شروط الحصول علي الجنسية المصرية

[مروه المصرية]

السلام عليكم و رحمة الله
قرأت في جرنال الجمعه اللي فات عن الشروط اللي الدوله تفضلت و وضعتها علشان تقدر أي أم مصرية متزوجه من أجنبي تعطي الجنسية المصرية لأولادها و طبعا أندهشت جدا لما قرأت الشروط
الشروط كالتالي:
1-لابد أن يكون الابن قد عاش في مصر 10 سنين متصله
2- لابد أن يكون قد تعدي الواحد و العشرين سنه
3-لا يعاني من أي إعاقة جسدية أو ذهنية

يعني بالله عليكم هي دي شروط تتقبل :أخخخ:
و بعدان يعني أيه يكون قد تعدي الواحد و العشرين سنه قننبلة
يعني معني كده أن الأم هتكون صرفت عليه دم قلبها في تعليمه كأجنبي و بعد ما يتصرف عليه و يخلص تعليم تبقي تديله الدوله الجنسية
و كمان يعني أيه لازم يكون معافي تماما !!!!! قننبلة
يعني لو فيه أي إعاقه نرميه و نتجاهله و منرضاش نعترف بيه كمصري
أنا بصراحه مش عرفه ليه الدول العربيه بتصر أنها تحصر زواج السيدات من أبن بلدها فقط يعني لو تزوجت أجنبي يبقي تعد بقي من المغضوب عليهم و مترضاش الدوله تدي أولادها الجنسية
أنا شايفه أن في القوانين دي ظلم كبير جدا للمرأه العربيه , لآن ربنا أحل زواج المرأة المسلمة من أي رجل مسلم و مفرضش قانون يقول أنه لازم تتزوج رجل مسلم من أبناء بلدها فقط و إلا يعامل أولادها معاملة الأجانب و لا يجوز أعتبرهم من أبناء البلد

أنا شايفه كمان أن عدم إعطاء الجنسية للأبناء ده ممكن ينتج عنه كره الأبناء دي للبلد اللي بتعاملهم كأجانب و هي أمهم بنت البلد
عرفين رفض أعطاء الجنسية للأبناء الأجانب ده بيفكرني بأيام الجاهليه اللي كانت فيها أبناء كل قبيلة لا يجوز لهم أن يتزوجوا من خارجها .
أنا عرضت رأيي بكل صراحه و أحب أعرف رأيكم أيه في الموضوع ده سواء كنتم متفقين معايا في الرأي أو مختلفين .
أختكم مروة

[أبو معاذ]

ورردة ورردة ورردة ورردةسلام الله عليكم

بالنسبة للشرط الاول
بصراحة انا شايف انه معقول
ليه؟
عشان الولد على الاقل يكون حس بانتماء للبدل دي وعاش فيها
وبعدين حطي في اعتبارك ان الاجنبي ده مش لازم يكون عربي
يعني مش اي حد اديله الحنسيه كده على طول


تاني شرط افتكر ده عشان يكون الولد بلغ سن الرشد ويقدر ياخد قرار انه ياخد الجنسية دي ولا مايخدهاش
وده حق من حقوق الولد
لان ازدواج الجنسيه-على حد علمي-ممكن يمنعه انه يخش منصب سياسي معين في بلد والده

الشرط التالت
هو انا قابله مع بعض التحفظ

بالنسبه لرايك الخاص
حضرتك شايفه ان الام لازم تدي جنسيتها لابنها بسهوله مطلقه
اولا موضوع الجنسية الاصل فيه للاب

ثانيا
الجنسيه ماهياش حاجه صغيره عشان ماتتحددش

ثالثا الولد مطلوب منه يعيش في مصر عشر سنين مش معني كده انه لازم يكون قضي سنوات عمره في مصر على انه اجنبي

ممكن جدا يتعلم كمواطن عادي في بلد والده

رابعا
انطلاقا من وجهه نظرك ممكن الاب المسلم اللي اتجوز من امراة مسيحيه ان مراته تدي دينها كمان للولد


نقطه اخيرة
الخلاف في الراي لا يفسد للود قضيه
ورردة ورردة

[مروه المصرية]

شكرا لمشركتك و إبداء رأيك
و طبعا أنا معاك في أن الأختلاف في الرأي لا يفسد للود قضيه
بس أسمحلي أنا مش فهمه وجهة نظرك في النقطة الرابعة رابعا
انطلاقا من وجهه نظرك ممكن الاب المسلم اللي اتجوز من امراة مسيحيه ان مراته تدي دينها كمان للولد

أصل أنا مجبتش سيرت الرجل المسلم خالص أو الديانة المسيحية اللي هتنتقل للأبناء

و كمان بالنسبة لتعليقك علي تاني شرط:
لان ازدواج الجنسيه-على حد علمي-ممكن يمنعه انه يخش منصب سياسي معين في بلد والده

أنا عرفه أن أزدواج الجنسية يمنع من تقلد منصب سياسي و كمان ممكن يمنعه من دخول الجيش أصلا بس طب مهو في كتير أوي من الرجالة المصريين متزوجين من أجنبيات و أولادهم حاملين الجنسيتين
يعني مجتش علي أولاد السيدات المصريات المتزوجات من أجانب و ميدهمش الجنسية
هتقولي حضرتك أصل
موضوع الجنسية الاصل فيه للاب
هقولك يعني المرأة العربية مش معترف بيها بأه !!!!!!!!!!

و كمان معلش ليه تعليق بسيط علي قولك
ممكن جدا يتعلم كمواطن عادي في بلد والده
لو كان ده متوفر للسيدات اللي بتطالب بالحصول علي الجنسية لآولادها , صدقني مكنوش طالبوا أصلا بالحصول علي الجنسية المصرية
عارف ليه
لآن معظم السيدات اللي بتطالب بالحصول علي الجنسية مطلقات من أجانب و للأسف عندهم أطفال منهم مضطرين يربوهم في مصر.

علي فكره أنا نسيت أوضح في موضوعي أني ضد زواج أي إمرأة مصرية من أجنبي أصلا
ده علشان محدش يفهمني غلط يوه بقى

[نفرتارى]

مش كفايه الى الواحد بيشوفه كل يوم؟؟ هما بس عاوزين يرتقوا شويه بمتوسط الذكاء00

لا شويه جد00انا متهيئلى الشروط ديه للى خلاص كبروا و اتولدوا قبل تطبيق القانون لكن الى هيتولدوا هياخدوا الجنسيه تلقائيا00يا ريت حد من بتوع القانون يفتينا فى النقطه ديه00

لان لو ع الكل يبقى فايدته فعلا؟؟


حد يفتينا و لما ييجى الخبر اليقين ارجع و ادلو بدلوى00 حنا للسيف

[usreh]

السلام عليكم ورحمه الله وبركاته


فى البدايه اشكرك اختى مروة على طرح هذا الموضوع الهام

ولكننى اريد ان اوجهه نظركم الى نقطه هامه جدا ان معظم السيدات (ان لم يكن كلهم) اللاتى تزوجن من اجنبى (المقصود به غير المصرى) واللاتى يبحثن عن جنسيه مصريه لاولادهم هم فى الغالب مطلقات او ارامل

وايضا منهم من لا توجد لديها مصدر دخل ثابت واحيانا كثيره تكون غير متعلمه او لا تملك القدر الكافى من التعليم الذى يؤهلها للحصول على عمل


الا تعرفون ذلك السمسار الذى ياتى بالعجوز الذى قد اتى لمصر لكى يتزوج من فتاه صغيره فى السن
او ذلك الرجل الغنى المتزوج من زوجتين او ثلاثه ويريد من تخدمهم ويختار فتاه صغيره من عائله فقيره جدااااااااااا




لنفترض مثلا ان هذا الطفل ظل حتى سن ال 21 سنه دون الجنسيه مصريه وهو لا يعرف بلد غيرها ماذا سيكون رد فعله تجاه تلك البلد التى عاش فيها غريب (ابن الاجنبى يقوم كل سنه تقريبا بعمل اقامه ولكننى لست متاكده من تلك النقطه مائه فى المائه)

كيف يشعر بالانتماء لها وهو قد لا يستطيع الذهاب الى المدرسه وهو ابسط حقوقه الا وهو التعليم (ملحوظه ابن الاجنبى يعامل معامله خاصه من ناحيه المصاريف والمدارس )



هناك الكثير من الجوانب فى هذا الموضوع وليس فقط ان صدور هذا القرار للمساوة بين الرجل والمراءه

ولكنه خطوه نحو انصاف الكثير من الابناء

[وائل]

الموضوع فعلا شائك
أنا ضد ان الموضوع يكون بدون قيود

وضد أيضا الشروط والتمييز السافر بين الرجل والمرأة فى هذا الأمر

من الممكن أن يكون فيه فروق بسيطة

شرط الإقامة شرط وجيه
وأعتقد انه كافى جدا

[مروه المصرية]

أختي الغالية نفرتاري
أشكرك علي مرورك بموضوعي و مشاركتك فيه
بالنسبة للشروط اللي زكرتها للحصول علي الجنسية
هي موضوعه للمولودين و اللي لسه هيتولدو
مفيش فرق

[مروه المصرية]

أشكرك أنا أيضا أختي علي مشاركتك و ردك علي الموضوع
وبالنسبة لقولك
ولكننى اريد ان اوجهه نظركم الى نقطه هامه جدا ان معظم السيدات (ان لم يكن كلهم) اللاتى تزوجن من اجنبى (المقصود به غير المصرى) واللاتى يبحثن عن جنسيه مصريه لاولادهم هم فى الغالب مطلقات او ارامل

وايضا منهم من لا توجد لديها مصدر دخل ثابت واحيانا كثيره تكون غير متعلمه او لا تملك القدر الكافى من التعليم الذى يؤهلها للحصول على عمل

أن الخطأ هنا خطأ المصريات التي يوافقن علي هذه الزيجات طمعا في المال و لهذا لآبد أن يكون هناك توعية بخطرها
و في رأيي زواج أي رجل أو أمرأه مصرية من أجنبي أو أجنبيه ينتج عنه الكثير من المشاكل التي لا حصر لها و خاصة للسيدات

[محمود]

في امر مهم جدا لم يتطرق اليه احد

وهو المصرية المتزوجة من فلسطيني اذ

ان كل ما سبق ينطبق على الجميع الا على

من تزوجت من فلسطيني..فابناؤها لا يحصلون

على الجنسية المصرية ...

اعرف رجلا فلسطينيا كبيرا في السن متزوج من مصرية و له

منها اولاد كثر و كان يتعب كثيرا كل مرة يقوم باي عمل

اداري حكومي لاولاده و لما سمع بهذا القرار صعق جدا

ولكن الحمدلله انه تقبلها بعد ذلك بصدر رحب..كانت حجة

القرار ان ذلك حفاظا على هوية الفلسطينين وكأن اي انسان

يحمل جوازين فهو معدوم الانتماء؟؟؟!!كتير جدا من البلاد العربية

اعطت جواز ولو مؤقت...ساعد جدا الفلسطينين في حياتهم و ابقى

في نفس الوقت على هويتهم الاصلية...مش عارف...بس حسيت ان

صورة التمييز كان ممكن تكون ارحم شوية من كدة...بس لعله خير..

[مروه المصرية]

أشكرك علي الرد
و لكني أريد تفسير لقولك
من الممكن أن يكون فيه فروق بسيطة
و شكرا

[مروه المصرية]

أشكرك جدا علي هذه الإضافه الرائعه
أنا فعلا مكنتش أعرف أن فيه الشرط ده
و في نفس الوقت أنا مش عرفه أيه الغرض منه
و أشمعني يعني الفلسطينيين؟

شرط غريب فعلا و مش عرفاله تفسير

[البحيري]

ياجماعة انا عندي رأي بسيط في الموضوع ده

لازم يكون هناك شروط للحصول على الجنسية وده شئ موجود في كل الدنيا .

لكن لازم يكون هناك حل للنساء اللاتي تركهن ازواجهن الاجانب و الغير قادرات على الصرف على أبناءهم في التعليم وكذلك اعفاءهم من نظام تجديد الاقامة كل ستة اشهر وجعل الاقامة مثل البطاقة والرقم القومي وبعد ذلك يتم تطبيق الشروط عند طلب الجنسية .

وذلك لأن المشكلة اساسا تكمن في

ان معظم السيدات (ان لم يكن كلهم) اللاتى تزوجن من اجنبى (المقصود به غير المصرى) واللاتى يبحثن عن جنسيه مصريه لاولادهم هم فى الغالب مطلقات او ارامل وايضا منهم من لا توجد لديها مصدر دخل ثابت واحيانا كثيره تكون غير متعلمه او لا تملك القدر الكافى من التعليم الذى يؤهلها للحصول على عمل

وايضا يوجد ابناء لا يعرفون الاب الاجنبي ولم يذهبوا الى بلده مسبقا ولا يعرفون غير مصر فقط وكذلك بعض المصريات لا يعرفن اي عنوان للزوج او عائلته ، فيجب ان يكون هناك حل منصف لهؤلاء مثل ما ذكرت من قبل .

[مروه المصرية]

: هيه:: هيه:: هيه:
لفض فوك بجد

[وائل]

أقصد ان فروق بسيطة بين الرجل والمرأة
قد تكون فى بعض الامور

مثلا فى الإرث
وفى الشهادة
وفى الإمامة

وهناك ايضا فروق فى الحقوق بالنسبة
لحق الحضانة

والقرابة من ناحية الأب يكون لها اولوية فى امور عن القرابة منا ناحية الأم
ومن هنا فصدت ان التمييز الرهيب بين ابناء المصرى المتزوج من اجنبية
وبين ابناء المصرية المتزوجة من اجنبى

غير مقبولة
أما ان كان هناك سبب وجيه لفروق بسيطة بينهما فى شروط اعطاء الجنسية فمن الممكن قبوله
ولكن لا يوجد فى ذهنى فكرة محددة عن امثلة لهذه الفروق

فقط اذا وجحد لسبب مقبول فأهلا به

اما ان نقول لا لأبناء المصريات فهذا غير مقبول ابدا

[sce37]

حسب اتفاقية حقوق الأنسان - مصر موقعة عليها و موافقة على ما جاء بها - من حق الأنسان الأرتحال و العيش و المواطنه لأى بلد يرى أن فرصته للحياه بها أفضل 0

الجنسية حق للأنسان بوجوده الفعلى و مشاركة المجتمع و حبه للوطن 0
حتى بدون جنسية الأم أو الأب 0

غايظانى حكاية أن يكون خالى من العيوب و العاهات - طب هات لى حد خالى من العاهات علشان نقيس عليه 0

على فكره - أزدواج الجنسيه - لا يمنع تقلد المناصب السياسية و لا التجند بالجيش - و بلاش نخوض كتير فى الموضوع ده لحسن كل الكبار معاهم جنسية تنفع وقت الزنقه 0

موضوع تانى غايظنى - المشكله طول عمرها موجوده - و لا حل لها - و السبب : يرى المشرع القانونى ألا يمنح الجنسية لأسباب يرتأيها - صراحة أنا لما سمعت جملته دى - قلت بسيطه - المشرع ده موظف - نرفده و نحل مشكلة الجنسيه -
لكن فجأه أصبح حل المشكله بسيط - الريس قرر يبقى قانون يمنح الجنسيه -
و للأسف لم تكن كلمته كافيه - بل لايزال القانون تحت المناقشه من أول و جديد
قد كده أحنا ناضجين و بنعرف نواجه مشاكلنا 0

أعتقد ان المرأه هى السبب الوحيد لمنح الجنسيه - لأن الأنتماء بيبدء من ثديها

[sce37]

بعض الأوضاع تحتاج توفيق سريع :
1- الجنسيات اللتى عاشت و عملت بمصر تحت الجنسية العثمانية و لا يوجد ما يمنع تجنسهم بالجنسية المصرية 0
2- جنسيات اللاجئين المتواجدين بأرض مصر لأجيال متعاقبة 0

3- أبناء المهاجرين العائدين للوطن الأصلى عوده نهائية 0

و بالنسبة لزواج المصرية من أجنبى - هذا الموضوع مش دايما تجارة بأعراض البنات الصغيرين - هناك زيجات تتم عبر الحدود - مثل أبناء النوبة - و بعض القبائل العربية فى السعودية - بعض العائلات الغزاوية - لذا ارجو الحرص فى عدم الأطلاق أن الأجنبى راجل خليجى جاى للمتعه و بعدين يطلق أو يختفى بدون ما يتعرف شئ عن أصله 0