شاهدت لك فلم حسن ومرقص [الأرشيف]

ام ياسمين

07-21-2008, 01:35 PM

في البدايه احب ان انوه للصدمه التي تلقيتها من مضمون الفلم
عندما وقع اختياري على مشاهدة هذا الفلم كنت اعتقد انني امام قصه واقعيه جاده تناقش قضيه هامه في مصر
وتناسيت ان الفلم بطولة عادل امام ولابد ان تختفي جدية عمر الشريف في هذا الفلم
الفلم بطولة عادل امام
في دور أستاذ لاهوت ورجل دين مسيحي يدعى بولس، يحارب المتطرفين المسيحيين الذين يسعون لإثارة الفتنة الطائفية بين المسلمين والمسيحيين في مصر ونتيجه لموقفه هذا يتعرض لمحاولة اغتيال بتفجير سيارته
لمواجهة هذا يعرض عليه رجال الامن بقيادة عزت ابو عوف( في دور لواء شرطه اللواء مختار)بانتحال شخصية رجل مسلم يدعى حسن العطار.
وعلى الجانب الاخر يقوم عمر الشريف بدور رجل مسلم وفي عزاء اخوه قائد الجماعه الاسلاميه يفاجا بالجماعه تخبره ان اخوه اوصى له بالخلافه فيرفض ذلك لانه غير متشدد ولا يحب المتشددين فيتعرض هو الاخر لمحاولة اغتيال هو واسرته بحرق منزله وعلى نفس الفكره يعرض عليه اللواء مختار تقمص شخصية رجل مسيحي يدعى مرقص
فتقوم زوجة القس بولس اوديت(لبلبه) بارتداء الحجاب وتقمص دور سيده مسلمه تدعى زينات وابنه جرجس (محمد امام ابن عادل امام في الحقيقه) يصبح اسمه عماد
وفي غرابه واضحه ومستفزه على الجانب الاخر تخلع زوجة الشيخ وابنته حجابهم ويتقمصن دور سيدتين مسيحيتين الابنه تدعى مريم
وتاخذنا الاحداث حتى يتقابل البطلين وكل منهم يعتقد ان الاخر يحمل دينه في السر
فالقص بولس الشيخ حسن يرحب يصداقة مرقص لانه يعتقد انه مسيحي
والشيخ يرحب بصداقته على اعتقاد انه رجل دين مسلم لانه يحمل اسم الشيخ حسن ومن نفس الفكره يقع ابن الشيخ حسن جرجس ( لخبطتكم صح ) في حب مريم ابنة مرقص
وتدور الاحداث في اطار فكاهي او كوميدي لكنه يحمل السخريه للجانبين المسلمين والمسيحين
وتضعهم الاحداث في دراما واحده حتي يتقاسموا السكن في شقه واحده وكل منهم يحب الطرف الاخر على اعتقاد انه يحمل دينه الاصلي
وفي نهاية الاحداث عندما يعترف الابن لمريم بانه يريد الزواج بها تخبره الحقيقه بانها مسلمه وليست مسيحيه ومن هنا تبدا العداوه بين الاسرتين بعد ان انكشفت الحقيقه وفي ماستر سين يكون هو ايضا مشهد النهايه في الفلم يقف كلا منهم بجانب الاخر وممسكين بايدي بعضهم لمواجهة الفتنه الطائفيه التي تحدث بعد مواقف هزليه يصورها المؤلف انها تخرج من رجال الدين المسلمين والمسيحين وتقوم معركة حامية الوطيس بينهم
بصراحه لم اتوقع ان يصل الاستهزاء الى هذا الحد من رجال الدين سواء المسلمين او المسيحين حتى انني خفت في اخر الفلم ان تقوم معركه بين الطرفين في الحقيقه يعني هذا الفلم يظهر مدى الخلاف ولا يقرب وجهات النظر

هريدي يابووووي

07-21-2008, 01:55 PM

على رأي المثل.. اتلم تنتون على تنتن.. عادل امام و عمر الشريف في فيلم واحد.. متوقعين يطلع ايه؟.. وا إسلاماه؟:)

ام ياسمين

07-21-2008, 03:31 PM

على رأي المثل.. اتلم تنتون على تنتن.. عادل امام و عمر الشريف في فيلم واحد.. متوقعين يطلع ايه؟.. وا إسلاماه؟:)
معاك حق والله بس الحسنه الوحيده التي تحسب للفلم انه فلم عائلي لا توجد به اي مشاهد غير مرغوبه اذا كان الغرض للتسليه فقط

ميمون

07-21-2008, 03:42 PM

من قمة المهازل
ان اللي يتصدي لقضايا تمس البلد بالشكل الكبير ده
عالم زي دول
جتكم القرف مليتم البلد

هريدي يابووووي

07-21-2008, 04:28 PM

معاك حق والله بس الحسنه الوحيده التي تحسب للفلم انه فلم عائلي لا توجد به اي مشاهد غير مرغوبه اذا كان الغرض للتسليه فقط

غريبة.. مش عوايد عادل امام :huh:

الصقر-510

07-21-2008, 04:39 PM

فلم فاشل قصه وهدف
واساء الى المسلمين والمسحيون
المسلمون افضل من كدة
والمسحيون اعقل من كدة
ورساله الفلم (ان المسلم يمكنه التعايش مع المسحى والعكس)
طيب فعلا دة الواقع
المسلم والمسيحى لافرق بينهم الا العقيدة
نتشارك الطعام والزيارت والواجبات والحقوق ونفترق فى العبادات
.....................
فلم لايستحق ان اضيع وقتى فيه لقد شاهدته على النت من يومين خسارة الوقت

BlueRose

07-21-2008, 04:52 PM

من ساعة ما الفيلم نزل و انا عايزة اشوفه و ماجاتش فرصة , بس سمعت قصته من أكتر من حد
القضية كبيرة و الفيلم سطحها جدا , كنت متوقعة انه مايناقشش 100% بس ماتوقعتش تسطيح للدرجة دي بصراحة

صمت

07-21-2008, 05:22 PM

اي حته فيها عادل امام لازم تخرب

انا بستغرب عالناس اللي بتحبه :dntknw:

والله دمه تقيل جدا:heat:

ومتكلف جدا

اصلا مش بحب اتفرجله علي حاجه
خااااااااااااااااااااااااااااالص:gun:

لاتنسى نعمه عليك

07-21-2008, 06:20 PM

والله ربنا يكرمك وفرت تمن التذكره والمعاناه انى اقنعهم انى ادخل سينما لوحدي
كان نفسي اشوف الفيلم على امل انه حاجه تتشاف

سهرانة للفجر

07-21-2008, 06:24 PM

انا لغايه دلوقتى نفسى افهم الغرض من الفيلم ده ايه ؟ ايه الرسالة الى عايز يوصلها؟
يعنى اننا مش هنكون متعايشين كويس مع بعضنا الا لو جرب كل منا دين الاخر؟ هل المطلوب ان يتنصر المسلمون ويسلم المسيحيون حتى نحس ببعضنا فنتعايش سلميا؟
وهل يقبل المسلم هذا؟ وهل يقبل المسيحى هذا؟
المعالجة سطحية جدا

BlueRose

07-21-2008, 06:46 PM

سهرانة : فكرة تقمص كل شخصية تحمل دين الآخر في حد ذاتها تحمل معنى رؤية كل واحد نفسه من خلال نظارة الآخر , و كذلك وضع كل طرف نفسه مكان الآخر عند الحكم على الأشياء و هذا هو ما يحتاجه التعايش بينهما ,ولا تعني مطلقا أن التعايش يستوجب تغيير كل لدين الآخر , الفكرة نفسها حلوة و تستاهل معالجة كويسة , لكن الفيلم فيما هو واضح استخدم فكرة جيدة لسلق قضية هامة .... شيء مؤسف فعلا

*لؤلؤ*

07-21-2008, 06:47 PM

شاهدت الفيلم و لم اجده بهذا السوء

فالفكرة الاساسية في الفيلم هي فكرة التعايش و الوحدة في مواجهة ما تتعرض له البلد من محاولات بث الفتنة و ليست مناقشة دينية حول اسباب الخلاف بين المسلمين و المسيحيين و التي ليست مجالها شاشات السينما

و بالقطع يوجد قساوسة متطرفين فكريا كما يوجد شيوخ ايضا متطرفين و الفيلم لم يعمم ذلك.

موسيقي الفيلم لياسر عبد الرحمن اكثر من رائعة

سهرانة للفجر

07-21-2008, 07:05 PM

سهرانة : فكرة تقمص كل شخصية تحمل دين الآخر في حد ذاتها تحمل معنى رؤية كل واحد نفسه من خلال نظارة الآخر , و كذلك وضع كل طرف نفسه مكان الآخر عند الحكم على الأشياء و هذا هو ما يحتاجه التعايش بينهما ,ولا تعني مطلقا أن التعايش يستوجب تغيير كل لدين الآخر , الفكرة نفسها حلوة و تستاهل معالجة كويسة , لكن الفيلم فيما هو واضح استخدم فكرة جيدة لسلق قضية هامة .... شيء مؤسف فعلا

انا متفقة معاكى انهم سلقوا القضيه كان ممكن تتعمل بعمق اكتر من كده بدون ماحد يبدل دينه ويعيش شخص مختلف مهما واجه من اخطار كان ممكن يجيبوا التعايش الايجابى الى حاصل فعلا بين الاتنين لكن كل واحد يلبس ثياب الاخر ويعيش فى المجتمع بالدين الجديد؟؟؟؟

فكرة البدل الفعلى قد يكون لها تاثيرا سلبيا وخاصة بين الشباب الذى قد تعجبه الفكرة فيبدل دينه مع اصدقائه وتترسخ مفاهيم خاطئة بين الاتنين ويضيع الدين فى المنتصف
تبديل حياه الانسان وخاصة دينه ليس امرا سهلا نعرضه امام الناس وكانه لعبة ادت الى نهاية سعيدة
اعتقد ان هذا الفيلم سيحدث بلبلة شديده من المتدينين من الطرفين

كمال ترسف

07-21-2008, 07:10 PM

انا كنت رايح اشوف فيلم ليلة البيبي دول لكن
لقيته اترفع ونزلوا بدلا منه هذا الفيلم , شاهدته
وياريتني ما شاهدته

برغم خلو الفيلم من المشاهد الخارجة الا انه فيلم
ساذج وسخيف , لأنه يناقش قضية في غاية الاهمية
بطريقة كوميدية وهزلية مستفزة ومليء بالخطابة
والافتعال والاستظراف , واعتقد انه لم يوفق في
ايصال الرساله التي يناقشها بل يمكن أن يزيد
الفتنة بين المسلمين والمسيحيين ...وشكرا

ام ياسمين

07-22-2008, 01:45 PM

من قمة المهازل
ان اللي يتصدي لقضايا تمس البلد بالشكل الكبير ده
عالم زي دول
جتكم القرف مليتم البلد
فعلا قمة المهازل ان تسطح الافكار لمواضيع هامه وتتناول بمثل هذه الصوره من الاستهزاء

ام ياسمين

07-22-2008, 01:46 PM

غريبة.. مش عوايد عادل امام :huh:
فعلا تعتبر من غرائب السينما او قل عجائبها

ام ياسمين

07-22-2008, 01:51 PM

افلم فاشل قصه وهدف
واساء الى المسلمين والمسحيون
المسلمون افضل من كدة
والمسحيون اعقل من كدة
ورساله الفلم (ان المسلم يمكنه التعايش مع المسحى والعكس)
طيب فعلا دة الواقع
المسلم والمسيحى لافرق بينهم الا العقيدة
نتشارك الطعام والزيارت والواجبات والحقوق ونفترق فى العبادات
.....................
فلم لايستحق ان اضيع وقتى فيه لقد شاهدته على النت من يومين خسارة الوقت
اخي صقر اشكرك لمرورك كان الواجب علينا ان تاتي المشاهده اليك
الواقع شيء والافلام شيء والتوصيل للعالم فكره .............شيء اخر

ام ياسمين

07-22-2008, 01:54 PM

من ساعة ما الفيلم نزل و انا عايزة اشوفه و ماجاتش فرصة , بس سمعت قصته من أكتر من حد
القضية كبيرة و الفيلم سطحها جدا , كنت متوقعة انه مايناقشش 100% بس ماتوقعتش تسطيح للدرجة دي بصراحة
فعلا فكرة الفلم تجذب اي شخص لمشاهدته ولكن للاسف التناول للفكره سطحها واستهزء بعقلية المشاهد
اختي بلو روز انتي وجدتي من تساليه .............ياليتني سالت

ام ياسمين

07-22-2008, 02:01 PM

اي حته فيها عادل امام لازم تخرب

انا بستغرب عالناس اللي بتحبه :dntknw:

والله دمه تقيل جدا:heat:

ومتكلف جدا

اصلا مش بحب اتفرجله علي حاجه
خااااااااااااااااااااااااااااالص:gun:

فعلا افلامه نسخه طبق الاصل من بعضها

ام ياسمين

07-22-2008, 02:02 PM

والله ربنا يكرمك وفرت تمن التذكره والمعاناه انى اقنعهم انى ادخل سينما لوحدي
كان نفسي اشوف الفيلم على امل انه حاجه تتشاف

خلاص ابعتي ثمن التذكره انا مستنيه

الصقر-510

07-22-2008, 03:22 PM

تم حذف المشاركه لوجود معلومه فيها غير واثق منها تمام الثقه
ابو مصطفقى

bosy_pop

07-22-2008, 03:26 PM

المسلمون والمسحيون افضل من كدة
ورساله الفيلم ان المسلم يمكنه التعايش مع المسحى والعكس
طيب فعلا دة الواقع:friends:
المسلم والمسيحى لافرق بينهم الا العقيدة:55::old:
نتشارك الطعام والواجبات ونفترق فى العبادات فقط لا غير
اصبح هنا مفيش جديد اتقدم للناس
بالرغم ان الافلام الكوميدى فى وسط الضحك ومع ذلك بتقول حاجة او بتنقض حاجة

ريتاج

07-22-2008, 08:52 PM

يعنى اخش الفيلم ولا مخشهوش حيرتونى بس صحابى دخلوه قالولى مش وحش

tefa

07-23-2008, 05:29 AM

السلام عليكم و رحمة الله ،
معرفش ليه أنا حاسس أنكم يا مش عايشين فى مصر يا ماشفتوش الفيلم
إحقاقا للحق الفيلم أغفل التفاصيل لحساب الفكرة إنما رسالة الفيلم واضحة ، ثم أنه مكانش بطريقة سطحية الكلام ده بيحصل فعلا و احنا مش متعايشين مع بعض فى مصر اللى عايز يصدق يشوف اللى بيتقال لما بتحصل مشكلة ، يشوف أقل خناقة بيدخل فيها ازاى ، يشوف ازاى فى مسيحيين بيتعاملوا باحتقار مع المسلمين و العكس صحيح ، كل واحد شايف البلد بتاعته ، فى الصعيد و الأرياف الناس بتعمل كده فعلا على بعض الشيوخ و بيحصل فى القاهرة كمان و شفتها بعينى ، الجهل وحش ،
الفيلم ممكن يكون أسقط تفاصيل كانت هتقويه إنما هو مش فيلم وحش إطلاقا ، بالعكس لو منتبهناش ممكن نوصل للبنان تانية و أوحش كمان زى بالظبط مشهد النهاية و أنا ليا قرايب فى الصعيد حصل عندهم خناقات مسلمين و مسيحيين و كانت أكتر من مشهد النهاية ،
هو الإعلام اللى متجاهل و الأمن اللى ماسك الموضوع كويس
الفيلم جيد ، مفهوش إسفاف ، مشهد النهاية أكتر من رائع ، الموسيقى تحفة
ملحوظة عمر الشريف مش مسيحى كان يهودى فى صغره و أسلم

anas m

07-23-2008, 03:07 PM

اسال الله ان يعيننا على اختيار الانسب للمشاهده والاطلاع لانه هنالك امور كثيره ظاهرها تقديم رساله للمجتمع وجوهرها نشر الفساد

الصقر-510

07-23-2008, 04:30 PM

السلام عليكم و رحمة الله ،

ملحوظة عمر الشريف مش مسيحى كان يهودى فى صغره و أسلم
وعليكم السلام ورحمه الله
محتاج تأكيد المعلومه وهل هى شخصيه ام متأكد منها ونسبة التأكد
(كل شىء جائز ومن قال لا اعلم فقد عصم نفسه وانا لا اعلم يقينا ديانه عمر الشريف حاليا)
ابو مصطفى:rosy:

tefa

07-23-2008, 05:23 PM

هو مولود لأم يهودية و أب مسيحى بعدين فى الخمسينيات أسلم عشان يتجوز فاتن حمامة و ده أكيد ، اللى مش
أكيد بعد كده عمل ايه بعد ما طلقها يعنى لحد دلوقتى

http://www.alarabiya.net/programs/2005/09/20/16952.html
اللينك ده فى حتة عن ديانته

estrella

07-23-2008, 07:10 PM

السلام عليكم ورحمة الله.......انا ماشفتش الفيلم و ومكنتش اعرف قصته قبل ماحضرتك تقوله........بس اللى فهمته انه بيحكى قصة تعايش مسلم ومسيحى مع بعض وبرده مش فاهمة ايه الهدف من تغيير كل واحد دينه عشان يتعايش فى المجتمع

هريدي يابووووي

07-24-2008, 07:15 AM

بالنسبة لموضوع إسلامه.. فأنا شاكك انها كانت مجرد حركة لكسب شعبية لدى الجمهور لا أكثر.. و اللي بيؤكد شكي ده .. ان هليوود كل ما بتحتاج حد ملامحه عربية عشان يمثل في فيلم الغرض منه تشويه صورة العرب عموما و المسلمين خاصة.. بيلجأوا ليه.. و الراجل كتر خيره مابيقصرش معاهم أبدا.. آخر فيلمين عملهم.. الفيلم الفرنسي "إبراهيم و زهور القرآن".. شوه فيه القصة الأصلية تماما.. و طلع الراجل المسلم سكير و مابيصليش أصلا.. و الفيلم الأمريكي "هيدالجو".. اللي اتقال فيه بالنص و بلغة عربية فصيحة "لقد كان النبي الكريم قرصاناً"..

ZOSER

07-24-2008, 02:16 PM

بصراحة الفيلم مش وحش للدرجة دى
1- مفيهوش تقريبا أى مشهد ساخن و مفيش حاجة منه تتحذف
2- موسيقى الفيلم جميلة جدا ومتماشية معاه
3- الفيلم بيناقش موضوع التطرف فى الملتين أكتر مابيناقش العلاقة بينهم
يعنى احنا كمسلمين فى ناس كتيرة متحيزة ضد المسيحية وعاوزين يطردوها من مصر نهائيا
وفى مسيحين برده متطرفين حاسين إن مصر بلد قبطى فى المقام الأول وإن المسلمين اغتصبوا حقوقهم فيها واستولوا على مصر

بس هو المشكلة اللى فى الفيلم إنه ممكن يتفهم على إنه بيعمم الحال ده على كل المسلمين وكل المسيحين
ودمتم:rosy:

jain

07-24-2008, 03:45 PM

السلام عليكم
بصراحه انا كنت انوى على انى ادخل الفيلم دا لانه قصه واقعيه وهيناقش حاجه بجد وكمان مجتمع المسلمسن والمسحيين يبقى فعلا مهم وكمان بطوله عمر الشريف واعتقد انه عمر الشريف شخصيه وقوره صاحبه امتياز فى اختيار بطولاته....
لكن انا كنت اشك فى الفيلك لانه من بطوله عادل امام صاحب اختياراته السوووء فى اختيار بطولاته......
بس طبعا الفيلم قصه زى ماانتو وضحكتيه باين انه فيه اساءه شويه
بس انا من راى سوزر بردو ان فى ناس بتقول عليه انه فيه الحته اللى بتقولى عليها بس بردو كويس مش وحش يعنى.....:dntknw:
تحياتى
اختكjain:rosy:

Nonaya

07-28-2008, 08:31 AM

الفيلم بعد ما شفته حسيت انى ما شوفتوش

بمعنى انى لمه شوفت الاعلان رسمت فى دماغى سيناريوهات كتيره و افكار و توقعات كانت افضل بكتير من اللى شفته

الفيلم بحساسيته دى كان لازم يتعمل بشكل افضل من كده
و حرفيه مش بس ضخامه انتاج

كان محتاج ضخامة تفكير

خصوصا انه اول مره فيلم يتناول الوحده الوطنيه

الفيلم كل ما كان فيه هو صراحه زائده عن مشاعر بعض الاقباط و المسلمين

و لكن كنا نتمنى ان لا يتواجد عادل امام فى الفيلم يمكن كان ممكن ابلعه

بس بصراحه اداء عمر الشريف كان جميل جدا فى الكام مشهد اللى عملهم

لان بصراحه عادل امام كان البطل و كنت حاسه انى كنت عايزه اعرف معلومات اكتر عن الاسره المسلمه و تحولها

النقطه دى يا اما الرقابه شالتها يا اما المؤلف كان جعان و كلها

و بعدين كان لازم يكون واقعى

انا حسيت انه زياده عن اللزوم

و الحمد لله ان احنا مش كده مع بعض

بس الخوف بقا ان الجماهير اللى فى السينما ما تعلقش و تقلب على بعض من غباء الفيلم و ال over

لان الفيلم فيه استخفاف بالشيوخ المسلمين و كمان المسلمين نفسهم

زى ما تقول كده اعطى عادل امام فرصه التريقه على الاسلام براحته فى فيلم بحاله

بس بصراحه اكتشفت فعلا ان احنا لازم نرجع زى زمان منفكرش مين مسلم و مين مسيحى و منسألش عن دين حد

و نرجع للوسطيه مسلمين و مسيحيين

لان احنا الخسرانين فى الاخر زى ما المشهد الاخير فى الفيلم بيوضح

ان كلنا هننضرب فى الفتنه

سى ابراهيم بيه

07-31-2008, 12:20 AM

السلام عليكم ورحمة الله وبركاته

الفيلم لا يرتقى الى عقل متفرج عمره 12 سنه

كنت أتوقع أن يبرز الفيلم قضايا هامه ونقاط الخلاف المجتمعيه لا الدينيه

الفيلم لم يعرض القضيه أساسا" وبالتأكيد لم يعرف لها حلا" سوى المشهد الآخير الذى جاء ليعبر عن وحدة الصف ونبذ الخلاف والتعصب بين أبناء الوطن الواحد

كنت أنوى أن أسرد بعض النصوص التى لم تعجبنى ولكن لم أجد نصا" واحد يعجبنى فى الفيلم

تحياتى وتقديرى:rosy:

EgY KnighT

09-10-2008, 01:01 AM

السلام عليكم ورحمة الله وبركاته

الإخوة الاعزاء انا عضو جديد في المنتدى وحبيت أشارك معكم إن احببتم

انا عديت لاقيت الكل حلل الفيلم والقصة والمناظر والاحداث ووضع للاشخاص دول حق انه ينتقدهم وافتكرت كلمة حلوة اوي قريتها مش فاكر لمين

الكلمة بتقول ( نحن ننتقد من نراهم رائعين حتى يصبحوا رائعين جدا )

اما عادل امام وبالاخص .... عادل امام وبالعنية .... عادل امام أقل شئنا من أن يكتب عنه جمله .. هو الفنان الوحيد الذي حارب الدين في كل افلامه بعد ان ابتلاه الله بالنجومية

نبدأ بالارهابي ولا من قبلها طيب و طيور الظلام طيب وبخيت وعديلة و... و ...و .... هو هزأ بكل من له لحية سنة عن سيدنا محمد صلوات الله عليه

وهزأ بكل من اتبع سنة محمد

وانتهى الامر بانه تطاول في برنامج البيت بيتك على شيخ من الشيوخ الجدد ( او القدامى الله اعلم ) لمجرد ان الرجل لم يرد ان يدلي بدلوه في موضوع الفيلم

ليس هو فقط بل وكل الشيوخ وقال ( ادي اللي عاملين مسلمين )

اومال مين اللي مسلم ؟؟؟؟ انت ؟؟؟؟ الله اعلم ولكن اشك

بصراحة صعبان عليا تمن التذكرة اللي دفعتوها في عادل امام

دا نتفرج عليه من ورا سور الحديكة وهو بيتنطط وبنحدف له زوداني :":

يارب يكون مرورنا خفيف عليكم

nour_alex

09-10-2008, 01:56 PM

اختي طيف الامل جزاكي الله خيرا
موضوعك متميز ولكن لي تساؤل صغير واسمحي لي اني اتحدث معك وتاخذي وجهة نظري برحابة صدر وسعة نفس.
اختي في الله لماذا يذهب المسلم الى الشيطان بقدميه؟
الا تعلمين ان كل مايلهي عن زكر الله فهو حرام فما بالك بأفلام من هذه النوعيه؟
اتجه هذا المسمى بعادل وهو ليس بعادل ولايمكن ان يكون امامأ
الى محاربة الدين الاسلامي في اغلب افلامه وكأن كلمة اسلام اصبحت تطرف وعار على كل مسلم(حاشا لله)
فهل يعقل ان ندفع فلوس ونأخذ من وقتنا مدة ساعتين لمشاهدة ديننا وهذا الرجل يسخر منه والاكثر من ذلك ان هناك من يضحك على مشهد او اكثر يسيء للاسلام في هذا الفيلم .
ماذا لو قاطعنا هذه الافلام ولم نذهب للسينمات لمشاهدة هذه النوعيه من الافلام؟ ماذا لو قاطعنا كل من يسيء الى الاسلام؟ النتيجه الطبيعيه ان هذا التصرف يجعل القائمين على صناعة الافلام ينظرون ويحللون ويوصلون لنتيجة ان المشاهد اصبح لايطيق هذه النوعيه من الافلام وبالتبعيه يبدأون في صناعة افلام ايجابيه وليست سلبيه ومدمره لكل فرد مسلم ان شاءالله.
وخلاصة الكلام اني اتوجه لكل الاخوه والاخوات ان يقاطعوا هذه الافلام ولو لوقت قصير حتى نرى نتيجه ايجابيه بأذن الله . وااسف لو اني اطلت في الحديث وااسف ان لم تكن وجهة نظري لم تلاقي اعجاب بعض او كثير من الناس ولكن الاختلاف في الرأي لا يفسد للود قضيه.

ام ياسمين

09-11-2008, 02:28 AM

اختي طيف الامل جزاكي الله خيرا
موضوعك متميز ولكن لي تساؤل صغير واسمحي لي اني اتحدث معك وتاخذي وجهة نظري برحابة صدر وسعة نفس.
اختي في الله لماذا يذهب المسلم الى الشيطان بقدميه؟
الا تعلمين ان كل مايلهي عن زكر الله فهو حرام فما بالك بأفلام من هذه النوعيه؟
اتجه هذا المسمى بعادل وهو ليس بعادل ولايمكن ان يكون امامأ
الى محاربة الدين الاسلامي في اغلب افلامه وكأن كلمة اسلام اصبحت تطرف وعار على كل مسلم(حاشا لله)
فهل يعقل ان ندفع فلوس ونأخذ من وقتنا مدة ساعتين لمشاهدة ديننا وهذا الرجل يسخر منه والاكثر من ذلك ان هناك من يضحك على مشهد او اكثر يسيء للاسلام في هذا الفيلم .
ماذا لو قاطعنا هذه الافلام ولم نذهب للسينمات لمشاهدة هذه النوعيه من الافلام؟ ماذا لو قاطعنا كل من يسيء الى الاسلام؟ النتيجه الطبيعيه ان هذا التصرف يجعل القائمين على صناعة الافلام ينظرون ويحللون ويوصلون لنتيجة ان المشاهد اصبح لايطيق هذه النوعيه من الافلام وبالتبعيه يبدأون في صناعة افلام ايجابيه وليست سلبيه ومدمره لكل فرد مسلم ان شاءالله.
وخلاصة الكلام اني اتوجه لكل الاخوه والاخوات ان يقاطعوا هذه الافلام ولو لوقت قصير حتى نرى نتيجه ايجابيه بأذن الله . وااسف لو اني اطلت في الحديث وااسف ان لم تكن وجهة نظري لم تلاقي اعجاب بعض او كثير من الناس ولكن الاختلاف في الرأي لا يفسد للود قضيه.
احييك اختي نور على تفكيرك المستنير نفع الله بك
ولكن الفلم كما تعرفين لا نعرف احداثه الا بعد مشاهدته وكونه فلم لعادل امام لم يكن لي الاختيار كان هو الفلم المتاح امامنا
جزاكي الله خير

طيف البدر

10-03-2008, 04:13 AM

يا جماعة الله يكرمكم ... و تعاونوا على البر و التقوى و لا تعاونوا على الإثم و العدوان
يا ترى تذكرة السينما اللي إنت بتدفعها دي معاونة على البر و التقوى و لا على الإثم و العدوان ؟؟
الفلوس اللي طالعة من جيوبنا دي و في جهات تانية اولى بيها بتروح للمشخصاتية و المغنواتية يزدادوا بها فسق و فجور و محاربة للدين ... و الله ربنا حيحاسبكم زي ما حيحسابهم
و المصيبة الأكبر إن إحنا ننفع كلب زي عادل إمام - الله يفضحه
ياريت يا جماعة نفوق شوية و يبقى لينا مواقف إيجابية

most1234

10-11-2008, 12:56 AM

يا جماعة انا حاسس إن إنتو متحاملين شوية على الفيلم
عادل إمام طول عمره افلامه مليانة مناظر و المضمون فيها ولا حاجة
يبقى إحنا المفروض نفرح لما يعمل فيلم يناقش فيه قضية و يكون مركز فيه على القضية من غير ما يحشر مناظر بالعافية فى الفيلم حتى و إن كان مناقشته للقضية بشكل سطحى وياريت إنه سكمل فى الخط ده مع الإهتمام شوية بمعالجة القية من جوة مش من الشكل الخارجى

Ahmed Amer

10-12-2008, 04:59 AM

مهو برده ياخوانا نكون منطقيين شويه
يعنى دا فيلم لعادل امام
وياريت على قده لوحده
دا كمان معاه سياده الحاخام عمر الشريف
منتظرين يطلع عامل ازاى :dntknw:
افلام عادل امام كلها بتسطح القضايا
وبتعرضها فى اطار ساذج وبسيط :don-t_men
بالرغم من انها اكتر من كدا بكتير واهم من كدا واعقد مئات المرات :outttt::outttt:
الا ان افلامه بتناقش القضايا دى بشكل استفزازى جدا
مش هننسى الارهاب مش هننسى طيور الظلام:أخخخ:
وطبعامستحييييييييل ننسى الكارثه الكبيره عمارة يعقوبيان
اللى هدت قيم ومثل واخلاقيات :budo:
وبين كل حاجه فى الفيلم بانها طبيعيه :yes2:
من اول الشذوذ وهتك العرض فى الاقسام والمعتقلات :":
لحد اخته اللى بيجيلها شبان فى البيت مرورا بالبنت اللى بتشتغل فى محل ملابس وبتتعرض للتحرش من صاحب المحل :yahoo:
وكل دا عادى جدا مش فارقه
طبعا مش هننسى الشيخ الصالح عضو مجلس الشعب الطاهر اللى بيتاجر فى المخدارت :old:
هى دى الطريقه اللى عادل امام بينقاش بيها القضايا فى افلامه كلها
طبعا نتيجه مناقشته دى ان لو الحاله دى موجوده عند 20 % من مصر
بعد المناقشه الرهيبه والحلول المنطقيه اللىبيقدمهالنا الفنان الفذ عادل امام
بنلاقى ان الحاله دى وصلت لأكتر من 90 %
حسبى ربى
:sniff::sniff::sniff:

أمانة

10-24-2008, 10:44 AM

لسة شايفة الفيلم دا سي دي طبعا
لان انا أقبل على مشاهدة افلام عادل امام بالعافية يعني

من زمان ما بتفرجش عليه
لكن لان قالوا الفيلم دا فيه فرقعة وفكرة الخ الخ
قلت طيب

متفقة في جميع اراءكم
عن الفيلم
الاخراج كان غير متقن
الكوادر مش مظبوطة
الموسيقى التصويرية أحلا حاجة في الفيلم
أداء عمر الشريف في الفيلم كان مقبول جدا

الفيلم كله سلبيات
وعشان لا يتم الهجوم عليه ويستطيع ان يرضي الطرفين المعنيين
لوى عنق الحقيقة والواقع
وجه على حساب طرف لصالح الطرف الآخر
عشان ما يشعللهاش
باسلوب مبتذل وهابط وفاشل إن صح التعبير

مشاهد مبتورة
والنهاية جت سريعة جدا في احداث متتالية
أحسن مشهد مشهد مريم أو فاطمة وهي تبكي وهي تعلن لعماد أو جرجس أنها مسلمة وانه ما ينفعش الحب بينهم ( أي مشهد بكاء بيكون مشهد ناجح جدا ، احنا شعب نكدي دمه خفيف)

أكثر مشهد واقعي هو في مشهد النهاية الاخ اللي اتضرب بالعصاية في المعركة والفتنة اللي حصلت وطار من على الأرض بالامارة كان لابس قميص كروهات اخضر
كانت ضربة متقنة جدا

بالظبط كدا تناول ردئ جدا لفكرة مهمة جدا

شكرا طيف على الموضوع:rosy:

ام ياسمين

11-03-2008, 02:04 AM

السلام عليكم
بصراحه انا كنت انوى على انى ادخل الفيلم دا لانه قصه واقعيه وهيناقش حاجه بجد وكمان مجتمع المسلمسن والمسحيين يبقى فعلا مهم وكمان بطوله عمر الشريف واعتقد انه عمر الشريف شخصيه وقوره صاحبه امتياز فى اختيار بطولاته....
لكن انا كنت اشك فى الفيلك لانه من بطوله عادل امام صاحب اختياراته السوووء فى اختيار بطولاته......
بس طبعا الفيلم قصه زى ماانتو وضحكتيه باين انه فيه اساءه شويه
بس انا من راى سوزر بردو ان فى ناس بتقول عليه انه فيه الحته اللى بتقولى عليها بس بردو كويس مش وحش يعنى.....:dntknw:
تحياتى
اختكjain:rosy:

مرسي لمرورك ياجين

ام ياسمين

11-03-2008, 02:05 AM

الفيلم بعد ما شفته حسيت انى ما شوفتوش

بمعنى انى لمه شوفت الاعلان رسمت فى دماغى سيناريوهات كتيره و افكار و توقعات كانت افضل بكتير من اللى شفته

الفيلم بحساسيته دى كان لازم يتعمل بشكل افضل من كده
و حرفيه مش بس ضخامه انتاج

كان محتاج ضخامة تفكير

خصوصا انه اول مره فيلم يتناول الوحده الوطنيه

الفيلم كل ما كان فيه هو صراحه زائده عن مشاعر بعض الاقباط و المسلمين

و لكن كنا نتمنى ان لا يتواجد عادل امام فى الفيلم يمكن كان ممكن ابلعه

بس بصراحه اداء عمر الشريف كان جميل جدا فى الكام مشهد اللى عملهم

لان بصراحه عادل امام كان البطل و كنت حاسه انى كنت عايزه اعرف معلومات اكتر عن الاسره المسلمه و تحولها

النقطه دى يا اما الرقابه شالتها يا اما المؤلف كان جعان و كلها

و بعدين كان لازم يكون واقعى

انا حسيت انه زياده عن اللزوم

و الحمد لله ان احنا مش كده مع بعض

بس الخوف بقا ان الجماهير اللى فى السينما ما تعلقش و تقلب على بعض من غباء الفيلم و ال over

لان الفيلم فيه استخفاف بالشيوخ المسلمين و كمان المسلمين نفسهم

زى ما تقول كده اعطى عادل امام فرصه التريقه على الاسلام براحته فى فيلم بحاله

بس بصراحه اكتشفت فعلا ان احنا لازم نرجع زى زمان منفكرش مين مسلم و مين مسيحى و منسألش عن دين حد

و نرجع للوسطيه مسلمين و مسيحيين

لان احنا الخسرانين فى الاخر زى ما المشهد الاخير فى الفيلم بيوضح

ان كلنا هننضرب فى الفتنه
ربنا يلطف بمصر
كلامك كله عين العقل
مرسي لمرورك

ام ياسمين

11-03-2008, 02:06 AM

السلام عليكم ورحمة الله وبركاته

الفيلم لا يرتقى الى عقل متفرج عمره 12 سنه

كنت أتوقع أن يبرز الفيلم قضايا هامه ونقاط الخلاف المجتمعيه لا الدينيه

الفيلم لم يعرض القضيه أساسا" وبالتأكيد لم يعرف لها حلا" سوى المشهد الآخير الذى جاء ليعبر عن وحدة الصف ونبذ الخلاف والتعصب بين أبناء الوطن الواحد

كنت أنوى أن أسرد بعض النصوص التى لم تعجبنى ولكن لم أجد نصا" واحد يعجبنى فى الفيلم

تحياتى وتقديرى:rosy:

لك كل التحيه والتقدير

ام ياسمين

11-03-2008, 02:07 AM

السلام عليكم ورحمة الله وبركاته

الإخوة الاعزاء انا عضو جديد في المنتدى وحبيت أشارك معكم إن احببتم

انا عديت لاقيت الكل حلل الفيلم والقصة والمناظر والاحداث ووضع للاشخاص دول حق انه ينتقدهم وافتكرت كلمة حلوة اوي قريتها مش فاكر لمين

الكلمة بتقول ( نحن ننتقد من نراهم رائعين حتى يصبحوا رائعين جدا )

اما عادل امام وبالاخص .... عادل امام وبالعنية .... عادل امام أقل شئنا من أن يكتب عنه جمله .. هو الفنان الوحيد الذي حارب الدين في كل افلامه بعد ان ابتلاه الله بالنجومية

نبدأ بالارهابي ولا من قبلها طيب و طيور الظلام طيب وبخيت وعديلة و... و ...و .... هو هزأ بكل من له لحية سنة عن سيدنا محمد صلوات الله عليه

وهزأ بكل من اتبع سنة محمد

وانتهى الامر بانه تطاول في برنامج البيت بيتك على شيخ من الشيوخ الجدد ( او القدامى الله اعلم ) لمجرد ان الرجل لم يرد ان يدلي بدلوه في موضوع الفيلم

ليس هو فقط بل وكل الشيوخ وقال ( ادي اللي عاملين مسلمين )

اومال مين اللي مسلم ؟؟؟؟ انت ؟؟؟؟ الله اعلم ولكن اشك

بصراحة صعبان عليا تمن التذكرة اللي دفعتوها في عادل امام

دا نتفرج عليه من ورا سور الحديكة وهو بيتنطط وبنحدف له زوداني :":

يارب يكون مرورنا خفيف عليكم
اهلا وسهلا بك
انت نورت الموضوع

ام ياسمين

11-03-2008, 02:08 AM

يا جماعة الله يكرمكم ... و تعاونوا على البر و التقوى و لا تعاونوا على الإثم و العدوان
يا ترى تذكرة السينما اللي إنت بتدفعها دي معاونة على البر و التقوى و لا على الإثم و العدوان ؟؟
الفلوس اللي طالعة من جيوبنا دي و في جهات تانية اولى بيها بتروح للمشخصاتية و المغنواتية يزدادوا بها فسق و فجور و محاربة للدين ... و الله ربنا حيحاسبكم زي ما حيحسابهم
و المصيبة الأكبر إن إحنا ننفع كلب زي عادل إمام - الله يفضحه
ياريت يا جماعة نفوق شوية و يبقى لينا مواقف إيجابية
فعلا كلامك كله حق
جزاك الله خير

ام ياسمين

11-03-2008, 02:09 AM

يا جماعة انا حاسس إن إنتو متحاملين شوية على الفيلم
عادل إمام طول عمره افلامه مليانة مناظر و المضمون فيها ولا حاجة
يبقى إحنا المفروض نفرح لما يعمل فيلم يناقش فيه قضية و يكون مركز فيه على القضية من غير ما يحشر مناظر بالعافية فى الفيلم حتى و إن كان مناقشته للقضية بشكل سطحى وياريت إنه سكمل فى الخط ده مع الإهتمام شوية بمعالجة القية من جوة مش من الشكل الخارجى
نفرح على ايه
ماعلينا فعلا الفلم يحسب له انه من غير مناظر

ام ياسمين

11-03-2008, 02:12 AM

مهو برده ياخوانا نكون منطقيين شويه
يعنى دا فيلم لعادل امام
وياريت على قده لوحده
دا كمان معاه سياده الحاخام عمر الشريف
منتظرين يطلع عامل ازاى :dntknw:
افلام عادل امام كلها بتسطح القضايا
وبتعرضها فى اطار ساذج وبسيط :don-t_men
بالرغم من انها اكتر من كدا بكتير واهم من كدا واعقد مئات المرات :outttt::outttt:
الا ان افلامه بتناقش القضايا دى بشكل استفزازى جدا
مش هننسى الارهاب مش هننسى طيور الظلام:أخخخ:
وطبعامستحييييييييل ننسى الكارثه الكبيره عمارة يعقوبيان
اللى هدت قيم ومثل واخلاقيات :budo:
وبين كل حاجه فى الفيلم بانها طبيعيه :yes2:
من اول الشذوذ وهتك العرض فى الاقسام والمعتقلات :":
لحد اخته اللى بيجيلها شبان فى البيت مرورا بالبنت اللى بتشتغل فى محل ملابس وبتتعرض للتحرش من صاحب المحل :yahoo:
وكل دا عادى جدا مش فارقه
طبعا مش هننسى الشيخ الصالح عضو مجلس الشعب الطاهر اللى بيتاجر فى المخدارت :old:
هى دى الطريقه اللى عادل امام بينقاش بيها القضايا فى افلامه كلها
طبعا نتيجه مناقشته دى ان لو الحاله دى موجوده عند 20 % من مصر
بعد المناقشه الرهيبه والحلول المنطقيه اللىبيقدمهالنا الفنان الفذ عادل امام
بنلاقى ان الحاله دى وصلت لأكتر من 90 %
حسبى ربى
:sniff::sniff::sniff:

ياجماعه عادل امام مش بالاهميه اللي انتوا متخيلينها ده مجرد اداه بينفذ كلام مكتوبله وبالحرف برعنته في الاداء فقط

ام ياسمين

11-03-2008, 02:13 AM

لسة شايفة الفيلم دا سي دي طبعا
لان انا أقبل على مشاهدة افلام عادل امام بالعافية يعني

من زمان ما بتفرجش عليه
لكن لان قالوا الفيلم دا فيه فرقعة وفكرة الخ الخ
قلت طيب

متفقة في جميع اراءكم
عن الفيلم
الاخراج كان غير متقن
الكوادر مش مظبوطة
الموسيقى التصويرية أحلا حاجة في الفيلم
أداء عمر الشريف في الفيلم كان مقبول جدا

الفيلم كله سلبيات
وعشان لا يتم الهجوم عليه ويستطيع ان يرضي الطرفين المعنيين
لوى عنق الحقيقة والواقع
وجه على حساب طرف لصالح الطرف الآخر
عشان ما يشعللهاش
باسلوب مبتذل وهابط وفاشل إن صح التعبير

مشاهد مبتورة
والنهاية جت سريعة جدا في احداث متتالية
أحسن مشهد مشهد مريم أو فاطمة وهي تبكي وهي تعلن لعماد أو جرجس أنها مسلمة وانه ما ينفعش الحب بينهم ( أي مشهد بكاء بيكون مشهد ناجح جدا ، احنا شعب نكدي دمه خفيف)

أكثر مشهد واقعي هو في مشهد النهاية الاخ اللي اتضرب بالعصاية في المعركة والفتنة اللي حصلت وطار من على الأرض بالامارة كان لابس قميص كروهات اخضر
كانت ضربة متقنة جدا

بالظبط كدا تناول ردئ جدا لفكرة مهمة جدا

شكرا طيف على الموضوع:rosy:
الشكر ليكي امانه
شكلك كده منشنه على مركز ناقده فنيه انا ارشحك

كتكوت بجد

11-27-2008, 12:14 PM

الفيلم مكنش وحش اوى كده ..بالعكس يوسف معاطى قرب وجهات النظر بشكل كبير انا والله كنت قاعد فى السينما جنب ناس مسيحين وكنا بنضحك سوا وبنركز سوا ...الموضوع بعيد عن التعصب ومش قريب او من التسيب زى معظم افلام عادل امام يمكن ده احسن افلامه اللى عملها على الاطلاق..

هجوم شديد على الفكره بس انا شخصيا شفت افلام تانيه فى نفس الموسم ده افضلها كان حسن ومرقص

بالنسبه للهجوم على القالب اللى اتقدم فيه العمل الفنى وهو القالب الكوميدى
فعايز اوضح بس لبعض الناس ان فعلا مفيش مسرح ولا تمثيل ولا فن ولا سينما فى الوطن العربى لانه رخيص فى ما يقدمه وغالى فيما يكسبه

لكن على فكره الاعمال السوريه تعد افضل الموجود على الساحه حاليا
وبالمناسبه الحكام من قديم الازل وكمان الافراد العاديين بيخشوا بطش الكوميديا لانها تقدر تعرى الحقيقه وتكشفها بأسلوب هزلى وعلى فكره معنى هزلى مش هزيل مش ضعيف هزلى بتساوى ساخر

يعنى واحنا بننقد بلاش نوصف القالب الكوميدى بأنه مش مناسب للقضيه الكبيره دى لان اكبر المسرحيات اللى اتقدمت فى انجلترا اللى خرجت جيل كبير اوى من الكتاب زيها زى فرنسا وزى اسبانيا
.. شكسبير...توماس كيد ..كريستوفر مارو... بن جونسون ايضا

لهم اعمال كوميديا لا احد يختلف عليها وكان ليها بعد سياسى اجتماعى كبير

فعلا حال الفن لا يرثى له وعلي هجوم شديد بسبب اللى بيعمله لكن ممكن يكون له مضمون

ويحضرنى قول ابن عمتى محمود على اسمى يعنى هوه متدين اوى اوى اوى كمان
كان بيقول عنى محمود رساله

بسبب انى بس بدرس مسرح

على اى اساس بنى كلامى الله اعلم يمكن من اللى بيشوفه فى التلفزيون

بس فيه حاجات جميله ممكن كلنا نتابعها ونقراها

فيه كمان شىء دفعنى انى اكتب ان حكايه البدل فى الشخصيات ممكن تخلى بعض الشباب تبدل
انا مش ذنبى ان نفوسهم ضعيفه وعقلهم غايب اوى انا بتكلم عن الشخص السوى
لان فكره البدل مقصود بها تعريه الشخصيه عشان يكشف حقيقتها

وانا عاذر فعلا الهجوم على الفن اللى بيقدم بشكل عام
اللى خلى مسرح الدوله يجيب فيفى عبده فى مسرحيه روايح تهز هزتين
حتى يحضرنى تعليق جميل اوى للدكتور احمد صقر
بيقول تعقيبا على المأساه دى الدوله بتقول اللى معوش الف جنيه يدخل الديسكو 50 جنيه ويدخل المسرح

ويارب كلامى ميكنش تقيل على بعضكم

كلها وجهات نظر ومش هنقطع بعض يعنى عشان ناس تانيه عايشه فى الهوا هههههه

مع السلامه

أمانة

12-02-2008, 09:31 AM

بعد اذنك يا ام ياسمين لفت انتباهي فقط تعليق عز 10002000

اسمح لي يا عز فقط أتساءل عن معنى حقيقة ظلم الحكومة للشعب اللي تناولها الفيلم
والفيلم لم يتناول او يظهر او يبنى اي موقف حكومي سواء بالسلب او بالايجاب
وانما الفيلم كله عبارة عن تلاحم المواطنين مع بعض
وتعارض وجهات نظرهم مع بعض
ومفيش اي موقف حكومي في الفيلم غير حكاية البدل الغريبة اللي عملتها ودا لرمزيتها مش اكتر

وكان ممكن اوي يتم التنكر في صورة كل ٍ على ملته
بمعنى ان المسلم يتنكر في صورة مسلم تاني وخلاص
والمسيحي يتنكر في صورة مسيحي تاني وخلاص

كتكوت بجد

12-02-2008, 11:01 AM

لفت انتباهى تعليق أمانه

تحيه طيبه وبعد

طيب انتى بتقولى مفيش مانع لو كان المسلم يتنكر فى شخص مسلم اخر وكذلك المسيحى

لكن هنا احنا تجاهلنا تماما حاجه اسمها الحبكه الدراميه

الفكره كلها مبنيه ان كل واحد عاش فى زى التانى تخيل انت شايف الدنيا من وجهه نظر الاخر

يمكن انا اشرت فى تعليقى سابقا ان المسأله انه حب يعرى حقايق قدام مننا من خلال عمليه تبادل الادوار دى

والحقيقه تنكر المسلم فى زى مسلم اخر وكذلك المسيحى مكنش هيحقق نص الاثر اللى حققه الفيلم

ام ياسمين

12-03-2008, 02:57 AM

هو عز راح فين ياجماعه انا مقريتش تعليقه
يلا ماعلينا مش مهم
شكرا ياامانه لردك في الموضوع البيت بيتك
وشكر خاص لمحمود نصير وان كنت اعتب عليه تقصيره في التواجد زي الاول

أمانة

12-03-2008, 10:37 AM

شكرا ياامانه لردك في الموضوع البيت بيتك

مضيافة وصاحبة واجب يا ام ياسمين
لكي تقديري وتحياتي :rosy:

يمكن انا اشرت فى تعليقى سابقا ان المسأله انه حب يعرى حقايق قدام مننا من خلال عمليه تبادل الادوار دى

أخي الكريم كتكوت بجد :rosy:
هذا ما أشرت اليه في تعليقي بان هذه الفكرة كانت مجرد رمزا مش أكتر لكن مش حقيقة ولا تحدث في الواقع

ومفيش اي موقف حكومي في الفيلم غير حكاية البدل الغريبة اللي عملتها ودا لرمزيتها مش اكتر

احترم تعليقك ورايك في الفيلم
لكن اجده تناول موضوع مهم جدا بسطحية جدا حتى ولو كان من خلال الكوميديا
أتقبله كعمل كوميدي رغم استهلاك ما به من كوميديا من قبل
لكن لا اتقبله كمعالجة للموضوع لانه لا يحدث في الواقع
كما قالت ام ياسمين واعترضت
تخلي امراة مسلمة بسهولة عن حجابها وتبرجها كل هذا التبرج من اجل التخفي ممن يتتبعونهم !
حبكة درامية غير واقعية وفي غير محلها !

كتكوت بجد

12-03-2008, 01:04 PM

هو عز راح فين ياجماعه انا مقريتش تعليقه
يلا ماعلينا مش مهم
شكرا ياامانه لردك في الموضوع البيت بيتك
وشكر خاص لمحمود نصير وان كنت اعتب عليه تقصيره في التواجد زي الاول

شكرا لكى ام يا سمين

وفعلا الانسان كان غايب عن القهوه مع انها فيها ذكريات حلوة كتير

بس والله فرحت ان فيه حد فاكرنى

تحياتى لكى :rosy: ولياسمينا:rosy:

أمانة

12-04-2008, 08:51 AM

شكرا لكى ام يا سمين

وفعلا الانسان كان غايب عن القهوه مع انها فيها ذكريات حلوة كتير

بس والله فرحت ان فيه حد فاكرنى

تحياتى لكى :rosy: ولياسمينا:rosy:
سيد/ محمود نصير؟
اسم مألوف
حضرتك بتكتب على احد المدونات الخاصة باحد الاعضاء هنا؟

كتكوت بجد

12-05-2008, 11:27 AM

سيد/ محمود نصير؟
اسم مألوف
حضرتك بتكتب على احد المدونات الخاصة باحد الاعضاء هنا؟

مش فاكر فى الحقيقه
لان انا كنت مخاصم الكتابه لمده تزيد عن 6 شهور
ولذلك حقيقى دماغى حصلها فورمات

شكرا لمرورك:rosy: