بـكائـيـات مـن أجـازة سـعـيـده

[مصراوى بجد]

هذه أوراق متناثرة من أجازة ( سعيده ) فى ربوع الوطن أنشرها على حلقات

الــوصــول

اليوم أعود لمعشوقتى
لحظات وتلامس أقدامى أرض مصرنا الحبيبه
كم يهزنى الشوق اليها ، شعور لا يكابده إلا من هاجر و أغترب
إنتبهت على صوت الكابتن يعلن الوصول بسلامة الله ويتمنى لنا إقامة سعيدة
أخذت طريقى الى صالة الوصول
تعالت الاصوات الزاعقه
... مدام سعديه الطوانسى ..... مدام هناء الشيخ ..... أستاذ على مجانص
عشرات الأسماء التى يهتف بها رجال يعترضون الطريق ، ليتسلموا الجواز من الشخص المطلوب ليتم ( تخليصه ) بسرعه :crazyy:
( ظاهره مصريه صميمه لم أشاهدها فى أى مطار من مطارات الدول التى زرتها )
وصلت إلى طابور ليس به سوى خمسة أشخاص أمام ضابط الجوازات .. ( ما أروع النظام )
لم يتحرك أى شخص من الطابور حيث كان الضباط مشغولون بمراجعة جوازات تأتيهم من أولئك الرجال الذين اعترضوا الطريق
بعد نصف ساعة هتف أحد الواقفين
... إيه التهريج ده إحنا واقفين فى الطابور والناس اللى مش واقفه هى اللى بتعدى
لم يكد الرجل المحترم ينطق بهذه الكلمات حتى خرج إليه ضابط كبير الرتبة وهو يصيح بصوت يصم الأذان
... انت بتزعق ليه انت عايز تعمل فيها ( دكر ) أقف وأنت ساكت أحسن لك
صمت الرجل المسكين وقد لفه الخوف :surrender:surrender
عبرت نقطة الجوازات
ما أروع هذا المشهد !!!
عربات جديدة لنقل الحقائب ومجانية !!! :clap:
كادت الدموع تطفر من عينى ، فهاهو الحلم يتحقق وتم تكهين العربات القديمة التى كانت مثار سخرية كل من يزور مصرنا الغالية وتوقفت عملية ( تسول ) جنيهين لكل عربة !!!! :lolly:
هل كان لابد أن ننتظر تغيير القيادات السابقة لتحقيق ذلك ؟!!! :chair::chair:
خلال عشر دقائق وصلت حقيبتى ، توجهت الى الصالة الخضراء و أنا أتمتم بآيات من الذكر الحكيم تعوذا من شر ما لقيته على أيديهم فى زيارات سابقة :devil::devil:
حدث شئ مذهل قابلونى بابتسامة مرحبة وأنتهى الموضوع خلال دقيقتين
رباه يبدو أننى سأنعم بأجازة سعيده !!!
خرجت من المطار لأجد عديلى العزيز بأنتظارى تعانقنا بشوق و أخذنا طريقنا لخارج المطار

(يـتـبـع )

[آيات الجارحى1]

استاذى العبقرى الجميل مصراوى..
كمان على حلقات:sniff:
ده انا اسوا حاجة فى حياتى لما يبقى كاتب عبقرى يكتب حاجة على حلقات..:cry: ياما عانيت ايام مجلة تان تان:انجغة:
عموما بدون ادنى شك طبعا هيبقى الاستمتاع للركب(على وزن الدم للركب)... تسلم ايدك يارب.. طب تاخد كام وتودينى فين..:drive:
قصدى الحلقات هتنزل كل اد ايه؟؟؟:sniff:
فى الانتظار وامانة عليك يا ليل طول.. وهات كل الحلقات م الاخر والاول:harp:
وتحية خاصة من توتو لشخصك الجميل العبقرى:flowers::flowers:

[العنتيل الدامد جوووى]

وتوقفت عملية ( تسول ) جنيهين لكل عربة !!!!
هل كان لابد أن ننتظر تغيير القيادات السابقة لتحقيق ذلك ؟!!!

يا مصروى الموضع مش كده

الموضوع ان فودفون اشتريت العربيات دى وبتحط اعلانها عليها

علشان كده بقت بالمجان


بس كمل ياعم كلامك حلو

بس متنساش تحكي لنا على كبرى 6 اكتوبر الغلبان :es3af:

[مصراوى بجد]

أختى الغاليه آيات
دايما منوره مواضيعى والله
عموما الحلقات إن شاء الله تكون يوميه :pray::pray:
دعواتك الجميله ربنا يسهلها
والحلقة الثانيه فورا بعد الرد
كل سنه وانت ِ طيبه
:flowers:

[مصراوى بجد]

العنتيل الدامد جوى
من عنيه ياباشا الكوبرى أيامه جايه
طلع الموضوع فودا فون طيب برده ربنا يسترهم احسن العربيات القديمة دى كانت فضيحه دوليه :drop2::drop2:

[مصراوى بجد]

الـنـفـق الـعـظـيـم

خرجنا من بوابة المطار فى الطريق الى موقف السيارات ... الحقيقة أن مصمم هذا الطريق لابد أن يكون أحد الفراعنه مصممى ممرات حجرات الدفن فى الأهرامات الخالده:eg::eg:
فالطريق عبارة عن نفق شديد الإنحدار يتلوى كثعبان يفر من صياده ويزدان بعدد لا محدود من الحفر والنقر
( أنصح وزارة السياحة بتوفير مراكز للتدريب بالخارج للراغبين فى زيارة مصر تقدم دورة تدريبة فى عبور الأنفاق تدر علينا العملة الصعبة ، كما يمكن إضافة هذا النفق الى مميزاتنا السياحية كالأثار والغوص فى مياة البحر الاحمر وتكون الدعاية .. تعال الى مصر و أستمتع بالانزلاق عبر النفق العظيم )
وصلنا الى قمة المنحدر فقال عديلى
.... إسمع إمسك إنت العربيه كويس وأنا حمسك الشنط من قدام علشان ما توقعش
بدأنا رحلة الهبوط وعديلى المسكين يهبط وظهره للمنحدر بينما استجمعت عضلاتى للسيطرة على العربة الطائشة
وصلنا الى منتصف المنحدر وفجأه جحظت عيون عديلى وصرخ
.... حااااااسب
سمعت أصوات فرقعة ودربكة خلفى فنظرت للخلف وهالنى ما رأيت
كانت إحدى العربات قد تحررت من عقالها واندفعت مطوحة بأربع حقائب ضخمة على المنحدر وكلهن يهبطن مندفعات نحونا على غير هدى
قفزت لائذا بحائط النفق تاركا عربتى ومستودعا الله عديلى وخواتيم أعماله
مرت العربة المنتحرة وقد تحررت تماما من الحقائب التى أخذت ترتطم بارض وحوائط النفق
بينما تعالى صراخ أمراة مهولة الحجم
.... يالهووووووىىىىىىىىىى طقم الكريستال وكاميرة الفيديو
وصلت الى نهاية النفق لأجد عديلى منطرحا على ظهره وسط الحقائب والعربات :es3af:
سارعت اليه لأساعده على النهوض وقد تمزقت ملابسه وأنا اعتذر عن تركى له
قال عديلى
.... الحمد لله انا بس اللى اتعورت الشنط وقعت فوقى ومفيش حاجه اتكسرت
شكرته وتوجهنا الى سيارته
يبدو أنها فعلا ستكون أجازة سعيده
( يتبع )

[dorbaga]

السلام عليكم ورحمة الله وبركاتة,,,


عديلى العزيز بأنتظارى تعانقنا بشوق و أخذنا طريقنا لخارج المطار

عديلك وعزيز طب خير يا رب يفضل رأيك كدا على طول :box:

شكلها كدا داخلة على احداث 48 بعد النكسة :sniff: عم صمراوي دلوقتي عشان كم عربية كهن ح نقول عن الحكومة لازملها تغير امل الحفريات والبرج والكورنيش والتلوث والخلفة ومحلول الجفاف وتنظيم الاسرة وربسو ح نعملهم ايه اقل ما فيها نطلع برشاش نضرب في الناس :box:


منور يا مصراوي خلينا نشوف الحلقة التانية يا هادي :flowers:


اخوكم الحكواتي :55:

[dorbaga]

السلام عليكم ورحمة الله وبركاتة,,,


.... الحمد لله انا بس اللى اتعورت الشنط وقعت فوقى ومفيش حاجه اتكسرت

انت ح تخليني اتشتت الحجة الى وقت العربية بتعتها حصل معاها ايه انا مالى ومال عديلك مش هو طلع من تحت الشنط سليم معافا خلاص بركة:chr24:

الست ام كرستال حصلها ايه جاوب :confused: شفلى لو الكميرة شغاله كنت صورت عديلك وهو في المنظر دا , وبكدا تضمن وفاءة طول العمر


كمل يا شيخ بينها فعلاً رحلة العمر


منور وخد دي :flowers:

[العنتيل الدامد جوووى]

.... حااااااسب

:brb::brb::brb::brb:

ياعم انت خليت العيال تضحك علي

بيقول لى بتضحك على ايه يابابا :brb::brb::brb:

قولت لهم : بضحك على خـــــــــــيبتنا

هو النفق ده جديد يامصراوى :confused:

علشان لما انزل اجيب معايا الزحافات ..

فووووووووووووو :scooter:

[ahmedsaed]

ما شاااااء الله عليك يا مصراوي ..
بجد قلبت عليا المواجع ..
أصل السيناريو بتاع المطار ده بيتكرر كل مرة أجي فيها مصر..
وفعلا دي ميزة تنفرد بها مصر وحدها دون دول العالم..
عموما .. اللهم لا اعتراض..
ده المطار .. أول حاجة بيشوفها السياح .. واخد بالك

يالله .. سلام
.
..
...
أحمد

[جرافكس]

كاتب الرسالة الأصلية : مصراوى بجد
الـنـفـق الـعـظـيـم

وصلنا الى منتصف المنحدر وفجأه جحظت عيون عديلى وصرخ
.... حااااااسب
سمعت أصوات فرقعة ودربكة خلفى فنظرت للخلف وهالنى ما رأيت
كانت إحدى العربات قد تحررت من عقالها واندفعت مطوحة بأربع حقائب ضخمة على المنحدر وكلهن يهبطن مندفعات نحونا على غير هدى
قفزت لائذا بحائط النفق تاركا عربتى ومستودعا الله عديلى وخواتيم أعماله

( يتبع )

الله يجازيك
عيني دمعت من الضحك

و خاصتا عند ( ومستودعا الله عديلى وخواتيم أعماله) .......:lol:

تحياتي لك

للعلم لقد قرأتها لك من قبل في منتدي اخر و لكني اضحك عليها مثل اول مره

شكرا لك

[مصراوى بجد]

أخى الحبيب dorbaga
الحقيقة إن عديلى أخ وصديق بمعنى الكلمه :55::55:
أحب أطمنك طقم الكريستال متكسرش غير نصه بس وكاميرة الفيديو تعيش إنت
تحياتى :flowers:

[مصراوى بجد]

العنتيل الدامد جوووى
النفق ياباشا موجود فى المطار الجديد تنزل منه على مواقف السيارات يلا اتمرن من دلوقتى
ويارب دايما ضاحك ومبسوط وسلامى للاولاد الحلوين ربنا يخليهم لك
تحياتى

[مصراوى بجد]

ahmedsaed
أيوه يا عزيزى هى المصيبه إن دى أول حاجه بيشوفها السائح وما خفى كان أعظم
تعظيم سلام لسعادتك
تحياتى

[مصراوى بجد]

الغالى جرافكس
والله زمان فينك يا راجل
منور ومشرف القصه وصاحبها
خالص التحية والموده

[مصراوى بجد]

الـتـشـريـفـه

تحركنا بالسيارة إلى خارج المطار وبمجرد وصولنا الى الطريق قطعنا كيلومترين فقط قبل أن نجد أرتالا من السيارات متوقفة تماما
على جوانب الطريق منظر غريب !! جحافل من البشر يقفون وظهورهم للطريق يفصل بين الواحد والتالى له مسافة قصيرة
سألت عديلى
.... ماهذا
.... ربنا يستر الظاهر فى حد معدى يعنى ممكن نقف ساعتين ثلاثه
.... معقول !!!! ومين ده اللى حيعدى
.... ايوه معقول ونص ومش مهم مين اللى معدى دى ياسيدى بقت موضه فى البلد تبقى رايح معاد شغل ولا تلحق طيارتك وفجأه تفضل واقف كده من غير ما تفهم ليه
طال الوقوف لمدة ساعه والجميع يتلفت يمينا ويسارا بانتظار الفرج
كان عدد من ضباط الشرطه يمرون وهم يصرخون فى اجهزة اللاسلكى بعصبية شديدة
خرج سائق سياره أجره من سيارته وتوجه الى شجرة بالجزيرة والتصق بها
أشاحت النساء بوجوههن
انتهى الرجل من مهمته واستدار وهو يغلق بنطاله ووجهه ينطق بالراحة والسعاده
فجأة إندفع نحوه ضابطان وثلة من رجال الشرطه مرتدى الملابس المدنيه
تسمر الرجل مرتعبا وقبل أن يفتح فمه هوت صفعة قويه على قفاه وعلا صوت الضابط بالصراخ
.... إيه اللى بتعمله دا يا إبن .....
.... معلش ياباشا مقدرتش امسك نفسى انا مريض وعندى سكر
.... سكر يا إبن ..... دا احنا حنشف دمك خالص
تم سحب الرجل المسكين وسط مأدبة من الصفعات والركلات الى سيارة شرطه كبيرة
عاد الضابط و هو يصرخ فى مساعديه
.... محدش يسيب حد ينزل من عربيته يا ولاد .......
مرت ساعة أخرى واصبح صراخ الاطفال فى السيارات المجاورة _ بتاثير الحرارة الخانقة _ سيمفونية عذاب متصلة
أخذ البعض يتخفف من جاكتات البدل ورابطات العنق ويفتحون قمصانهم ( رباه كيف ستتطور الأمور إذا طال الوقوف !!! )
كان الطريق المقابل خاليا تماما ثم فجاه ظهرت افواج من سيارات الشرطه بمختلف الاحجام وهى تنطلق بسرعه يصاحبها عشرات الدراجات البخارية ومئات من قوات الشرطة تعدو على غير هدى
قلت لعديلى
.... الظاهر اللى معدى دا حيعدى من الطريق المقابل
.... ايوه
.... طيب احنا واقفين ليه واحنا فى طريق ثانى
إنفجر ضاحكا وقال
.... تصدق ممكن تلاقيهم موقفين الطريق فى اسكندريه كمان
.... وليه دا كله
.... إجراءات أمنيه خايفين حد يعمل حاجه
مرت سيارة سوداء وسط عدد من السيارات التى تبرز مدافع رشاشة تكفى لنسف نصف المدينه
فجأه انطلق الواقفون ورجال الشرطه كمن تم الافراج عنه من معتقل وسمعت احدهم يكلم زميله وهما يجريان
.... يارب توب علينا من القرف ده بقى
بدون وعى وجدت نفسى أقول
يااااااااااااااااارب

( يتبع )

[عمدة]

كاتب الرسالة الأصلية : مصراوى بجد
قال عديلى
.... الحمد لله انا بس اللى اتعورت الشنط وقعت فوقى ومفيش حاجه اتكسرت
شكرته وتوجهنا الى سيارته
يبدو أنها فعلا ستكون أجازة سعيده[/COLOR]
( يتبع )[/B][/B][/B] [/B]

:brb::brb::brb:

لقد ضحى عديلك بنفسه من أجل الحقائب :D

من حقه أن يتقاسم الحقائب معك :brb:

دمت رائعاً , أكمل ياصديقي .. لقد رسمت على وحجوهننا الإبتسامة :tu:

[كتكت هانم]

كاتب الرسالة الأصلية : مصراوى بجد
الـتـشـريـفـه

تحركنا بالسيارة إلى خارج المطار وبمجرد وصولنا الى الطريق قطعنا كيلومترين فقط قبل أن نجد أرتالا من السيارات متوقفة تماما
على جوانب الطريق منظر غريب !! جحافل من البشر يقفون وظهورهم للطريق يفصل بين الواحد والتالى له مسافة قصيرة
سألت عديلى
.... ماهذا
.... ربنا يستر الظاهر فى حد معدى يعنى ممكن نقف ساعتين ثلاثه
.... معقول !!!! ومين ده اللى حيعدى
.... ايوه معقول ونص ومش مهم مين اللى معدى دى ياسيدى بقت موضه فى البلد تبقى رايح معاد شغل ولا تلحق طيارتك وفجأه تفضل واقف كده من غير ما تفهم ليه
طال الوقوف لمدة ساعه والجميع يتلفت يمينا ويسارا بانتظار الفرج
كان عدد من ضباط الشرطه يمرون وهم يصرخون فى اجهزة اللاسلكى بعصبية شديدة




دا في كل البلاد العربية يا سيد :shutup: حاجة تقرف :sniff:

تبقى حضرتك خارج من الشغل تعبان وزهقان وحتموت تروح البيت ويعطلوك عشان حد حيمر من الشارع المهبب اللي حتتنيل تمشي فيه تروح بيتكم :huh:

لله المشتكى :chains:

الله صحيح انا قرأت الموضوع دا فين قبل كدا :thinky:

:nanana:

[mohamed22]

بدون وعى وجدت نفسى أقول
يااااااااااااااااارب

يااااااااااااااااااااااااااااااااااااااااااااااااا ااااارب

[مصراوى بجد]

أخى الحبيب عمده
نحن ياسيدى فى وطن التضحيات :-"
دام ودك الرائع
تقبل خالص التحايا

[مصراوى بجد]

كتكت الغاليه
قرتيه ياستى فى :box2::box2::box2:
علشان تبطلى لماضتك اللذيذة :crazyy:
تحياتى الصادقة

[مصراوى بجد]

mohamed22
:flowers::flowers::flowers:
تحياتى واتمنى ان تعجبك باقى الحلقات

[مصراوى بجد]

التاكسى

فى اليوم التالى لوصولى الى الوطن الغالى إحتجت لقضاء إحدى المصالح التى ستكون موضوعا للحلقة القادمة
ولقضاء هذه المصلحة إستقليت فى ذلك اليوم السعيد التاكسى عدة مرات واليكم التفاصيل

تاكسى رقم 1
توقف التاكسى الذى لا أعرف له موديلا أمامى ، كان الزجاج مغلقا ففتحت الباب وقلت
.... مصر الجديدة
.... ماشى
ركبت التاكسى ومددت يدى لافتح زجاج النافذه ولكن لم أجد أى مقابض نظرت للسائق فقال
.... لا مؤاخذه يا بيه الإزاز عطلان
.... ياه بس الجو حر جدا
.... معلش أنا فاتح الإزاز اللى ناحيتى
كانت السيارة تسير بسرعة 20 كيلومترا فى الساعة وتصدر اصواتا لا تصدر مركبة الفضاء تشالنجر نصفها
مددت يدى لأضع حزام الامان بمكانه فقال السائق
.... لأ مفيش قفل إنت بس حطه على صدرك علشان المخالفات
( والكاظمين الغيظ )
واجهنا أحد الكبارى أخذت السيارة تصعد ببطأ شديد مع إهتزازات مرتعده وأصوات فحيح من الموتور و لكن ماهذا !!!!
أنا لاأرى شيئا تقريبا !!!!
إكتشفت أن السيارة ممتلئة بالدخان سعلت واخذت أشهق بصعوبة وصرخت
.... إيه ده العربيه بتولع يا اسطى
.... فال الله ولا فالك يا بيه ده بس الشكمان منفس من قدام أنا حتى كنت رايح اصلحه
.... طيب وقفت ليه يا بنى آدم وركبتنى
.... أنا قلت إنت فى طريقى و أهو نسلى بعض
.... اقف يا جدع إنت ونزلنى
.... طيب طيب بس لما انزل من على الكوبرى
وصلنا لمنزل الكوبرى فتسارعت السيارة قليلا وفجأة ضغط السائق الفرامل بشده
إرتطمت بالتابلوه والزجاج الامامى رغم ان السرعه ليست عاليه
صرخت
.... إيه دا يا أسطى
.... لا مؤاخذه يابيه العربيه اللى قدامى وقفت مره واحده والكرسى بتاع حضرتك مفكوك وبيجرى لقدام مع الفرامل الجامده
.... نزلنى نزلنى بقولك

تاكسى رقم 2
اشرت اليه وقد لاح لى أن مظهره أفضل من عربة الموت السابقة
.... مصر الجديده
.... ماشى
ركبت التاكسى وكم اسعدنى ان الزجاج كان مفتوحا
مد السائق يده الى الكاسيت و اداره
( إن أنكر الأصوات لصوت الحمير )
إنطلقت نهقات عاليه من السماعات بهذه الرائعه
هييييييييييه ... أوع ... أوع ... أوع .... أوع .... هيييييييييييييييه .... إع ..... إع ..... إع .... إع هييييييييييه ... حموه ..... حموه ...حموه...... حموه ........ هييييييييييييييييه ..... غدوه ....غدوه .... غدوه .... غدوه ....هييييييه
صرخت
.... إيه ده يا أسطى
رد وهو ينفث سموم سيجارة ذات رائحة غريبه
... دا شريط حمدان البهيم الجديد
... طيب أقفل الكاسيت أنا عندى صداع
... الف سلامه يابيه طب أنا معايا سجاير لف صنف عالى تعدل النفوخ وتخليك اخر بهججه
... بهججه !!!! يانهار أبوك إسود !!!! نزلنى هنا نزلنى

تاكسى رقم 3
.... مصر الجديده
... ماشى
الزجاج مفتوح ... جميل ، الكاسيت صامت ... رائع ، لا سجائر ... الحمد لله
كانت السيارة تسير بسرعة معقوله وفجأه ضغط السائق البنزين بكل قوته وهو يصرخ
.... طب وحياة ..... ما أنا سايبك
أخذت السيارة تتلوى وتنحرف وسط السيارات بجنون
صرخت
.... حاسب يا اسطى حاسب
.... أنا لازم ادشدشه
.... هو مين
.... سواق الميكروباص اللى كسر على
.... حصل خير .... صلى على النبى .... جت سليمه
.... لازم يتربى
إنحرف سائق الميكروباص نحونا بجنون ليحصر سيارتنا بينه وبن الرصيف ليتوقف الغريمان
بسرعة البرق سحب كلاهما قطعة حديد ونزل ليلتحما فى معركة فاصلة
كنت محاصرا بفعل التصاق بابى بالميكروباص ... فجأة تقدم شخص نحو السيارة ويبدو أنه جامع النقود بالميكروباص يحمل حديدة طويلة رفعها ليهوى بها على الزجاج الامامى
إرتعبت وحشرت نفسى بين المقعدين لأصل الى الكنبة الخلفيه وصوت انفجار الزجاج الامامى يدوى فى اذنى
نجحت فى أداء هذه الحركة البهلوانيه الخطيرة وخلصت نفسى من السيارة و الحمد لله
أخذت أجرى بعيدا ثم توقفت لأنفض الزجاج عن نفسى
تفقدت الخسائر
فردة حذاء
شحم على قميصى
فتحه مربعه طول ضلعها 7سم فى بنطالى من الخلف
ما أجملها أجازه

( يتبع )

[أم منة الله]

أخى الفاضل المبدع دائما مصراوى
فخر لنا و شرف كبير ان تكون معنا و نستمتع بكتاباتك المميزة
حبيبت اقتبس من الموضوع لاقيته كله يستحق الاقتباس و التعليق على ما وصل اليه حال مطارنا و شوارعنا للأسف و تاكسينا :closeeye:
اذكر فى مرة بسبب تشريفة لاحد كبار الزوار القادم لمصر انى تعطلت و كادت تفوتنى الطائرة
و لما طلعت الطيارة تعطلت ساعة اخرى لان الزائر طائرته بتهبط و لازم نستنا احسن حد مننا يغتاله جو جو :cry:
خايفين على نفسهم قوى و الموت هيجى لنا و لهم و لو حتى معهم حرس مصر كلهم:chair:
تسلم ابداعاتك يا اخى مصراوى و فى انتظار البقية :tu:

[beautiful smile]

:brb::brb::brb::brb:

تعيش وتاخد غيرها

كويس اني شفت الموضوع عشان الحق نفسي ومنزلش :drop2:


كتابتك تجنن بجد وحقيقي تستحق لقب "كاتب متميز"

انا مستنيه باقي الاجازه التعيسـ........السعيده ديه وربنا يستر وتعدي على خير :hot:

[مصراوى بجد]

الأخت الكريمة منة الله
أولا أود أن أوجه لك الشكر على جهودك الرائعة بهذا المنتدى والتى لاحظتها أثناء تشرفى بتصفح مواضيعه
وأنا معجب جدا بأسلوبك خلال المشاركات والذى ألمح من خلاله فكرا راقيا ملتزما بروح اسلامية واضحة
جزاكِ الله خيرا لهذا المرور الكريم و أتمنى أن يعجبك القادم من الحلقات
تحياتى وتقديرى :flowers:

[مصراوى بجد]

أختى الفاضلة beautiful smile
والله النزول لا مهرب منه :cry::cry:
ربنا يسترها معانا جميعا
ويارب الباقى يعجبك
تحياتى وتقديرى :flowers:

[مصراوى بجد]

إيـصـال سـحـب

(قبل 11 شهر )
أقود سيارتى عبر طريق العين السخنة بالاتجاه الى الغردقة حيث نقضى ثلاثة أيام ثم نواصل طريقنا الى السعودية عائدا الى مقر عملى منهيا أجازتى التى اصطحبت خلالها سيارتى عبر ميناء الغردقة
اقتربت من سيارة نقل تسير أمامى ... فجأة وجدت قطعا من الحصى والحجارة الصغيرة تتساقط من السيارة المكشوفة وتنذر بأوخم العواقب فى حال إصطدمت بزجاج سيارتنا
ضغطت دواسة البنزين لأتخطى السيارة المحملة بالخطر بسرعة ... تجاوزتها ثم عدت الى معدل سرعتى الطبيعى
بعد دقائق قليلة .... السيارات تتوقف ، إنها إحدى لجان المرور على الطريق ، تقدم أمين شرطه طالبا رخص القيادة والسيارة ثم طلب منى ركن السيارة والتوجه الى سيارة ضايط شرطة تقف على جانب الطريق
ترجلت وتوجهت الى الضابط
.... سلام عليكم
.... إتفضل
.... ماهذا
.... إيصال سحب رخصة القيادة
.... لماذا
.... سرعة زائده ... الرادار سجل سرعتك 96 وأقصى حد للسرعة 90
.... أنا زودت السرعة لأن كان ممكن أتعرض لكارثه انا وأسرتى لأنكم تسمحون للسيارات المحملة بمواد البناء بالسير دون تغطية حمولتها ، والمفروض انكم تمنعوها
نظر إلى بقرف يعادا قرف من ينظر حماته وهى ترقص عشره بلدى وقال
.... إتفضل يا أستاذ انت مش حتعلمنا شغلنا
.... أنا مسافر لمدة سنه واحتاج للرخصة عند عودتى
.... مش شغلنا

أخذت الايصال وعدت الى السيارة
( قبل أيام )
عدت الى الوطن و أرغب فى إستئجار سيارة حيث قدمت من مأمورية عمل بالهند الى الوطن مباشرة .
أخرجت الايصال من بين أوراقى الهامة وتوجهت منذ الصباح الباكر الى مرور مصر الجديدة
وقفت فى الطابور لمدة نصف ساعة حتى وصلت الى الموظف خلف الشباك الصغير
ناولته الإيصال نظر إليه وقال
..... إيه ده .... دى رخصة سواقة مش رخصة سياره
.... أيوه
..... رخص القيادة بتروح على مرور مدينة نصر عند مسجد رابعة العدوية
..... شكرا

وصلت الى مرور مدينة نصر ، وقفت فى الطابور لمدة نصف ساعة حتى وصلت الى الموظفة خلف الشباك الصغير
ناولتها الإيصال نظرت إليه وقالت
..... دى مسحوبة طرق سريعة ... دى تلاقيها فى مرور الدراسة .... هنا الرخص المسحوبة داخل البلد
.... شكرا

وصلت الى مرور الدراسة ، وقفت فى الطابور لمدة ساعة ( الزحام شديد ) حتى وصلت الى الموظف خلف الشباك الصغير
ناولته الإيصال
..... إيه ده
..... إيصال رخصتى المسحوبة
..... بس اللى مكتوب ده مش رقم رخصة ، مكتوب 840 جمرك البحر الأحمر
..... إيه !!!!!!! ده كان رقم اللوحات المؤقته لسيارتى السنه الماضيه ، ليه ما كتبش رقم الرخصة
..... تلاقيك بلضمت معاه حب يقرفك
..... بلضمت معاه !!!!!!
..... أيوه تلاقيك ما أخدتش المخالفه من سكات فقال يأدبك ،
..... أفندم !!!
.... المهم تعرف رقم رخصتك ؟
..... لا طبعا
..... كدا يبـأه الله يعوض عليك طلع واحده جديده
..... بس دى مش غلطتى دى غلطة المقدم ( أسم المقدم مختوم على الأيصال )
..... أمرك لله روح طلع واحده جديده من مرور مدينة نصر و إشترى دماغك
..... ماينفعش أعمل بدل فاقد
..... لا بدل فاقد لازم رقم الرخصة القديمة

عدت الى مرور مدينة نصر ( شاريا دماغى ) ومستعينا بالله لأشق الطريق نحو إستخراج رخصة أخرى ( يتبع )

[dorbaga]

السلام عليكم ورحمة الله وبركاتة,,,

التاكسي

الحلو يا مصراوي انها يوميات اجازة سعيدة والاحلى بجد منك يا مصراوي ان كل جزء سهل ممتنع لا تطويل ولا تقصير تقرائها كل جزء لتجد انها متكاملة مقفولة يعني والاروع انها مازلت بتحصل :brb:

لما الحق الحلقة الى بعديها خد دي :flowers: مقدماً

هو انا قلتلك كل عام وانت بالف خير ولا جات متأخرة


اخوكم الحكواتي :55:

[سندس الجنة]

السلام عليكم ورحمة الله وبركاته،،

أخي مصراوي بجد هذه اول مرة اقرا لك وبصراحة استمتعت جدا واريد ان اضيف كت بسافر على مطار القاهرة بس غيرت مساري الى مطار الاسكندرية وآخر مرة كانت من برج العرب .والحمدلله اني نقلت خط سيري من القاهرة للاسكندرية هي طيارة وحدة وتخلص حاجاتك وتطلع على طووووووووووول.

بس عايزة اقولك حاجة في سنة 2000 اكتوبر كنت في القاهرة^_^ وكان تاني يوم لازم الحق القطار راجعة اسكندرية:scooter: القطار بيطلع الساعة 11 وانا قلت انزل من بيت صديقتي الساعة 10 قال يعني بدري -_-، انا في مدينة نصر ورايحة محطة القطار اعتقد كانت في رمسيس يعني مش يعيدة ولا حاجة بس وخدت التاكسي وقفنا في الشارع لوحده ساعة ليه يا عمو اصل في حد بيعدي :thinky:، افتكرت بعدين انه كان ختام القمة العربية والرؤساء مروحين يا سلام طيارة تفوتنا ، قطار يروح واللي عنده جلسة مهمة في المحكمة والا عملية يعمل ايه:sniff: :angry: طبعا لفيت لفة سبت التاكسي وما كنش في حد قاعد في عربيته اصلا حتى الموظفين سابو الباصات ومشوا على رجليهم :bye: الساعة 11 رحت المحطة لقيت القطار طبعا مشى طيب:sniff: وبعدين ارجع ازاي على بيت صاحبتي ما وانا ما عرفش حاجة في اي حاج بس الحمدلله كان في طلبة جامعة دلوني على مترو الانفاق وكانت فسحة في ربوع القاهرة ، اصل اختكم ليها في اسكندرية وبس :D ومن التاكسي للمحطة ومن المحطة لمترو الانفاق وكل ده وانا شايلة شنطتي معايا ، بس الحمدلله في
الآخر وصلت .



أسفة اني طولت بس كلنا ليها

[آيات الجارحى1]

ابداع على ابداع والله..:tu:
بس احلى احلى حتة بتاعت اللى بينظر بقرف يعادل اللى يشوف حماته وهى بترقص عشرة بلدى..:D
بجد ضحكت فيها ضحك دى.. ياريت الستات تقرا وتتعلم وتشوف اراء الناس فى حماقاتهم ايه...
بس بجد مفيش احلى ولا اروع من كده والله..
تسلم ايدك استاذى المبدع:flowers::flowers:

[shody20]

أستاذي العزيز المبدع ... ( اللي وحشني كتييير جداً و مش بيسأل )
مصراوي....


أولأً أجمل سلام لحضرتك و كل سنة و انت طيب....
طبعاً أنا ماقدرتش أمسك نفسي اني أقرأ الحلقات السابقة و طبعاً هو مش من حظي اني قريتها أول ما نزلت ... بسمن حظي اني قريت كم حلقة على بعض... و كانت وجبة دسمة جداً من الضحك و البكاء....
و زي ما قالوا الأحباب هنا ... السهل الممتنع... و وضف بسيط...
أنا طبعاً بتأسف لأني ما قريتهاش أول ما نزلت..... بس أنا أصلاً مش بخش كتير خالص في أي حتو ... بخش تخاطيف أطمن على الناس من بعيد لبعيد...
ادعيلي...ربنا يوفقني و أعرف أرستق...( حلوة ارستق دي) أموري و أقدر أنظم حياتي المتلخبطة..

عموماً ... من ابداع لآخر دائماً أستاذي العزيز....ربنا يكرمك و يا رب أقدر أشوف بقية الحلقات...


تقبل تحياتي...

[مصراوى بجد]

أخى الحبيب dorbaga
الله يكرمك دايما تشجعنا وكلامك كله ذوق
وكل عام وانت وكل من تحب فى أسعد حال

[مصراوى بجد]

أختى الفاضله سندس
أجمل حاجه فى شعبنا إنه بيقول فى الآخر الحمد لله وصلت
شعب طيب وغلبان مهما حصله ومهما شاف بيقول الحمد لله
أى حاجه من اللى حصلتلى أو حصلت لسيادتك لو حصلت بره على طول فيها قضيه وتعويض من الحكومة علشان تسببت فى تأخير واحد عن طيارته ..... مثلا
لكن عندنا كل تأخيره وفيها خيره :crazyy::crazyy:
حمدا لله على سلامتك
تحياتى

[مصراوى بجد]

أختى الغالية آيات
ربنا يكرمك ويارب القادم يعجبك
:flowers::flowers:

[مصراوى بجد]

الغالى جدا shody20
عندك حق أنا فعلا مقصر جدا فى حقك
واثق إنك حتسامحنى لأن كرم أخلاقك مشهود
ربنا يصلح أحوالك ويجعل خطواتك من نجاح لنجاح
تحياتى :flowers:

[مصراوى بجد]

الرخصة


قضيت ليلتى استعد لأجتياز إمتحان رخصة القيادة غدا
أخذت أراجع كتاب إشارات المرور ، وأخذت زوجتى تسألنى عن معنى كل إشارة
والأولاد يراقبوننى ويضحكون عند كل خطأ منى
فى الثامنة صباحا أخذت مكانى فى الطوابير لسحب الأستمارات والنماذج و أستكملتها جميعا
لم يبق سوى شهادتين طبيتين
أفادنى صاحب كشك المرطبات أنه يمكن إستخراجهم من مركز طبى ملاصق للمرور
أسرعت الى هناك وأرشدنى شخص الى عيادة الباطنه
سجلت اسمى وبعد دقيقتين خرجت ممرضه ونادت إسمى
قمت لأدخل العياده ولكنها قالت
.... الدكتور مش فاضى وعلشان انت مستعجل انا حخلصها ( إبتسامة ذات مغزى )
.... أه .... أيوه .... شكرا ( مع 2 ملطوش لزوم السرعه )
بعد نصف دقيقة كنت احمل شهادة بخلوى من جميع الامراض المتوطنه والمعديه والعصبيه وان حاسة السمع لدى جيده !!!!

لم يبق سوى شهادة العيون ، أعرف الطريق جيدا ، بعد دقيقتين كنت أحمل شهادة تفيد بأن قوة إبصارى كزرقاء اليمامه واننى لا اعانى حولا ظاهرا واننى اجيد تمييز الالوان
( الأن فقط عرفت سبب إزدياد عدد حوادث الطائرات !!!! )

عدت الى مبنى المرور ، دفعت الرسوم ووقفت منتظرا إمتحان الإشارات
نظرت الى يمينى فوجدت لوحة تشير الى غرفة رئيس إدارة المرور وعلى لوحة أخرى كتب
( إذا كانت لديك أى شكوى تقدم بها إلى رئيس الوحدة )
أستبشرت خيرا ... لأعرض عليه المشكله لعله يساعدنى
تقدمت من الغرفة فاستوقفنى عسكرى مستوضحا
.... أنا عندى شكوى
.... من إيه
.... لا بس حالة خاصة كده
نظر الى شذرا ثم دخل الغرفة وعاد بعد قليل ليشير الى بالدخول ووجهه ينطق بالقرف
دخلت الى المكتب
.... السلام عليكم
.... وعليكم السلام
رويت قصة الرخصة المفقوده و أضفت
.... ولدى ياسيدى رخصة قيادة سعودية منذ 9 سنوات واخرى دولية منذ 4 سنوات
.... روح أمتحن
.... أفندم ؟
لم يرد ومد يده للتليفون معلنا عن إنتهاء المقابلة !!!!!
( خرجت أجرجر بقايا كرامتى )
أنهيت إمتحان الإشارات بنجاح
توجهت لامتحان القيادة
توقفت السيارات فى طابور طويل
تقدم منى عسكرى وسأل
.... داخل الإمتحان
.... إن شاء الله
.... يارب تنجح
... الله يخليك
.... طب مفيش شاى لينا
.... نعم؟ .. آه .. أيوه ... أيوه .. إتفضل ( ملطوش )


بعد دقيقتين
عسكرى أخر

.... داخل الإمتحان
.... إن شاء الله
.... يارب تنجح
( ملطوش )

بعد دقيقتين
عسكرى أخر

.... داخل الإمتحان
.... إن شاء الله
.... يارب تنجح
( ملطوش )


بعد دقيقتين
عسكرى أخر
( ناولته الملطوش قبل أن يفتح فمه .... صاحب خبره )

تقدمت إلى موقع الامتحان
سالنى عسكرى عن اسمى فأجبته
صاح بدون مناسبه
.... أدخل يا أستاذ انت حترسمنى
.... حاضر ... حاضر
أتممت الأمتحان بنجاح
وبعد ساعة تسلمت الرخصة
ما أروع هذا التقدم لم اقض سوى 12 ساعه فقط على يومين لأستخراج الرخصة
وصلت الى منزلى ليستقبلنى الاولاد مهللين وهتفنا جميعا
( يا بشرانا هذه .... رخصه )

( يتبع )

[كونتيسة قطايف]

:tu::tu::tu::tu:
ما شاء الله لا قوة الا بالله
خمسة وخميسة :55: الله اكبر

المفروض ان الواحد يبكي من اللي بيقراه لكن ان من كتر الدحك اضطروا :es3af:

ولما فقت :idea: قررت اني اعرض عليك اني اشتري منك حقوق حلقة النفق والتاكسي
واعمل منها فيلم يكسر الدنيا :brb::brb::brb:
يابني دانتا فلته :prof:



تحياتي السخنة جدن :notooth:

[مصراوى بجد]

اسعد الله صباحك يا كونتيسة
خلى جنبك شوية كولونيا خمس خمسات علشان تفوقينى انا من الحلقه الجايه ... اخوك اتبهدل فيها اخر بهدله
لك الف شكر على التحيات الساخنه لانها اجمل حاجه فى التلج ده :brb::brb:

[آيات الجارحى1]

سوخنة:sniff:
حاجة سوخنة:sniff::sniff:
انا مشربتش كوباية كاكاو من ايام ما كان نفسى فيها وانا بكتب مذكرات جواز السفر:cry::cry:
ياكونيسة هانم ممكن تحيات سوخنة ليا انا كمان:cry:
استاذى العبقرى الجميل مصراوى:flowers:
صباحك سكر:flowers::flowers:

[مصراوى بجد]

حـديـقـة أسـمـاك

بعد أن انتهيت من ملحمة إستخراج الرخصة تفرغت تماما لوضع برنامج لقضاء الإجازة
تحلق الأولاد الثلاثة حولى منتظرين تفاصيل البرنامج
أخذت أتصنع التفكير العميق مستمتعا بأحساس بالأهمية قلما أنتزعه من حرمى المصون
حتى أنتزعنى صوت حازم ( ثلاث سنوات ) من خيالاتى
.... قول حتودينا فين بسرعه
.... إحم .... أنا قررت أوديكم حديقة الأسماك كنزهة صباحية
تدافعت الأسئلة من الأولاد حول محتويات الحديقة
بدأت الاجابة مستعينا بصورة الحديقة منذ زيارتى الأخيرة لها قبل عشر سنوات مضافا إلية ما تخيلته من إضافات وتحسينات تدعمها بيانات وزارة السياحة عن تطور المنشآت السياحية ، وضعت ساقا على ساق مستعرضا معلوماتى
.... الحديقة تحتوى على عشرات الأحواض الممتلئة بالأسماك النادرة ذات الألوان والأشكال العجيبة والتى تم جمعها من بحارنا الغنية بكل أنواع الأسماك وكذلك أسماك أخرى نادرة جدا من مختلف بلاد العالم
.... طيب ممكن نأخذ كاميرة الفيديو ونتصور معاهم
.... أكيد ممكن .... دا أنا حعملكم فيلم رائع

صباح اليوم التالى أستيقظ الأولاد فرحين مشحونين بإحساس المغامرة ومتشوقين لرؤية العجائب الموعودة
وصلنا إلى الحديقة وتوجهت لشباك التذاكر
.... خمس تذاكر لو سمحت
.... عشر ملاطيش
.... تفضل
تناولت التذاكر و أستدرت لدخول الحديقة ولكن نادانى الرجل مرة أخرى
.... يا أستاذ
.... نعم
.... مش دى كاميرة فيديو
.... أيوه
.... طيب لازم لها تذكرة بخمسين ملطوش
.... كاااااااااااااام خمسين !!!!!!!!
.... أيوه
ترددت وكدت أعيد الكاميرا إلى السيارة لكن نظرات الأولاد منعتنى ، دفعت المبلغ صاغرا وخففت عن زوجتى المصدومة قائلا
.... مبلغ زهيد مقابل فيلم نادر سيراه الأولاد و الأحفاد بعد عشرات السنين
تجاوزنا بوابة الدخول وسرنا بضعة أمتار قبل أن يتقدم منا شاب يرتدى زيا يوحى بأنه من موظفى الحديقة وقال و إبتسامة عريضة تملأ محياه :sniff:
.... أهلا وسهلا منورين
.... شكرا
.... إنتم أكيد جايين علشان تتفرجوا على الأسماك
( إستنباط يدل على ذكاء متقد ) :-"
.... أيوه جايين نتفرج على الأسماك
قال ونفس الأبتسامة مرسومة على وجهه
.... للأسف مش ممكن
.... نعم ؟ مش ممكن ليه
.... أصل الحديقة بيتعمل فيها تطوير شامل ومكان الأحواض مغلق
قررت ان أرتكب جريمة الأعتداء على موظف أثناء تأدية وظيفته :chair:
ناولت زوجتى كاميرةالفيديو إستعداد لكى أطبق فى زمارة رقبته ، ولكنه أستدرك قائلا وبطريقة مسرحية
.... لكن طبعا علشان الأولاد الحلوين ما يزعلوش أنا حدخلكم بنفسى
( إذا الموضوع بحاجة إلى بعض الملاطيش ) :-"
.... ماشى ماشى
تقدمنا الشاب الى مكان يشبه المغارة بين حجارة اسمنتية وبقايا اخشاب وقال معتذرا
.... معلش طبعا علشان بيعملوا صيانه
وصلنا الى داخل المغارة ودليلنا يتقدمنا وتوقف بنا أمام حوض ذو إضاءة شاحبة و مياة عكرة تسبح به سمكة متوحدة من نوع البلطى والتى تجدها فى قفة أسماك الحاجه أم زينب عند مدخل أى سوق شعبى
قال الشاب
.... دى سمكه من نوع البلطى الملكى المصرى ودى سمكه عريقة ولها تاريخ عايشه هنا من ثلاثين سنه
نظر الى الأولاد باحباط وغيظ فقلت مداريا خيبة أملى
.... أيوه أيوه مين بيشوف بلطى ملكى دلوقتى
عرضت على الاولاد ان أصورهم الى جوارها فصاحوا والشرر يتطاير من أعينهم
.... لااااااااااااااااااااااااااااااااااء
قادنا الرجل الى الحوض التالى
( اللهم أجرنى فى مصيبتى ) كان بالحوض الكالح قرموط أسود من النوع الذى يملأ المصارف
قال الشاب
.... دا قرموط فرنسى نادر جدا ومش موجود غير هنا وفى حديقة اسماك باريس
( تحاشيت النظر الى الأولاد )
وصلنا الى الحوض الثالث كان مظلما تماما وبه مياه سوداء قذره
.... وهنا سمكة اللوتس و....
قاطعته
.... إحنا مش شايفين حاجه الحوض مظلم
.... ههههههه طبعا يا استاذ سمكة اللوتس تعيش فى الظلام ولو شافت النور تموت فورا
نظرت الى الأولاد وجدتهم قد أداروا ظهورهم لى تماما وقد إنقعدت أياديهم فوق صدورهم وأخذوا ينفخون من الغيظ :maaaad::maaaad:
قلت محاولا إنقاذ الوضع
.... طيب الحوض ده فى إيه
قال الشاب
.... دا حوض سمك الكرمبو الأسترالى وده مشهور بالوانه الرائعه
دققنا النظر ولكن لاشئ بالحوض ، نظرت الى الشاب مستعطفا وسألت
.... هو ده كمان بيعيش فى الظلام
.... لا يا أستاذ اصل السمكه دى على وشك إنها تبيض وسمكة الكريمبو لازم تبيض فى مكان منعزل ومحدش يشوفها
وقفت يائسا تماما وعاجزا عن فعل أى شئ
قال الشاب
.... للأسف هو ده السمك الموجود بس والباقى نقلوه لحد ما تخلص الصيانه وعموما تقدروا تتمشوا فى المغاره على راحتكم ، و أى خدمه يا بيه
ناولته ملطوشين حتى أتخلص من سماجته
بمجرد ان غادرنا تعالت الاصوات
.... هى دى حديقة الأسماك .... دى تقرف .... انت ضحكت علينا ..... دى فسحه دى
قلت مهدئا
.... طيب تعالوا نتفرج على المغارة
.... مش عايزين
.... طيب تعالوا نخرج من الناحية الثانية
سرنا الى نهاية المغارة وقبل ان نغادرها جذبنى حازم من رجل البنطلون وقال
.... بابا هو الراجل والست دول بيعضوا بعض ليه
نظرت مذهولا الى مايشير اليه فوجدت شابا وفتاه فى ركن بالمغاره فى وضع :blush):سحبت أولادى وجريت الى خارج المغارة اللعينة وانا أتمثل بيت الخنساء

ولولا كثرة الباكين حولى على ( حيائهم ) لقتلت نفسى

( يتبع )

[ساجد لله]

:D

مش معقول أسلوبك وطريقة عرضك للموضوع .. رائع
فعلا كل ماتقوله حقائق وبتحصل بحزافيرها .. أخوك مر بالتجربه دي كاملة من أول المطار الى التراخيص وأكتر:D

ننتظر باقي الحلقات

تقبل تحياتي:flowers:

[آيات الجارحى1]

:brb::brb:
ياعينى يا خويا رايح متخيل نفسك هتلاقى الاكواريوم وللا ايه:D
ده فى اسكندرية بقى فى الاحياء المائية..
وشوف بقى على بحارنا وسواحلنا وثرواتنا من الشعاب المرجانية دى ويادوب الموجود فى الاحياء المائية تعتبر من وجهة نظرى مجموعة اسماك يقتنيها هاوى نص نص مش هاوى دماغه عالية يعنى.. الصراحة الحال ده والله يدل على مدى غباء المسؤولين وتخلفهم وتبلد افكارهم...
ده انا اللى اسمى انا .. عندى فى بيتى فى اسكندرية مجموعة من الشعاب المرجانية اللى اقدر افتح بيهم مكانين زى الاحياء المائية واسمى هاوية .. الصراحة بجد حال بائس وكمان لما جيت الكويت هنا ودخلت المركز العلمى (الاكواريوم).. وهو مكان الصراحة يعنى لما دخلته لم املك الا ان اقول لما الدنيا كده يبقى الجنة ايه.. هو احواض عملاقة تتسع لاسماك قرش ضخمة وانواع مختلفة من الاسماك من جميع انحاء العالم وهو كما تمنيت حضرتك ومنيت ابنائك برؤيته .. لما الكويت البلد الصغيرة اللى معندهاش نفس مساحات سواحلنا ويبقى عندها مكان بالرقى والروعة الخرافيه دى(الله اكبر).. واحنا فى مصر خيبتنا خييييبة كده... يبقى نقول ايه بس..
اتذكر انى قرأت فى الاهرام مرة انه تم العثور على حيوان بحرى نادر اسمه الراقص الاسبانى وتلك التسمية جائت من شكله الذى يشبه لبس الرقص الاسبانى.. وان المفروض انه ميبقاش موجود فى البحر الابيض المتوسط المهم من هنا لهنا اخدوه ودوه على الاحياء المائية فى اسكندرية.. وبما انى من المهتمين لدرجة الولع بالحياة البحرية وكل شىء يتعلق بالبحر (حتى الشحم اللى بيلزق فى الرجل وميطلعش الا بالجاز ده:sniff: )
فذهبت على الفور جرى لاراه فى الاحياء المائية..
فوجدت حوض عبيييييييط والبتاع الجميل ده ياعينى قاعد كده عنده اكتئاب وشكله بيتخانق مع مراته عشان هى السبب انهم طلعوا الرحلة دى من مكانهم الاصلى فى البحر الاحمر وجم يصيفوا عندنا فى اسكندرية وكانت النتيجة انهم اتاخدوا تحرى واتحبسوا على ذمة الشوىفى تهمة تجسس على موانىء البلد لصالح اسبانيا وبعض العملاء الصدفيين فى البحر الاحمر ... وعجبى..
استاذ مصراوى.. لك مليون تحية ..:flowers::flowers:

[سندس الجنة]

السلام عليكم ورحمة الله وبركاته،،

والله اخي مصراوي بجد انا اول وآخر مرة رحت جنينة الحيوانات:lolly: كانت في سنة 1986 يعني من زمن ولى وفات:انجغة: فمش قادرة اتذكر بصراحة ما الذي جد في الموضوع ولكن اذا كان كما ذكرت وكما اكد الاخ ساج لله والاخت آيات فسبحان الله اقترح ان تبعث بقصتك هذه الى احدى صحف او الى من يهمه الامر لان الزوار اذا راوا ما ترونه فكيف سيكون الانطباع الأول؟؟؟


بصراحة هما دلوقتي كل جهودهم موجهينا لمدينة ستة اكتوبر عشان عيون الفنانين اللي بيصورا فيها ونسيوا الاماكن التانية
بصراحة يا اختي آيات انا لسة لليوم ما زرتش الاكوايروم ونفسي اروح والله بس مافيش وقت ولا حد فاضي يروح معايا:hat: مع اني ساكنة جنبه ما علينا .

[Dr ims]

تتبعت الحلقااات من بدايتها ولي مشاركة بكره لما اجي من الكلية زي دلوقتي العصر




ربنا معاكم:pray:

[كونتيسة قطايف]

:brb::brb::brb:

:lolly::lolly::lolly:
اعتقد يامصراوي بعد المذكرات دي امن الدولة حيوزع صورتك :geeek: على المنافذ الجوية والبرية والبحرية :banned:
مع التشديد ان المزكور من المطلوبين على ورق الكوتشينة في العراق :gilo:

المهم عايزة اتطمن بس انك مالعبتش بعقلك وخدت الولاد الغلابة :انجغة: تفسحهم في جنينة الحيوانات :cry:
لان اخر مرة لما زرتها كان عمري 6سنوات والسايس :bb: بتاع قفص الاسود لقفني من جنب ماما :lady2: ولزقني جنب القفص قال ايه عشان الصورة:photo: تطلع هايلة :ch9:
والحقيقة ان الصورة :rip: كانت فعلا حتطلع هايلة لدرجة انها كانت حتتنشر على الصفحة الاولى للجرايد المحلية والعالمية بعنوان الاسد يلتهم راس طفلة تلتقط لها امها صورة هايلة :brb::brb::brb:
ده عينة بس من الفسح اللي رحتها وانا عيلة :dead:

:chef:والهوت شوكلت مع السينمون رولز ده تحية على المزكرات الشربات :notooth:



:tratat: ايات .....الهوت شوكلت اتبعتلك هوم دليفري انشاء الله يعجبك
مبسوطة:notooth:

[آيات الجارحى1]

كونيسة ربنا يكرمك يارب كان تمام الف شكر..
استاذى مصراوى مش ناوى تكمل ابداع هنا وللا ايه؟؟
نحن فى الانتظار:flowers:

[z3bola]

الأخ العزيز مصراوى بجد
يسلم إيدك ويسلم كيبوردك ويسلم ماوسك على كلامك الجميل:tu:
كلنا فى انتظار بكائيتك الجديدة
إحنا زعلناك فى حاجة ؟:confused:
من يوم 15 فبراير لانهاردة 25 فبراير واحنا مستنيين:thinky:
وحشنا كلامك اللى زى العسل
تحياتى:)
زعبولا

[dorbaga]

السلام عليكم ورحمة الله وبركاتة,,,

الاخ الغالي مصراوي بجدفي ويم حبيت اعمل فيها الفرنكا وانزل اشوف المتحف بتاع ميدان التحرير واشوف فرعون وجه لوجه

واحنا على الباب قلى 10 ملطيش قلتله لية بس قلى عشان اجنبي قعدت احلف اني مش اجنبي وبتكلم بالعربية وناطق ومستأنس واربة في البيوت مرضيش

دفعت وقلت اكيد فرعو يستاهل اكثر من كدا بكثير

وصلت لحد الباب بيقلى 20 ملطوش بقلة لية قلى عشان الكميرا قلتله لا وميت لا دا على جثتي رجعت ارجع التذكرة مرضيش وكنت بين خيارين احلاهم مر مرارة الحنظل وقلت عوضي على الله احسن مادخل وادفع 20 جنية عشان اصور فرعون القاهم بيعملو تحسنات الناس لما سمعتني قعدت تضحك على


لقيت واحد راجل عامل شبطة فلوسي يا عالم فلوسي يا حرامية فلوسي يا خونة ملقتش فرعون

الناس كلها بصتلى , قلتلهم الحكواتي محلل اقتصادي وحكيم روحاني وقلت خسارة قريبة ولا ربح بعيد



اي خدمة يا مصراوي

اشتقنالك يا مصراوي فينك :rolleyes:


اخوكم الحكواتي :55:

[مصراوى بجد]

ساجد لله
يا أخى إسمك اجمل إسم شاهدته فى المنتديات خذ دى:flowers: على الاختيار الرائع ده
وحمدا لله على سلامتك من مطبات المطارات
تحياتى

آيات الجارحى1
كنت قاعد أقرأ التعليق بتاعك فجأة جت الجملة الاعتراضيه دى
وبما انى من المهتمين لدرجة الولع بالحياة البحرية وكل شىء يتعلق بالبحر (حتى الشحم اللى بيلزق فى الرجل وميطلعش الا بالجاز ده )
رقعت حتة ضحكه ودى تانى مره اتفضح فى الشغل بسببك
انا خلاص مش حقرا لسيادتك حاجه الا فى البيت
عندك مقدره رهيبة على إسعاد من يقرا حروفك حتى فى الردود
لك تحيه :flowers:

52875Sondos
حديقة الحيوانات :blush)::blush):
ربنا يسترك بلاش سيرتها والله دى أصبحت سبه فى جبين البلد
و أوعى تروحى هناك :es3af:
سلملم

Dr ims
ياااااااه كل دى محاضرات :nanana:

كونتيسة قطايف

طيب لى طلب عندك روحى شوفى الاسد دلوقتى
يا عينى حيصعب عليكى والله ما قادر يقف على رجليه وبقه مفيهوش سنه واحده يعنى ممكن تديلى شوية فول سودانى:cry: صدقينى حياكلهم
سلملم

z3bola
معلش والله كنت مشغول فى شوية شغل وبسافر كثير
حالا حلقه جديده يارب تعجبك
وربنا ما يحرمناش منك
تحياتى

dorbaga

هو انت رحت هناك
انا عملتها ورحت من سنتين ما كانش ناقص غير يقلعونى ملط :drop2::drop2:
الا صحيح هى كاميرة الفيديو دى حاجه قبيحه
سلملم

[مصراوى بجد]

الصابونه

دخلت بسيارتى الى محطة بنزين ، فور توقفى أمام عامل المحطة هجم على سيارتى شاب وفتاة
صاح الشاب كمن وجد كنوز سليمان
..... مبرووووووك ألف ألف ألف مبروك يافندم ، تكسب معانا، سعادتك محظوظ اخر رقمين فى لوحة العربيه يقبلوا القسمة على ثلاثة
..... بجد ؟ ربنا يبشرك بالخير
..... إحنا بقالنا إسبوع منتظرين حد يكسب
.... أول مره أكون محظوظ :lolly::lolly:
..... طيب إركن العربيه و إتفضلوا علشان إستلام الجائزة
.... هبطت من السيارة ليحتضننى الشاب مهنئا بينما إنهالت الفتاة _ ذات الملابس الساخنة والقوام الملئ بالمتفجرات _ بالقبلات على الأولاد وحملت الولد الصغير وأخذت تلاعبه ، كدت أعترض فأنا صاحب السيارة وجميع المميزات من حقى ولكن تذكرت وجود حرمنا المصون فطأطأت رأسى متحسرا على ضياع أهم مافى الجائزة :sniff::sniff:
استأذن الشاب للحظة ، ووجدته يهجم على صاحب سيارة أخرى صائحا
..... مبرووووووك ألف ألف ألف مبروك يافندم تكسب معانا ، سعادتك محظوظ أول رقمين فى لوحة السيارة يقبلوا القسمة على خمسة
( غريبة إيه الصدف دى.. إثنين يكسبوا فى خمس دقائق الظاهر إنى وش السعد )
تدخلت الفتاة لتطلب منى _ بدلال _ التوجه برفقتها الى مكتب صغير ملحق بالمحطة لتسلمنى الجائزة
( صباحنا فل ) :clap:
إلتفت إلى الأولاد وبابتسامة عريضة قلت
.... خليكم هنا يا أولاد أنا حستلم الجائزة وأجيب أيس كريم و أرجع
صرخ القرود
....لااااااااااااااااااااء حنيجى معاك مش حنسيبك
( مافيش فايده ) :angry:
إصطحبتنى الفتاة الى مكتب وجدت به عددا من الفتيات وامام كل واحدة منهن شخص يبدو أنه بصدد إستلام جائزة !!!! :thinky::thinky:
قالت الفتاة
.... إتفضل إستريح
جلست
أحضرت صندوقا متوسط الحجم من المخمل الأحمر يزدان بقلوب صغيرة وفتحت الصندوق و أخرجت الجائزة
ماهذا !!!! الجائزة عبارة عن صابونة سعرها نصف ملطوش فى كل مكان !!!!!
صحت بحنق
.... إيه ده!!! حضراتكم عاملين فرح والأخ العرقان ده عمال يبوس ويحضن فيه لما قرفنى علشان تدونى صابونه
.... هئ هئ هئ لا يافندم دى الجائزة الرمزية... الجائزة الكبيرة هى إقامة مجانية لمدة ثلاثة أيام فى قريتنا السياحية الجديده ( زورونى كل سنه مره) على أجمل شاطئ فى العالم
.... أهو كده الكلام وحضرتك حتكونى معانا
.... هئ هئ هئ إحتمال ، المهم حضرتك توقع على الإستمارة دى وتكتب بياناتك وعدد المرافقين ونأخذ من حضرتك 50 ملطوش تأمين بس لضمان الجديه وحضرتك حتستردهم أول ما تحضر الحفله النهارده
.... حفلة إيه؟
.... حفله النهارده فى فندق ( خلينا نشوفكم ) فى قاعة ( إبقى قابلنى ) الساعة 9 مساءً ، لازم تشرفنا علشان تعرف مواعيد الرحلة
.... أوكيه بس أمانة ياريت تكونى موجوده أصل أنا معرفش حد هناك يا ........ هو إسم حضرتك إيه
.... هئ هئ هئ هئ هئ ... مونيكا ... وحستناك النهارده
( ياسيدى ياسيدى يمسى ايامك بالخير يا كلينتون ) :lolly:
عدت الى السيارة ملوحا لزوجتى بالصابونة ورويت لها القصة _ حاذفا مايتعلق بالفتاة _ لكن أصغر القرود صرخ
.... والبنت اللى ريحتها حلوه قالت لبابا إنها حتستناه هناك :hot::hot:
....
...
..
.
فى المساء توجهت إلى الحفل_ مصطحبا أفراد الحرس الثورى_(حسب أوامر القيادة )
دخلت الى القاعة ليستقبلنى شاب مهندم قائلا
.... أهلا وسهلا تحب حضرتك تتفرج على رسم للقرية وتختار الشاليه المناسب
.... الحقيقة أنا محرج منكم جدا معقول كل ده علشان أخر رقمين يقبلوا القسمة على ثلاثه ، دا كثير والله ، ياسيدى أى شاليه كله من إيديكم كويس
.... ههههه أيوه بس لازم حضرتك تختار المساحة والموقع المناسبين لميزانيتك
.... مزانية إيه .... هو مش الثلاث أيام مجانا !!!
.... أيوه مجانا بس بعد حضرتك ما تشترى شاليه وعلى فكرة ده سعره مخفض 30% علشان حضرتك كسبت معانا يعنى سعر الشاليه المتوسط على البحر حيكون 215000 ملطوش بس وتسددهم بالتقسيط عل سنتين
.... نعممممممم !!!! بس أنا مش عايز أشترى شاليهات
.... صدقنى دى فرصة دا نفس الشاليه بعناه ب 300000 من شهرين
.... ياسيدى مش عايز أنا حأخذ الثلاث أيام وبس
تغير وجهه فجـأة وزم شفتيه إستحقارا وقال
.... للأسف الشراء شرط أساسى للتمتع بالثلاثة أيام
.... طيب خلاص مش عايز رجعوا لى فلوس التأمين
.... أيوه طبعا حضرتك تستلمهم من مقر الشركة الرئيسى من قسم الحسابات
.... وهو فين مقر الشركة ده
.... قريب خالص ... فى إيطاليا حضرتك
.... نعم ياخويا إنتم نصابين و أنا حوديكم فى داهيه
.... لأ لأ لأ إوعى تغلط ... إرجع لصورة الإستمارة حتلاقى مكتوب إن الإسترداد من المكتب الرئيسى ، ومكتوب فى أخر الإستمارة عنوان المفر الرئيسى فى روما وتقدر حضرتك تروح هناك وتتأكد بنفسك وحتأخذ فلوسك بالكامل

خرجت من الفندق أجرجر هزيمتى :closeeye::closeeye:
تبخرت أحلام الأجازة الجميلة مع مونيكا ، ولم يبق لى سوى ...... الصابونه

[كتكت هانم]

مبرووووك :lolly: انت حتدخل كتاب جينس للأسعار القياسة :tu:

مصرواي يشتري صابونة بخمسين ملطوش (ملطوش يضرب ملطوش) :clap::clap:

ابقى بروزها في ايطار فاخر وحطها في ......
























الحمام :hurry:



<< يا شماتة طنط كتكت فيك :brb::brb::brb:


:chr24::chr24::chr24:

[مصراوى بجد]

كتكت
:chair::chair::chair:
هى حصلت الحمام
:box2::box2:
خذى دى :hang:
ولا اقولك خذى دى






































:flowers::flowers:
العشره ما تهونش برضه

[ساجد لله]

أخي الفاضل مصراوي

جزاك الله خيرا على هذا الأطراء .. ده بس من زوقك :flowers:

وأحييك على أسلوبك السهل الممتنع في السخريه مما نعانيه من واقع حالنا
بالظبط وكأنك تقول ماتعرضنا له جميعا .. حتى شغلانة الصابونه والشاليه دي مرت بي ولكن بدل النمره التى تقبل القسمه على ثلاثه كانت لو معاك عمله ورقيه بها الرقم 6 :blink:( بس ما كانتش الصابونه ضمن الأتفاقيه:) )


في أنتظار الحلقه القادمه

تحياتي:flowers:

[سندس الجنة]

السلسلام عليكم ورحمة الله وبركاته،،


اخي مصراوي الحمدلله انك رجعت تبدع تاني وتكمل مذكرات الاجازة :flowers:


بس قلبت بصابونة:lolly:

وماله اصل الصابون حيجيله وقت ويختفي من السوق فهما بيسبقوا:فتكوا بعا

على العموم تحياتي والى مزيد من










:واه يابوي





















الصابونات:clap:

[آيات الجارحى1]

كاتب الرسالة الأصلية : مصراوى بجد
[ALIGN=CENTER] بينما إنهالت الفتاة _ ذات الملابس الساخنة والقوام الملئ بالمتفجرات _ بالقبلات على الأولاد وحملت الولد الصغير وأخذت تلاعبه ، كدت أعترض فأنا صاحب السيارة وجميع المميزات من حقى [/COLOR]



الحتة دى انا هبروزها واعلقها مش على الحيطة لان ممكن امشى والحيطة متبقاش اودامى انا هعلقها على عدسات نضارتى من جوه بحيث تبقى اودام عنيا عشان مبطلش ضحك..
الحتة دى انا ضحكت فيها والله ميقلش عن نص ساعة عرض مستمر...
احلى احلى حتة قراتها لحضرتك فى كل كتاباتك..

استاذى العبقرى مصراوى..
ربنا يحفظك يارب بجد والله روعة اسلوب الكتابة فن وتحفة الله اكبر عليك :flowers::flowers:

[aboyosef]

المبدع مصراوي

يبدو انك ادتنا الصابونة و نسيت الموضوع

تحياتي :flowers:

[عطوة]

كل دة و انت لسة فى المطار امال لو ركبت الاوتوبيس هايجرالك اية يا مسكين
على فكرة ان شاء اللة هيكون لك مستقبل مشرق
كمل يا عم كمل
عطوة:lolly:

[weka]

اسلوب رائع وجميل وسهل


كما يقولون السهل الممتنع

عارف اتمني كتاباتك دي تنزل حلقات منفصلة كا مسلسل والله هتكسر الدنيا بس تفتكر هيزيعوها



كمل والله متابع من اول حلقة


خد دي:flowers:

[أميرة بلا حصن]

مصراوي...

تاريخ آخر مشاركة في الموضوع ده عمرها يزيد عن سنتين وكام شهر..

بس انهرضة مجليش نوم.. ورغبة مني في تغيير حالة من الملل تتسلل إلى كل مطلع أسبوع عمل جديد.. قررت أجيب موضيعك كلها من أولها لآخرها..:scenic:


يا أخي حرام عليك...
دنا مش غيرت مودي وبس...
دنا قلبي وجعني.. والجيران صحيت.. وقربت أخبط راسي في الأرض لأتخلص من نوبة ضحك تملكتني ومش عارفة أخلص منها إزاي!!
:heat: :scenic:



سرنا الى نهاية المغارة وقبل ان نغادرها جذبنى حازم من رجل البنطلون وقال
.... بابا هو الراجل والست دول بيعضوا بعض ليه



الحته دي سببتلي تشنج عضلي من كتر الضحك..:brb:

يا مصراوي حرام عليك أعضاء القهوة..
هيموتو بدري بسببك..:brb: :brb:



فى المساء توجهت إلى الحفل_ مصطحبا أفراد الحرس الثورى_(حسب أوامر القيادة )


ده أقل واجب... بعد موجة الغزل الصريح والغير صريح
في الحسناء الهيفاء اللي لطشت منك القرشين..:gy0000:

بس فداها مش كده سههم

[نور محمد]

هوووووووووووووووب

حرام الجمال دا كله مايبقاش فى أول صفحة