بتـــــاع اللبــــــــــــــــــان

[العائد-أبوسهيله]

كنت فى ليله رأس السنه فى معديه بين بور فؤادو بورسعيد وكانت ليله شديده البرد بكيت فيها على الطفل المكوم على أحد الكراسى محتضنا علبه اللبان التى هى رأس مـاله بل وحياته بالكامل......
********************************
ضـرب الجـرس... والــحرس أنـــدارو خلــفِن در
وعـــام قـــديم أنـــقضى
وعـــــام جــديــــــد بيمر
والمــــر يـــزداد مــرار والحــر مـا هـش حــر
تعـظيم سـلام للالم مـ عـدش شـىء بيـسر
العتـمه ليلـيه....واليـله شـتويه...وانا بين شطـوط المـلل راكـب معديـه
اللحـظه مـش هـيه... اللحـظه لحظـه سـقوط ليـكى يابشـريه
كان اللـى كان أنسـان ..أسـنانه لبـنيه...القـامه طـول شبـرين..والبشـره بنـيه
وكان شـقاء الطـفوله فـ اللـوحه خلـفيه..
أنـا بتــاع اللبـان فشـر حـلاوه زمــان ....بيبدد الاحـزان ويـجدد النيه
يافرخ بنيه ... قلبــى عليك يابنـي يادمعـه فـ عنـيه
البـرد فـاق طوبـه
والعركـه منصـوبه
بـين الـهوا والمـوج
الـبحه منهيه
أنـا بتـاع اللبـان
أنا اللى محـتاج حنـان
حـبه لبـن دافـيه
هدمـه مغطـيه
ياناس يامصريه
أنا شهيد الحنان
مـقتول
بـدون
ديــــــــــــــــــــــه....

[محمد فارس]

فى معديه بين بور فؤادو بورسعيد
بقى ياراجل تروح ولا تقلشى00
هو ده الاتفاق؟؟
طيب00انا بروح حته تانيه ومش حقولك0
لكن تعالى قولى
انا اول مرة اعرف ان البرد بيولد جَمال
ابوسهيلة00
مااجملك فيما كتبت

[رنـranimـيم]

أستاذى العائد ابو سهيله ...

أبكيتنى ...جريت دموعى لما قريت وصفك لانهيار اللى فى يوم قالوا عليها اننا كلنا بنشترك فيها ...وسموها على اسمنا قال ايه انسانيه ...شفت الولد وكانه قدام عينى... شفته تمام زى انت ماوصفته قدرت تخلينى اشوفه بين سطورك وابكى عليه واتصوره بكل دقة وصفك ...حتى لون هدومه وشكلها شفته ..ولمحت كمان رعشته وحسيت انه جعان ...مديت اديه اغطى جسمه المتكوم لقيتنى بامد فى الهوا ايديه ... ..ياترى حنقول لروحنا ايه لما نتسال فى يوم عنه ونتحاسب على محروم عاش فى يوم بينا
شكرا استاذ عائد ...الابداع مش جديد عليك

رنيـــــم

[روبى 2]

ياعم أبو سهيلة

إيه الإبداع ده

والله من أروع ما رأيت ومن أمتع ما كتبت يا استاذي

تعـظيم سـلام للالم مـ عـدش شـىء بيـسر
العتـمه ليلـيه....واليـله شـتويه...وانا بين شطـوط المـلل راكـب معديـه

منتهى الدقة في تصوير الحالة المنيلة

جبت منين بين شطوط الملل دي ... الله الله

البـرد فـاق طوبـه
والعركـه منصـوبه
بـين الـهوا والمـوج
الـبحه منهيه
أنـا بتـاع اللبـان
أنا اللى محـتاج حنـان
حـبه لبـن دافـيه
هدمـه مغطـيه
ياناس يامصريه
أنا شهيد الحنان
مـقتول
بـدون
ديــــــــــــــــــــــه....


حزن السنة اللي مضت
غيم على ديّا
والدمعة لم تنمسح
والضحكة منهية
بتقول بتاع اللبان ... مقتول مالوش دية !!
احنا كمان في الضحك
ماعادلناش غيّة
كبدي عليك يا ولد
لَطَشُه الهوا في أمشير
لا كانلو حيطة سند
ولا مرة كانلو كبير
كبيرو حمل تقيل
وسَنَده حيط مايل
ياللي ناديتو على .. حرية الانسان
شوفو حياة الولد
وادّولو حريـــــــــــــة

ويسلم لسانك يا استاذنا :flowers:

[elshimi]

تعظيم سلام للالم
تعظيم سلام للحظتك الحلوه اللى عليت لفوق قوى
اللبان رمز الستر والغطا
وحلم الدفا فى ليالى طوبه
بس وجهه نظرى انك مكنتش شرحت فى الاول قصتك
وكنت سبتنا للشعر نواجهه بدون معلومه مسبقه
يمكن عشان مساحه الجدل فى العمل الفنى تتوجد
والخيال ميتقفلش عل سقف الحروف المكتوبه
عشان نطير معاك لاكتر من عالم
على اى حال
عصرتنا معاك حزن
بنشكرك جميعا

[أيمن عماره]

ياعم أبوسهيله

بياع اللبان لن يكون المشهد الأخير الذى سيعبر عن الألم فى بورسعيد
بورسعيد مدينة الأزمات بحق ... بدايه من الحروب المتتابعه ونهاية بقرار الغاء المنطقه الحره ...

حزين على الاوضاع اللى بشوفها واللى رسمتها فى قصيدتك المبهره
فانت بحق من أعمدة المنتدى الرئيسيه فى الشعر
تسلم إيدك وخد دى :flowers: ودى لبتاع اللبان :closeeye:

[العائد-أبوسهيله]

الاحبه هراس/
طاووس/
رنيم/
روبى/
الشيمى/
مقهور
أشكركم من القلب وأعتذر عن الافاضه فى التعليق لضيق الوقت