كوباية او كوبايتين على حسب.. بس مش تعملوا حمام سباحة بقى فى الصينية!!لا يعنى شوية بشوية لان الصوص او الدمعة بتاعت الاكل ده المفروض متبقاش كتيرة ..تقريبا هتستوى فى خلال تلت ساعة او نص ساعة واحيانا اقل على حسب نوع الفراخ..
وبيتقدم معاها رز وطماطم بالتوم والكمون..



طريقة عمل الطماطم بالتوم والكمون
بتجيبوا طماطم جامدة اى عدد انتوا عايزينه وبتقطعوه.. ايه ده طب اوصفها ازى دى:confused:
طيب انتوا بتجيبوا الطماطماية بتقطعوها على اربعة..وبعد كده كل ربع اقطعوه على اتنين..وتفرموا كام فص توم فى الكبة يبقى مفروم ناعم خالص.. وللى بيحب الاكل حامى زى حالاتى يفرم مع التوم فلفل اخضر حامى اوى على حسب قدرة تحمله للحامى.. بس ويتخلط التوم بالكمون وشوية ملح بسيطة على الطماطم..


طبعا هتقابلكم مشكلة ريحة التوم فى البوء..
تاكلوا يانسون حبوب بعد الاكلة دى..


وبالهنا والشفا وتابعونى عشان هنكمل ان شاء الله لو ربنا كتب لنا عمر..

[آيات الجارحى1]

اذيكوااا يا حلويييين يا عسولييين..
انتوا لسة عايشين:viking:
نجدد الموضوع تانى لانى من ايام خفاريعو مقولتلكوش حاجة..
جايبة لكم بقى حاجة واااو خالص..


طريقة عمل البسطرمة فى البيت:واه يابوي
البسطرمة اللى بتتباع معمولة من لحوم مستوردة.. وجنون البقر وغيره من الامراض بجانب اللحوم مش بتبقى طازجة.. طيب خليكوا معايا ونتوكل على الله نقول اسرار المهنة:sniff:

1- هاتوا قطعة لحم على بعضيها مستطيلة حمرا من غير اى عروق فيها ولا دهون من قلب فخد بلدى والافضل عرق فلتو بس اساى لازم ميبقاش عليها اى دهون من الخارج خاالص..


2- 4 معالق كبيرة توم مفروم مخلوط بملح

3- نص كوباية كبيرة حلبة مرة ناعمة ومطحونة هتلاقوها عند العطار (فى فتح الله يا اسكندرانية:cry: )


4- معلقتين كبيرة فلفل احمر ناعم(ارناؤوطى) مين ارناؤوطى ده؟؟


الطريقة

1- اشطفوا قطعة اللحمة بالميه العادية ونشفوها كويس جدا بحتة قماش نضيفة وبعدين حطوا ملح فى تشققات اللحمة وبعدين لفوها فى ورق لحمة بس ميبقاش تخين يبقى رقيق نوعا ما.. وبعدين لفوها بالجرايد عدة طبقات(بسطرمة مثقفة:doc: ) وبعدين اربطوا الكلام ده بدوبار وتبقوا ضاغطين على اللحمة وتترك لمدة 12 ساعة فى مكان متجدد الهواء(متروحوش بقى تعملوا زى العيال الصغيرة وتفتحوا عليها كل شوية.. بنقول 12 ساعة يبقى 12 ساعة:viking: )
بعد 12 ساعة شيلوا بقى الحاجات اللى على مومياء البسطرمة دى ..وبعدين تغسلوا كويس اوى بالميه العادية محدش يتفزلك بقى ويغسل بميه سوخنة:crazyy: وبعدها نشفوها كويس اوى بفوطة نضيفة

هاتوا بقى التوم المفروم ابو ملح مع الحلبة المطحونة الناعمة مع الفلفل الارناؤوطى ده واعمله خليط مع بعضه..
غطى بقى اللحمة بالخليط ده من كل الجوانب واضغطى عليه كويس عشان يلزق فى اللحمة ويتماسك تماما..
اشنقوه بقى فى الهواء الطلق لمدة اسبوع او اكتر لحد ما ينشف خااالص..
وطبعا البسطرمة محدش ياكول الخليط اللى برة بتاعها ده لانه بيبقى زى حماية لها لكن مش للاكل..



وبالهنا والشفا.. ونصيحة..






اشتروا البسطرمة جاهزة انتوا ناقصين غولب:فتكوا بعا

[ام ايهاب]

السلام عليكم .....................تسل الايادي حلوة كل الكلات ماعدا البسطرمة لاني مش بحبها .....................واسهل طريقة لعمل الاكل هي الصواني يعني كله علي بعضه وفي صنييه وتنتهي بلا غسيل مواعيين ووجع دماغ :brb::brb:وبعدين كله لحمه وفراخ فين المسقعه والمش بتاع امي ولا هو وحش ولا هو وحش اللي عايز مش انا تحت امره بس بالدولار:brb::brb:تعرفي بقي ياحجه توتو تعملي البرام في الفرن وتعرفي تخبزي الرقاق في البيت انا عندي وصفة هايله هاتوا هدايا الاول وانا اقول كل الاسرار:nanana::nanana:

[آيات الجارحى1]

اهلا يا ام ايهاب منورانا:flowers:
هاتى ما عندك كلنا اذان صاغية..

جايبالكوا انا بقى وصفة جميلة اوى ..


الشيش طاووق
المقادير
1 كيلو صدور دجاج مخلية( ومنزوعة الجلد)
1 بصلة متوسطة مفرومة ناعم خالص
ملح وفلفل وبهارات
1 معلقة كبيرة زيت نباتى
نص كيلو خضروات مشكلة( فلفل اخضر - طماطم)


الطريقة:
قطعوا الفراخ مكعبات وتتبل بالبصلة المفرومة والتوابل التانية ومعلقة الزيت..وبعدين غطوا المقدار ده وحطوه فى التلاجة 12 ساعة او اكتر وبعدين بعد ما تنهتى المدة دى تكونوا مقطعين الفلفل الاخضر والطماطم مكعبات برضو(مربعات او كاروهات زى ما انا بقولها) وبعد كده تجيبوا اسياخ خشب هتلاقوها بتتباع فى اى سوبر ماركت كبير.. وتشبكوا فيها الفراخ بالتبادل مع الفلفل والطماطم.. وتتشوى فوق الفحم او تحت شواية الفرن..


وطبعا بتتعمل ساندوتشات..
للى بيحبوا المايونيز مع الاكل.. دى طريقتى الخاصة غير الطريقة المتعارف عليها لعمل المايونيز وبيطلع جميل ..


طريقة عمل المايونيز:
بيضة تضرب فى الخلاط مده طويلة لما تطلعوا روحها(اوعوا تحطوها بقشرها)..وبعدين يتحط عليها ملح وفلفل ومعلقة خل صغيرة وتضربوها تانى مدة طويلة فى الخلاط وبعدين تبقوا فاتحين الجزء اللى بيتفتح فى غطا الخلاط ده وتضيفوا زيت نباتى والخلاط شغال لحد ما يتماسك القوام.. يعنى تفضلوا تحطوا زيت لحد ما القوام يوصل للتماسك اللى انتوا عايزينه..
بث كتشة..:انجغة:

وراجعين ان شاء الله..:flowers:

[آيات الجارحى1]

تصدقوا انكوا غايظننى..
محدش بيرد ليه ما تقولوا عملته حاجة معملتوش حاجة .. مش تسكتوا كده..
طيب انا هسيبنى منكوا وهخلينى مع استاذ ياسر سويد..
حضرتك طلبت منى الفول النابت بيتعمل ازاى..
وبرضو الدكتورة شو طلبت طريقة الفلافل..
طيب نقول الاتنين..
بس يا استاذ ياسر ايه علاقة الفول النابت بالسمك؟؟
انا من يومها وكل ما اجى هكتب الطريقة اقول يا بت استنى تكون له طريقة تانية وللا حاجة اصل حضرتك سألت بيتعمل ازاى وبعدها قلتلى السمك عليا يا توتو.. سمك ايه بقى:hot:
عموما انا هقول طريقته اللى اعرفها انا ..

شوربة الفول النابت
بيتجاب مقدار كوبايتين من الفول العادى بتاع التدميس ده من اى سوبر ماركت بيبيعه(وهو نى طبعا مش متدمس الا تروحوا تجيبوه مدمس معلبات:crazyy: )
بيتنقع فى الميه يومين مع تغيير الميه كذا مرة فى اليوم..
بعد كده هتلاقيه على راى ابو بكر عزت طلعتله زلومة من الجنب.. هتلاقى القشرة البنى بتاعته اتشقت وبقى له صوبع من الجنب.. بيتفصص من القشرة البنى وبعدين يتشطف كويس وبعدين يتجاب بصلتين كبار كده متخرطين صغير اوى (مش مفرومين فى الكبة ) لا تخريط يدوى.. يتحمروا بسيط خالص فى شوية زيت وبعدين يتضاف الرز والفول والملح والفلف على حسب الرغبة ويتحط معاهم مقدار كوبايتين تلاتة ميه.. ويتسابوا على النار لحد ما الفول يستوى..
وبتتقدم شوربة باللمون..


اتمنى ان دى الطريقة او يبقى هو ده الفول النابت اللى حضرتك تعرفه يا استاذ ياسر.. فين السمك بس فى الموضوع:hot::hot:



الفلافل(الطعمية)

بتجيبوا من السوبر ماركت نوع من الفول اسمه فول مدشوش..
بيتنقع فى الميهنقدار 3 كوبايات ممكن يومين برضو لحد ما يبقى طرى مع مراعاة تغيير الميه باستمرار..
بعد ما بيبقى طرى بتجيبوا بقى خوضرة(2 حزمة بقدونس وواحدة شبت وواحدة كزبرة) وبتجيبوا نص رغيف عيش متقطع صغير..وبصلتين متوسطين متقشرين..وملح على حسب الرغبة..
وتفرموا كل الفرح ده فى الكبة مع بعضه لحد ما يبقى عجينة.. لازم طبعا يبقى متماسك..لو مش متماسك اوى زودوا العيش شوية لحد ما يبقى قوامه كويس..بس بعد كده بتعملوا اقراص الفلافل وتحطوا على وشها حبات كزبرة حصى مش مطحونة(بتاعت الملوخية قبل ما تطحن.. يووووه انا ايه اللى خلانى اتوهكوا كده.. من عند العطار هاتوا كزبرة حصى وخلاص)
بس وبتتقلى وبالهنا والشفا..:flowers:

[صابر بياع الورد]

الاخوة العزاب الاعزاء

المتزوجون لا

اللى نفسهم حلو اه:)

حاقدم لكم النهارده اكلة
انما ايه حتاكلوا صوابعكم وراها

لا تقولولى هوم دليفرى ولا ايات الجارحى:blink:

ومن غير ما تقطع الطماطم كاروهات:55:

بالذمة فى تقطيع كاروهات:doc:

ما علينا

المكونات:
1- فرخة طازة مدبوحة وتخلى الراجل ينضفهالك ولو تخلية يقطعها لك يكون اسهل ليك
2- حلة مناسبة وبها ماء وحبهان ومستكة و5 بصلات وكل ده على النار
3- اول ما تغلى الميه ارمى الفرخة من بعيد وغطى الحلة واجرى على الكمبيوتر
4- بعد ييجى ساعة ارجع اطفى على النار وارجع على الكمبيوتر
5- بعد ما تزهق وتشعر بالجوع عرى الحلة واغرف وبالهناء والشفاء

ولا تتعب نفسك ولا حاجة
ملحوظة : بعد ما تا كل تغسل ايدك كويس وترجع على الكمبيوتر:knight:

[ياسر سويد]

بس يا استاذ ياسر ايه علاقة الفول النابت بالسمك؟؟
انا من يومها وكل ما اجى هكتب الطريقة اقول يا بت استنى تكون له طريقة تانية وللا حاجة اصل حضرتك سألت بيتعمل ازاى وبعدها قلتلى السمك عليا يا توتو.. سمك ايه بقى


عم توتو

متشكر جدا جدا على الفول النابت :flowers::flowers::flowers:

حقيقى كان لذيذ وأن كان خلانى يومين ما دخلتش الحمام :blink:

انما معلهش كله يهون فى سبيل الفول

على فكرة انا لما قولت خللى السمك عليا

كان قصدى اشرح انا طرق تحضيره

لأن دى الحاجة الوحيدة المسموح لى اطبخها هنا عشان باكون انا اللى صايده

محسوبك صياد ومفيش حاجة فى البحر تقوللى لأ :viking:

بس بعد اسلوبك الرائع لشرح تحضير كوب الماء

وتقطيع الطماطم كاروهات

فكرت يروح فين الصعلوك بين الملوك :crazyy:

فسبت ليكى شرح السمك كمان

ولو حد عايز اى مساعدة فى اكله بعد كده انا موجود

بس بشرط يكون سمك من البحر المالح موش بتاع ميه حلوه

ويكون طازة ما يكونش مجمد :crazyy:

[آيات الجارحى1]

استاذ صابر:flowers:
نسيت تقول لهم انهم يشيلوا الريم اللى هيطلع على وش الشوربة والا هتبقى الشوربة مش حلوة ومتتشربش.. عرفت فايدة ان وصفات الاكل تتاخد من ستات البيوت حتى لو كانت سلق فرخة من اودام الكمبيوتر:nanana:


الف هنا وشفا يا استاذ ياسر وهنيئا مريئا ان شاء الله..:flowers:
طب ما تيجى نعمل مسابقة بينى وبين حضرتك فى وصفات الماكولات البحرية..
عيب اصل الاسكندرانية يعنى ميتوصوش فى جميع مشتقات البحر (ممكن اطبخلكوا لنش بالزيت واللمون.. ويخت فى الفرن مع شرايح بطاطس..وعوامة فى شوربة بالبقدونس والتوم) :closeeye::closeeye:


طب عشان خاطر بقى الصباح الاسكندرانى الجميل ده :cry:


شوربة فواكه البحر
شوفوا بقى اروع حاجة فى حياتى هى الشوربة دى فلازم تركزوا خالص بقى عشان ده اكبر سر من اسرار المهنة بس والله مش هخبيه عنكم..:bb:


تقدروا تعملوها بالسمك لوحده او بالمكونات التانية لوحدها..
المقادير
- يا اما سمك متنضف طبعا
- او سوبييط متنضف برضو ومتقطع حتت صغيرة مع جمبرى متفصص
- او جندوفلى..(هتلاقوه بيتباع فى سوق الحقانية اللى ورا محكمة الحقانية فى المنشية ) لازم الجندوفلى يكون طازة وتعرفوا انه طازة ازاى .. عادى هتبقى واقفين بتسالوا الراجل بياع السمك على جندوفلى هتلاقوا ميه اترشت عليكوا.. :crazyy: هتطنشوا وتقولوا عيل بيستظرف وجايب كريزى بول وبيرش بيها ميه على الناس.. بس هتتوالى زخات الكرم المائى عليكم.. هتدركوا ان الجندوفلى بيه باشا بما انه طازة وحى فهو دمه خفيف حبتين وبيحب يلعب فبياخود الميه ويرشها تانى.. على فكرة هو عبارة عن صدفيات يعنى شبه ام الخلول كده..

- حزمة بقدونس مفرومة فى الكبة ..
- بصلتين كبار متخرطين يدوى(التخريط اليدوى للبصل بيدى نكهة للاكل بالاضافة ان مش اى اكل ينفع معاه البصل مفروم فى الكبة)..
-فصين تلاتة توم مفرومين فى الكبة..

الطريقة
بتجيبوا البتاعة اللى هتعملوا فيها الشوربة دى..بتحطوا فيها بتاع 3 معالق زيت واول ما يسخن الزيت بعد دقيقتين كده تحطوا عليها البصل المتخرط ده وتقلبوا لحد ما البصل يتحمر.. مش يبقى اسود وبرضو مش دهبى يعنى يتحمر شوية..وبعدين حطوا بتاع اربع كوبايات ميه..وبعدين تحطوا سواء السمك(لو السمكة كبيرة بتتقسم على اتنين وراسها متشالة طبعا) او السوبييط والجمبرى المتفصص.. او الجندوفلى.. والجندوفلى بقى هيبقى طازة فلما تحاولوا تفتحوه مش هتعرفوا طبعا .. فانتوا تجيبوا ميه دافية شوية .. وتحطوا فيها الجندوفلى.. من الحرارة هيفتح الصدفة بتاعته تنشلوه انتوا بقى بسكينة هو هيقفل على السكينة بس هتتمكنوا من فتحه ويتشطف بالميه ويفضل زى ما هو بالصدفة بتاعته.. يعنى هيتقدم فى الشوربة وهو بالصدفة بتاعته كل ما هناك اننا فاتحين الاصداف بتاعته(هى شوربة الجندوفلى كده وفى ارقى المطاعم:viking: )
وتحطوا ملح وفلفل على حسب الرغبة.. طبعا السمك بعد ربع ساعة تقريبا هيستوى.. الجندوفلى بعد عشر دقايق او ربع ساعة.. السوبييط هو اللى هيطول (الا لو هتستعملوا حلة برستو فهيبقى سريع اوى فى انه يستوى).. قبل ما تقفلوا النار بعد ما اتاكدتوا انه استوى تحطوا البقدونس مع التوم المفرومين.. ويادوب بتاع 3 دقايق على النار وتقفلوا النار على الشوربة..
دايما خدوا بالكوا اى بقدونس او خوضرة بتتحط على النار لازم تتحط اخر حاجة وقبل ما تقفلوا النار علشان فايدتها تبقى موجودة فيها ونكهتها فى الاكل تبقى واضحة لانها لما تغلى كتير مع الاكل بتضيع النكهة والفايدة بتاعتها..
بتتقدم الشوربة مع اللمون طبعا..
وياااريت اللى يعملها يطمننى..:flowers:

[البحيري]

السلام عليكم يا جعانين

ياعم صابر بياع الورد انت نسيت أهم حاجة في الفراخ الملح والفلفل الأسود .

توتو باشا والله مانا عارف أقول ايه بعد اللي أنا قرأته ده ، فعلا شوية وصفات على الكيف وأنا فعلا نفسي ألاقي وقت و أعمل الافتكاسات دي وعامة أنا حاطبعها وأخليها عندي أهي تنفع ونعمل بعد كده كتاب للوصفات .

وعامة نحن في انتظار وصفات جديدة دائما .

وتقبلوا تحياتي:flowers:

أخوكم

أبو هدير :انجغة:

[miss maya]

يلا يا آيات اللى بعده :knight:

فين الوصفة التانية ياعنى هيه الكيتشن ماشين مبتعملش غير صدور فراخ بس

[SAD GIRL]

اسمحيلي ياست توتو أشرف موضوعي دليل الأكلات بإضافة موضوعك ده إلى القائمة قللب

[miss maya]

انا كنت بهزر

يا توتو موضوعك اكتر من رائع بس وقف ليه انا متابعاه عايزة وصفات اكتر

وبعدين انتوا ليه نسيتوا الحلو
بعد الوصفات الجميلة دى حقدم لكم طبق الحلو


طيب حد فيكم جرب توترتت الشو بالكريمة والفاكهة


لازم فى الاول نجهز عجينة الشو ( ودى بنستخدمها فى وصفات كتير تانية مش بس دى )
المقادير
50 جرام زبد او 2 ملعقة كبيرة
1 ملعقة كبيرة فانيليا
4 ملعقة كبيرة دقيق + ذرة ملح
4: 5 بيضات
1 كوب ماء

الطريقة
نحط الماء على الزبدو نغليه على النار
نضيف الدقيق بمجرد الغليان
ونرفع الاناء بعيد عن النار وبتم التقليب بملعقة من الخشب
لما العجينة تهدا نبدا بو ضع البيض بيضة بيضة مع مراعاة التقليب بعد كل بيضة ( يفضل استخدام المضرب الكهربائى )
تعتبر هذة العجينة هى الاساس فى عمل

عدة اصناف حلوة وحادقة ( عجينة الشو ) منها تورتة الشو بالكريمة والفاكهة

المقادير
مقدارين من عجينة الشو مشكلين كوحدات بحجم المشمشة
كوب من الكريم شانتى
علبة كمبوت مشمش
كوب كراملة بس تكون سائلة
الطريقة
ترص وحدات المشمش فى وسط سرفيس بيضاوى او مستطيل
ترص وحدات الشو المحشية بالكريم شانتى وممكن كمان نستغنى عنه باضصافة الكريم باستير يعنى حسب الرغبة
حول المشمش كل وحدتين فوق بعضهم
ويتم تثبيت جميع الوحدات بصب الكراميلة السائلة عليهم
ونسيبها لحد ما تبرد ونجملها بوردات من الكريم شانتى وعلشان المشمش يلمع ممكن نصب عليه كميه من المربى السائلة


:eat: :eat: :eat: بالهنا والشفا

[آيات الجارحى1]

استاذى الهدير.. :flowers:
ساد جيرل :flowers:
مايا العسولة :flowers:
راجعة والله بس كنت مشغولة شوية..
بالنسبة لطلبك يا ساد جيرل .. يا ستى مفيش مانع اتفضلى طبعا بس متنسيش حقوق الطبع والتاليف محفوظة :bb:
مايا .. بالنسبة للحوليات فزى ما تقولى كده الحلو ميكملش.. :sniff: انا مش بعرف اعمل حلويات كتيرة لانها بتتطلب هدوء اعصاب واتزان غير عادى ودى صفة مش موجودة فيا.. يعنى عشان اعمل الكيكة الاشفنجية لازم البوتاجاز ميتحركش ولو فتحت الباب بتاع الفرن يبقى بالتصوير البطيء وطبعا توتو بعيد كل البعد عن كده لانى بمسك باب الفرن برزعه ممكن اصحى كل اللى فى البيت على صوت رزعته دى.. اجمالا انا مليش فى عمايل الحلويات الصراحة غير كام حاجة بس..
اما ليه صدور فراخ بس فمتقلقيش هكتب كل اللى اعرفه ان شاء الله.. لو فاضيين يعنى لمدة كام سنة اودام كده
وراجعة تانى ان شاء الله :flowers:

[يابوي]

طب ممكن اطلب طلب صغير


عايزة طريقة المحشي لجميع انواع الخضار


وياريت ترد عليا بسرعة

وجزاك الله خيرا

[دكتـــــــ سارة ـــــــــورة]

اوعو تقفلو الموضوع انا عندي كام طلب كدا بس بعد الفاصل
:flowers:

[آيات الجارحى1]

طيب هقول لك طريقة المحشى بس هوصفلك تحشى ورق العنب ازاى :crazyy: ؟
اصل له طريقة فى اللف معينة لازم تبقى اودامى عشان تشوفيها..
طب بعد الفاصل هقول لك ان شاء الله.. اما طريقة لف ورق العنب فانا هشاورلك وانتى تشوفى :closeeye:

[s_lonely]

:انجغة: :انجغة: :انجغة:
ومنكم نستفيد
ميرسي عالموضوع التحفة دة.... :واه يابوي

[دكتـــــــ سارة ـــــــــورة]

انا جيت :blush):


توتو معليش انا مزعجه انا بس حطلب طلب بسيط علي الماشي كدا
عاوزة ادمس فول في البيت عشان اللي بشتريه من السوق بتبقي جلدته مؤذيه جدا و كمان ريحته مش اد كدا


عاوزة اقولك علي حاجه
هو انتي مش بتملحي مية السلق بتاعة المكرونه؟


في ايه كمان

اه خدي بالك من اللي جايه دي بس عاوزة النصيحه بتاعتها بسرعه اوى
























عاوزة طريقه افتح بيها كبس النور او احط بيها فيشه الكمبيوتر او الخلاط او حتي اولع البوتجاز من غير ما احس انه حينفجر فيا مع العلم اني شاطرة الحمد لله في عمايل البيت بس مش عارفه ايه اللي جري لي بقيت بخاف من الكهربا اوى
من ساعه ما كنت بصبن كبس نور الحمام بسلكه المواعين بالجنيرال
وسرحت بعيد عنك
عنك ماتشوف الا النور بقي

من ساعتها بخاف افتح التلاجه اصلا او حتي اولع التليفزيون
بحس انه حينفجر في وشي















وانا بخاف علي وشي اوىىىىىىىىىىىىىىىىىىىى
:ballon: :ballon: :ballon:


جزاكي الله كل الخير علي الموضوع الرائع دا
و انا لسه شايفاه امبارح بالظبط
وانشاء الله بكرة حعمل الفراخ
و حقولك علي طعمها



اسيبك علي خير
سلام :inlove:
خدي مني دي يا ماما توتو :flowers:

[يابوي]

لا ياتوتو


انا عايزة محشي كوسه فلفل رومي طماطم


لا الورق عنب انا خبيرة فية

[دكتـــــــ سارة ـــــــــورة]

توتو يا عسوله انتي :inlove:
ازيك عامله ايه؟ :inlove:
ايه مطنشه الموضوع اللذيذ اوى دا ليه ؟
افضي له شويه اختك مزنوقه في الاكل الحلو بتاعك دا
علي فكرة عملت الفراخ اللي بالليمون و طلعت حلوة خصوصا اني بموت في الاكل اللي بيتعمل بالليمون
بس انا متأكده ان نفسك في الاكل حيخليها احلي واحلي
علي فكرة الحمام المحشي انتي بتحشيه من تحت بس ؟
ابقي احشيه من الحوصله بيبقي حلو
و ماتنسيش الملح في مية سلق المكرونه
انا اصلي بحب الملح كتير كتير في الاكل
فلازم انتي كمان تحطي ملح حتي لو مش بتحبيه


ياريت تنوري الموضوع بأكلاتك من تاني
قريب حعمل البتاع ابو مشروم اللي انتي قولتي عليه
و كمان حعمل المايونيز
وشربة فواكه البحر


دومتي لينا يا توتو


في حفظ الله



سلام


يا توتو

[آيات الجارحى1]

سارور حبيبتى :flowers:
اذيك عاملة ايه؟
مش موضوع انى نسيت الموضوع هنا لكن انا كنت نفسى مسدودة شوية عن الكتابة اليومين اللى فاتوا.. لكن اهو الحمد لله..

عاوزة طريقه افتح بيها كبس النور او احط بيها فيشه الكمبيوتر او الخلاط او حتي اولع البوتجاز من غير ما احس انه حينفجر فيا مع العلم اني شاطرة الحمد لله في عمايل البيت بس مش عارفه ايه اللي جري لي بقيت بخاف من الكهربا اوى
من ساعه ما كنت بصبن كبس نور الحمام بسلكه المواعين بالجنيرال
وسرحت بعيد عنك
عنك ماتشوف الا النور بقي
طب جربى كده تستخدمى بريل :thinky: :thinky:
وبعدين انتى بتقولى وعينك ما تشوف الا النور.. طيب ما اهو انتى اهه شوفتى النور يبقى اسهل وسيلة انك تكررى العملية دى كل مرة عشان تولعى كبس النور(عرفة :واه يابوي قفلت كباس النوووور وخليتها ضلمة :clap: :clap: ) :D :D


بالنسبة للملح بقى يا ستى فطبعا انا محدش بيحب الملح ادى لكن عشان عندى الضغط فطبعا الملح فى الاكل اقل من معدلاته خااالص :cry: :cry: .. لان فعلا اى شوية ملح بيتعبونى.. لكن اجمالا انا مش بملح مية المكرونة لانى بضيف لها الصلصة اللى بتبقى متملحة ..
اما الحمام فمش بحشيه من عند الحوصلة لانه بيبقى شكله غريب كأنه واخد هرمونات زيادة :thinky: :thinky:

س.لونلى :flowers:
منورة الموضوع واشكرك على ردك

يابوى :flowers:
شوفى يا ستى..
طبعا خلطة المحشة هى هى فى كل انواع المحشى.. وهى عبارة عن رز وخُضرة(بقدونش وشبت وكسبرة) مفرومين) وطماطم كاروهات صغيرة.. مكعبات صغيرة يعنى.. وبتاع 4 معالق زيت كبار وبصل متقطع صغير خالص وملح وفلفل اسود وطبعا اهم حاجة فى الخلطة هى الخُضرة بتاعتها لازم تبقى كتيرة ..انا مش بعمل بمقدار معين.. المهم كل البلاوى دى بتتاخد وتتحط على بعضها .. عندك بقى بالنسبة للكوسة.. انت اغسليها كويس اوى.. وبسكينة تقومى تكحتى الطبقة الخارجية بتاعتها .. على خفيف مش نص الكوساية تطلع فى ايدك.. يعنى مجرد القسرة او الطبقة الخارجية بتاعت الكوسة تتكحت.. وبعدين تجيبى(المأورة) بتبقى قاطعة رقبة الكوسة من فوق وطرفها التانى من الناحية التانية.. طبعا يادوب الاطراف بس.. وبعدين بتجيبى الماورة وتبتدى تنخورى فى الكوسة من قلبها لكن متوصليش انك تخليها زى الماسورة مفتوحة م الناحيتين.. لا لازم تكون مقفولة من ناحية.. بس وبعدين بتشيلى القلب بتاعها كله وبتحشى خلطة الرز اللى عملناها مكانها.. وبتبقى مجهزة شوربة وعليها صلصة او طماطم مضروبة فى الخلاط ومخلوطة بالشوربة ومتملحة طبعا وبعد ما بترصى الكوسة فى الحلة او الصينية صبى عليها الشوربة(لو مفيش شوربة ممكن ميه وصلصة وحتة سمنة وملح وفلفل) لحد ما الشوربة تغطى الكوسة فى الحلة او الصينية.. وولعى النار فى اى حد بتتخنقى منه.. قصدى ولعى البوتاجاز واول ما المية بتاعتها تبتدى تتشرب وتقل تقومى توطى النار خالص وتسيبيها لحد ما الرز اللى جوه يستوى.. وبالهنا والشفا..
اما محشى الفلفل.. فنفس الخطوات بالظبطوبتشيلى راسه طبعا وقلبه اللى بيبقى فيه بذور..
محشى الطماطم بقى انا معلتوش الصراحة لان محدش غاويه هنا او فى كل اللى اعرفهم.. لكن اعتقد افضل طريقة له هو التسوية ع البخار فى الحلة البرستو.. طبعا بتبقى الطماطم جامدة جدا وبرضو بتشيلى قلبها وتحشيها بخلطة الرز وسويها على شبكة البخار فى الحلة البرستو اعتقد هتاخد ربع ساعة او اقل لكن لازم تكونى حاطة صمام الخضروات مش اللحوم بتاع الحلة البرستو.
ولى عودة ان شاء الله واشكر كل الاحبة على المتابعة الجميلة دى.. :flowers:

[دكتـــــــ سارة ـــــــــورة]

مش موضوع انى نسيت الموضوع هنا لكن انا كنت نفسى مسدودة شوية عن الكتابة اليومين اللى فاتوا.. لكن اهو الحمد لله..
يارب يخلي لنا نفسك مفتوحه علي طول
ويخليكي لينا و مايحرمناش منك يا غاليه و عزيزة
(عرفة :واه يابوي قفلت كباس النوووور وخليتها ضلمة :clap: :clap: ) :D :D
لأ يا توتو النور ما راحشي ولا الدونيا ضلمت :clap:
مسكتني الكهربا 3 ايام حاسه ان جسمي ماشيه في كهربا مش عاوزة تسيبه :elec:
ما علينا
المهم انك نورتينا يا قمر
ما تبقيش تقطعي خالتك سارة ام عنبه بتقلق عليكي و بتوحشيها اوى :inlove: :flowers:

[دكتـــــــ سارة ـــــــــورة]

مش موضوع انى نسيت الموضوع هنا لكن انا كنت نفسى مسدودة شوية عن الكتابة اليومين اللى فاتوا.. لكن اهو الحمد لله..
ربنا يخليكي لينا و يخلي لنا نفسك مفتوحه دايما و مايحرمناش منك يا قمرنا المنوور انت (عرفة :واه يابوي قفلت كباس النوووور وخليتها ضلمة :clap: :clap: ) :D :D
لا وحياتك اعدت تلات ايام الكهربا ماسكه فيها مش عاوزة تسيبني :elec:
ما علينا سيبك انت
المهم انك نورتينا
خودي بالك
خالتك ام عنبه بتقلق عليكي و بتوحششيها اوى اما بتغيبي
سلمي لي علي ياسمينا و عبود :flowers:

[anonymous]

احم احم
صباح الخير على الكيتشن ماشين :nanana:
كنت قاعد النهاردة افتكر في ذكريات الطفولة
ذكريااااتووون
و بعدين
افتكرت حاجة ماما كانت بتعملهالنا اسمها شكشوكة :55:
كل اللي فاكره انها بتتعمل في طاسة و فيها بيض :surrender
و ان آخر مرة كلتها كان ييجي من 16 سنة
بجد مش هزار :واه يابوي
يمكن ماما بطلتها عشان بقية اخواتي بيكرهوا البيض و بعدين تفرقت بنا سبل الحياة و دلوقتي افتكرت الشكشوكة
و بما ان الطبق الوحيد اللي بعرف اطبخه هو البيض المقلي
قلت ازود عليه الشكشوكة B)
ممكن يا آيات طريقة الشكشكوكة :doc:
و يا ريت بالمرة شرح لمعنى الكلمة و اصلها و سبب الاسم الغريب :closeeye:
و دمتم ذخرا للجعانين و العزاب و الفتيات حديثات الزواج ^_^

[bigera]

:واه يابوي شكشوكة :واه يابوي

افتكر كان بيض على حاجة احمرا :واه يابوي

بيض على لحمة مفروومة :D

[زهرة مصر]

صباح الخير عليكم .. وصفاتك جميلة ياايات رغم انى كنت حالفة مادخلكيش موضوع بعد المقلب الظريف بتاعك فى المراسلات انما رجعت وقلت كبرى يابت .. اصلى قلبى طيب .. تلاقيكى نسيتى عادى ....
عايزة منكم لو سمحتم حد يقولى بالضبط وبالمقادير اعمل ازاى كفتة جميرى لانى غلبت ان اضبطها ولازم يطلع فيها حاجة وخربت بيتى وانا بجرب .. بس بلاش ياآيات وصفة المراسلات دى فلوس ناس ياماما .... :blush):

[آيات الجارحى1]

اذيكم كلكم..
اعتذر عن التأخير بسبب ظروف ربنا ما يكتبها على حد..
انونيمس هنا؟؟
اهلا اهلا وسهلا.. وباجيرا جه كمان..
طيب يا شباب ..
انا معرفش ايه اصل الشكشوكة او سبب تسميتها وكان فى حاجة شبهها برضو اسمها (سخينة).. كانت ستو الله يرحمها بتعملها..
الشكشوكة:
بيض على حسب اعداد الاسرة..
كوباية رز..
بصل متقطع كاروهات(مكعبات صغيرة)..
ملح وفلفل..
معلقة صلصة او طماطم متقطعة كاروهات برضو..
معلقتين سمنة او زيت او بوية او اى حاجة مزيتة وخلاص مش فايقالكوا انا..

الطريقة:
بتجيب السمنة او الزيت وتحطهم على حلة فى النار وبعدين بتجيب البصل الكاروهات تحطه عليه وتحمره شوية لحد ما يبقى (مستحمر ) محمر يعنى..وبعدين تحطوا الطماطم او الصلصة مع كوبايتين ميه والملح والفلفل بعد شوية كده لما تقل الميه شوية تقوموا تحطوا كوباية الرز المتنقية المغسولة مع كوبايتين ميه وبعد ما يتدوقوا الرز بعدها بربع ساعة او اقل ويكون استوى تقوموا تكسروا البيض وتحطوه فوق الحاجات اللى فى الحلة دى.. بس اوعوا تقلبوا البيض لا يبقى اومليت كده.. بتسيبوا البيض هيتسلق طبيعى جوه الحلة لان المكونات سوخنة وع النار وسيبوهوم بتاع عشر دقايق وطبعا لو احتاجوا شوية ميه زودوهم شوية صغيرين كل مرة مش تجيبوا جرادل وتدلقوا.. وبعدين تتاكل بالهنا والشفا..

[anonymous]

حمد لله عالسلامة يا آيات :flowers:
متشكر على الوصفة
هجربها في أقرب فرصة ان شاء الله :flowers:

[آيات الجارحى1]

زهرة مصر.. :flowers:
معلش اتاخرت عليكى اوى فى الرد.. طبعا فاكرة المقلب اللى عملتوا فيكى ..
نصيحة بس فى ودنك.. بجد والله.. عشان تبقى ست بيت ممتازة.. متمشيش بمقادير غير فى حاجات معينة لازم تمشى فيها بالمقادير المظبوطة جدا جدا..
بالنسبة لكفتة الجمبرى..
انا مش بعملها بمقادير ..
بتجيبى الجمبرع بعد ما تقشريه وتشيلى السلسلة اللى فى ضهره وطبعا لو جمبره هتصطادى بيه هيبقى هو يادوبك السلسلة(لو صغير يعنى)..
وبتجيبى بقدونس كذا حزمة كده.. يعنى مثلا 3 حزمات او اربعة..
وبتجيبى بتاع اربع بصلات كبار ..
وبتفرمى الفرح ده كله فى الكبةمع ملح وفلفل وممكن فصين توم..
وبعدها يا ست الكل بتصبعى الكفتة.. بتعمليها صوابع يعنى.. وبتحطيها فى صينية مدهونة زيت او سمنة وتحطيها فى الفرن وتقلبيها .. او انك بتحطيها فى بيض مضروب بملح وفلفل وبعدين فى البوقسوماط وتقليها فى الزيت (بتبقى كفتة بانيه).. ودى الالذ..
وتابعونا فمازال لدينا المزيد من وصفات توتو كيتشن ماشين

[الست شربات]

يممممممممم :mob: :mob:

كفتة الجمربيكا دى شكلها حلوة اوى يا ايات...
هحاول اجربها بس الجمبرى هنا غالى اوىىىىىىىىىىىىى :cry:

لكن هحاول ان شاء الله :closeeye:

بس هعملها واكلها من غير ما اقول لجوزى لحسن هيموتنى لو عرف انى جبت جمبرى" :chair: :chair:

مزيد من الاكلات يا جميلة بس وحياتك بلاش الحجات اللى تعمل مشاكل فى البيوت الاقتصادية دى.. :inlove:

[آيات الجارحى1]

الناس زهقت م الفارخ وشكلى هتحدف بالبيض الممشش بعد كده..
خدوا الطريقتين دول وادعوا لى..


ستيك بوافر(stick bwaver)

الصراحة انا دوقت ساندوتشات ستيك البوافر دى عند مؤمن فى اسكندرية وعجبتنى جدا فبما ان توتو يعنى من النوع اللى لازم يعرف كل حاجة بتتعمل ازاى فعملتها والحمد لله نجحت وطلعت زى بتاعت مؤمن واحلى كمان..اوعوا بس حد يقول لمطاعم مؤمن الا يرفعوا عليا قضية..
المقادير:

1-2كيلو بفتيك..(او على حسب الكمية اللى انتوا عايزينها).
2- بتاع اربع او خمس بصلات كبار مفرومين فى الكبة وطالع روحهم من الفرم خالص..
3- فلفل اخضر حامى مفروم (ده على حسب الرغبة).
4- فلفل اسود وملح وزيت..
5- مايونيز(بيضة نية تتضرب فى الخلاط كويس جدا جدا وبعدين حطوا شوية ملح وفلفل ومعلقة صغيرة خل واضربوهم تانى فى الخلاط وبعدين الخلاط وهو شغال افتحوا الغطا الصغير اللى موجود فى الغطا بتاعه وافضلوا حطوا زيت لحد ما يبقى الخليط كثافته متماسكة) بس كده ده المايونيز.
5- نص كوباية خل



الطريقة:

بتنقعوا البوفتيك فى البصل المفروم والملح والفلفل الاسود والفلفل الاخضر الحامى والخل فى التلاجة لمده 12 ساعة تقريبا.. وبعدها بتطلعوهم وتجيبوا صينية او بايركس وتدهنوها زيت كويس وترصوا البوفتيك فيها وتضيفوا كوبايه مية.. وتحطوها فى الفرن.. ولو الميه نشفت زودوا المية شوية صغيرين فى شوية صغيرين.. المهم انها لما تستوى تكون متشربة الميه بتاعتها والباقى عبارة عن صوص بس..
بعد كده بتجيبوا البوفتيك بتقطعوه مستطيلات وتضيفوا المايونيز عليه وتحشوا بيه الساندوتشات وبالف هنا وشفا..



بوفتيك محشى

المقادير:
1- بوفتيك على حسب ما الميزانية تسمحلكم(يا ست شربات ابعتلك جمبرى وتبعتيلى بوفتيك؟؟ اصله غالى هنا اوى)

خضار(بطاطس وكوسة وجزر) متقطعين صوابع على غرار(شوفتوا غرار دى) متقطعين بنفس طريقة بطاطس فارم فريتس..ده الكوسة والجزر كمان هتبقوا مقطعينهم كده..

3- سلاكات سنان(تووث بيكس) (خلة)(اه والله بجد)..
4- زيت..
5- ملح وفلفل..


الطريقة:
بتقطعوا البوفتيك الحتة مثلا على اتنين او لو كبيرة شوية تبقى على تلاتة..
وبعدين بتجيبوا حتة البوفتيك دى.. بتقوموا تفردوها وتحطوا فيها لو هى بالطول يبقى حطوا الخضار بالعرض والعكس.. بتحطوا فيها 3 صوابع بشرية.. لا استنوا انتوا صدقتوا.. بتحطوا فيها 3 صوابع م الخضار.. واحد بطاطس وواحد كوسة وواحد جزر.. وبعديت بتلفوا البوفتيكة عليهم كأنكم بتغلفوهم.. وبعدين بتجيبوا سلاكة السنان وتقوموا تدخلوها من طرفين البوفتيك اللى اتقابلوا فى الاطراف هتدخلوها من ناحية ولما تطلع تغرزوةها تانى .. احنا كده عملنا ايه؟ لفينا الخضار بالبفتيك.. وعشان البفتيك ميتفكش رحنا غرزنا فيه سلاكة السنان كأننا اديناله غرزة بإبرة الخياطة..(يارب يبقى حد فاهمنى).. وهكذا تحشوا باقى البفتيك.. وبعدين تعالوا بقى على مقلاية او صينية كبيرة وتحطوا فيها شوية زيت حلويين كده.. يعنى مثلا اربع او خمس معالق ويستحسن زيت زتون عشان ميزودش الكوليسترول..
وتولعوا ع المقلاية اللى فيها الزيت واول ما يسخن بعد كام دقيقة كده تقوموا تحمروا فيه البوفتيك.. وتقلبوه لحد ما يتحمر من جميع الجوانب.. بعدها بتشيلوه م الزيت وتحطوه فى صينية فرن او بايركس ومعاه بتاع 3 كوبايات ميه .. وتسيبوه لحد ما يستوى.. نفس الموضوع الافضل انه ميبقاش له ميه كتيرة يعنى يبقى صوص بس..
بيتتاكل مع مكرونة اسباجتى...
والف هنا وشفا..

[زهرة المدائن]

بسم الله الرحمن الرحيم

السلام عليكم :)

معاكم اختكم زهرة المدائن تخصص طبيخ ورز ومكرونات B)
وعلى فكرة يا آيات أنا هاجرب وصفاتك وأقولك على النتيجة :D


وعلى استعداد للمساعدة في الوصفات .. :box:

أختكم : زهرة المدائن

[آيات الجارحى1]

للرفع :box:
ده اولا..
ثانيا بقى..
حد يدينى وصفة للديك الرووومى .. :sniff: :sniff:
بعمله فى البرستو(حلة الضغط) بس يادوبك كأنه لابس لبس اخوه الصغير...
بتبقى ضيقة جدا عليه وبيطلع مبهدل وحالته تصعب على الكافر فعلا..
عايزة اعرف الطريقة اللى بيتحط فيها فى كيس حرارى فى الفرن او اى طريقة تخليه يطبع بشكل ديك رومى مش منخل ديك رومى من كتر الاخرام اللى فيه والبهدلة..
وتاااابعونا ان شاء الله :knight:

[آيات الجارحى1]

على فكرة الست شربات زمانها ولدت اكيد..
بالسلامة يارب ربنا يطمننا عليكى يالحبيبة ويهون عليكى غربتك ويوقف لك ولاد الحلال يارب.. ورردة

[آيات الجارحى1]

والنبى اييييه!!!
محدش عارف الديك الرومى بيتعمل ازاى :sniff:
ده اسمه كلام يا عبد السلام!!!
:viking: :viking: :viking:

[emanff]

اية يا توتو انت مبهدلة الناس بالوصفات المعقدة لية !!! متخليكى حونينة على الناس اللى بتحب الحاجات اللى بتطلع من كبسولات جاهزة متجهزة !!!!!!!!!!!! :closeeye:

(يسروا و لا تعسروا ) :closeeye:

انا عندى طريقة دجاج (صينى على هندى) انما اييييييية ! حاجة تحححححححفة و اللة !

دجاج بالزنجبيل (و ممكن الثوم ايضا) :واه يابوي

و لا مقادير و لا حاجة (هية يدوب فرخة ! و زنجبيل و ممكن ثوم) :surrender

بس لزوم الكلام : :closeeye:
دجاجة متنضفة (و مسلوخة كمان) ,
ginger & garlic paste , يعنى حاجة فيها زنجبيل و بتتباع فى السوبر ماركت ...
و ثوم متقشر و مفروم كبير

الطريقة ...
1) بعد تقطيع الدجاجة الى قطع صغيرة , تبلها بال paste و عادة منكونش محتاجين ملح (بس انتو و راحتكو بقة , بس متحتوش كتير)

2) خلو قطع الدجاجة تفضل متبهرة لمدة نصف ساعة تقريبا

3)بعدين ... يتحط المخلوط كلو فى اناء عميق و يغطى و يترك على نار هاااااااااااااااااادية
(ممنوع اضافة اى شىء اخر !!!)

4) بعد تقريبا نصف ساعة تكون الفرخة استوت (بسبب النار الهادية و الخليط) , عندها تضاف قطع الثوم و ممكن نضيف شوية زيت صغننة اوى اوى , بس عشان قطع الدجاجة تاخد لون. و يقلب الخليط قليلا !

و بس خلاص ! و بالهنا و الشفا

الحاجة الوحيدة اللى مش حلوة , ان الواحد بتيقى ريحتو (زنجبيل و ثوم) :أخخخ:

[آيات الجارحى1]

:أخخخ: :أخخخ: :أخخخ:
مش عارفة مش مرتاحة للبتاعه اللى قلتى طريقتها دى..
متاكدة ان الاثار بس ريحة توم وزنجبيل؟؟
عندى احساس ان فى غازات مسيلة للدموع وحالات اغماء وحاجات كده كتير..
وبعدين الPASTEاللى يتحط ده اعمل له بعدها .COPY وللا بيست بس :think3:
على ضمانتك اعملها؟؟
ربنا يستر :sniff:
هاتوا طريقة للديك الرومى يا ظلمة :viking:

[emanff]

بقة مش مرتاحة للطبق اللى زى العسل دة و انتى هارية الناس باسامى حاجات و لا عمرنا سمعناها !! :viking:
قال بوفيك قال !!!!! و سلطة بحرية فيها حاجات مش عارف من انهى منشية !! :maaaad:

متقولى حاجات سهلة فيها قرنبيط و بطاطا :wub: و جبنة :wub: :wub: :wub:

و قال اية و عاملة ريجيم !!!!!!!!!!!!!!!!يا ستى اقل ما فيها اتقى اللة فى البياع بتاع السوبر ماركت اللى بيشك انك بتعملى (عمل و سحور :55: ) بالبتوع دول !!!
و قال اية , اكل مصرى ! امال مبنسمعش بالحاجات دى فى المسلسلات ازاى !!!!
يعنى همة كانو بيضحكو علينا ب (ملوخية الارانب , و الفول و الطعمية !!!!!!)
يللة , منهم للة !

بقولك اية , انا عاوزة حلويات فيها قرع !! اصلى بحبو قوىىىىىىىىىىىى
و كمان حاجات فيها خضار , ابعدى عن اللحمة شوية (عشان صحتك على الاقل :twee: , قال اية مش عارفة الضغط وتعب القلب جاى منين :chains: :chains:

و قبل منسى , ابقى حطى طرق للحاجات اللى تتحط فى الفرن و كمان عاوزة حاجات تتطبخ بالروب (الزبادى) و كمان :think3: .....

اما افتكر انا نفسى بأية تانى ابقى اقولك :drop:

[*زهرة*]

للرفع ..يللا توتو كملي الموضوووووووع :ura1:

[roro2000000]

انا بصراح عاجبنى جدا طريقه البيتزا
بس صعبه شويه ممكن بدل التليفون نستعمل الموبايل اسهل؟
موضوع زى العسل

[boshatag]

مشكووووووووووووووووووووورة يا بنت الجارحى

[روزا كانينا]

انا جييييييييييييت...
الفراخ باللمون


الاكلة دى بتتعمل بصدور الفراخ بس..
بتطلبوا من بياع الفراخ انه يديكم صدور بس على حسب العدد اللى عندكم يعنى ممكن كل شخص يتعمل حسابه فى 2 صدور فراخ او اكتر زى منتوا عايزين..
المكونات...
1- صدور فراخ على حسب الرغبة...
2- طماطم تقطعوها كاروهات... يعنى مكعبات.. يعنى اى تخريط والسلام مش مهم لو مش عارفين تخرطوا مكعبات بس المهم تبقى متخررطة صغير مش ترنشات بقى وتلعبوا بيها طبق طاير فى المطبخ...الطماطم بتاع 8 او 9 طماطمات كبار (على اى كمية فراخ) اصل احلى حاجة ان الواحد يمشى من غير مقدار.. انا بتكلم جد والله بس خدوا بالكوا مش كل حاجة ينفع فيها من غير مقدار..
3- توم بتاع راس توم متوسطة مفرومة فى الكبة او تحت رجل عربية او ممضوغة حتى المهم تبقى مفرومة..(رجاء يا جماعة الله يكرمكوا التوم يتفصص الاول من قشره حكم انا عارفة بكلم ناس خام)...
4- زيت ويستحسن زيت زيتون.. على فكرة معظم الوصفات انا هكتبها بزبت الزتون بس انتوا براحتكم اعملوها بالسمنة او زيت العربيات شوفوا انتوا ترتاحوا لايه..



الطريقة...

1- اتفقنا ان فى صدور فراخ .. طبعا الصدور(مخلية من العضم).. ودى وظيفة بياع الفراخ لان فى حالتكم صعب اشرحلكم تخلوها ازاى ولو انها سهلة.. وكمان تبقى منزوعة الجلد.. يعنى معلهاش الجلد بتاعها وخدوا بالكوا اى طيور تتعمل لازم لازم لازم منطبخهاش بالجلد بتاعها عشان اى هرمونات ضارة فى اكل الطيور بتتركز فى جلدها..

2- الفراخ تتشطف وبعدين قطعوها كاروهات هى كمانز.. طبعا للتقطيع عشان تقدروا تظبطوا التقطيع تكونوا بتقطعوا على رخامة او خشبة تقطيع مش ماسكين الحاجة فى ايدكم وتقطعوا عشان هتبقى صوابعكم فى الاكلة هى كمان لان هتتعوروا.. المهم قطعوا الفراخ مكعبات او حتت صغيرة..يعنى الحتة اد عقلتين الصوبه واتمنى ميبقاش ناس عمالقى بيقروا عشان ساعتها هيبقى صدر الفرخة يادوب اد عقلتين الصوبع بالنسبة لهم .. سامع يا لؤلؤ ياللى مفيش كوتشيات فى مصر مقاسك...

3- صينية بقى على النار وفيها 4 او 5 معالق(معلقة اكل كبيرة) زيت زتون والنار والعة طبعا مش هنسوى الاكل باللمبة النيون اللى فى السقف..
سيبوا الزيت ثوانى كده على النار وبعدين حطوا مكعبات الفراخ كلها على الزيت.. هتتش محدش يتخض.. قلبوها بقى لحد ما تبقى لونا محمر كلها.. وبعدين حطوا التوم المفروم اللى قولنا عليه.. وقلبوهم بتاع 3 دقايق او اقل.. وبعدين ارموا عليهم مكعبات الطماطم ومعلقة صغيرة ملح(المعلقة مش مليانة وتقدروا تتحكموا فى الملح على حسب ما تدوقوه).. ونص معلقة صغيرة فلفل اسود...وقلبوهم مع بعض وضيفوا كوبايتين ميه.. لحد ما الطماطم تبقى صلصة وتدوب فى الاكل ساعتها تحطوا نص كوباية لمون معصور على اللى فى الصينية ده.. ويادوب 5 دقايق وتقفلوا النار
مع ملاحظة انكم تدوقوا الفراخ الاول استوت وللا لسة؟؟ بس عموما الفراخ بتستوى بسرعة ومع نفس الوقت اللى الطماطم بتتحول فيه لصلصة...


بس يا حلويين هى دى الوصفة.. مش هنزل وصفة تانية غير لما تقولوا لى انكم بجد عملتوها.. وللعلم هى من اسهل ما تكون والله ووقتها على بعضها بتاع نص ساعة من اول التخريط(للديناصورات) لحد ما تستوى....



وبألف هنا وشفا...
الحلقة الجاية الفول النابت والحمام المحشى.. ان شاء الله ووالله الاتنين اسهل من بعض...

ومحتاجة تشجيع بقى ومتابعة وربنا ميحرمنيش منكم ابدا يا عسوليين..


بصراحة يا ايات مش عارفه اشكرك ازاى ..

موضوعك شجعنى جداااااااا ان ادخل المطبخ و اطبخ بعد ما كنت حالفة لا اقرب له و لا اجى جنبه لحد ما اموت ..

بس طريقتك الظريفة في العرض شجعتن ىو بالفعل دخلت و قررت اعمل الفراخ بالليمون وقتها اعلنت حالة الطوارئ في البيت انا عصبت راسى و دخلت متوكلة على الله لقيت ماما واقفة على الباب و عينيها بتدمع .. و اخويا بيجهز شنطة سفره عشان قرر فجأة يسافر المريخ .. اما بابا بقى فليقته بيجر كرسى و يقعد قدام المطبخ و هوا حاضن طفاية الحريق :think3: عيلة غريبة مش كده ..

بس على مين انا قررت و لازم اطبخ يعنى هطبخ و بمنتهى الهمة لسه هقطع ال8 طماطمات لقيت ماما بتجرى و تقولى يا بنتى بلاش افترى ..:sniff:

انا : ايه يا ماما يعنى هتستخسرى فيا الطماطم و بعدين هوا انا ححطها في جيبى مكلكم هتكلوا معايا :dntknw:

ماما : :sniff: يا بنتى حرام عليكي ايه الى بتقوليه ده .. انت مش شايفة كمية الفراخ قد ايه لو حطيتى كل الطماطم ديه عليها مش هتستوى الا على الفجر .. و بعد مداولات عديدة قررت اقلل كمية الطماطم و الماء و اسمع كلام ماما و امرى لله مهى برضه خبرة من المطبخ ..

بس و خلصت الطبخه و الحمد لله مفيش اي خسارة لا يمكن اصلاحها في المطبخ و جهزت الاكل و شكله رائع و سلاطة و خلافة و اخويا ساب شنطة سفره و قرر يأجله و ياكل الاول و مع اول قطمه لقيت وشه احمررررررررررر و بيكح .. اتارينى قللت كمية كل حاجه و نسيت اقلل الثوم في الاكل :واه يابوي

بس على العموم حصل خير و الفراخ اتكلت برضه ..

المرادى ناوية اعمل التبولة بقى و ربنا يستر و ميحصلشى حاجه