موقف غير حياتك

[عموره]

اكيد كل واحد فينا مر بتجربة او موقف معين غير حياته 180 درجة, موقف غير نظرته في حاجات كتيرة, كل واحد يحكي عن تجربته او موقف معين حصله او مر بيه وكان له تأثير كبير في حياته وغيرها.

ويله نشوف آرائكم ونحكي تجاربنا اكيد كل واحد فينا هيستفيد من تجربه التاني.............

[عموره]

على العموم بما أن لسه ماحدش بدأ واتكلم عن تجربته الشخصيه فهبدأ بنفسي

وهتكلم بصراحه
جت عليا فترة كده ماكنتش بصلي ولا بٌقرأ قرآن ولا تقريبا بعمل اي نوع من العبادات غير اني اصوم في رمضان واصلي مره وانسى عشرة, حياتي كانت كلها لهو وعبث وضياع في ضلال مبين, فعلا كانت حياة احتقرها كل ما افتكرها دلوقتي, بحس ان الشياطين كانت ملياها ومافهاش ذرة روحانيه او حاجه جميله, بس الحمد لله ماعملتش حاجه غلط في حياتي او كبيرة من الكبائر وكأن ربنا حماني طول الفتره دي علشان عارف اني هرجعله تاني واطلب منه المغفره والرحمة, في مره كنت مسافر من القاهرة للاسكندرية بالليل في ميكروباص لأن الوقت كان متأخر والقطار شطب, المهم واحنا طول الطريق كان السواق مشغل شريط دعاء ختم القرآن لقارئ اسمه (مشارى راشد) بيدعوا والناس بتبكي وراه بأسلوب خلا جسمي كله يرتجف وقشعريرة بارده تسري في أوصالي, ملأت الدموع عيني طول الطريق وحزنت على الايام الي فرضطها في حق ربنا وطاعته واني ماكنتش بداوم على الصلاة, رجعت البيت دخلت نمت على طول من التعب, وفي المنام حلمت بيوم القيامة وبأهواله تفصيليا, شوفت الصراط المستقيم وشوفت نار جهنم والعياذ بالله وشوفت الناس بتصرخ وهي بتتعذب بيها, والله يمكن نفس الصرخات الي في موضوع الاخ ايوري في قسم الحوار العام عن التسجيلات الي تدعي انها لاصوات جهنم.

رأيت والدتي في المنام تحاول ان تمسك يدي وتقولي يله يا عمرو تعالي عدي الصراط معايا, وانا خايف ومش عايز اعدي لأني عارف اني هسقط في نار جهنم بسبب تقصيري في حياتي, بعدها شوفت والدتي عدت الصراط المستقيم ووقفت تناديني وتقولي انا عديت يا عمرو يله تعالا ماتخفش وانا مش عايز اعدي لأني عارفه نهايتي هتكون فين

من هنا بدأت نقطة التحول في حياتي, قمت من النوم كأن راكبني الف عفريت, والحمد لله بقيت مواظب على الصلاه لا افوت فيها ركعه واحاول اني اعوض ما فاتني وادعو الله ان يتوب علي ويرحمني ويكفر عني سيئاتي, فعلا الحياة شكلها وطعمها اتغير تماما عن حياة اللهو الي كنت عايشها, اصبحت اجمل واروع بكتير جدا, بقيت مستمتع بحياتي لأبعد حد وبشوف كل شئ جميل فعلا, بعمل كل حاجه بكل اعتدال بدون ما اغضب ربنا وفي نفس الوقت مدي لربنا حقه في العبادة والطاعه والحمد لله مافيش أجمل من التقرب الى الله.

ده الموقف الي غير حياتي تماما وأحب اسمع مواقفكم انتوا كمان لأننا اكيد هنستفيد من تجارب بعض......



<!--EDIT|عموره|Jun 17 2002, 01:44 AM-->

[زنكلوني]

مرحبا اخ عموره
هذا موقف جميل والنتيجة اجمل .
على فكرة انت جريء لانك كتبت تجربتك وقاتها بصراحة ، وهذه الايام الواحد ما يقدر يتكلم بصراحة عن افعاله السابقة وخصوصا اذا كانت غير صحيحة ، نسئل الله المغفرة ..
ولكن احب ان اذكر ان مرة كنت مسافر مع صاحبي الى احد الدول الاوربية
بالطيارة قاصدين الفسحة والمتعة ، والناس مبسوطين والي يشرب بيرة والي يشرب واين وهيصة .. فجئة الكابتن ولع ضوء ربط الحزام وقال في المكرفون اننا نمر بمنخفض جوي ..
وبدأت الطيارة تهبط وتصعد كاننا في احد العاب الملاهي ،، طبعن الكل خاف والي يسمي والي يقرأ قرآن طبعا الكل بطل يشرب الخمر ،، وتذكروا ان الله قريب ويقول المثل راحت السكرة وجت الفكرة .
واستمر هذا الحال تقريبا خمسة دقائق كافيةلتعيد تفكيرنا جميعا ..ولكن مع الاسف بعد الوصول الى المطار سالمين رجعت حليمة لعادتها القديمة والجميع نسا تلك الاوقات العصيبة ولم يتعضو ..

[(*_*)هشومه(*_*)]

[b:fa677aadbc]انا معجب بتجربتك ده يا اخ عمرو و معجب بجراءتك و انت بتحكيها.
و انا برجو الناس ان هم يعملوا زيك و يصلوا[/b:fa677aadbc].
[b:fa677aadbc]و انا برجوهم كمان ان همه يحكوا المواقف الى حصلت فى حياتهم [/b:fa677aadbc]
[b:fa677aadbc]و انا بشكرك كمان علشان انت عمنلتلنا الغرفه ده الى نقدر نحكى فيها تجاربنا [/b:fa677aadbc] .
[b:fa677aadbc]وبقولك مبروك على ترقيتك[/b:fa677aadbc].

[ام عمرو]

موضوع حلو يا عموره
عن موقفى انا لما حجيت السنه دى كل حاجه فيا تغيرت بس اكيد لالافضل والحمد الله:: :tu: :tu: :tu: :tu: :tu:

[عنونة]

أخ عموره قصتك ذكرتني بحالي قديما كنت مثلك لا أصلي ولكن أصوم وكانت الأغاني في حياتي كالهواء الذي أتنفسة كنت في هذه الفترة من حياتي أشعر بفراغ داخلي وضيق في النفس لا أتحمله وكنت كل يوم قبل أن أنام تأتيني الهواجس ويؤنبني ضميري الى أن من علي الله بالهدايه لا تتصوروا كم السعادة التي أنعم بها وما أجمل البكاء من خشية الله والإحساس بنعمتة وبالذل والعبوديه له سبحانه مقلب القلوب
والله نحن لا نستحق كل هذا الفضل من رب العالمين
ربي إغفر لي ولإخواني المسلمين وإجمعنا في جنة النعيم يفرح بنا النبي صلى الله عليه وسلم ونجاوره ونرى وجهك الكريم آمين

[السلوى]

بجد يا جماعه مواضعكوا كويسه جداا واغلبنا كان في غفلة ولسبب ما ربنا هداه لكن انا الشغل غير حياتي ايام الكلية الواحد كان فاضي كل همه الرحلات الصحاب مكنش شايل مسؤولية نفسه من ساعة ما اشتغلت وغيرت اسلوب حياتس 360 درجة

وكمان تقريبا حياتي زي عمرو كانت لهو والواحد كان بعيد عن ربنا لغاية مسمعت عمرو خالد وساعتها الحمد الله مفوتش فرض وبعمل السنن على قد ما بقدر والحمد الله انك لا تهدي من احببت لكن الله يهدي من يشاء

[غــفــران]

موضوع جميل يا عمورة (كالعادة) :) ربنا يثبتك و يثبتنا اجمعين.

اما عن الموقف اللي غير حياتي، انا ممكن اسميه اختبار من ربنا اللي على اساس نتيجته، اتغير مسار حياتي و إليكم القصة:

تبدأ قصتي منذ حوالي 5 سنوات عندما تخرجت من كلية الآداب قسم اللغة الانجليزية و بدأت حياتي العلمية باعمل كمدرسة للغة الانجليزية للأطفال في مدرسة لغات. في هذه الأثناء تعرفت على سيدة انجليزية و عرضت علي ان اعمل معها في شركتها الجديدة و طلبت مني ان أقابلها في مقر الشركة. المهم, رحت أقابلهاو كانت ظريفة جدا و عرضت علي ان أبدأ معها من أول الشهر لكن انا طلبت منها مهلة لحد ما أخلص مع عيال فصلي الامتحانات لأني ما أقدرش اسيبهم في وسط الطريق كده فوافقت.

أود اضافة ملحوظة هامة جدا و هي اني في هذا الوقت الذي قابلت فيه هذه السيدة كنت أرتدي حجاب عادي, يعني أيشارب قصير و بلوزة و جيبة و في بعض الأوقات بنطلون, حجاب كاجوال يعني. لكني بعد انتهاء العام الدراسي و اشتغالي بعد الظهر في مركز للغات كنت بادرس انجليزي لناس كبار و لقيت نفسي بأقف قدام شباب و مراهقين و كبار و أدرسلهم و حسيت اني عايزة أستر نفسي أكتر من كدة فقررت اني أشتري اشاربات طويلة و أخليها أطول عشان تستر اكتر ما يمكن ستره.

كده مر على مقابلتي الأولى للست الانجليزية حوالي 6 اشهر و أختكم نسيت الست دي اساسا و انتهى العام الدراسي و اشتغلت بعد الظهر زي ما قلتلكم و غيرت طريقة لبسي و في يوم فوجئت بها بتتصل بي و تفكرني بوعدي ليها. أنا في ذلك الوقت كنت بافكر في المستقبل و هعمل ايه لما العام الدراسي يبدأ و هارجع للتدريس و وجع القلب تاني و اذ بي القاها بتكلمني.... يا ألله.... المكالمة دي جت في وقتها تمام :tu: و طلبتني لمقابلة تانية زي ما يكون كان قلبها حاسس اني اتغيرت. المهم, رحت المقابلة و قعدنا في المقابلة دي حوالي نص ساعة قالتلي بعدها ان انا عاجباها و عايزاني معاها بس في حاجة واحدة طبعا عرفتوا هي ايه:twink: الاشارب الطويل طبعا. هي بصراحة ما مارستش علية اي ضغط و قالتلي انه من الأفضل ان الاشارب يكون قصير.

انا بصراحة شديدة في الأول استنكرت الفكرة و لكن هي قالتلي ان ده مش موقفها من الحجاب لكن ده عشان العملاء بيني و بينكم ان قلتلها اني هافكر و أرد عليها أنا باتكلم معاكم بكل صراحة. انا مانكرش اني فعلا فكرت في العرض بتاعها و تعالوا نحسبها سوا المكان محترم والمرتب ضعف اللي كنت باخده من المدرسة و همارس اللغة الانجليزية من بلدها يعني استفادة مؤكدة من جميع النواحي و الشيطان شاف شغله معايا صح :td:

عشان مطولش عليكم اكتر من كده, قلت و انا هاحير نفسي ليه؟ عليكي يا بت يا غفران بالاستخارة و لو لية نصيب في الشغلانة دي أكيد هاخدها و لو ما ليش نصيب مستحيل اخدها و بعد ما صليت الاستخارة بيومين كنت قاعدة الساعة 3 الصبح و مخي قاعد يودي و يجيب بس كنت ميالة اكتر اني ارفض اني ارجع زي ما كنت و البس ايشارب قصير محد ما ربنا الهمني اني افتح الراديو على اذاعة القرآن الكريم و اذ بي افتح على الأية اللي بتقول: "ربنا لا تزغ قلوبنا بعد اذ هديتنا و هب لنا من لدنك رحمة انك انت الوهاب" و كأني باسمع الآية دي لأول مرة و كأنها يا جماعة موجهة لي شخصيا في الحظة دي اتحسم عندي الصراع تماما و توكلت على الرزاق الذي لا يغفل و لا ينام و بدأت أحضر صيغة الرفض اللي هاقولها لها.

في اليوم المتفق عليه, اتصلت بيها و قلتلها اني مش هاقدر اني ارجع البس ايشارب صغير زي الاول فطلبت مني مهلة يوم واحد تفكر و ترد علية.... تاني يوم لقيتها بتتصل و تقولي انها موافقة اني اشتغل معاها زي ما انا كده و بتسألني أحب أبتدي من امتي :present:

و آديني بقالي معاها في 4 سنيين في الشركة و مبسوطة جدا الحمد لله.:twink:

أسفة اني طولت عليكم :f: :f: :f:

[عموره]

اشكرك يا اخت غفران على كلامك واشكر كل الي شاركوا في الموضوع وربنا يثبتنا على الايمان دايما

[NOOR]

موقف غير حياتي

الغربه طبعا كان ليها اثر جامد عليا

من بني ليها شعبيه جامده في مدرستي و معروفه بشخصيتي المميزه ل بنت زيها زي اي حد و من الاقليات في المدرسه

:waa:

طبعا في مدرستي القديمه المذاكره مكنتش مهمه و طبعا الاصحاب و الفرفشه اهم حاجه و يعني بنذاكر في اخر السنه و بننجح طبعا (نظام تعليم فاشل)

طبعا اما سافرت , الانجليزي بحد ذاته كان صدمه لان اللي اتعلمناه حاجات على الورق و قواعد مش لغه

طبعا حصل لي احباط و اكتئاب رهيب استمر لمده سته اشهر لدرجه اني مكنتش بعرف انام بسبب المعامله الوحشه من الزملاء العرب و الكندين في المدرسه و من حركات النداله و الاستغلال اللي بتتعمل فينا


في يوم بابا خرجني معاه و تكلمنا مع بعض :rol:

منفعش الكلام :rol:

و مره تانيه و تالته :rol:

منفعش برضه :rol:

لحد مافي يوم بابا انفعل :tooth: و كان زعلان جدا و قال انا جبتكوا هنا عشان تتعلموا زي منا اتعلمت و تاخدوا فرصتكم و ان انا خليته يحس ب الندم عشان جابنا هنا :zz:

من نفس اليوم قررت اني ابقى سعيده و اركز في الدراسه واتعلم و في نفس الوقت ابقى قريبه من ربنا

و فعلا سبحان الله ربنا ساعدني جدا و تخرجت بتفوق من الثانويه ( و جوايز كمان) وفي ماده الادب الانجليزي كانت اعلى درجه في الفصل من نصيب اختي و المركز التاني من نصيبي :brb:

يعني طلعنا احسن من الكنديين بلغتهم :twink:

و بجد بجد بجد مفيش اي حاجه اسمها صعبه و خصوصا ان كنا واخدين نفس المواد اللي كل الطلبه واخدينها و اللي بيشتغل و بيتعب ربنا بيديله حقه و بزياده كمان

و اللي ساعد كمان نظام التعليم في كندا اللي يخلي الواحد يحس انه بني ادم و ليه راي في الفصل مش بليد و حمار:cool:

[مدينة]

ما شاء الله يا عموره

ربنا أراد هداك، وانا شايفة إن اللي حصلك ده فضل منه سبحانه وتعالى.

ويارب يارب يثبتك على الإيمان ويزيدك من فضله وهداه.

غفران موقفك رائع ويظهر قد إيه اللي ينصر الله ينصره الله.

يارب أيدنا بنصرك




:f: :tu: :f: :tu: :f:

[boltya]

السلام عليكم ورحمتة بركاتة

مشكور يا عمرو موضوع :tu:

انا موقفى تقريبا مشابة لموقف عمرو شوية

انا برضة كنت عايشة حياتى كدة من غير هدف ومن غير غاية وكنت برضة اصلى مرة وعشرة لا وكنت عايشة حياتى زى اى بنت خروج ولبس وmake upوماكنتش محجبة وكنت بعمل كل حاجة بتعملها اى بنت عادية عايشة تايهة او بمعنى اصح عبيطة

بعد كدة ربنا ادانى انذارات كتيرة ورا بعضها اولها ان واحدة صاحبتى توفت وبعد كدة جدتى وبعد كدة ابن عمى اللى اكبر منى بسنة واحدة واخر حاجة عمى وكنت بعد كل مرة بزعل جدا بس بعد فترة بيروح التأثير وبرجع زى الاول

قعدت افكر فى كل اللى بحصلى دة وحسيت فعلا ان انا المقصودة من كل دة وان ربنا عايز يفوقنى

وبالصدفة سمعت شريط الحجاب بتاع عمرو خالد ربنا يحمية وفعلا اتحجبت و حسيت ان دى البداية وسمعت بعد كدة شرايطة كلها واكتر شريط اثر فيا الشريط بتاع الخشية وبقيت مش عارفة اعمل اية عشان اعوض اللى فاتنى قبل فوات الاوان وبدأت التزم فى الصلاة واحضر دروس دين

وحسيت ان بقى ليا غاية عايشة عشانها وان فى حاجة عايزة احققها

والحمد للة على كل شئ انة هدانى وتقبل توبتى وانا بدعى ربنا انة بثبتنى على اللى انا فية ويزيدنى اكتر واكتر

ويارب يهدى امة الاسلام كلها

معلش انا طولت عليكوا بس تعرفوا حاجة

ان انا عمرى ما قلت الكلام دة لحد واللة وعلى فكرة انتوا سبب من اسباب الاستمرار فى الهداية ربنا يخليكوا ليا ويهديكوا ويبارك فيكوا :f: :f: :f: :f: :f: :f: :f: :f: :f: :f: :f: :f: :f: :f:

[RA7MA]

السلام عليكم ورحمه الله وبركاته
سبحان الله كل واحد فينا ليه قصه مختلفه ربنا لما بيشاء يهدى حد بيرسلوا رساله من حياته
بالنسبي ليا انا فنا الموقف دا كان في المشرحه بحكم دراستى ليا تعامل مباشر مع الجثث :!big: :,فى يوم كان عندي امتحان ورحت المشرحه بدرى منا عاوزه اراجع ودخلت المشرحه وقفلوا عليا من بره بالمفتاح وءلولى اودامك ساعه :wako: :wako:
ساعه انا والجثه وابتاديت اكلم مع الجثه انوا يردابداوبعدين احركوا يمين شمال مافيش اعتراض مالوش لاحول ولاقوة ودا بين ايد انسان ذيوة امال لما اقف بين يدانالله عز وجل حعمل ايه ولا اكلم اؤل ايه والحمد لله على الموقف دا اللى فعلن صحا الواحد من الغفله اللى كان فبها ويريت كل واحد يحط نفسه في موقفى ويراجع حسابته

[نياهاها]

انا اقولك موقف غير مجرى حياتي عارف انا ايام ما كنت صغير كنت اشرب حليب بالممه اما لما عرفت اشرب بالقلاص قمت اشرب بالقلاص ولا قربت نحو المميه من يومها
نياهاها

[meba2laz]

ghofran we amr we koloko asartouny gedan gedan,ya Rab teb2o sabab fy hedayty ,we Rabna yekremna we yehdeena kolna

[مهلبيه]

السلام عليكو ورحمة الله وبركاته

ربنا يهدى الجميع وانا بحيكم على الشجاعة النادرة ديه اليومين دول
اما بخصوص التغير فى حياتى هو يوم مالبست الحجاب كان احسن قرار اخذته ساعتها حسيت
ان رنبنا راضى عنى وبدأت اشوف الدنيا بنظرة تانية خالص واالحمدالله على الهداية :wub:

[Basbosa]

في البداية احب اقولكم ان دي اول مرة اشارك معاكوا :l: و انا سعيدة جداً بده و بشكر البيج بوس :ph34r: اللي ساعدني علشان اشارك معاكوا في القهوة اللي من ساعة ما دخلتها و انا اتمنيت اني ابقي واحده منكوا اتمني ان احنا نكون اصدقاء انشاء الله .
اخي العزيز عمرو :
فكرتك اكثر من رائعة لأن " ذكر فإن الذكري تنفع المؤمنين " و الاعتبار بالآخرين من الفضائل فيشخص كل منا .
أولاً : أنا سعيدة بأن عدد من يتجهون لله كل يوم في ازدياد و ده مكنش موجود قبل كده.
ثانياً : قصتك جميلة جداً و أنا قريت كتيب لعمرو خالد " رسائل ربانية " مليان قصص من النوع ده عبارة عن علامة من ربنا لهداية الإنسان في اللي بيفهمها و يستفيد من الرسالة دي و يحمد ربنا عليها و في اللي بتعدي عليه مرور الكرام و انا بعتبر كل واحد مبيتعظ غلبان و مسكين .
عموماً احنا بنتمني الهداية لكل المسلمين اللهم آمين .

[اكشن]

انا حصلى موقف بس مش فكره لما افتكره ابعت

[نخلة]

انا كل يوم بيحصلى مواقف تغير حياتى

وكل يوم بستفيد حاجات كتيره وخبرات فى الدنيا0000

وحتى لو كانت بسيطه جدا000000000000واكيد كلنا كده

وتذكروا ان الحكمه وليده الفشل00 :tu: :tu: :tu:




يدوم عزك :tooth:

[مسلم أنا]

السلام عليكم ورحمة الله و بركاته
كنا أصدقاء اثنين
لا نكاد نفترق . أصبح اسمى مقروناً بأسمه فى دراستنا . و أصبح رقم هاتفه محفوظاً من كل بيت و رقم هاتفى محفوظاً من كل بيته
أسرارنا معا . تفاهمنا فى أدق الامور كان يحسدنا عليه الجميع
كان أخى و صديقى و رفيقى و صاحبى
لكم وددت لو أن حياتنا ارتبطتت للأبد معا و ألا نفترق أبداً
و فى يوم كان هو فيه فى بلدته الريفية و كنت أنا على أحد الشواطئ المشهورة بالفسق و المجون فى دولتنا المسلمة ( هذا كان حالى وقتها ) أستمع للأغانى و أشاهد الفتيات العاريات على الشاطئ حتى تلقيت اتصالاً منه على هاتفى المحمول يخبرنى فيها بأنه قادم الى مدينتنا التى نسكن فيها و يطلب منى بأن اقبله هناك
و رجعت الى مدينتى و دخلت غرفتى و أنا أحضر مجموعة من الافلام و الاغانى الجديدة على جهاز الكومبيوتر خاصتى لأحضرها له عند مجيئه
و كذلك ميدالية هدية أحضرتها له من ذلك الشاطئ
و نمت و أنا أفكر فى الغد و بأننى سأفعل كذا و كذا
ثم جاء الصباح و استيقظت على الهاتف بجانبى و سمعت صوت أحد اصدقائنا المشتركين يقول لى بصوت حزين أن أخى و صديقى و رفيقى و صاحبى قد مات غرقا و هو قادم الى مدينتنا بعد سقوط العربة التى كان يستقلها فى ترعة صغيرة ارتفاع الماء فيها لا يجاوز المتر
و ياليتنى أعرف كيف مات
لم أفق من صدمة الخبر الا بعد نصف ساعة ثم جريت الى قرية صاحبى و فوجئت بأن ماكان كان
_ و جاءت سكرة الموت بالحق ذلك ما كنت منه تحيد _
وقتها شعرت بضياعنا فى الدنيا و بأننا نحيا حياة لامتعة و لا استقرار فيها
أين هى متعة زائلة كنت فيها و هاقد أصبحت بهم
و جعلت أفكر كيف يموت غرقا من وقع فى متر ماء و كيف صبر على الله و قد كنت أجهر بمعصيته و البحر أمامى
كيف كان حالى لو اختلطت الادوار
كيف كنت أواجه ربى
لم أدرى الا و الدموع تنسكب على خدى و أتذكر ربى و أعرف أننا فى الدنيا فى دار ممر الى دار مقر
و الناس فيها نوعان
رجل باع نفسه فأوبقها
و رجل ابتاع نفسه فأعتقها
و من يومها و استنار لى الطريق فسبحانك لا اله الا أنت خلقتنى و أنا عبدك و انا على وعدك و عهدك ما استطعت أبوء لك بنعمتك على و أبوء بذنبى فأغر لى فأنه لا يغفر الذنوب الا أنت
و سبحان مقلب القلوب
مسحت الاغانى و الافلام من على جهازى و استبدلت بخطب و دروس للمشايخ و العلماء
استبدلت بقرأتى بقرأة كتب الفقه و السيرة و العقائد و الاحاديث و القرأن الكريم
اللهم ثبت قلبى على الايمان
اللهم حبب الى الايمان و زينه فى قلبى
أخوكم فى الله

[amalhazen]

:tu: :tu: :tu: :tu: :tu:
ا شكركم شباب علي الكلام الي من القلب وربنا يثبتكم ويثبتنا.
الحكاية كلها من اللة ثم :?big: :?big: :?big:
الاصدقاء
هو دة المفتاح علشان كدة لازم نختار صحبنا مين .
فكم من صديق قاد صديقة الي التهلكة
وكم من صديق قاد صاحبة الي بر الامان.
مع كل الشكر لعمورة علي هذة الخطوة الجريئة.

[KATKTA]

ربنا يبارك فيك يا عمرو :happiii:

[TATO ELMOR]

قصتك يا مسلم مؤثره جدا

وأنا تفاعلت وتأثرت بها

ربنا يصبرك و بصديق يعوضك

ويثبت قلبك بالأيمان والأسلام ويثبت الأسلام بيك أخى المسلم

[contact]

انا حصلتلى مواقف كتيرة
تقريبا طول عمرى اطلع من دة واخرج من دة

بس اخر حاجة غيرت تفكيرى واسلوبى مؤخرا هى
القهوة الكتكوتية دية
حقيقى حسيت انها ادتنى قوة جديدة خلتنى اخرج بسرعة من الامى
انا كنت محتاجة اشعر بحب ولقيته هنا
الكل بيحب بعضة فى الله مش مشكلة اننا نختلف لان الاختلاف حيقوينا اكتر
احساسى انى لو احتجت معونة او مشورة حلاقى اخواتى جنبى
ودة حقيقى غير حياتى بدرجة كبيرة
اشكركم جميعا
ويا رب يديم المعروف

[^^^hi^^^]

:cool: :cool:

رائــــــــــــــــــــــــع و اكتر من رائع كمان الموضوع دة ممتاز يا عمورة

و الله الواحد بيبقى محتاج لاحاجات من دى كتير عشان ديما يتانوا فاكر ومتذكر

وذكر فان الذكرا تنفع المومنين

و الموقف بتاعك يا مسلم و الله كان دموعى حتنزل و جسمى اشعر ربنا يثبتك على الايمان و يثبتنا معاك
ويهدينا جميعا اكتر و اكتر يا رررررررررررررررررررررررررررررررررررررب


و لية ملحوظة يا جدعاااااااااااااااااااان الناس لما تلاقى حاجة حلوة كدا المفروض كلها تشارك لو مش بموقف يبقى بدعم و التعليق عشان المواضيع دى ما توهش عنا و لو مش ليك لاى حد المهم انها تبقى قصة حقيقية و معبرة

وبلاش يا جماعة ومن غير زعـــــــــــــل بلاش حد يحاول يهرج هنا يعنى ما ينفعش يعنى واحد داخل عايز يهديك وبيقولك على مواقف في حياتة عشان يوريلك حاجة حلوة تقوم انت ترود علية بتهريج مش كدا و لا اية يا جدعاااااااااااااااااااان

ويجعلوا عامر
ويارب يارب الموضوع دة يكبر و يكبر و ينتنوا اول موضوع في قسم الفضفضة

[aggressive]

لسه ممرتش باي موقف ^_^ ^_^

[يمونة]

السلام عليكم و رحمة الله وبركاته
أنا أول مره برضه أشارك هنا أنا فرحانا جدا ان موضوع زى ده اتفتح و سعيده أكثر بالقصص اللى اتكتبت
ما شاء الله الأيام دى بالدات فى ناس كثيرة بدأت ترجع لربنا وأنا نتمنى ان موضوع ايقاف "عمرو خالد"ميبعدش الناس اللى ربنا هداها قريب عن الطريق المستقيم لأن يا جماعة ممكن تكون دى محنة ربنا ابتلانا بيها عشان يختبرنا ادا كنا هنسبت ولا لأ
ربنا يثبتنا دايما على الايمان و يجمعنا فى مستقر رحمته
آمين آمين آمين

[علياء الإسلام]

السلام عليكم ورحمه الله وبركاته
اخوتي في الله ........اليوم جلست ابحث في القهوة لحد ما لقيت الموضوع ده .......

قا احنا محتاجين انه كل واحد فينا يكتب مواقف اللي غيرت حياته ....
عشان الكل يستفيد ......ان شاء الله
فجزاك الله خيرا يا عمرو على الموضوع

مواقفكم رائعه حقا يا اخوتي ...ولها في النفس وقع غريب ........
ربنا يثبتكم ويثبتنا كلنا انشاء الله

ان قصتي طويله ...حكتبهالكو بكره ان شاء الله ...
بالتوفيق من الله جميعا
علياء الاسلام

[الواد مزيكا]

بسم الله الرحمن الرحيم

الموقف الى غير حياتي

كنت مع احد اصدقائ نتسوق فجاءة شعرت بضيق شديد واحساس بدوخه وهذا الضيق يزداد ويزداد
فطلبت من صديقي ان نذهب الى المستشفى حالا .
بعد الفحوصات قال لي الدكتور بان لدي جلطه في القلب واني في حاجه الى عمليه بلبالون لفتح الشريان
اخذت الاحداث تتوالى علي فانا صغير في السن ومعنى ذلك ان شركة الطيران التى اعمل بها سوف تنزلني الى وظيفه ارضيه وهذا ما لا ارغبه .
المهم استعنت بالله وعملت العمليه وصحتي بأت كويسه لكن التقرير الطبي اشار بعدم قدرتي على الطيران
وتم انزالي الى وظيفه ارضيه.
وهي وظيفه جيده على اي حال غيرت حياتي تماما . من(( رحال الى استقرار))



ودمتم

[علياء الإسلام]

السلام عليكم ورحمه الله وبركاته
هذه هي قصتي

فتاه هادئه ...لا تعرف الخروج كثيرا ...ملتزمه بصلاتي وقراءتي للقران ..وصومي لرمضان ....ولكن
لم اكن افقه شيئا مماك نت افعل ...لم احس بقربيمن الله ...ولا بخوفي من جهنم حينما اقرا آيه فيها ترهيب منها ..او فرحي وبكائي حينما اقرا أيه عن الجنه ...كنت مثل الميت ....تماما
جسد بلا روح او قلب .........وقد انعكس هذا علي ...فقد كنت اسمع الاغناي الاجنبيه بصوره فظيعه
........الاجنبيه فقط ..فالاغاني العربيه ..ليس لها دخل في حياتي فهي من التراث القديم بالنسبه لي


هويت الرقص الاجنبي ..انبهرت بكل ما هو امريكي او بريطاني ..او اي شيء اخر ...لكن ليس بعربي مسلم ......هويت صرعاتهم في الموضه ...وقص الشعر ..وكل ماهوجديد في عالمهم ..وابكي بكاء مريراا

اذا فاتتني حلقه من حلقات البرنامج الشبابي ..الذي يذيع اغاني اجنبيه ....وابقى لا اعرف ما افعل ...واتضايق ..

كنت اضع السماعات في اذني حتى انام ...فتاتي امي وترميها في سله المهملات ...واستيقظ في منتصف الليل واغضب واضعها مره اخرى ....اردد اغانيهم وانا نائمه ..اشتري المجلات واكنزها لدي الصق صورهم على حائطي ...اقبلها بكل قوه ..والعياذ بالله ...........

نعم هكذا كانت حياتي قبل ثلاث سنون,.....انبهار في انبهار ...لا مثيل له

الى ان جاء ذلك اليوم ..........تحدد موعد سفري الى انجلترا مع عمتي .......للعلاج ...كنت ارى انها فرصه كي ارى اولئك الذين احبببتهم ..لا بل عشقتهم ........دون وعي مني

وانا هناك ...جلست اقلب في القنوات التفازيه مئات المرات ....ابحث عن ضالتي ....وبدات حيرتي

اين هم ..لم لا اراهم في التلفاز ......كما كنت اراهم في بلدي ....؟؟!!
لماذا برامجهم علميه بحته ورياضيه واخباريه ....لكن لا شيء عن اولئك المغنين :!big: :?big: :!big:
فجاة وبعد اسبوع وجدت ذاك البرنامج الذي .....لا اردي ان اذكر اسمه ..ولا حتى مافيه من فظاعته
اناس ليس بهم ذره من الحياء ........لا بل وحوش ادميون .......فقدت عقلي حينها ااولئك من انبهرت بهم ......ااولئك من احببتهم ..........لماذا ...............لم تتحمل انوثتي ولا حيائي ما رايت من مشاهد
.........تحول سفري لصدمه كبيره بالنسبه لي .......رجوت عمتي بان نعود الى بلدي بسرعه فانا لا اطيق العيش هنا ,,,,في ظل تلك المدنيه الوحشيه ..........مع ان هناك برامج رائعه علميه وتغذي العقل العلمي .......ولكن هم ازدواجيون ..لا يفقهون ما يعرفون .......ولا مالا يعرفون

عدت .........الى بلدي والى برامج التلفاز هنا .......وعادت حليمه لعادتها القديمه .......

بدات الدراسه ....جاءتني معلمه وهي داعيه في نفس الوقت ......بدات تتحدث باسلوب جميل ورائع
عن النبي .......عن الصحابه .....والتابعين .......عن نفسها وتجاربها .......احببت حصتها كثيرا ....اذهب اليها في البريك كي تحكي لي حكايتها وحكايه النبي معها .....تذوقت طعم حلاوه ولذه النبوه والدين .....والقران .....احببت قصه ذلك الشاب ....ذلك التابعي الذي اتخذ نهج جده منهجا له في عالم
يسوده الطمع والجشع .....رضي الله عنه وارضاه

.....عمر بن عبد العزيز........يااااااااه ......قصته عجيبه ......ابهرني حقا .....كيف تحول من المشيه العمريه الى ازهد انسان في المدينه .........كيف انه حين تول الخلافه .....ترك الغرفه الخضراء .......وذهب ليعيش في منزل صغير في المدينه .......كيف كانت بناته يحجبن افواههن كي لا يشم ابوهن رائحه البصل والعدس .......كيف وككيف وكيف..........

قرات الكتاب في يوم وااااااحد .....بعدها لم استطع الحديث لأي شخص ......عقلي في حاله من الغضب والحسره والضياع لما فات من عمري .......يومان وانا ابكي دون ان يعرف احد ما بي .......لقد مات عمر بن عبد العزيز .....لو قلت هذا لأحد لما صدقني ......اخبرت اختي قالت وماذا فيها مات منذ مده طويله ........عرفت انه ما من احد يفهمني الى من التجئ .......وجدت شريطا بعنوان توبه صادقه لهفت لسماعه .......وحين انتهيت .........بكيت بقوه وبقوه لأول مره في حياتي ....صليت ركعتين ثم....اتخذت قراري ..ولا رجعه فيه ........كل الاشرطه لسله المهملات وكل المجلات والملابس .......والزينه وكل شيء له علاقه بهم ......اردت ان اطهر نفسي ........من كل ما يدنسها


وها انا الان .. احمد الله على اني عرفت البكاء من خشيته ........اشكر الله ثم تلك المعلمه .....وعمر بن عبد العزيز .....فليغفر الله لهما ما تقدم وما تاخر

وليجزهما كل خير ...... عذرا للاطاله

:wub:



<!--EDIT|علياء الإسلام|Jul 13 2002, 09:21 PM-->

[posy]

بسم الله الرحمن الرحيم
والله يا جماعة انا يعنى الحمد لله رب العالمين طول عمرى ملتزمة فى لبسى وصلاتى و مراعاة الله ولكنى لم اكن محجبة وانا ابلغ من العمر 18 سنة وكسور ، صمم والدى على ارتدائى الحجاب عند دخول الجامعة وذلك بعد محاولات شديدة لارتدائه قبل الجامعة اى فى المرحله الثانوية ، شعرت بضيق رهيب لانى سوف ارتدى الحجاب ، حيث ارتديته فى اول ايام شهر رمضان المبارك وذلك لانه جاء غصبا فقلت فى نفسى لعل ارتدائه فى رمضان يهدى نفسى الى الخير ، وبالفعل لبست الحجاب ولكنى ظللت لاكثر من شهرا فى حالة احباط شديد ثم اخذت الوم نفسى واعاتبها لما فيها من وساوس الشيطان ولكنى الان حمدا لله ربى وب الجميع فى قمة سعادتى لقيامى بعمل هذه الفريضة ، واشعر بارتياح شديد ورضى عن نفسى
يمكن انا مكونتش عايزة البس الحجاب عشان شعرى حلو لكن يوم الحساب هجيب ربى عندما يسألنى عن الحجاب بماذا ؟؟ هاقول لربنا ايه ؟؟
هاقوله شعرى حلو مستخسراه فى الحجاب ؟
هذه الكلمات هى ماهدانى الى الصواب ، بالرغم من انى والله والله قبل الحجاب كونت انسانة محتشمة جدا
ولبسى واسع وطويل ومش باحط make up ولا حاجة خالص لكن الشيطان ابن ال .......
انا دلوقتى محجبة ولبسى محترم جدا وملتزمة فى اقوالى وافعالى واقرأ القران بصفة مستمرة واذا يوم مقدرتش باشغل شرايط بدلا من القراءة ولكنى دايما دموعى فى عينى وشاعرة بضيق نفس شديد وحاسة ان قلبى فى حزن مش عارفة ليه ؟؟
هذا بالرغم من ان طلباتى فى البيت اوامر وانا اتمتع بوجه حسن على حد قول الناس ، ولكنى لا اجد سببا لحزنى هذا ؟؟؟

[^^^hi^^^]

:cool: :cool:
دة شيطاااااااااااااااااااان بردوا يا بوسىىىىىىىىىى
اشغلى نفسك في شى موفيد ممكن تمارسى هواية كويسة او رياضة كويسة او تعملى اى شى يخرجك من الحالة دى ومايسيبشى الشيطان يلعب في نفوخك

يا جدعااااااااااااااااااااااااااان لازم كلنا نشارك يا جدعاااااااااااااااااان ممكن موقف تحكية يغير حياة بني ادم تانى
نحكى تجربنا لبعض عشان نستفاد كلنا و لا انتوا اية رايكم


و يجعلوا عامر

[koaofus]

السلام عليكم
انا برضو ايام ما كنت فى ثانويه عامه
اول سنه اولى ثانوي كان ربنا هاديني شويه تانيه ثانوي كنت الشيخ بتاع الشله بس حصل و سقت و اطريت اعيد السنه تانى علشان معديتش في الكميا و الفرنساوي
من هنا انا اتغيرت 360 درجه
لدرجه انا دلوقتي بقول لو مت و انا في 3 ثانوي كنت اتحدف في جهنم من غير حساب لان الحسنات مش حتعمل حاجه
المهم بعد ما اتغيرت للاسوء كان ليا واحد صحبي جدا من المدرسه و مات في حادث و هو لسه نده 16 سنه كان اكبر مني بسنه انا اكتئبت و اتغير حالى و عرفت ان العمر ممكن يروح في اقل من ثانيه و بعديها بشهر تقريبا ربنا ادني القوه علشان ادخل الامتحنات و نجحت بس مش بمجمع عالي للاسف
و الحمد لله انا دلوقت في سنه 3 في الجامعه و ماشي و بحاول اني مغضبش ربنا تاني
اي نعم لسه العرق الوحش فيا بس انا حاسس اني بتحسن اه الصلام مش منتظمه بس بصلي و اصوم الفرض والسنه و الفضل للتحسن للحادث الي جرى لصاحبي و للشله الاخيره الي انا معاها في الجامعه دلوقت
و زي ما بقول كل مره
يجعلو عامر

[غــفــران]

للي عنده موقف غير حياته عايز يحكهولنا :rolleyes:

[& الفايروس &]

السلام عليكم ورحمة الله وبركاته
أشكر الأخت بوسي على الموضوع الجميل والرائع اللى ممكن باذن الله يكون سبب في تغيير حياة شخص او حتى جزئية بسيطة منها

أما بالنسبة لحالة الضيق اللي عندك فانا لا دكتور نفساني ولا حاجة ولكن أنصحك بادعية الهم والحزن المتوفرة في كتيب ممتاز اسمه ( حصن المسلم )

وبالنسبة للموقف فهو موقف حصلي في الاعدادية في يوم 17 أو 27 من رمضان توفي أحد زملائي في المدرسة في السعودية رغم انه دايما كان بيتكلم عن نواياه في المستقبل ووووووووووو ( وكان مأمل يعيش لأمد بعيد )
ولكن حكمة الله جل وعلا في انه يتوفى بحادث اصطدام موتسيكل ( مقنع )
بتريلا أو بنص نقل مش فاكر ولكن الحادث أثر علي في العيد ( اللي جا بعدة علطول ) بصورة كبيرة شوية بعد كده بدأ التاثير يخف تدريجيا في أمور محددة

وللحديث بقية
والسلام عليكم ورحمة الله وبركاته