إلحقونى يا كتكوتات .. أنا فى ورطة ومحتاج لكل كتكوتة..!!

[محمود الأزهري]

السلام عليكم ورحمة اله وبركاته..
بصراحة مش عارف أبتدى منين..
بس على رأى الحاجة والدتى..:lolly:
اللى هتاخدك دى مسكينة وربنا يكون فى عونها..:confused:
والسر وراء هذه الإشفاقات الأمهاتية هو انى خيبة قوى ودلّوع على الآخر..:sniff:
مش دلّوع يعنى مايص .. :blink:حاش لله.. دول كانوا يطخّونى فى البلد..:chair:
لكن خيبة فى الحاجات اللى بنسميها شغل البيت..:dry:
طبعا حضارتكم مستغربين ..:blink:
ازاى راجل ..:thinky: وكما أزهرى..:thinky: والمصيبة إنه صعيدى من الصعيد الجوانى جدا جدا .......... جداً..:thinky: ووالدته بتتهكم عليه عشان مبيفهمش فى شغل البيت..:confused:
الحكاية وما فيها..
إنى أكبر إخواتى .. ومعنديش اخوات بنات .. :pray:
واحنا خمسة صبيان ..
يعنى كتّر خير الوالدة معانا ..:sniff:
أنا فاكر أيام ما كنت فى المرسة .. كنت ارمى الشنطة فى حته والقميص فى حتة والشوز فى حتة.. وطبعا إخواتى كانوا على نفس المنوال..:brb:
المهم انا باعتبارى الكبير كنت برفض توسلات الحاجة الوالدة ربنا يخليها بإنى أحط ايدى فى أى شئ فى البيت..:crazyy:
يعنى لا كباية شاى ممكن أغسلها ولا طبق ممكن أشطفه ولا كرسى ممكن أعدله.. ولاحتى أجيب لنفسى كباية ميه..:maaaad:
لكن اخواتى كانوا عشان مش هما الكبار بيرضخوا لأوامر ست الحجة.. :brb:
واتعلموا الحاجات الخفيفة زى الطبخ والكنس وترتيب البيت..:tu:
الصراحة لله كانوا أشطر منى فى الموضوع ده.. :sniff:
والحجة كانت بتضطر تغريهم بالفلوس والشيكولاته عشان يساعدوها..:flowers:
أما أنا مكانش عندى استعداد اتنازل عن رجولتى( عبيط) ..:maaaad:
المهم فضلت خيبة حتى فى فترة الجامعة.. وكنت عقابا لىّ انا اللى بشترى الخضار لزمايلى اللى كانوا بيعرفوا يطبخوا..:cry:
تخيلوا الذل واحنا خمسة فى اوضة واحدة كل واحد فيهم عليه الطبخ يوم.. وانا الوحيد اللى بنزل اشترى الخضار والعيش كل يوم..:cry:
المهم كل الحاجات اللى حكيتهالكم دى هى السبب فى الورطة اللى انا فيها دلوقتى..:blink::confused:
مفيش حد معايا فى البيت.. وجعااااااااااااااااان..:cry:
ومش عايز آكل نواشف من برّه.. بطنى خلاص اشتكت .. :sniff:
انا دلوقتى بسلق البطاطس ..:tu: لكن نفسى آكل رز..:sniff:
ومصمم آكل رز..:maaaad:
بس يا خسارة مش عارف ازاى اعمل رز..:cry:
ياريت يا كتكوتات تقولوا لأخوكم الشيخ زورو ازاى بيتعمل الرز ..:D بس مش الرز المفلفل .. عشان مبحبّوش..:crazyy:
انا عارف انكم دلوقتى بتغنّوا وتقولوا.. آدى جزاء اللى مايسمعشى كلمة ماما تقولها..:knight::chair:
لكن حسنة قليلة تمنع بلاوى كتيرة وهنيالك يا فاعل الخير والثواب..:cry:

[Heart of Oak]

و يا ترى سعادتك تحب الرز مسلوق و لا محمر معمر ؟؟ :doc:

[محمود الأزهري]

هئ هئ هئ ..
حتى أنت يا بروتس.. أقصد يا هارت..
انا بحب الرز اللى هو رزاية محمرة ورزاية بيضا.. شفت الدلع!!
وأشكرك على إحساسك.. وحمدالله على السلامة يا بو قريبو

[dr_sho]

عندى طريقة ممتازة للرز المعجن بيتاكل بالشوكة والسكينة

[dr_sho]

لأ وكمان ممكن تعمله كور وتدفها ترد لك
الرز المعجن المطاطى لوعايز الطريقة قللى

[محمود الأزهري]

ناقص كمان حد يفول اعمللك رز يابانى من اللى بياكلوه بالعصايتين!!:chair:
ليه كده يا دكتورة شو.. :crazyy:
والله انا فعلا عايز اتعلم الرز عشان آكله دلوقتى ..:eat::eat:

[ازهرى]

لا و ليه .. :blink:

ممكن سعادتك بعد ما يعجنه يضربه فى الخلاط و يعمله هريسة .. :doc:

[محمود الأزهري]

الله أكبر..
ها قد دخل الأزهر إلى المعترك..
اخيرا لقيت واحد أزهرى زى حلاتى..
وكمان تحت صورته نشيد انا بحبه قوى..
وكمان صعيدى..
وكمان من أسيوط اللى قضيت فيها احلى اربع سنين فى حياتى..
أحمدك يااااااااااا رب..
أزهرى..
نورت بيتك ومطبخك... ٌصدى ومطرحك..

[حورية الجنة]

احم احم انا بحكم تجاربى الفاشلة فى المطبخ :chef::blush):
حقولك على الطريقة
عشان تدعيلى اوعى تنسى
بداية كدة

انت تجيب الرز وتغسلة كويس
وبعدين تجيب حلة صغيرة على ادك
اه عتعمل مثلا مقدار كباية زر لحسن
تفهمنى خلط وتجيب الرز كلة الا فى البت
وبعدين تحتاس بس مفيش مشاكل ابقى اعزمنا علية :D
المهم
تضع كباية من الارز على كباية وربع ماء وتسيب الارز يشرب الماء
لحد متلاقيش ماية خالص
اة متنساش ترش حبة ملح فى الارز
ولو عندك لبن ممكن تحط حبة لبن على حبة ماية للتوفير


وبالهنا والشفا :tu::tu::eat:
ومتنساش تقولى عملت اية
لحسن دى اول مرة لية :brb::brb::brb:

[Heart of Oak]

نرجع بقى للهريس... قصدى الرز :drop2:


ممكن سعادتك بداية تقدح معلقتين سمنة فى الحلة على النار ...

بعد كده تجيب شوية رز صغيرين قيمة 4 ملاعق ( بعد غسيل الرز طبعاً و مش مشكلة التنقية احنا ناكل الزلط المغسول أصله مش معدى ) و نحطهم نحمرهم فى السمنة ...

بعد ما الرز يحمر نروح حاطين شوية مية ( لو الطبيخ قرديحى ) أو سليقة ( لو فى فرخة تايهة ضلت طريقها الى المطبخ ) ...

بعد كده نضيف باقى الرز ... و نغطى و نستنى لغاية ما يشرب ميته و يستوى .... و شكراً :doc:

[محمود الأزهري]

كاتب الرسالة الأصلية : حورية الجنة
احم احم انا بحكم تجاربى الفاشلة فى المطبخ :chef::blush):
حقولك على الطريقة
عشان تدعيلى اوعى تنسى
بداية كدة

انت تجيب الرز وتغسلة كويس
وبعدين تجيب حلة صغيرة على ادك
اه عتعمل مثلا مقدار كباية زر لحسن
تفهمنى خلط وتجيب الرز كلة الا فى البت
وبعدين تحتاس بس مفيش مشاكل ابقى اعزمنا علية :D
المهم
تضع كباية من الارز على كباية وربع ماء وتسيب الارز يشرب الماء
لحد متلاقيش ماية خالص
اة متنساش ترش حبة ملح فى الارز
ولو عندك لبن ممكن تحط حبة لبن على حبة ماية للتوفير


وبالهنا والشفا :tu::tu::eat:
ومتنساش تقولى عملت اية
لحسن دى اول مرة لية :brb::brb::brb:
يا حلاوة..!!
بس ان شاء الله ان شاء الله .ز حضرتك هتكونى أول واحدة تدوقى الرز ده .. وكمان أول واحدة يكون من نصيبك دعوتين .. ياإما حلوين.. ويا إما............

[حورية الجنة]

اخ :blink:

نست السمنة ........

[محمود الأزهري]

كاتب الرسالة الأصلية : Heart of Oak
نرجع بقى للهريس... قصدى الرز :drop2:


ممكن سعادتك بداية تقدح معلقتين سمنة فى الحلة على النار ...

بعد كده تجيب شوية رز صغيرين قيمة 4 ملاعق ( بعد غسيل الرز طبعاً و مش مشكلة التنقية احنا ناكل الزلط المغسول أصله مش معدى ) و نحطهم نحمرهم فى السمنة ...

بعد ما الرز يحمر نروح حاطين شوية مية ( لو الطبيخ قرديحى ) أو سليقة ( لو فى فرخة تايهة ضلت طريقها الى المطبخ ) ...

بعد كده نضيف باقى الرز ... و نغطى و نستنى لغاية ما يشرب ميته و يستوى .... و شكراً :doc:
يا طعامتك يا دكتور..
والله انت وحورية شكلكم ناويين تعملوا فيا حاجة..
انت متأكد ان طريقة الرز كده..
لحسن انا علىّ تار لولد ابو سباق وخايف يكونوا نبهوا عليك وخلوك تتبعهم..:brb::brb:

[Heart of Oak]

ما تقلقش ... بس متنساش الملح ... :hot:

[dr_sho]

حم احم انا بحكم تجاربى الفاشلة فى المطبخ
حقولك على الطريقة
عشان تدعيلى اوعى تنسى
بداية كدة

انت تجيب الرز وتغسلة كويس
وبعدين تجيب حلة صغيرة على ادك
اه عتعمل مثلا مقدار كباية زر لحسن
تفهمنى خلط وتجيب الرز كلة الا فى البت
وبعدين تحتاس بس مفيش مشاكل ابقى اعزمنا علية
المهم
تضع كباية من الارز على كباية وربع ماء وتسيب الارز يشرب الماء
لحد متلاقيش ماية خالص
اة متنساش ترش حبة ملح فى الارز
ولو عندك لبن ممكن تحط حبة لبن على حبة ماية للتوفير


وبالهنا والشفا
ومتنساش تقولى عملت اية
لحسن دى اول مرة لية


ايه ده ياداليا
إنتو بتعملوا الرز كدة
يعنى بتحطيه فى حلة مع المية يتشرب وما بتحطهوش على النار :D :brb:
بس أكيد يا داليا هيبقى حلو علشان إنتى اللى عملاه

شوف يا شيخ زورو
أنا خبرة بقى فى الرز
عملته 3 مرات :-"

المقادير:2كوب أرز ونصف
2 كوب ماء (نفس معيار الأرز)
1 ملعقة سمن بلدى
رشة ملح

الطريقة
حط كوبيتين المية فى الحلة وعليهم معلقة السمنة ورشة الملح وشوف الحدق عاجبك ولا محتاج تزود
حط المية على النار
وبعدين إغسل الرز كويس
عقبال ما تخلص غسيل تكون المية سخنت وبقت مية سخنة :rolleyes:
خد نصف كوباية من المية اللى فى الحلة وحطها على جنب
وبعدين حط الرز فى الحلة
استنى شوية كدة قدمها لغاية لما تلاقى الرز إتشرب
تقوم موطى النار
ومغطى الحلة وتتوكل على الله تعمل اى حاجة كدة لمدة ربع ساعة
وبعدين ترجع
قدامك إحتمالين
تلاقى الرز حلو ويتاكل اكل ساعتها إتوكل على الله وكله
يا إما تلاقيه ناشف كدة يعنى شكله بيقول إنه عايز مية تقوم مزود له مية من النصف كوباية اللى إنت شلتها الأول .
طيب ليه بقى الذكاء ده
تشيل المية وبعدين تحطها
علشان ماماتى دايما تقوللى المية الناقصة أحسن من المية الزيادة
النقص يتعوض والزيادة ما بينفعش معاها حاجة (شوفت بقى ماما بتعتى :tu:)
وبتقوللى برضه حبة حبة وتعرفى تظبطيه لوحدك

ملحوظة لو عايز رز بالشعرية
حمر الشعرية فى السمنة الأول وبعدين ضيف عليها المية والملح وإمشى نفس الخطوات عادى

ملحوظة لو إنت بقى أكيل وبتحب الحاجة تبقى دسمة (مع إن كدة غلط على المعدة ) ممكن تضيف قشطة اللبن على المية قبل ما تحط الرز (ما بحبش كدة أبدا ببقى حاسة إنى باكل رز بلبن )



ممكن سعادتك بداية تقدح معلقتين سمنة فى الحلة على النار ...

بعد كده تجيب شوية رز صغيرين قيمة 4 ملاعق ( بعد غسيل الرز طبعاً و مش مشكلة التنقية احنا ناكل الزلط المغسول أصله مش معدى ) و نحطهم نحمرهم فى السمنة ...

بعد ما الرز يحمر نروح حاطين شوية مية ( لو الطبيخ قرديحى ) أو سليقة ( لو فى فرخة تايهة ضلت طريقها الى المطبخ ) ...

بعد كده نضيف باقى الرز ... و نغطى و نستنى لغاية ما يشرب ميته و يستوى .... و شكراً


ايه ده ياهارت
اتعلمت الطريقة دى فى المشرحة :brb::brb:
ولا فى الفارما
عامل ايه فى الإمتحانات يابطل ؟

[محمود الأزهري]

أنا كنت حاسس من الأول إنها فرصة عيلة ابو سباق عشان يخلصوا منى...
بقى عايزنى أكل رز المشرحة يا هارت!!!:crazyy:
يخرب بيت الفارما اللى لحست عقلك يا بنى..:doctor:
أنا قلتلك كفاية مذاكرة ولا انت سرّحت عباس بحتة جبنة بعيد عنك..؟؟:brb:
طيب يا هارت..:sniff:
يا قناااااااوى.. :knight:
لما أقابلك.. عارف هعمل فيك ايه؟:thinky:
هعمللك رز زى اللى بتقول عليه واعزمك فى بيتنا..:brb:

ربنا يكرمك يا دكتورة شو على التعديل..:tu:
وعلى فكرة جانى مدد من الرسايل الخاصة.. بطريقة عمل الرز ..:clap::clap:



والمفاجأة الكبيرة بقى..:confused:
إنى قبل ما اكتب الموضوع اتصلت بابن عمتى(خبرة قديمة جدا فى جميع أنواع الرز) عشان يسهر معايا.. :mob:
وطبعا عشان استغله فى عمل الرز..:brb:
بس مكانش موجود.. عشان كده اضطريت اكتب المشاركة دى هنا واعمل الرز انا بنفسى..:cry:
وبعد ما جاتنى النفحة بتاعت الخاااااص.. فوجئت بابن عمتى الهمام بيخبط على الباب .. وبيقول انهم فى البيت أول ما وصل قالوله روح بات عند ابن خالك الغلبان..:bb:
وعمل الرز المعتبر..:eat:
وادينى باكل رز انما ايه...:blink:
بعيد عنكم.. :sniff:ادعولى مباتش فى المستشفى :doctor::pray::فتكوا بعا

[سارونا]

طب ادعي ما تخدش واحده زيي ... مالهاش في الطبيخ خالص :D

[SAFROOT]

انت تجيب الرز .. وترزه
وتجيب المعلقة .. وتمعلقها
وتجيب البق .. وتبقه

بالهنا والشفا :bb:

[Nile Hawk]

أخص أخص أخص

عيب عليك يا شيخنا بقه تعرف تصدر فتوى من غير ما تكون بطنك مليانة طب إزاى .......... على رأيى جدى الله يرحمه ((إفرض أتوجدت لوحدك))

عموماً سيبك من الرز أنا ممكن أقلك إزاى تعمل "أرم ريتر" دى طريقة ألمانى لعمل عيش بالسكر بس فى تحبيشات سرية فى السكة لو عايز تعرفها أبعت لك رسالة خاصة فيها طريقة التحضير عشان خاطر العيش و المواضيع اللى كلناها سوا فى القسم عندى.

و لا أقولك طريقة تعمل بيها كيكة بالشيكولاته و الزبيب أنا اللى مخترعها حتكلها من هنا و :crazyy: سلملى على المترو

[SAD GIRL]

2كوب أرز ونصف
ليه بس كده يا دكتورة شو ؟؟:D
ده كتير خالص 2 ونص
انا أتوقع كوب واحد او كوب وربع كفاية عليه

شوف يا شيخنا زورو انا عندي طريقة رز متعلماها من الوالدة ،، بس بلاش أقلك عليها علشان انت جاتلك وصفات أنواع وأشكال ابقى جربهم كلهم وشوف :D


بس انت بتقول :
واتعلموا الحاجات الخفيفة زى الطبخ والكنس وترتيب البيت..:tu:
هو الطبخ خفيف كده ؟؟ :confused:

[محمود الأزهري]

حبيت أخضّكم بس..:brb: :brb:

وشاكر لكل من ساهم فى إثراء الموضوع .. :clap:
واحب ابشركم.. إنى بكده ناوى اعمل مطعم للرز وبس..:lolly:
انا تقريبا عرفت كل طرق الرز اللى فى العالم..:brb:


نايل هوك...:confused:
بقى انا بتاع كيك .. شكلك مجعتش قبل كده ولا معيز بطنك مَأْمَئِت..:knight:


انا لقيت الموضوع ظريف شوية (بمداخلاتكم طبعا).. قلت أنشطه..:clap:

مع التقدم بجزيل الشكر لأم عبد الله اللى وافتنى بطريقة عمل الرز :flowers: فى رسالة خاصة بعيدا عن عيون اولاد أبو سباق اللى عايزين يخلصوا على..:viking: :viking: :viking: :viking: :viking: :viking: :viking:

[صديقه مخلصه]

بسم الله الرحمن الرحيم
طبعا انا جيت خلاص بعد ما فات الاوان وكان نفسى جدا جدا انى اقولك اى طريقه :cry: :cry: لكن لاقيت ان كل الاخوه والاخوات قالولك كل الطرق الصح والغلط وربنا يقويك بس لو احتست ممكن تبعتلى ابعتلك ....................
مكان مطعم بيعمل احلى طواجن رز من اللى وصت عليها الحاجه الوالده
والسلام عليكم:clap::clap:

[mody30]

يا شيخ زورو انت ممكن تنزل تروح لاى محل كشرى وتقوله ادينى علبة رز فقط
وده اسلم حل

[زهرة مصر]

ياازهرى قلبى معاك نقول بالهنا والشفا :)ولانيجى نزورك ومعانا كيلو برتقال :doctor:. مش حااكلك غير ان ده جزاة اللى مايسمعش نصايح ماما وهو صغير:انجغة:اما لو منط مافيش حوجة لدول كلهم عليك وعلى كتاب ابلة نظيرة صفحة ( الشوربة ) سورى اقصد الرز. لو لسة عايش سمعنا صوتك:brb:

[محمود الأزهري]

صديقة مخلصة..
ولا يهمك..:)
الجماعة قاموا بالواجب وزيادة.. :lolly:
انا حاس انى لو طاوعتهم كانت مصارينى اتخانقت معايا واعلنت اضراب..:crazyy:



شودى 30

يا عم كشرى مين.:واه يابوي
الرز البيتى لا يعلى عليه .ز خاصة رزاية حمرا ورزاية بيضا .. :brb:
بس انا دلوقتى بقول يا ريتنى كنت جبت رز من اى محل كشرى..:cry:


زهرة مصر..

على رأيك..:thinky:
آدى جزات اللى ميسمعشى كلمة ماما تقولها..:cry:

[زاجل]

دلوقتي زمانك شبعت من كل الوصفات
بصراحه انا مليش في الطبخ ومره ماما قالتلي انتي هتعملي الرز:blink::واه يابوي و كنا في رمضان وكان ابن عمي عندنا:dry: وسبحان الله اذا بالرز الي اول مره اعمله في حياتي يطلع كتله واحده جامده لا حراك فيها :crazyy:حتى ما بتنزلش في المعلقه وبالطبع حطيته على السفره:surrender ده في رمضان يعني الناس جعانين :hot:وفي النهايه ابن عمي قالي منك لله ياشيخه:chair:وانا قعدت اضحك عليه قال يعني عزمينه على الفطور :brb:

[رشا عبد الرازق]

آه يا شيخ زورو:brb:

من زمان مضحكتش كده :brb:

هقولك ايه

كان نفسي تمشي ورا داليا اللي نسيت السمنه واتفرج عليك بعدها :doctor:


هارت انا بعمل الرز زيك:clap:


يا شو الدقه دي هتوديكي وتودي اسم النبي حارسه وصاينه فين قوليلي
يا بنتي القصه مش مستاهله ده كله

بس سيبك المتميز متميز حتى في الرز:D





بالهنا على قلبك يا شيخ زورو ^_^

كل ده عشان حلة رز معملتهاش بنفسك في الاخر :crazyy:


امال لو حلة محشي كان هريدي لغى عضوية احفادنا قبل ما حضرتك تتعشى


ربنا يعينها بجد :lolly:



عشان بس تعرفوا قيمتنا :dry:

[محمـد حمـوده]

الله يسامحك يا شيخ زورو ... هو الرز لازم ( يتعمل ) !!!!
قايم الدنيا ومقعدها .. ومشغل ستات القهوه ورجالتها عشان شوية رز
شوف ياسيدى ... المسأله بسيطه جدا.. احكيلك حكايتى مع الرز ...
انا فى فتره كنت مشترك فى السكن مع زميل فى العمل ( فى الرياض ) .. وكان هو بينام بدرى .. وانا باسهر مع ا صدقاء فى الخارج.. وفى ليله عدت كعادتى وكان نائما .. وكنت
جاعااااان... لقيت طبق رز على ترابيزة المطبخ ..فتحت علبة خضارجاهز .. حطيتها ع الرز
... هممممممم.. ومسكت جريده لاتصفحها كعادتى السيئه على الاكل.. وشبعت وحمدت الله
ونمت....
صحينا الصبح .. لقيته بيقولى : محمد... هو انت سويت الرز بالليل !!!!!!!!!!!:confused:
طبعا انا كنت واقع على الارض .. من الضحك على خيبتى القويه ........ اتارى صاحبنا
كان غاسل الرز وكسل يعمله .. ونام ... وانا اكلته نى ...!!!!!!
عادى... ايه المشكله.. ولسه عايش
ياعزيزى.. ليس بالرز وحده يحيى الانسان ... المهم الملوخيه...:nanana:

[أم أحمد]

عقبال ما تخلص غسيل تكون المية سخنت وبقت مية سخنة

يعني الماية لما تسخن تبقى ماية سخنة:واه يابوي


ما علينا:D

بس قوليلي يا دوك:thinky:

كوبايتين ونص ليه .. ده كله نفر واحد :thinky::thinky:

برضه ما علينا:D

كملوا .. كملوا .. ومنكم نستفيد يا جماعة:closeeye:

أخبار الرز ايه معاك يا زورو؟؟:D

[صعيدي جداً]

أنا متابع الموضوع من الأول
:blink::blink:

الشيخ زورو

إنت كنت طالب في اسيوط ؟؟؟

متأكد؟؟؟

أنا عارف انك كنت تنزل تجيب الطلبات
:thinky::thinky:

طيب لما كانوا أصحابك ينزلوا أجازه كنت بتقضيها شبراوي وكوك ويندو وباتسيا ولا ايه؟


أنا ليا 8 سنين في غربه متواصله من اسيوط للقاهره :crazyy:

وتعلمت الحمد لله الطبيخ وبقيت طباخ بريمو مع إن كل أكلي جاهز
:bb::bb::bb::bb:

يعني الأكل اللي بعمله أكيد بيكون مصيره سلة الزباله
:doc::doc::doc::doc:


عقبال ما تتعلم زيي
:brb::brb:

[أم أحمد]

فكرتوني بأاول مرة أعمل فيها رز في حياتي:blush):

طلع النص اللي فوق مستوي و النص اللي تحت لا .. لحد النهاردة مش عارفة ليه:huh:

[يابوي]

فكرتني ياعم


بموقف مرة حصل معاي


هو انا صحيح بنت بس صفر على الشمال في المطبخ


معرفشي اي حاجة


في يوم من الايام امي كانت في المستشفى مع وحدة قريبتنا


واخواني وبابا كانوا عايزين يتسحرو

فقولت وبكل فخر انا الي حطبخ لكم اليوم


فقالوا طب اعملي لنا رزا ابيض واي حاجة معها

والله دخلت المطبخ وحست

وانا افكر ازاي اعمل رزا أبيض

فتصلت فوراً بجارتنا

وطلبت منها طريقة عمل الرزا الابيض

والحمد لله نجحت في عمل الرزا الابيض


بست للاسف