فكييييييييييييييييييييرة.. حد يحب يشارك يا فرسان العامية؟

[هريدي يابووووي]

الإخوة الأعزاء..
انا حاليا شغال على سلسلة دروس في السيرة..
و مرة و انا بادور على النت.. لقيت موقع حاطط السيرة النبوية كلها في صورة قصيدة.. فجت لي فكرة:idea:
ايه رأيكم لو مع كل درس.. احطه مكتوب هنا.. و نشوف النقاط الأساسية اللي فيه و نحاول نطلعها في قصيدة عامية قصيرة سريعة بحيث تبقى في آخر الدرس تفكرنا بيه؟:hot:
مارأيكم.. دام فضلكم:انجغة:

[بابا جاب موز]

السلام عليكم ورحمة اللهوبركاته


وأنا موافق
امضى يا هريدى .....أيدك فى ايدى:knight::knight:

موافق وراضى .......ومن دلوقتى فاضى

وابدأ تعالى ......وماتقولش لالا






وأقولها لحد ما أبقى عجوووووووووووز


بابا جاب مووووووووووووووووووووز

[الغزال الشارد]

إيه يا بوص؟؟؟؟؟؟؟ :viking::viking:




وهي دي برضه محتاجه لسؤال............:hat::blink:




أنا مش من فرسان العاميه ولا حاجه..............




بس أكيد - بإذن الله - ربنا يقدرني و أشارك......:pray::pray:







و أكيد كل فرسان العامي..........:knight::knight:



وإللي فرسان مش عامي.............:knight::knight:


كلهم هيشاركوا بإذن الله.......... :tu::tu:





وتسلملنا فوكيراتك يا ريس.........:wink::wink:

:chr24::chr24:





ده عمل كنا نفخر....إن جتلنا الفرصه علشان نشارك فيه.........




يوه بقىيوه بقىيوه بقى

[آيات الجارحى1]

:cry::cry::cry:
طب مينفعش حد يخف دمه؟؟؟؟
:cry::cry::cry::cry::cry:

[محمد فارس]

هو ده الكلام
جاتلكم فرصة عمل يافرسان العامية
يعنى كل واحد ممكن يوقع عقد احتكار لعدد من الحلقات0
على خيرة الله0

[posy]

انا لست من فرسان العامية ولا الفصحى على الاطلاق ولكنى اريد التجربة
ويكفينى شرف التجربة ان لم انجح

فهل تقبلونى معكم ؟!! :confused:

[واحد بيحب مصر]

و ليه ما قلتش فرسان الفصحى كمان يا فالح
خليها على الطرفين يا زعيم
عموما فكرة طيبة
سنحاول
تحياتي

[هريدي يابووووي]

جزاكم الله خيرا يا جماعة :)
الليلة ان شاء الله هانشر الدرس التاني و هاقولكم على النقط الأساسية فيه بحيث نركز عليها..
و يا دكتور جمال.. منورنا والله :flowers:
بس المطلوب فعلا شعر عامي مش فصحى.. السيرة اتعملت فصحى قبل كه والحمد لله ماحدش فهم حاجة:D.. عاشن كده عاوزين نعملها عامي بأسلوب بسيط..
و مافيش مانع للإستظراف يا آيات لما نكون بنتكلم على درس مستفاد مثلا أو بننتقد عيب معين.. ممكن نصوره بصورة كوميدية خفيفة..:)

[هريدي يابووووي]

على فكرة..
الدرس الجديد ان شاء الله اسمه "الحب الأول"..
بيتكلم عن زواج النبي"ص" بالسيدة خديجة الى نزول الوحي على النبي"ص"..
فيه نقطة أعتقد هاتبقى ملهمة جدا ليكم.. يا سلام بقى لو صورتوها في كم بيت شعر بس يكونوا قصيرين.. مش عاوزين معلقات الله يكرمكم:cry:
النقطة هي في غزوة بدر.. لما النبي "ص" لقى بين الأموال اللي اتبعتت من مكة فداء للأسرى.. لقى قلادة السيدة خديجة..
فأخدها و حضنها و بكى.. و هو بيفتكر أيام السيدة خديجة..
بيفتكر "كلا والله لا يخزيك الله أبدا"..
و بيفتكر القلب الكبير اللي كان بيسكن اليه و يشكيله همومه لما يلاقي الصدود و الأذى من المشركين..

مخمخوا فيها لغاية ما انشر الدرس الليلة ان شاء الله .. هانشره مكتوب و مش هاسجله الا لما القصيدة تخلص عشان القيها في آخره و اللي ألفها ياخد أجر كل واحد هايسمع الدرس ان شاء الله :flowers:

[هريدي يابووووي]

تم نشر الدرس يا شباب:flowers:
ورونا الهما..
اضغط هنا (http://www.haridy.com/ib/showthread.php?s=&threadid=27189)

[سلسبـيل]

ربنا يقدرني واقدر اكتب حاجه مناسبه:55:


سلسبيل

[هريدي يابووووي]

صلصبيل:sniff:
فيه حاجة غريبة قوي حصلت..
الرسالة اللي بعتيهالي فتحتها اقراها.. و جيت ارد عليها.. لقيتها فص ملح و داب:cry:
هو انتي بعتيلي رسالة والا شديتيلي مكتوب؟:thinky:
يظهر شديتيه جامد شوية:brb:
حبة جد بقى:dry:










































ممتاااااااااااااااااااااااااازة والله يا سلسبيل:tu:
بجد رائعة والله خصوصا انها طلعت بالسرعة دي..
محتاجة بس شوية مراجعة للوزن و تبقى مية مية صديق:tu:
جزاكي الله كل خير.. ربنا يكرمك و يعزك:flowers:
يا ريت بقى تنشريها هنا

[سلسبـيل]

معلش يابوص
اصلي كنت عملت ليها الغاء
عشان كان فيها غلطات كيبورديه
بوظت الوزن




اتعلمتم ايه م الدرس؟
يلا تعالو نقول ونعِد
اللي يحب
ان الله يختاره ويبقي
نور في الضلمه
يهدي الناس ويزيل الغُمه
لازم تبقي النيه دي خالصه
لازم تستحمل وتعاني
خطَّك مش مفروش بالورد
طب ازاي؟
انت اختار الزوجه الصالحه
اللي تعينك
تنشر دينك
وانتي اختاري الزوج الصالح
اللي يساعدك
تدعي لربك
وتربي ابنك ..او بنتك
علشان يطلع جيل النصر
يمحي الشر
ينشر دين الحق الواضح
********
طب ايه تاني
شفتم خَير نساءِ الارض؟
هيه خديجة
اول واحده
جه م الغار الصادق يجري
راح يحكيلها
هيه تقول له
ربك مش راح يخلف وعده
ويخذل عبده
وكانت واثقه
ف كل كلامه
وكات بتسانده
وتثبِّت عزمه ..وارادته
باهدي لكل اخواتي هدية
خدو م الطاهرة القدوة الحسنه
عاشت كل حياتها الباقيه
علشان تخدم دينها وصابرة
كات لمحمد بلسم يشفي
وتهونله الامه المرة
ليك يا الهي عَجِلت لترضي
كانت هيه الفايزة الاولي
اول من بُشِر بالجنه
اه لو يبقي اتنين في زمانا
زي الطاهرة
***********
عام الحزن
مش اسبوع اوشهر ونص
لا كان عام
عام م الحزن
بعد ماعدي
الذكري ماخصلتش وبس
فضلت جوا البال بتطوف
والقلب الابيض مخطوف
ومحمد بيحب حيبها
علشان بِيفَكره ويمس
ذكري ف قلبه مايوم حايسبها
غزوة بدر وكان النصر
وسط الفديه
لمح العقد بتاعها بيلمع
يمسكه بإديه المبروكه
وعينه بتِدْمع
طاف بخياله
صورة حبه الاول فجاه
لحظة رهيبه
خمسه وعشرين سنه وياها
صعب ان الصادق ينساها
طول مالذكري دا هي بتتجدد
مين تتمني؟
تبقي رفيقه ف يوم في الجنه
لبنت خُوَيلد؟
**************
تالت حاجه
عارف نفسك؟
طيب عشت معاها دقايق؟
انت وهيه تناجي ف ربك؟
تقعد تتحاسب وياها
وتعرف عملك
لو عاوز تتغير فعلا
لازم تبدا
جدد نفسك
هما دقايق
قدر قُلَيّل م اليوم جدا
وبكده تقدر تعرف ربك
******
رابع نقطه
لازم تصبر
وابقي رفيق بالناس التانيه
وماتكرهش العاصي لشخصه
روحله وساعده
خليه يبصر
اللي المؤمن حاسه وشايفه
ازاي تقدر
انك يوم تبعت ليه دعوة
وانت بتكرهه او مش طايقه؟
****************
اخر حاجة
لازم تقرأ
كل ماتقرأ
حاتحفظ قدرك
إقرا..تلاقي ايات من ربك
إقرا وربك
هوا الاكرم
لازم تفهم
علشان نوصل
ونكون امة .نور بتعلم
ماتقولش انا باقرا الروايات
إقرا ف حاجه تفيدك دنيا
وتفيد غيرك اشخاص تانيه
وتكون ليك في الاخره دليل
مش علشان تقضي الاوقات
ولا تخلص يوم و طويل
يلا يا امه "اقرأ" نرجع
آن الوقت يغيب الليل


اعتقد ان الاخطاء في الوزن اتظبطت؟
ولا لسه فيه حاجه تانيه:flowers: محتاجه تعديل؟


سلسبيل

[آيات الجارحى1]

الدرس ابكانى طبعا..:sniff::sniff:
القصيدة رائعة..
الصراحة انا مش عارفة اقول ايه والله.. يا بيج بوص ويا سلسبيل .. والله انى لاحب ان احشر معكم..
ربنا يحفظكم يارب وينفع بكم يارب ويجزل لكم العطاء..
خلصت حروفى من الكلام والله ومهما وصفت مش هقدر اعلق على الدرس الحساس اوى اوى والقصيدة التى جاءت تأكيد على معانى الدرس بصورة مؤثرة جدا..
جزاااااااااااااااااااكم الله كل خير يارب..
ياريت اخونا الفيزيائى ييجى يقرا الدرس والقصيدة لانه هيفرح اوى

[محمد فارس]

ماشاء الله
هو ده الكلام

انا يادوب صليت الجمعة واتأخرت شوية00كنت معزوم 00وبرغم الامطار الغزيرة كان عندى اصرار على الغدوة دى00رحت وجيت وكلى امل الاقى الدرس نزل علشان ربنا يكرمنا بكام البيت اكتبهم 000لكن سلسبيل سبقت واللى سبق اكل النبأ0

بصراحة فكرتك هايلة ياهريدى باشا000تطويع الموهبة فى توصيل معلومة او فكرة0
والتجاوب جه سريع جدا 000خاصة وان الاخت سلسبيل شبه معتزله من فترة لظروف الدراسة0

بارك الله فيكما 0000وقسم عامى منور بوجودكم 00

[هريدي يابووووي]

الله يكرمكم جميعا :)
بس يا جماعة المسألة مش مسألة مين اللي يلحق الأول..
عاوزين كلنا نشارك و في الآخر نجمع الأفكار في فكرة واحدة نكون شاركنا فيها كلنا..
ايه رأيكم؟

[روبى 2]

والله يا بوص جزاك الله خيرا على الفرصة الجميلة ..

حبيت أشارك بحاجة يارب تكون بس قد مقام الحبيب (صلى الله عليه وسلم)

ما تصلو بينا على النبي الهادي الأمين
سيد البشر .. خير الأنام .. والعالمين

لو يوم قلمنا حب يبدأ بالكلام
عنه... لا هيوفي ولا يروي الحنين

زهرة شباب مكة وأكرم خلقها
تحكي عليه كل البشر على أرضها
في العشرينات .. وبينضرب بيه المثل
صدق وأمانة .. خلق كريمة نشأ بها

طاهرة وشريفة .. عندها أكبر تجارة
عن تجربة .. اثبت محمد الجدارة
جواها احساس قالها هيكونلو شأن
استأمنت صدقه وأمانته والجسارة

بصو بعينيكو وفتَّحو يابنات الايام دي
الطاهرة لما قلبها يختار عريس
قالت لحالها .. صدق وأمانة .. دولا عندي
بالدنيا.. أحسنلي من خمسين وريث

هوا كمان لما اتفتح قدامو سيرة
كانت في عقله أمنية ان تكون مراته
لانه عارف فيها اخلاق الأميرة
وبعقلها هتسانده وتنور حياته

في الخلوة جوا الغار .. كان على طول يفكر
ف الكون ووِسْعُه .. باهتمام وتدبر
كانت حريصة انه يعمل ما بدا لو
عارفة انه حاجة كبيرة .. بتساعدو انه يقدر

دلوقتي سنه أربعين .. الوحي جالو
جوا حراء مرسال أمين واقف قبالو
يجري عليها لانها هيا السكن
يجري في حماها وهيا بتروقلو بالو

شوفو الحكيمة .. لما تيجي تطمنو
وتقولو ربك عمرو ما راح يخلى بيك
وتهدِّي بالو .. من قلب خوفو تأمِّنو
وتقولو حاسة ان ربك حامي ليك

مش بس راحة لقلبه بالقول والكلام
لا بالمواقف والعمل ... فارس همام
وتروح وتروي لورقة كل اللي حصل
ويعرَّفو انه هيخرج مالزمام

هيخَرَّجوه أهلو من الوطن الحبيب
هيخَرَّجوه.. الغريب بعد القريب
يحملها جوا فؤادة ... تجرحلو مشاعرو
يعرف بأنه بين ايديه موضوع رهيب

شوفو بنات جنسي شرفكم قد ايه
لما تكون منكم خديجة بطهرها
يبقى تحسو إنكم في الدنيا دي
مفروض عليكم يبقى فيكم طبعها

عاشت حياتها كلها لزوجها الأمين
عاشت لزوجها قبل ما يكون النبي
هيا حبيبتو .. معاها عاش أصعب سنين
واستحملت .. قالت ده هوا مأربي

بعد العناء.. بعد المحبة والسكن
يجيلو عام .. كان هوا ده عام المحن
ماتت خديجة .. بموتها كان مكسور حزين
عرف ان موتها هيبتدي معاه الحَزَن

وف معركة بدر اللي كات أولى معاركو
واحد أسير مالاسرى .. يبقى صهر ليه
واما زينب بنتو جت تفديلو أسرو
كان النظام .. تدفعلو مال لاجل تفاديه

كان الفدا من بنتة زينب .. القلادة
اللي اما شافها عرف قوام .. كات ملك مين
ريحة خديجة هفهفت حوالين مكانه
والدمع سال على خدو .. وبان حزين

اتذكر الطاهرة اللي كانت ليه سكن
اتذكر اللي استحملت كل المحن
واستأذن اصحابه ورد لها القلادة
وكرَّم الذكرى اللي كانت ليه وطن

شفتو الوفاء لزوجة ماتت من سنين
شفتو الدموع !! نزلت غزيرة من العينين
شفتو اما ذكرى ف قلبو تفضل بالسنين
يبقى أكيد عرفنا طبعا تبقى مين

ما تفكرو شوية يا بنات الايام دي
شوفو كدة .. ايه من خديجة أخدنا ايه؟
لو نفسكو في الجنة تبقى جارة ليكو
شوفو خصالها وطهرها .. واتعاملو بيه

لو قلنا فيها وفيه .. هنقعد نحكي دهر
وكلامنا يجري بينا شهر يجيب ف شهر
لا نوفي ليهم حقهم ولا حتى ربعو
سيرة نبينا العطرة .. جارية زي نهر
اللهم صلي وسلم وبارك على سيدنا محمد وعلى آله وصحبه ومن سار بنهجه إلى يوم الدين

[هريدي يابووووي]

:cry: جميلة جدا يا روبي..
ماشاء الله جبتي خلاصة الدرس اللي قبله كمان
ربنا يكرمك و يعزك:flowers:

[رشا عبد الرازق]

يا بنت حوا

يا بنت حوا يا اللي حلمك جواكي لسه بترسميه
شوفي الطريق اللي عليه الطاهره مشيت هتلاقيه
سكة سلامة بادية صح
من غير بكا ونواح وجرح
يا بنت حوا الحب أكبر م اللي بندور عليه

الله عليها

الله عليها لما صانت غبته ولا يوم اشتكت
بالصبر ثبتت لما دوّر ع الحقيقة وثبّتت
خوفه اللي كان لا يحتمل
مديتلو ايدها بالأمل
آمنت ..وكانت هيه عزمه والناس بقسوه بتعاديه

شفتي الوفا

شفتي الوفا لما بكا ع العقد محلا دمعتو
منسيش حبيبتو اللي حبت واللي شالتو في محنتو
عرفت تخلد جوا نفسو
كانت صديقتو وهيه نفسو
غرست اساس الجنة فوق الارض لجل ما تعلا بيه

يا بنت حوا

يا بنت حوا نفسي أبدأ تيجي نبدا كلنا
نحلم بشركه لما تيجي تبقا خطوه في صفنا
نزرع في غرسه تكون دليل
علشان ما يصحى بايدنا جيل
نحلم نكون زي الخديجه الطاهره قبل ما نبدتيه

[محمد فارس]

شفت ياعم هريدى

الحاجات الحلوة تتوالى00
بعد ان امطرتنا سليبل بوابل من الكلام الجميل0
جاءت روبى وتفاعلت مع الموضوع وبكلام جميل ايضا0
حاجة تفرّح القلب 00
وهذا التفاعل ينفى تماما مايحلو للبعض ان يردده من ان الشعراء يكلمون انفسهم0

تحية للأخت سلسبيل
وتحية للأخت روبى
وبرافو بجد000وتستحقون التقدير

[هريدي يابووووي]

نسيت رشا ياأستاذنا:55:
ماشاء الله أبدعتي يا رشا والله:tu:
ماتتخيلوش فرحتي بيكم قد ايه:clap:

[محمد فارس]

ويتوالى التفاعل الجميل
وهذه المرة جاءنا من الاخت رشا00
وكم كان تفاعلها جميلا كعادتها 00

000
مش ملاحظ حاجة ياهريدى باشا

التفاعل كله الى الان انثوى0
ماهو السر؟؟

[هريدي يابووووي]

هممممم:-"
هو يا إما لأن الرجالة مش مهتمين بالموضوع:hot:
أو لأن الموضوع عن السيدة خديجةB)
أو لأن زبونات القهوة سباقين بالخير دايما:tu:

[هريدي يابووووي]

نسيت حاجة...
ممكن لأن رجالة القهوة مستنيين الطلق الصناعي:brb:

[محمد فارس]

منستش رشا ياباشا
وتوقيت كتابة ردى هو نفس توقيتك00
شفت ازاى بقى


اما السبب فأنا برجح السبب التانى من التلاتة 00ومستبعدش موضوع الطلق الصناعى0

[روبى 2]

جميلة جدا يا روبي..
ماشاء الله جبتي خلاصة الدرس اللي قبله كمان
ربنا يكرمك و يعزك

والله يابوص كتر خيرك انت انك اديتني شرف الكلام عن خير الأنام (صلى الله عليه وسلم) وأطهر نساء العالمين (رضي الله عنها)

ربنا يكرمك وينور دربك :flowers::flowers:

[هدايه]

فكرة ذكية من بوص حقيقى شدتنا كلنا الى ركن النور


تقديرى لشخصك الثرى اخى هريدى
ولما الحق ادخل سباق الحب والمشاعر الخالصة لوجه الله
واعذرونى هيه حاجة صغيرة لكن كتبتها حالا دلوقت اول ماقريت الموضوع لكن فيه احساسى كله


قلادة خديجة (رضى الله عنها وارضاها)


لما حضنها بحب فى كفه

سال الدمع غصبن عنه

حس ان خديجة حبيبته

ست الخلق

لسه دماها بتجرى فى دمه

ولسه هواها نسيم بيشمه

وراح يتذكر تاريخه معاها 00

وازاى ضحت
وازاى تعبت

وازاى سهرت
دايما جنبه
ام بتحمى

وصدر يضمه

راح يتذكر يوم الوحى

لما اهتز

وهدت روعه

ورفعت عنه شدة وغُمة

يوم لقانا 00هيبقى قريب ولا بعيد00
مستنى وبراقب وقته

واجى نعيد الحب الاول

فى زهر ونهر 0000
وقصر00فى جنة




صلى الله عليه وسلم
ورضى الله عنها وارضاها


الامضاء

سيل من دمع

ودى مقدمة ولسه باقى الحب

جزاك الله خيرا اخى الكريم

[روبى 2]

أستاذي الفاضل

هراس

أشكرك على التقدير :flowers:

وبارك الله فيكما :flowers:

[جهـــJeHaDـــاد]

كاتب الرسالة الأصلية : روبى 2


شفتو الوفاء لزوجة ماتت من سنين
شفتو الدموع !! نزلت غزيرة من العينين
شفتو اما ذكرى ف قلبو تفضل بالسنين
يبقى أكيد عرفنا طبعا تبقى مين




انا عيوني دمعت ياروبي cry:

بارك الله فيكي يارب:flowers:

[آيات الجارحى1]

معلش يا جماعة لو سمحتولى عايزة اطرح فكرة معينة واحد من العمالقة بقى يكتبها ..
ان الكلام يبقى على لسان القلادة نفسها.. لو اتكلمت ووصفت اللحظة اللى لقت ايدين الرسول عليه الصلاة والسلام وهو بيلمسها... وانها عارفة الملمس ده.. وتبدأ تفتكر انها كانت حلية للسيدة خديجة.. وان الغريب انها كقلادة المفروض تبقى حلية وزين لمت ترتديها لكن اللى كان حاصل العكس ان عنق السيدة خديجة هو اللى كان بيزين القلادة.. وشرف تخليدها للابد بسرد فدية الاسرى اللى هتفضل طول العمر ليوم القيامة تتحكى وتوصف رقة مشاعر تخليها هى متبقاش عارفة تبكى وللا تفرح من التاثر..وان لها زمايل بنفس احاسيسها مش هى بس.. زى عنقود العنب اللى كان فى ايدين الرسول عليه الصلاة والسلام بعد ما رجع من الطائف واتخلدت ذكراه وغيرهم كتير ..
ها؟؟
ايه رايكم دام فضلكم

[هريدي يابووووي]

فكرة شديدة يا آيات:box:
بجد رائعة..

[هريدي يابووووي]

هداية..
جزاك الله كل خير..
أبدعتي والله..
الحتة دي شديدة
لسه دماها بتجرى فى دمه

ولسه هواها نسيم بيشمه

[آيات الجارحى1]

اقل حاجة عندنا يا باشا مش عايزين نعقدكوا بس:-":-"
ياريت بس اللى يكتبها يراعى الجوانب الرومانسية اوى اوى :sniff:

[الحســــام]

نسيت حاجة...
ممكن لأن رجالة القهوة مستنيين الطلق الصناعي:brb:

واخيرا وصلت الدكتورة آيات :doc:ومعاها الفكيرة الرائعه بتاعتها ...:idea:
واللى اتمنى انى اكون قدرت اكتبها بالشكل اللى يوصل الفكره للمتلقى B)...

خالص تحياتى للبوص هريدى :police:
وتحيه خاصه لايات...:tu:

حســــام.

[الحســــام]

هى دى نفس الايد عارفاها
هى اللمسه وحاسّه دفاها
لما الدمعه الغاليه دى سالت
والعين ما توقفش بكاها

كانت زينتى ان انا وياكى
شرفى وقيمتى عشان لامساكى
لما فارقتى الدنيا يا طاهره
كانت كل منايا ياصابرة
انى اكون ف الجنه معاكى

ورثت زينب كل خصالك
عرفت معنى الحب ف بيتك
كانت بتشوف صورتك فيّا
ضحّت بيا
وفدت زوجها
زى ف يوم ما نصرت حبيبك

وسط الزينه قعدت اتباهى
ويا مشاعر مش سايعاها
اضحك ولاّ ابكى م الفرحه
ودموعى انا لبيت لنداها

عمرى ما كنت اتصور مرة
لما خدونى فداء للاسرى
انى راح ارجع يوم للهادى
وافضل دايما قصه و ذكرى

[روبى 2]

عمرى ما كنت اتصور مرة
لما خدونى فداء للاسرى
انى راح ارجع يوم للهادى
وافضل دايما قصه و ذكرى

أكرمك الله وأعزك يا حسام :tu::tu:

والأخت آيات

ما أبدعها من فكرة :flowers::flowers:

[محمد فارس]

د0حســــــــــــــــــام
نورت

ماشاء الله عليك وعلى تفاعلك الجميل 00وبصراحة انت رفعت عنا الحرج0000المشاركات كانت نسائية وجيت انت رفعت راسنا0
تسلم وفى انتظار المزيد

[آيات الجارحى1]

انا كتبت كام جملة كده ومفيش مانع اكتبهم هم طبعا مش مستوى بس مجرد عايزة اكتبهم.. حد عنده مانع:bb:
احسب..:donatello


خرزة فى خرزة ولضمة خيط وكنت قلادة..
لا استنوا.. ده انا نوع خاص فوق العادة..
كل حلى الدنيا يزين الا انا بقى دورى بزيادة..
كنت ألالى واطير م الفرحة وعنق الطاهرة ليا وسادة..
ياما سمعت احلى تلاوة تسعد قلبى وانقى عبادة..
وفيوم راح الدفا من حباتى ومشاعرى حست ببلادة...
والحزن ساكن فى بريقى والعتمة بقى ليها سيادة...
بتزيد لا بتنقص فى ملامح حباتى واتمرمغ فيها كالعادة...








بس يلا كفاية عليكوا كده...
اصلى مش عارفة اكملها الصراحةيوه بقىيوه بقى
المهم انى طلعت الكبت اللى عندى..

[رشا عبد الرازق]

أخي هريدي
أخي هراس

جزاكما الله خيرا

والشرف لنا ان طفنا عبر اريج هذا الدرس لا تحرمنا من ذلك في كل درس اخي هريدي |أثابك الله

سلسبيل
روبي
هداية
حسام
آيات

رائع رائع رائع ما شاء الله

فكرة ولا أروع يا آيات

[هدايه]

حديث القلادة


أحيانى تانى لما لمسنى بايده الشريفة

وافتكرنى 00لما كانت000

بتزينى 00رقبة خديجة!

كان مكانى سر راحتى
كان سكينتى
وكان لى واحتى

فى رقبة اللى كانت ليك حبيبة

من يوم مافارقتنى0000

فارقتنى السكينة

كنت شاهدة
وكنت راقبة
لكل لمحة
وكنت حاسة بكل نبض القلب
لما كنت هناك قريبة
الف حب
والف سيرة عطرة للروح الصديقة

عطر ايدك(صلى الله عليه وسلم) أحيا قلبى
خلاه ينطق بالحقيقة




تحياتى لفكرتك الجميلة اختى ايات
ودامت لنا افكارك ليتدفق معها احساسنا

[آيات الجارحى1]

هو البيج بوص راح فين؟؟؟:blink::confused::crazyy:

[واحد بيحب مصر]

أكتب و بدّع يا قلم



اكتبْ و بدّعْ يا قلمْ = و اوعك تخورْ أو تنثلمْ
و اقطفْ حروفك من خدود ..= الشمس و اصعد للقمم
طول ما الحبيب المصطفى = نبعك ، هتفضل محترم
و لا يوم تحيد عن سكتكْ = أو تنحني ، أو تنهزم
***
اكتب حكايةْ قدوتي = رمز العلا ، نبعْ الكرم
طَهَ اللي بيه إتغيرت = سيرة وأخلاقْ الأمم
وإتنورت بعد الدجى = بعد التخبط والعدم
لما على درب الهدى = حطَّت قدم ، شالت قدم
***
إبدأ من البيت الوفي = بيت المبادي والقيَم
بيت النبي إللي اتبنى = ع . الحب شامخْ كالهرم
نوّر بأم المؤمنين .. = إللي هوَت أعلى القمم
واتجوزت اغنى البشرْ = رغم إنه كان يرعى الغنم
***
و ف. بيت خديجهْ أشرقت = شمس الهدى تمحي الظُّلَم
وقفت بجنب المصطفى = لما ارتفعْ للنورْ علم
ما كدَّبت ، ما شككت = يوم ،أو جنى منها الألم
كانت وفيّهْ بطبعها = و الصدق من أغلى الشيم
***
ماتت ومات عم النبي = والحزن في طه احتدم
يبكي إللي كان بيحبهم = مهو إنس من إحساس و دم
لكن على رغم الأسى = قام ينشر النور الأعم
نور الرسالهْ إللي محى = من قلب طه كل هم
***
إكتب أخيراً يا قلم = و اوعك تخورْ او تنثلم
قول عن قلادة أمنا = رمز الطهارهْ و الشمم
لما رآها المصطفى = يو م بدرْ غشّاه الندم
واتذكر القلب الوفي = إللي بفقدانهْ إتصدم

أخي الحبيب هريدي
أحسنت و بارك الله فيك على هذا الدرس المفيد جدا
و ثق أننا سنكون من متابعيه بصفة دائمة كلما سنحت الظروف

و هذه كانت مشاركتي في هذه الحلقة
أرجو أن تكون أعجبتكم و أعجبت الإخوان

وتقبلوا وافر تحياتي و حبي

د. جمال مرسي
( واحد بيحبكم و يحب مصر )

[رشا عبد الرازق]

دكتور جمال

انحني لقصيدتك

ما أروع ما نثرت


رائعه بل فوق الروعة يا أخي

ما شاء الله

سلمت وسلم قلمك

[محمد فارس]

د0 جمال مرسى
ماشاء الله

كلما قرأت لك جديدا يزداد انبهارى بما تكتب واهنئ نفسى بذلك 0
تملك موهبة يادكتور جمال لا يختلف اثنان على قيمتها0

دام تألقك
حفظكم الله

[هدايه]

اخى الكريم د0 جمال
عنما يتفق الاحساس والقلم يكون الابداع

صورة صداحة لزمن جميل


اسلوب راقى واداء ارقى

[واحد بيحب مصر]

الأخت الكريمة رشا
أشكرك جدا و أشكر أخي هريدي أن أتاح لنا الفرصة كي نعبر عن النزر
اليسير مما يدور في خلجات أنفسنا تجاه حبيبنا المصطفى
(صلى الله عليه و سلم )
تحياتي و دام قلمك المبدع
و أعتذر لك لتأخري في الرد على مشاركتك و ثصيدتك الرائعة التي أدرجتيها في صفحتي ( يا كايد الأزهار ياجوري يا مفتح )
احترامي
د. جمال

[واحد بيحب مصر]

الأخ الحبيب هراس
تحياتي القلبيه
هذا من بعض ما عندكم يا سيدي
و الحمد لله أن عرفتني على الناس الحلوين دول
والظاهر اني سأنساق طواعية للعامية بعد غياب و انقطاع
تحياتي

[واحد بيحب مصر]

الأخت الكريمة هدايه
شكرا لكلماتك الرائعة
و شكرا لهريدي على اتاحة الفرصة
تحياتي

[هريدي يابووووي]

ماشاء الله..
يا جماعة أبدعتم و أثلجتم صدري والله..
آيات.. ربنا يكرمك و يعزك..
هداية..
بارك الله فيكي:flowers:
دكتورنا الكبير قوي اللي بيحب مصر..
الكلام قليل الحقيقة .. و مايوفيكش قدرك أبدا..
نسأل الله انه يجعل كل كلمة في ميزان حسناتك:flowers:

[آيات الجارحى1]

كاتب الرسالة الأصلية : هريدى يابووووى
ماشاء الله..
يا جماعة أبدعتم و أثلجتم صدري والله..
آيات.. ربنا يكرمك و يعزك..
هداية..
بارك الله فيكي:flowers:
دكتورنا الكبير قوي اللي بيحب مصر..
الكلام قليل الحقيقة .. و مايوفيكش قدرك أبدا..
نسأل الله انه يجعل كل كلمة في ميزان حسناتك:flowers:
:sniff::sniff::sniff::sniff:
ايه ده يعنى هداية والدكتور جمال اخدوا ورد وتوتو لأ!!!!
يعنى هى جت عليا انا ومطرحتش يا كبيرنا:cry:
اه يا عينى عليك ياتوتو .. ياللى منزل حبرشنى الجديدة يا توتو:-"..
محدش يضرب خلاص مش هخرج عن الموضوع..
دكتور جمال كلماتك رائعة بجد والله ولقيت كمان اسمك منور منتدى عمرو خالد وحاجة جميلة والله وشرف لينا وجودك معانا ولكل اللى شكرونى على فكرتى انا اللى بشكركم على ابداعاتكم وكلماتكم الجميلة وجزاك الله خير يا بيج بوص على الثواب اللى اديتهولنا والورد اللى اديتهولهم:box:

[هريدي يابووووي]

:crazyy: يا ساتر يا رب..
صديق.. انت فيه منوفي؟B)
بقى باصلهم في الوردتين و ناسية المكنسة الكهربائية؟:crazyy:

انا قلت "باصالهم":blink:
بدري عليها مابدري عليها .. بدري عليييهااااااا:cry:
جت رجليها ماجت رجليها.. جت رجلييييييييييها :cry:

[hossamzzzz]

جزاكم الله خيرا