يعنى ايه بورصة ؟ !! [الأرشيف]

خال / محمد

10-29-2008, 01:50 PM

متسألنيش ..

يعنى ايه بورصة !

و يعنى ايه انهيار مالى !

و يعنى ايه ( ضخ ) الأموال !

هى يعنى ماسورة مية ؟ !

و البنوك دى يعنى البلدية ؟ !

و البورصة دى يعنى مش فرصة ؟ !

باسمع كده فيها عن حاجات ..

أسهم كده و مش عارف سندات ..

و حاجة كده زى بيع القرض ..

و اعرف إن ناس جابتهم الأرض !

بص بقى /

أنا مالييش فى دا السؤال

ياعم سيبنى و خلينى فى حالى

دا بدل ما تسألنى عنى و عن عيالى ؟

و عايزين ايه منهم فى المدرسة ؟

الناظر عايز تبرعات

ههههههه صحيح ..

اللى اختشى .. مات

وعلبة طباشير عايزاها المُدَرِّسة

و عايزين ملخصات

و مجموعات و تقويات

دا غير الدروس الخصوصية

و أنا يادوب بحوش فى قسط الجمعية

و الشتا دخل ..

عايزين جزم و شرابات

و بنطلونات و بلوفرات

عايز تسألنى ؟

اسألنى يعنى ايه فقر

و يعنى ايه قهر

و يعنى ايه أول الشهر ..

و آخر الشهر

و يعنى ايه فاتورة

و يعنى ايه قسط

و يعنى ايه مقدم

و يعنى ايه زنقة

و يعنى ايه خنقة

و يعنى ايه سلف

و يعنى ايه طابور

و يعنى ايه قضيها

و يعنى ايه أجّـلها

و يعنى ايه صلـّحها

و يعنى ايه رقـّعها

و يعنى ايه مفيش

و يعنى ايه تحابيش

و يكفــّينا كام رغيف

و طعمه ايه الفول

لو عايز تسألنى .. اسألنى فى دول

طب تعرف انت يعنى ايه تعب ؟

و يعنى ايه شـقا ؟

و ايد متـشـققة ؟

بقوللك ايه .. كفاية بقى

فلسفة و أسألة مزوقة

أنا أصلى دماغى مش ناقصة

زهقــتنى بأسألتك ...

و اللى اسمها البورصة !!

:chains:

المصرى افندى

10-29-2008, 04:32 PM

الخال محمد

الشاعر الذى انتظر نصوصه طمعا منى فى الاستمتاع
وحبا لشخصه الكريم
وحبا فى المدرسة الشعرية التى ينتمى إليها

النص
تعبير عن قضية تؤرق الجميع
البعض منا فى وادى والاخرون فى وادى أخر
واتساع الفجوة بين الطبقات الاجتماعية
الفقير يزداد فقرا
والثرى يزداد ثراءا على حساب الفقير
( لقمة العيش ) أصبحت على قائمة الاولويات
صاغ الشاعر فكرته وقضيته ببراعة ليست جديدة عليه
حاكى الواقع بموضوعيه ... فتوحدنا مع النص

الخال محمد وحشتنى جدااااااااااااااااااااااااااا

ايمن عثمان
:rosy:

اغاريد

10-29-2008, 04:46 PM

ههههههههههه ههههههههههههههههه ههههههههههههه ههههههههههههه

تسمحلى اقولك ايه هيه البورصة بمفهوم بسيط

على غرار حملة " سهم فى الايد انت مالك ومستفيد "

البورصة ( زى السوق) مكان يجتمع فيه البائعين والمشترين بس البضائع المعروضة ( هى الاوراق المالية ) الاسهم والسندات

السهم :

صك ملكية ( جزء من رأسمال الشركة )
يحصل صاحبه على عائد ( ربح ) متغيير ( يعنى معدل الفائدة متغيير )
يعطى صاحبه حق التصويت فى مجلس الادارة

السند :

صك مديونية ( جزء من ديون الشركة ) يعنى انت مداين الشركة
يحصل صاحبة على دخل ثابت ( يعنى معدل الفائدة ثابت )

عشان تستثمر فى البورصة لازم تعرف شوية قواعد مبسطة هى :

" كيف تخطط للاستشمار "

الحد الادنى للاستثمار 5000ج
أعرف موقفك المالى الراهن معرفة جيدة
حدد الهدف طويل المدى الذى ترغب فى تحقيقة من الدخول فى البورصة
حدد حجم المخاطر التى يمكنك تحملها وعلى هذا الاساس يتحدد العائد المرجو من الاستثمار
استثمر من المال الفائض لديك عن حاجاتك الاساسية والتزاماتك المادية على المدى القصير
لا تضع راهنك على توع واحد من الاسهم
عليك ان تفهم وتمارس حقوقك كمستثمر
تسلح بالمعرفة فهى اداة النجاح فى الاستثمار ( معرفة التحليل المالى والاساسى والفنى )
لا تندفع فى سلوك القطيع الذى يسود السوق من حين لاخر
عليك بتنويع محفظة استثماراتك

محمود شلاطة

10-30-2008, 02:36 AM

رائع استاذى الفاضل قصيدة معبرة عن حال الشعب

لا فض فاك
ودمت متألقا

خال / محمد

10-30-2008, 04:18 PM

الخال محمد

الشاعر الذى انتظر نصوصه طمعا منى فى الاستمتاع
وحبا لشخصه الكريم
وحبا فى المدرسة الشعرية التى ينتمى إليها

النص
تعبير عن قضية تؤرق الجميع
البعض منا فى وادى والاخرون فى وادى أخر
واتساع الفجوة بين الطبقات الاجتماعية
الفقير يزداد فقرا
والثرى يزداد ثراءا على حساب الفقير
( لقمة العيش ) أصبحت على قائمة الاولويات
صاغ الشاعر فكرته وقضيته ببراعة ليست جديدة عليه
حاكى الواقع بموضوعيه ... فتوحدنا مع النص

الخال محمد وحشتنى جدااااااااااااااااااااااااااا

ايمن عثمان
:rosy:

أخى العزيز و أستاذنا / المصرى أفندى

ما أسعدنى الآن بردك الكريم مرتين ..

مرة شرفت فيها بكلماتك التى أتمنى أن أكون مستحقا لها من أخ عزيز و شاعر جميل مثلك

و مرة ..

أن كانت سببا فى أن ألقاك هنا ثانية ..

تطل علينا بشخصك الذى افتقدنا أنسه .. وحرفك الذى أوحشنا رونقه وبريقه

فوددت لو كنت أقبض على مفتاح القصيد منذ أمد حتى نسعد بطلتك علينا

غبتَ طويلاً أخى الكريم

و غاب رفاق كنا ننهل من عذب حروفهم

أفلا تعودوووووون ؟!!!

أنتم أوحشتمونا كثييييييييييييييييرا

:rosy:

خال / محمد

10-31-2008, 10:01 PM

ههههههههههه ههههههههههههههههه ههههههههههههه ههههههههههههه

" كيف تخطط للاستشمار "

:brb::brb:

لكن يا اغاريد صاحبنا لا يعرف كيف يخطط ( للاستمرار ) ؛

فكيف يخطط ( للاستثمار ) ؟! :vava:

مع كل ..

معلومات سهلة ومبسطة أشكرك عليها ..

و أشكرك على مداخلتك الكريمة :rosy:

خال / محمد

10-31-2008, 10:09 PM

رائع استاذى الفاضل قصيدة معبرة عن حال الشعب

لا فض فاك
ودمت متألقا

و كل الشكر لك أخى الكريم على كلماتك

شرفت بمرورك :rosy: